Kakamasiyaniw kamanan akxni lakgskgatanku

1, 2. ¿Tukuya tamakgtay xliputsatkan natlatni xlakata nakamakgastakkgo xkamanankan?

MAX akgtututa mil kata chatum tlat wa: «Ti kakgalhi ixkamanan, nama Dios kamaskiwinit» (Salmo 127:3). Xlikana, tiku kgalhikgo kamanan wa tuku lanka talakgalhaman nema kamaxkinit Dios lhuwa tamakgaxtokgat. Pero, tiku kgalhikgo kamanan maski paxuwakgo na tunkun katsikgo pi lhuwa taskujut lakgatayakgo.

² La uku tlakg lanka taskujut kamakgastakkan kamanan. Pero, lhuwa natlatni lu tlan kamakgastakkgonit chu salmista kinkawaniyan tuku kamakgtayanit: «Para ni Kintikukan Dios yawa akgtum akgxtakga [o chiki], nitu limakwan [o nitu litaxtu] ixtaskujutkan ti tamakgtayaninan» (Salmo 127:1). Akxni tlakg liwana nastalaniyaw xlimapakgsin Jehová, tlakg tlan natlatni nawanaw. Biblia wan: «Kalipawanti Jehová xliputum minaku, chu ni wa mintalakapastakni kalipawanti» (Proverbios 3:5). ¿Nakgaxmatputunaw xtastakyaw Jehová akxni namatsukiyaw uma lanka taskujut nema akgpuxam kata makgapala: namakgastakaw chatum kgawasa?

TUKU WAN BIBLIA

3. ¿Tuku lakgayawakanit xatlat xlakata kamanan?

³ Klhuwa familias xlikalanka kakilhtamaku lakchixkuwin lakpuwankgo pi wa xatse tiku lakgchan nakastakyawa xkamanan. Xlikana pi xTachuwin Dios wan pi xatlat lakgchan nakamaxki xfamilia tuku lakaskin. Pero na wan pi lakgchan wi tuku natlawa kchiki. Biblia wan: «Kamakaxti mintaskujut kkilhtin, chu kalakkaxwili kkakiwin. Alistalh na natlawaya minchik» (Proverbios 24:27). Kxlakatin Dios, xatlat chu xatse kalakgchan nakastakyawakgo xkamanan (Proverbios 1:8, 9).

4. ¿Tuku xlakata ni kililakpuwanatkan pi lakgkgawasan tlakg xlakaskinka nixawa laktsuman?

⁴ ¿Tuku lakpuwana xlakata minkamanan? Wankan pi kʼAsia «ni lu tlan kamakgamakglhtinankan laktsuman», chu nachuna lakpuwankgokan kLatinoamérica, asta «kfamilias tiku lu kgalhtawakgakgonit». Pero, kilikatsitkan pi laktsuman nachuna xlilakaskinka la lakgkgawasan. Jacob, tlat xala makgasa tiku lu lakgapaskan chuna kalichuwinalh putum xkamanan asta xlaktsuman, «kamanan nema Dios [ki]lisikulunatlawanit» (Génesis 33:1-5; 37:35). Nachuna, Jesús kasikulunatlawalh «laktsu kaman» (lakgkgawasan chu laktsuman) nema kalinika (Mateo 19:13-15). Liwana katsiyaw pi uma tuku tlawalh limasiyalh la lakapastaka Jehová (Deuteronomio 16:14).

5. ¿Tuku namakgtaya akgtum tamakgaxtokgat xlakata nalakkaxwilikgo la xlilhuwa kamanan nakgalhikgo?

