Kamaklakaskiw tratados xlakata namalakgatumiyaw xalakwan xalaksasti
1. ¿La limaklakaskinkanit tratados kxkachikin Jehová?
1 Akglhuwata kata, xkachikin Jehová limaklakaskinit tratados xlakata namalakgatumi xalakwan xalaksasti. Kata 1880, C. T. Russell chu xcompañeros tsukukgolh tlawakgo tratados xlakata tiku xlikgalhtawakgakgo revista Watch Tower xmakgpitsikgolh. Lu xlakaskinka xwanit tratados wa xlakata tala Russell kkata 1884 tsokgwililh kxlakatin mapakgsinanin akgtum corporación nema ni litlajakan tumin chu litatlawa xtaskujut Dios, tachuwin tract («tratado») na anta wilika kʼuma tukuwani: Zionʼs Watch Tower Tract Society (la uku wanikan Watch Tower Bible and Tract Society of Pennsylvania). Akxni chalh 1918, xLikgalhtawakgananin Biblia liwaka 300 millones tratados xmakgpitsikgonit. Chu la uku, chuntiya lu makgtayanankgo tratados akxni talichuwinan Dios.
2. ¿Tuku xlakata lu makgtayanankgo tratados?
2 Tuku xlakata lu makgtayanankgo. Tratados lu stlan tasiyakgo chu lhuwa colores limin. Tuku limin lu lakgatikan chu maski ni lhuwa letras kgalhi lhuwa tuku wan. Latamanin tlakg makglhtinankgo tratados nixawa akxni kamaxkikan revistas o libros. Nachuna, tiku aku tsukumakgo lichuwinankgo Dios chu laktsu kamanan tlan namastakgo. Chu xlakata ni laklanka tlan nalinaw niku naʼanaw.
3. Kalichuwinanti tuku limasiya pi tratados lu xlakaskina nema max taxtulh kmaktum likgalhtawakga o la max wix makgtayanitan.
3 Lhuwa latamanin tratado lilakgapaskgolh tuku xaxlikana. Akgtum liʼakxilhtit, chatum puskat xalak Haití akxilhli ktiji maktum tratado, sakilh chu akxni likgalhtawakgalh wa: «¡Wa uma xaxlikana!». Alistalh alh kxPukgalhtawakga xTatayananin Jehová, tsukuka limakgalhtawakgakan Biblia chu tamunulh. ¡Chuna lalh kaj xlakata xTachuwin Dios nema xlimin maktum tratado!
4. ¿La namaklakaskinaw tratados akxni wa nalakgchan namakgpitsiyaw?
4 Akxni lichuwinanaw Dios kʼakgatunu chiki. Xlakata tratados lu makgtayanankgo akxni lichuwinankan Dios, kmakgapitsi papaʼ wa natamakgpitsi chu nalitsuku noviembre. Pero ni kajwatiya namakgxtakgaw tratado akgatunu chiki, wata nalimaklakaskinaw xlakata natsukuyaw katachuwinanaw latamanin. Komo akxni xlimakgtumku nalakganaw o krevisita nakinkakgaxmatniyan, tlan namasiyaniyaw la nalikgalhtawakgayaw Biblia chu nalimaklakaskinaw libro ¿Tuku xlikana masiyay Biblia? o atanu tuku limakgalhtawakganankan. ¿La nawanaw akxni namastayaw tratados? Xlakata maklhuwa anan, pulana liwana kililakgapasatkan nema namastayaw.
5. ¿La xmastaw tratados akxni naʼanaw akgatunu chiki?
