Xpalakachuwinanin Dios

AKXNI xwilakgolh mapakgsinanin kʼIsrael chu kʼJudá na latamakgolh lu xlakaskinka lakchixkuwin: palakachuwinanin. Xputumkan xtalakaskin pi ni xpekuankgolh chu tliwakga xkgalhikgolh xtakanajlakan xlakata xwankgolh xtamakatsin Dios. Uku naʼakxilhaw pulaktati tuku lichuwinankgolh:

1. Masputukan Jerusalén. Akxni xtsankgajku akglhuwa kata, xpalakachuwinanin Dios na lichuwinankgolh xlakata Jerusalén pero Isaías chu Jeremías tlakg lichuwinankgolh pi xʼamaka masputukan chu niti xʼama latama. Na lakatanks lichuwinankgolh tuku xlakata uma kachikin makgasitsikgolh Dios. Maski xwankgo pi xlinkgo xtukuwani Jehová, pero xtlawakgo tuku xla nixaxlikana takanajla, ni xtlawakgo tuku xaʼakgstitum chu xlakata xlakatsalakgo limapakgsin xlimasiya pi nichuna xtlawamakgo (2 Reyes 21:10-15; Isaías 3:1-8, 16-26; Jeremías 2:1–3:13).

2. Lakkaxwiliparakan xaxlikana takaknin. Akxni xʼama titaxtu 70 kata akxni xkachilinkanit kBabilonia, xkachikin Dios xʼamakgo taspitkgo kJerusalén, nakaxtlawaparakgo templo chu nalakkaxwiliparakgo xaxlikana takaknin (Jeremías 46:27; Amós 9:13-15). Akgtiy ciento kata xtsankga akxni nina a xkgantaxtu uma, Isaías lichuwinalh pi chatum chixku wanikan Ciro xʼama akgchipa Babilonia chu xkalakgmaxtulh kachikin xlakata xlakaxwiliparakgolh xaxlikana takaknin. Asta lichuwinalh la xʼama tlawa xlakata tlan xʼakgchipalh (Isaías 44:24–45:3).

3. Akxni xchilh Mesías chu la xʼama latama. Mesías xʼama lakachin kkachikin wanikan Belén (Miqueas 5:2). Ni tlanka xʼamaka makgkatsikan, chu kgewi tantum burro xʼama tanu kJerusalén (Zacarías 9:9). Maski xkapaxkilh chu tlan xkalikatsinilh latamanin, lhuwa xlakgmakgankgolh (Isaías 42:1-3; 53:1, 3). Asta lu nitlan la xʼamaka makgnikan. ¿Xwamputun uma pi anta xʼama sputa Mesías? Ni, xʼamaka malakastakwanikan xlakata xmastalh xtamakamastan chu chuna putum latamanin tlan xkatapatika xtalakgalhinkan (Isaías 53:4, 5, 9-12).

4. Xtamapakgsin Mesías. Latamanin tiku kgalhikgo talakgalhin nila mapakgsinankgo pero Mesías tlan mapakgsinan. Chu asta limapakuwikan xaPuxku Takaksni (Isaías 9:6, 7; Jeremías 10:23). Akxni namapakgsinan kKatiyatni, naʼanan takaksni xlikalanka katiyatni, chu latamanin tlan nakatalatamakgo animales (Isaías 11:3-7). Nasputa putum tajatat (Isaías 33:24). Asta linin nialhtu katiwa (Isaías 25:8). Chu lhuwa millones latamanin nalatamaparakgo (Daniel 12:13).

(Takilhtinit kIsaías, kJeremías, kDaniel, kAmós, kMiqueas chu kZacarías.)