⁵ ¿Talismaninit kminkachikin pi puskat lhuwa kamanan nakgalhi? Tiku tamakgaxtokgkgonit nalaksakkgo la kgalhlit kamanan nakgalhikgo. Pero ¿komo natlatni ni kgalhikgo tuku nakalimawikgo, nakalitamawanikgo xlhakgatkan chu nakalimalakgachakgo kʼescuela chalhuwa kamanan? Tiku tamakgaxtokgkgonit wa uma tuku xlilakapastakatkan akxni nalaksakkgo la xlilhuwa kamanan nakgalhikgo. Makgapitsi nila kamaxkikgo xkamanankan tuku maklakaskinkgo wa xlakata kamakamaxkikgo makgapitsi xparientes xlakata nakamakgastaknikgo. ¿Tlan akxni chuna tlawakgo? Nitlan. Chu uma ni wamputun pi nialh kalakgchan nakamaxkikgo xkamanankan tuku maklakaskinkgo. Biblia wan: «Lapi winti ni kuintaj tlaway [...], na tlakg xaliwaka wanti xala kxchik, kaj likgamananit xtakanajla» (1 Timoteo 5:8). Tiku tamakgaxtokgkgonit nema liwana lakapastakkgo lakkaxwilikgo la xlilanka nawan «kxchik» xlakata tlan “nakuentajtlawakgo”. ¿Wi tuku tlan nalimaklakaskinkgo xlakata ni lanka nawan xfamilia? Na akgatunu tamakgaxtokgat xlilaksakatkan; nachuna, komo akgtum tamakgaxtokgat ni lhuwa kamanan kgalhiputunkgo, xakstukan xlilaksakatkan tuku nalitakuentajtlawakgo xlakata nialh nakgalhikgo kamanan. «Xampi chatunu nkin, nkinkatapakgsiniyan [nalinaw] wantu luwa kintakukakan.» (Gálatas 6:5.) Pero, komo tuku nalitakuentajtlawakgo nalimakgnikgo skgata, uma lakatsala tuku wan Biblia. Jehová Dios “makilhtsukinit latamat” (Salmo 36:9). Wa xlakata, tiku makglhti xlatamat skgata tiku nina lakachin lu ni maxki kakni Jehová chu makgnina litaxtu (Éxodo 21:22, 23; Salmo 139:16; Jeremías 1:5).

LA NAMAXKIKAN TUKU MAKLAKASKINKGO KAMANAN

6. ¿Tukuya kilhtamaku natsukukan kamasiyanikan kamanan?

⁶ Proverbios 22:6 wan: «Kamamakgatawakga kgawasa chuna la na wan xtiji». Kamasiyanikan kamanan na atanu taskujut lu xlakaskinka nema lakgayakgo natlatni. ¿Tukuya kilhtamaku natsukukan kamasiyanikan? Akxni laktsinajku. Apóstol Pablo wa pi Timoteo xmasiyanikanit “lata skgataku” xwanit (2 Timoteo 3:15). Tachuwin xagriego nema tamaklakaskin kʼuma versículo na kilhchanima tiku aku lakachinit o tiku nina lakachin (Lucas 1:41, 44; Hechos 7:18-20). Wa xlakata, lu tlan wa pi Timoteo tsukuka masiyanikan akxni aktsinajku xwanit. Akxni lakgskgatanku tlan natsukukan kamasiyanikan kamanan, xlakata lhuwa tuku katsiputunkgo.

7. 1) ¿Tuku xlakata xlakaskinka pi xatlat chu xatse lu napaxkikgo kskgatakan? 2) ¿La xtalalin Jehová xKgawasa?

⁷ Chatum tse wan: «Akxni xlimakgtumku kakxilhli kiskgata, lu kpaxkilh». Chuna makgkatsikgo lhuwa natsitni. Chuna la lapaxki xatse chu xakgawasa tlakg staktilha chuna la tlakg akxtum tawilakgo. Akxni xatse matsiki tlakg lapaxki (katamalakxtupi 1 Tesalonicenses 2:7). Komo xatse naspalha kskgata chu natachuwinan lu xlakaskinka xlakata tlan natawila xtalakapastakni (katamalakxtupi Isaías 66:12). ¿Chu xatlat tuku xlitlawat? Xatlat na lu tlan xlitalalit aktsu kskgata. Jehová kinkawilinin lu tlan liʼakxilhtit. Libro xla Proverbios lichuwinan la Jehová talalin xachastum xKgawasa, tiku wan: «Jehová kintlawalh xtachuna la niku tsuku xtiji [...] chu putum kilhtamaku xatapaxuwan ktawi kxlakatin» (Proverbios 8:22, 30; Juan 1:14). Nachuna, tiku xatlan tlat lu tlan tsuku paxki xkgawasa akxni aku lakachin. Chatum tlat wan: «Kalimasiyani pi paxkiya. Kamanan ni nikgo xlakata kaʼakgpixtikan chu katsukkan».

