¿Namalakgsputukan Katiyatni?
Biblia kinkamaxkiyan xatakgalhtin
Ni, kimplanetajkan ni katimalakgsputuka, ni katilhkuyuka chu ni katililakgpalika atanu. Biblia masiya pi Dios malakatsukilh Katiyatni xlakata anta nalatamakgo latamanin putum kilhtamaku.
«Tiku xa’akgstitum wa nakamaxkikan katiyatni chu putum kilhtamaku nalatamakgo anta» (Salmo 37:29).
«Xla wilinit katiyatni anta niku xlitawilat; nikxni katimapanuka niku wi» (Salmo 104:5).
«Katiyatni nikxni katilakgsputli» (Eclesiastés 1:4).
«Tiku malakatsukilh katiyatni, tiku tlawalh chu liwana lakkaxwililh, tiku ni tlawalh xlakata nitu nalilakan, wata tlawalh xlakata nalatamakan anta» (Isaías 45:18).
¿Namalakgsputukgo latamanin Katiyatni?
Maski latamanin maxkajwanimakgo Katiyatni, anan guerras o atanu tuku nitlan, Dios ni katimastalh talakaskin pi latamanin nalimasputukgo Katiyatni putum uma. Biblia wan pi Dios “nakamalakgsputu tiku malakgsputumakgolh katiyatni” (Apocalipsis 11:18). ¿La natlawa uma?
Dios nakamasputu mapakgsinanin, tiku ni kuentajtlawakgonit Katiyatni, chu nawili xTamapakgsin xalak akgapun (Daniel 2:44; Mateo 6:9, 10). Jesucristo, xKgawasa Dios, wa namapakgsinan kʼuma Tamapakgsin (Isaías 9:6, 7). Akxni Jesús xlama kKatiyatni, xla tlan malakgachokgolh tuku masputunan (Marcos 4:35-41). Akxni Jesús namapakgsinan kxTamapakgsin Dios, namalakgachokgo putum tuku masputunan. Nalakkaxtlawapara Katiyatni xlakata xtachuna nawan la xwanit jardín xaʼEdén (Mateo 19:28; Lucas 23:43).
¿Pero ni wan Biblia pi Katiyatni nalhkuyukan?
Nichuna. Lhuwa tiku chuna lakpuwankgo xlakata ni liwana akgatekgskgo tuku wan 2 Pedro 3:7: «Akgapun chu katiyatni nema wilakgolh uku kalikgalhkgalhimaka lhkuyat». Kalichuwinaw pulaktiy tuku lu xlakaskinka nema nakinkamakgtayayan liwana naʼakgatekgsaw umakgolh tachuwin:
Anta kBiblia, tachuwin akgapun, katiyatni chu lhkuyat tipalhuwa tuku kilhchanima. Akgtum liʼakxilhtit, Salmo 97:1 wan: «¡Jehová mapakgsina litaxtunit! Kapaxuwalh katiyatni. Kapaxuwakgolh lhuwa islas». Kʼuma texto tachuwin «katiyatni» kakilhchanima latamanin.
Versículos nema pulana wilakgo k2Pedro 3:7 lichuwinan tuku kilhchanima «akgapun», «katiyatni» chu «lhkuyat». Versículos 5 chu 6 lichuwinan Munkaklat nema milh kxkilhtamaku Noé. Amacha kilhtamaku kamasputuka latamanin, pero kimplanetajkan nitu masputumaka. Munkaklat kamasputulh latamanin tiku lixkajni xlikatsikgo, chuna la wan Biblia, amacha katiyatni (Génesis 6:11). Na kamasputulh amacha «akgapun», uma wamputun, mapakgsinanin. Wa xlakata, kimplanetajkan nitu masputumaka, wata kamasputuka tiku nitlan xlikatsikgo. Noé chu xfamilia lakgtaxtukgolh akxni masputuka amacha kakilhtamaku chu malakgatsamaparakgolh Katiyatni (Génesis 8:15-18).
Xtachuna la Munkaklat kamasputulh latamanin, «lhkuyat» nema lichuwinan 2 Pedro 3:7, nakamasputu latamanin tiku nitlan likatsikgo chu ni wa kimplanetajkan. Dios kinkamalaknuniyan «xasasti akgapun chu xasasti katiyatni» niku «putum kilhtamaku natlawakan tuku xaʼakgstitum» (2 Pedro 3:13). Uma «xasasti katiyatni», o xasasti latamanin, nakgalhikgo «xasasti akgapun», akgtum xasasti gobierno, wa xTamapakgsin Dios. Akxni namapakgsinan uma Tamapakgsin, Katiyatni akgtum lu stlan paraíso nawan (Apocalipsis 21:1-4).