Tuku katsiputunkgo tiku likgalhtawakgakgo

¿Tuku xlakata tanu tanu la lichuwinankgo libro xla Mateo chu Lucas xlakata xapulana kata la latamalh Jesús?

Tuku lichuwinankgo Mateo chu Lucas xlakata xapulana kata la latamalh Jesús tanu tanu xlakata chatunu tsokgli la xlakpuwan.

Mateo lichuwinan xlakata tuku titaxtulh José. Lichuwinan la akxni katsilh pi María x’ama kgalhi skgata, tamanixnat nema kgalhilh akxni ángel wanilh tuku xlama chu la tlawalh xtastakyaw ángel (Mat. 1:19-25). Mateo na lichuwinan pi chatum ángel wanilh José k’akgtum tamanixnat pi xkatatsalalh xfamilia k’Egipto chu xla kgalhakgaxmatnalh. Nachuna lichuwinan k’atanu tamanixnat niku chatum ángel wanilh pi xtaspitli k’Israel chu pi xla taspitli chu tamakgxtakgli kNazaret (Mat. 2:13, 14, 19-23). Kxapulana akgtiy capítulos kxlibro Mateo makgtujun lichuwinan xtukuwani José pero xtukuwani María kaj makgtati.

Pero tuku tsokgli Lucas tlakg lichuwinan xlakata María. Lichuwinan pi ángel Gabriel lakgapaxialhnalh chu pi xla alh lakgapaxialhnan Elisabet chu wanilh Jehová makgapitsi tachuwin nema limatlankilh (Luc. 1:26-56). Nachuna lichuwinan tuku Simeón wanilh María xlakata tuku tuwa x’ama titaxtu Jesús. Chu akxni lichuwinalh tuku lalh akxni Jesús xkgalhi akgkutiy kata chu kata’alh ktemplo xfamilia, Lucas lichuwinan xlakata María chu ni wa xlakata José. Nachuna, lichuwinan pi lu nitlan xlimakgkatsi xlakata uma (Luc. 2:19, 34, 35, 48, 51). Kxapulana akgtiy capítulo kxlibro Lucas xtukuwani María akgkutiy tatekgsa, pero xla José kaj makgtutu. Wa xlakata Mateo tlakg lichuwinan tuku xlakpuwan chu tuku xtlawa José, pero Lucas lichuwinalh tuku xlakpuwan chu tuku tlawalh María.

Nachuna xlakata niku minkgocha familia tanu tanu la lichuwinankgo. Mateo lichuwinan xlakata tuku familia mincha José chu limasiya pi Jesús xtutlat xwanit José tiku x’ama makglhtinan xpumapakgsin David. ¿Tuku xlakata? Xlakata José anta xminitancha kxfamilia David xpalakata xkgawasa, Salomón (Mat. 1:6, 16). Pero Lucas lichuwinan familia niku mincha María chu nalimasiya pi Jesús wa tiku lakgchan namakglhtinan xpumapakgsin David chuna «lantlata kxliwa» (Rom. 1:3). ¿Tuku xlakata? Xlakata María anta xminacha kxfamilia mapakgsina David kaj xpalakata amakgapitsi xkamanan, Natán (Luc. 3:31). Wa xlakata, komo xtsumat Helí wa xwanit María, ¿tuku xlakata Lucas wan pi wa José? Xlakata ankgalhin xlichuwinan xtukuwanikan lakchixkuwin anta kfamilia niku xminkgoyacha. Wa xlakata akxni Lucas wan pi José xkgawasa Helí, xtakgatekgsni pi xpuwiti xwanit (Luc. 3:23).

Listas xla familia nema lichuwinankgolh Mateo chu Lucas xlakata niku xminkgonitancha familia limasiyakgo pi Jesús wa Mesías tiku xwankanit pi namin. Xlakata Jesús anta xminacha kxfamilia David lu xkatsikgokan chu asta fariseos ni la xwankgo pi ni xlikana. La uku, familia niku minkgocha chuntiya xlakaskinka xlakata kintakanajlakan chu kinkamaxkiyan takgpuwantin pi Dios namakgantaxti tuku malaknunit.