8. ¿La nakamakgtayakgo natlatni xkamanankan xlakata lu naskgalalankgo akxni laktsujku?

⁸ Pero, kamanan wi atanu tuku na maklakaskinkgo. Lata akxni lakachinkgo, xakskititkan tlan makgamakglhtinan chu maki tuku masiyanikan chu wa natlatni tiku tlakg tlan namasiyanikgo. Akgtum liʼakxilhtit wa tachuwin. Tiku lakputsanankgo lakpuwankgo pi xlakata skgata tlan nachuwinan chu nakgalhtawakga «wa namakgtaya tuku namasiyanikgo xnatlatni akxni laktsujku». Katachuwinanti chu wi tuku kalikgalhtawakgani miskgata. Lakapala nachuna natlawaputun, chu ni lhuwa kilhtamaku natitaxtu wix masiyanipat nawan nakgalhtawakga. Max nakatsini kgalhtawakga akxni nina an kʼescuela. Uma lu namakgtaya komo wila niku ni lu anan makgalhtawakgananin chu niku escuela lu tsama.

9. ¿Tuku tlakg xlakaskinka xlitlawatkan natlatni?

⁹ Tuku tlakg xlakaskinka akxilhkgo natlatni tiku kstalaninanin Cristo wa namasiyanikgo tuku xla Dios (kaʼakxilhti Deuteronomio 8:3). ¿Tuku xlakata? Namakgtayakgo xlakata na nalikatsikgo la kstalaninanin Cristo, wamputun, nakgalhikgo «xasasti tayat» (Efesios 4:24, TNM). Xlakata tlan nakamasiyanikgo talakaskin tuku nakamakgtaya.

KAKAMASIYANIW KINKAMANANKAN TUKU XAXLIKANA

10. ¿Tukuya lakwan tayat xlikgalhitkan kamanan?

¹⁰ Xlakata akgtum chiki tliwakga natawila talakaskin xalakwan tuku nalitlawayaw. Apóstol Pablo wa pi tuku tlakg xatlan nema nakinkamakgtayayan xlakata nakgalhiyaw lakwan tayat xla kstalaninanin Cristo wa «oro [...], su mpala plata, su mpala lakswan chiwix» (1 Corintios 3:10-12). Uma kilhchanima lakwan tayat la takanajla, liskgalala, lakapastakkan tuku tlawakan, ni makgxtakgnankan, mastakan kakni chu paxkikan Jehová chu xlimapakgsin (Salmo 19:7-11; Proverbios 2:1-6; 3:13, 14). ¿La tlan nakamakgtayakgo natlatni xkamanankan xlakata nakgalhikgo umakgolh lakwan tayat? Natlawakgo tuku tatsokgtawilanit makgasa.

11. ¿La xkamakgtayakgo xkamanan natlatni xalak Israel xlakata xkgalhikgolh lakwan tayat?

¹¹ Akxni atsinu xtsankga xlakata israelitas xtanukgolh kTiyat nema xKawanikanit pi Nakamaxkikan, Jehová kawanilh natlatni xalak Israel: «Umakgolh tachuwin nema klimapakgsiman la uku natamakgxtakga kminaku; chu namasiyaniya minkamanan chu nalitachuwinana akxni natawilaya kminchik chu akxni lapat ktiji chu akxni pimpata lhtataya chu akxni natakiya» (Deuteronomio 6:6, 7). Wa xlakata natlatni nakawilinikgo liʼakxilhtit chu tlan nakatalalinkgo xkamanankan, nakatachuwinankgo chu nakamasiyanikgo.

12. ¿Tuku xlakata lu xlakaskinka pi natlatni nawilikgo lu tlan liʼakxilhtit?