5 Wa nalichuwinanaw tratado nema lakpuwanitaw namastayaw chu la kinkakgalhtikanan niku lichuwinanaw Dios. Akxni natsukuyaw tachuwinanaw tlan namaxkiyaw tratado. Max nalakgati xmakni tratado. Atanu, tlan namasiyaniyaw maklhuwa tratados chu wa nalaksaka maktum. Komo lichuwinamaw Dios niku ni taxtukgo latamanin, tlan namakgxtakgaw tratado niku tlan naʼakxilha o tlan nakgalhskininanaw komo tlan natamaknuyaw kxtantun malakcha xlakata nakinkawaniyan tuku lakpuwan xlakata tratado. Komo título akgtum takgalhskinin, tlan nawaniyaw pi kakinkawanin tuku lakpuwan xlakata takgalhskinin o tlan natlawaniparayaw atanu takgalhskinin nema nakatsiputun xtakgalhtin chu chuna tlan natachuwinanaw. Tlan nalikgalhtawakganiyaw tsinu tuku wan tratado, chu namaxkiyaw kilhtamaku xlakata nakakgalhti takgalhskinin nema wilakgo kpárrafos o kakinkawanin tuku lakpuwan. Tlakg tlan komo kBiblia nalikgalhtawakganiyaw textos nema tlakg xlakaskinka. Akxni natachuwinankgoyaw, katalakkaxlaw tuku kilhtamaku chu tuku hora nalakganaw. Komo congregación makgxtakga likgalhtawakga kchiki niku niti wi, tlan namakgxtakgaw maktum tratado niku ni naʼakxilhkgo tiku titaxtukgo.
6. ¿La namastayaw tratados akxni nalichuwinanaw Dios ktiji?
6 Akxni nalichuwinanaw Dios ktiji. ¿Limaklakaskinitata tratados akxni lichuwinana Dios ktiji? Tiku titaxtukgo lakapalamakgo chu ni tachokgoputunkgo xlakata nakinkatachuwinankgoyan, wa xlakata nila katsiyaw komo lakgatikgo tuku lichuwinamaw. Ni nakamaxkiyaw revistas xalaksasti xlakata ni katsiyaw komo nalikgalhtawakgakgo, wata kakamaxkiw tratados. Xlakata lu lilakgatit xmakni chu xlakata ni lhuwa tuku wan max natlawa pi nalikgalhtawakgaputun akxni nakgalhi tsinu kilhtamaku. Pero, komo natachokgokgo xlakata nakinkatachuwinankgoyan, tlan nakalitachuwinanaw tuku wan tratado.
7. Kawanti liʼakxilhtit nema limasiyakgo la namaklakaskinaw tratado akxni nakatatanokglhaw latamanin.
7 Akxni lichuwinanaw Dios niku katatanokglhaw latamanin. Ni tuwa lichuwinankan Dios niku katatanokglhkan latamanin akxni maklakaskinkan tratados. Chatum tala putum kilhtamaku lin tratado akxni wi niku an. Akxni wi tiku tachuwinan, max tiku skuja kpustan, wani pi maxkiputun likgalhtawakga chu maxki maktum tratado. Chatum tala chu xpuskat kilakgolh kNueva York chu xlinkgo folleto Naciones chu maklhuwa tratados kʼatanu tanu tachuwin xlakata xkatsi pi xʼama katatanokglha latamanin xalak lhuwa países. Akxni xkgaxmatkgo pi tanu tachuwin xchuwinankgo, maski kaj kstanamakgolh ktiji, xjaxmakgo kparque o xwayamakgo krestaurante, xmaxkikgo maktum tratado kxtachuwinkan tiku xkatachuwinankgo.
8. ¿La litaxtu tratado la talhtsi?
8 «Kachanti mintalhtsi.» Tratados la talhtsi. Akxni wi tiku chanankgo, lakalhuwa makgawanikgo talhtsi xlakata ni katsikgo niku napulha. Wa xlakata Eclesiastés 11:6 wan: «Lakatsisa kachanti mintalhtsi, chu asta kakgotanun chuntiya kaliskujti; xlakata ni katsiya niku tlan nakitaxtu, unu o amacha, o akxtum tlan nawan». Wa xlakata, chuntiya «kamalakgatumiw takatsin» nema liminkgo tratados (Prov. 15:7).
[Tuku wan página 3]
Xlakata tratados lu makgtayanankgo akxni lichuwinankan Dios, namin kilhtamaku wa natamakgpitsi chu nalitsuku noviembre