¹² Kawili liʼakxilhtit. Pulana, Jehová wa: «Umakgolh tachuwin [...] natamakgxtakga kminaku». Alistalh wa: «Namasiyaniya minkamanan». Xalakwan tayat pulana xlikgalhit xatlat. Xatlat xlipaxkit chu nalilatama tuku xaxlikana. Chuna tlan nalakgchan kxnaku aktsu kgawasa tuku namasiyani (Proverbios 20:7). ¿Tuku xlakata? Xlakata kamanan tlakg kamakgtaya tuku akxilhkgo nixawa tuku kgaxmatkgo (Lucas 6:40; 1 Corintios 11:1).

13. ¿La tlan natlawakgo natlatni chuna la tlawalh Jesús?

¹³ Lu tlan katalalipi. Jehová kawanilh natlatni xalak Israel: “Kakatachuwinanti minkamanan akxni natawilaya kminchik chu akxni lapat ktiji”. Uma limapakgsin wamputun pi natlatni nakalimaxtunikgo kilhtamaku xkamanankan maski ni kalimakgwani. Jesús xkatsi pi talakaskin nakalimaxtunikan kilhtamaku kamanan. Akxni xʼamaja masputu xtaskujut kkatiyatni, latamanin «xmakamastanikgoy laktsu kaman lakimpi natokglhkgoy» o nakamakspalha. ¿Tuku tlawalh Jesús? «Ntichaxkgolh, tiokgspuwilikgolh xmakan; kskulunatlawamakgo.» (Marcos 10:13, 16.) Kaj kalakpuwanti: nialh lhuwa hora xkgalhi Jesús chu kalimaxtunilh kilhtamaku umakgolh kamanan. ¡Lu tlan tuku kinkamasiyaniyan!

14. ¿Tuku xlakata lu makgtayanan akxni natlatni kalimaxtunikgo kilhtamaku xkamanankan?

¹⁴ Kakatachuwinanti. Akxni kalimaxtunikan kilhtamaku kamanan tlakg tlan katachuwinankan. Akxni tlakg natachuwinana, tlakg nakatsiya la likatsi. Pero, kalakapastakti pi tachuwinankan ni wamputun pi kaj nachuwinana. Chatum tse xalak Brasil wa: «Kkatsinilh liwana nakkgaxmatni, chu xlikana xakkatsiputun tuku xwan». Xlakata kgalhkgalhinalh tlan kitaxtulh, xkgawasa tsukulh wani tuku xmakgkatsi.

15. ¿Tuku natlawakgo natlatni xlakata akxtum natapaxuwakgo xkamanankan?

¹⁵ Kamanan lakaskinkgo «kilhtamaku akxni litsiyankan [...] kilhtamaku akxni natachayawakan», wamputun, talakgastan o takgaman (Eclesiastés 3:1, 4; Zacarías 8:5). Lu kamakgtaya natlatni chu kamanan akxni akxtum paxuwakgo. Lu nitlan pero klhuwa chiki kaj wa televisión tuku kalimalakgastanikan kamanan. Maski ktelevisión wilakgolh programas nema tlan nalilakgastanankgo, lhuwa programas liminkgo nixatlan tayat chu na tlawa pi nila nalatachuwinankan kfamilia. Xlakata chuna, natlatni tlan wi tuku akxtum nakatatlawakgo xkamanankan xlakata napaxuwakgo. Tlan nakilhtlikgo, nakgamanankgo, naʼankgo katapaxialhnankgo xʼamigos o naʼankgo niku lakgatikgo. Uma nakamakgtaya xlakata tlan nalatachuwinan.

16. ¿Tuku xlimasiyanitkan natlatni xkamanan xlakata Jehová chu la xlitlawatkan?

¹⁶ Kakamasiyani. Jehová wa: «Namasiyaniya [uma tachuwin] minkamanan». Uma versículo wan tuku namasiyaniyaw chu la natlawayaw. Pulana «milipaxkit Jehová mi Dios xliputum minaku, xliputum milatamat chu xliputum militliwakga» (Deuteronomio 6:5). Chu alistalh «uma tachuwin [...] namasiyaniya». Namasiyaniyaw kgawasa xliputum xlatamat napaxki Jehová chu xlimapakgsin (katamalakxtupi Hebreos 8:10). Tachuwin «namasiyaniya» wamputun makglhuwa nawaniya. Wa xlakata Jehová kinkawaniyan la tlan nakamakgtayayaw kinkamanankan nakgalhikgo lakwan tayat, talakaskin makglhuwa nakalitachuwinanaw Dios. Uma wamputun pi chali chali nakatalikgalhtawakgaya Biblia.

17. ¿Tuku max natlawakgo natlatni xlakata kamanan nalilakpuwankgo tuku xla Dios? ¿Tuku xlakata?

¹⁷ Tlakg lhuwa natlatni katsikgo pi tuwa nachan kxnakujkan tuku nakamasiyanikgo xkamanankan. Apóstol Pedro kawanilh kstalaninanin Cristo: «Ankgalhin kalakgpuwalakapitit xatlan xtastakyaw Dios, xtachuna lantla laktsu lakgskgatan lakgtasakgo xtsikitkan» (1 Pedro 2:2, Hua Xasasti Talaccaxlan, 1999). Tachuwin «kalakgpuwalakapitit» limasiya pi lhuwa latamanin ni putsakgo tuku xla Dios. Natlatni xliputsatkan la natlawakgo xlakata xkamanankan nalakgatikgo tuku xla Dios.

18. Chuna la xmasiya Jesús, ¿la tlan natlawakgo natlatni?

¹⁸ Lakgchalh kxnakujkan tuku kawanilh Jesús tiku xkgaxmatnimakgo xlakata kalimasiyanilh liʼakxilhtit (Marcos 13:34; Lucas 10:29-37). Tlakg kamakgtaya kamanan akxni kawilinikan liʼakxilhtit. Kakamasiyani tuku masiya Biblia chu kakalitachuwinanti tuku lanit makgasa nema nalakgatikgo, chuna la lichuwinan Ki libro xla takgalhtawakga xalak Biblia.a Kamakgkatsikgolh kamanan pi na anta lamakgolh tuku kalitachuwinampat. Kakamatlawi dibujos niku nalimasiyakgo tuku lanit nema talichuwinan kBiblia. Jesús na maklakaskilh takgalhskinin (Mateo 17:24-27). Chuna katlawa akxni nakatakgalhtawakgaya mi familia. Ni kajwatiya nakawaniya tuku limapakgsinan Dios, tlan nakakgalhskina: ¿Tuku xlakata Jehová kinkamaxkin uma limapakgsin? ¿La nakinkakitaxtuniyan komo nakgalhakgaxmataw? ¿La nakinkakitaxtuniyan komo ni nakgalhakgaxmataw? Umakgolh takgalhskinin makgtaya aktsu kgawasa nalilakpuwan chu nakatsi pi xlimapakgsin Dios xatlan chu makgtayanan (Deuteronomio 10:13).

19. Komo natlatni natlawakgo la wan Biblia akxni nakamasiyanikgo xkamanankan, ¿la lu tlan nakakitaxtuni?

¹⁹ Tlan nakamakgtayayaw kinkamanankan natalalinkgo Jehová Dios akxni laktsujku komo nakawiliniyaw liʼakxilhtit, tlan nakatalalinaw, nakatachuwinanaw chu nakamasiyaniyaw. Komo tlan natalalinkgo Jehová nakamakgtaya kinkamanankan napaxuwakgo. Naliskujkgo xlakata nalilatamakgo chuna la kanajlakgo maski xcompañeros nakamatlawiputunkgo tuku nitlan chu atanu tuku nataliʼakxilha xtakanajlakan. Kakamakgtayaw putum kilhtamaku xlakaskinka naʼakxilhkgo natalalinkgo Dios (Proverbios 27:11).

LU XLAKASKINKA NAKASTAKYAWAKAN

20. ¿Tuku wamputun tastakyaw chu la xlitamastat?

²⁰ Akxni kastakyawakan kamanan makgtaya xtalakapastaknikan chu xnakujkan. Xlakan putum kilhtamaku maklakaskinkgo nakastakyawakan. Pablo kawani natlatni pi “kakamasiyunikgolh ntu xatlan xtachuna lantla xtalakaskin nkimPuchinakan” (Efesios 6:4). Akxni natlatni kastakyawakgo xkamanankan nakalimasiyanikgo pi kapaxki chuna la tlawa Jehová (Hebreos 12:4-11). Akxni stakyawanankan chu limasiyakan tapaxkit xliwanit xatlat tuku xlakata stakyawanama. Wa xlakata kinkawanikanan pi “kakgaxmatwi tastakyaw” (Proverbios 8:33). ¿La xlistakyawanatkan?

21. ¿Tuku xlilakapastakatkan natlatni akxni nakastakyawakgo xkamanankan?

²¹ Makgapitsi natlatni lakpuwankgo pi akxni nastakyawanankgo, kaj nakamakgapekuankgo, nakakilhnikgo o asta nitlan tuku nakawanikgo. Pero Pablo wan xlakata tastakyaw: «Wixin xanatlatna, ni [...] mpala makgasitsiyatit milakgskgatankan» (Efesios 6:4). Putum kstalaninanin Cristo kawanikan pi “tlan kakalikatsinikgolh xlipaks amakgapitsin, lu tlan kalistakyawakgolh wanti ni kgaxmatkgo ntachuwin” (2 Timoteo 2:24, 25). Natlatni tiku kstalaninanin Cristo katsikgo pi xlakaskinka lakatanks nachuwinankgo pero na lakapastakkgo umakgolh tachuwin pi namin kilhtamaku atanu tuku natalakaskin natlawakgo akxni nastakyawanankgo (Proverbios 22:15).

22. Komo nacastigarlikan chatum aktsu kgawasa, ¿tuku liwana xlikatsit?

²² Kamanan ni lakxtum, wa xlakata tanu tanu tastakyaw maklakaskinkgo. Makgapitsi ni kamakgtaya akxni “kaj tachuwin kalistakyawakan”. Akxni chuna xtayatkan kaminini nakacastigarlikan xlakata nakalakgmaxtunikan xlatamatkan (Proverbios 17:10; 23:13, 14; 29:19). Pero aktsu kgawasa xlikatsit tuku xlakata castigarlimaka. «Kiwi chu tastakyaw wa tuku mastakgo liskgalala.» (Proverbios 29:15; Job 6:24.) Nachuna, ni namalakatsalikan akxni nakacastigarlikan. Jehová kawanilh xkachikin: «Nakmalakgaxokgeyan chuna la xlilat» (Jeremías 46:28b). Biblia wan pi ni namalakatsalikgo akxni nakasnokgkgo xkamanankan nema nakalitlawani tuku nitlan (Proverbios 16:32).

23. ¿Tuku xlimakgkatsitkan kamanan akxni nakacastigarlikan?

²³ Akxni Jehová wanilh xkachikin pi xʼama kastakyawa, pulana kawanilh: «Ni kapekuanti [...] xlakata akit ktawilan» (Jeremías 46:28a). Nachuna, akxni natlatni nastakyawanankgo kamanan ni xlimakgkatsitkan pi ni kapaxkikan (Colosenses 3:21). Wata xlimakgkatsit pi stakyawamaka xlakata paxkikan chu “tawilaka”.

LA NATLAWAKAN XLAKATA NITU NAKAʼAKGSPULA KAMANAN

24, 25. ¿Tuku lu talakaskin kuenta nakatlawakan kamanan?

²⁴ Lhuwa tiku laklankata, lu lipaxuwakgolh akxni aktsinajku xwankgonit. Lakapastakkgo la ni xpekuankgo xlakata xkatsikgo pi xnatlatnikan xʼama kamakgtayakgo. Natlatni lakaskinkgo pi xkamanankan chuna kamakgkatsikgolh pero xlakata la uku lu lixkajni wi kakilhtamaku tlakg tuwa kakuentajtlawakan kamanan nitu nakaʼakgspula nixawa makgasa.

²⁵ Umakgolh xaʼawatiya kata tlakg talhuwinit tuku lu nitlan kaʼakgspulama kamanan xlakata kalikgamanankan. Anta kMalaysia, kaj akgkaw kata nema titaxtunit lu talhuwinit tiku chuna katlawakan. Anta kʼAlemania, akgatunu kata max akgtutu ciento mil laktsu kamanan kalikgamanankan chu kʼakgtum país sudamericano akgnajatsa millones tiku chuna katlawakan. Lu nitlan, pero atsinu ni putum umakgolh kamanan anta kxchikkan kalikgamanankan, chu tiku chuna katlawani wa tiku lakgapaskgo chu tiku kalipawankgo. Pero, natlatni liwana xlikuentajtlawatkan xkamanankan. ¿La natlawakgo xlakata nitu nakaʼakgspula?

26. ¿La tlan nakakuentajtlawakan kamanan chu la namakgtaya aktsu kgawasa akxni nakatsi tuku wan Biblia?

²⁶ Tuku lama limasiya pi kamanan tiku ni lu kamasiyanikan xlakata talakgxtumit wa tiku tlakg kalikgamanankan, wa xlakata xlakaskinka natsukukan kalitachuwinankan akxni laktsinajku. Komo nakatsikgo uma, nakamakgtaya xlakata nitu nakatlawani «nixatlan xtiji chixku tiku lixkajni tuku wan» (Proverbios 2:10-12). ¿Tuku xlikatsitkan? Xlikatsitkan tuku masiya Biblia, wantuku xatlan chu tuku nixatlan chu na xlikatsitkan pi makgapitsi nitlan likatsikgo chu pi kamanan ni nakakgalhakgaxmatkgo akxni nakamatlawiputunkgo tuku nitlan (katamalakxtupi Daniel 1:4, 8; 3:16-18). Ni kaj makgtum nakamasiyanikan. Lhuwa kamanan talakaskin makglhuwa nakamasiyanikan xlakata liwana nalakapastakkgo tuku kamasiyanikan. Akxni tlakg laklankata, xatlat xlikatsit pi nialh aktsu tsumat chu xlitalakgpalit la natalalin chu xatse nachuna nalikatsini xkgawasa, xlakata tlakg liwana nakatsikgo kamanan tuku xatlan. Akxni natlatni akxilhkgo tuku tlawakgo xkamanankan tlakg nakamakgtaya xlakata ni nakalikgamanankan.

KAPUTSAW XTAMAKGTAY DIOS

27, 28. ¿Tiku tlakg tlan nakamakgtaya natlatni xlakata liwana nakamakgastakkgo xkamanankan?

²⁷ Lu tuwa tsukukan kamasiyanikan kamanan akxni laktsinajku, pero natlatni tiku kstalaninanin Cristo ni talakaskin xakstukan natlawakgo. Akxni xmapakgsinamakgo jueces, akxni chatum chixku xwanikan Manóah katsilh pi xʼama kgalhikgo skgata, skinilh xtamakgtay Jehová xlakata tlan xmakgastakli xkgawasa. Jehová kgalhtilh xʼoración (Jueces 13:8, 12, 24).

²⁸ Nachuna la uku, kstalaninanin Cristo tiku makgastakmakgo xkamanankan tlan naskinikgo xtamakgtay Jehová. Tuwa tuku lakgaya chatum tlat pero lu tlan tuku kitaxtu alistalh. Akgtum tamakgaxtokgat xalak Hawai kawani natlatni: «Kgalhiyatit akgkutiy kata xlakata nakamasiyaniyatit akxni nina chankgo nawan kata nema tlakg tuwa tuku titaxtukgo. Komo naliskujatit xlakata natlawayatit chuna la wan Biblia, napaxuwayatit chu tlan namakgkatsiyatit akxni minkamanan xliputum xnakujkan naskujnanikgo Jehová» (Proverbios 23:15, 16). Akxni minkgawasa nalaksaka naskujnani Jehová, wix na nawana: «Kamanan xtamaskiwin Jehová».