¿Tuku likgalhtawakga nakamakgtaya tiku ni kanajlanikgo Dios chu Biblia?
1. ¿Tuku xlakata ni likgalhtawakgaputunkgo libro ¿Tuku xlikana masiyay Biblia? makgapitsi latamanin?
1 Xlakata chatum lataman kskujni Dios nawan, talakaskin nakatsini tuku wan Biblia. Pero, makgapitsi tiku ni kanajlanikgo Cristo wankgo pi Biblia ni xTachuwin Dios. Makgapitsi ni kanajlanikgo Biblia chu Dios. Max umakgolh latamanin ni nalikgalhtawakgaputunkgo libro ¿Tuku xlikana masiyay Biblia? Komo chuna, ¿tukuya likgalhtawakga makgtayananit? Tastakyaw nema nalichuwinanaw uku, wa maklakaskinka tuku wankgolh tiku lichuwinankgo Dios xalak 20 países.
2. Komo wi tiku nakinkawaniyan pi ni kanajlani Dios, ¿tuku kilikatsitkan, chu tuku xlakata?
2 Tiku ni kanajlanikgo Dios. Komo wi tiku nakinkawaniyan pi ni kanajlani Dios, talakaskin nakatsiyaw tuku xlakata. ¿Kanajlani evolución? ¿Nialh kanajlani Dios xlakata akxilha pi latamanin ni tlawakgo tuku xaʼakgstitum chu takanajla nachuna likatsikgo? ¿Minacha kʼakgtum país niku ni kanajlanikan Dios? ¿Xla chatum lataman tiku nikxni makgkatsinit pi maklakaskin Dios? Lhuwa tiku lichuwinankgo Dios akxilhkgonit pi akxni kakgalhskinkgo latamanin «¿Putum kilhtamaku chuna lakpuwanita?», uma tlawa pi nawankgo tuku lakpuwankgo. Kamaxkiw talakaskin nachuwinan, xlakata nakatsiyaw la namakgtayayaw, pulana talakaskin nakatsiyaw tuku xlakata ni kanajlani Dios. Komo chuna natlawayaw, nakatsiyaw tuku nawanaw chu tuku likgalhtawakga nakamaxkiyaw (Prov. 18:13).
3. ¿La kamaxkiyaw kakni latamanin chu tuku kanajlakgo?
3 Akxni natachuwinana chatum lataman, kamaxki kakni tuku lakpuwan. Chatum xalak Estados Unidos wa: «Lu xlakaskinka nakatsiyaw pi chatunu chatunu kalakgchan nalaksakkgo tuku kanajlakgo. Ni nakawaniyaw pi nitlan tuku kanajlakgo, wata nakatlawaniyaw takgalhskinin chu uma natlawa pi xakstukan nalakpuwankgo komo xlikana tuku kanajlakgo». Chuna tlawa chatum superintendente de distrito. Pulana maxki talakaskin nakgalhtinan, alistalh tlawani uma takgalhskinin: «¿Na lakpuwanitata uma?». Alistalh wanipara tuku lakkaxwilinit.
4. ¿Tuku pulana kililakpuwanatkan akxni nakalitachuwinanaw Dios budistas?
4 Budistas ni kanajlakgo pi wi chatum Dios. Akxni katachuwinankgo umakgolh latamanin, makgapitsi tiku lichuwinankgo Dios xalak Gran Bretaña lu kamakgtayanit xlakata maklakaskinkgonit folleto Cómo hallar paz y felicidad duraderas. Akxni likgalhtawakgakgo xapulana páginas, alistalh katalikgalhtawakgakgo sección nema wanikan «¿Existe un Creador todopoderoso?». Atanu kilhtamaku katalikgalhtawakgakgo sección nema wanikan «Una guía para toda la humanidad». Chu komo tlan akxilha, kamasiyani libro ¿Tuku xlikana masiyay Biblia? kawani: «Maski wix ni kanajlaya pi wi Dios, komo nalikgalhtawakgaya Biblia lu namakgtayayan, xlakata limin lu tlan tastakyaw». Chatum precursor tiku lichuwinan Dios niku wilakgolh chinos kʼEstados Unidos wa: «Latamanin tiku wilakgolh niku klichuwinanaw Dios lakgatikgo kgalhtawakgakgo, wa xlakata akxni ktaspitaw, likgalhtawakgakgonita tuku kkamakgxtakgniyaw. Pero makgapitsi ni akgatekgskgo tuku xlakata kkalimakgalhtawakgeputunkgoyaw Biblia. Wa xlakata akxni aku klakgapaxialhnama klakgati kkamaxki folleto Lakwan tamakatsin masta Dios, nema tlawakanit xlakata tlan nakatachuwinanaw latamanin». Chatum superintendente de circuito tiku kalakgapaxialhnan chinos kEstados Unidos wan pi tlan tunkun nakalimakgalhtawakgekan libro ¿Tuku xlikana masiyay Biblia? akxni xapulana nakalakgapaxialhnanaw. Max tlan xwa nalitsukuyaw capítulo 2, niku lichuwinan tukuya libro Biblia, chu ni wa nalimatsukiya capítulo 1 niku lichuwinan Dios.
5. ¿Tuku xlakata ni nakalitlakgwanaw latamanin?
5 Latamanin nila lakapala nakanajlanikgo Dios, wa xlakata talakaskin ni nakalitlakgwanaw. Ni kaj makgtum natachuwinana chatum lataman xlakata nakanajla pi wi chatum Malakatsukina. Pero akxni makglhuwa nalakgapaxiʼalhnana max nakanajla pi wi Dios o naʼakgatekgsa tuku xlakata makgapitsi kanajlanikgo Dios.
6. ¿Tuku xlakata makgapitsi ni katsiputunkgo tuku wan Biblia?
6 Tiku nitu katsiputunkgo xlakata Biblia o ni kanajlakgo tuku wan. Makglhuwa katachuwinanaw tiku kanajlanikgo Dios pero ni kanajlakgo pi Biblia wa xtachuwin, wa xlakata ni katsiputunkgo tuku tatsokgnit. Chuna lakpuwankgo latamanin kpaíses niku ni kanajlanikgo Cristo chu akxni kgaxmatkgo tachuwin Biblia tunkun wa lakpuwankgo tiku wankgo pi kstalaninanin Cristo. Nachuna lay kpaíses niku latamanin wankgo pi kstalaninanin Cristo, nialh kuenta tlawakgo la makgtayanan tuku lichuwinan Biblia. ¿Tuku natlawayaw xlakata latamanin nakatsiputunkgo tuku wan Biblia chu namakgamakglhtinankgo libro ¿Tuku xlikana masiyay Biblia? xlakata tlan nakalimakgalhtawakgeyaw?
7. ¿Tuku natlawayaw xlakata latamanin nakatsiputunkgo tuku wan Biblia?
7 Maktum carta xla sucursal xalak Grecia xwan: «Xlakata tlakg tlan nakamakgtayaya tiku ni katsiputunkgo tuku wan Biblia talakaskin nakamasiyaniya tuku wan. Lhuwa tiku lichuwinankgo Dios akxilhkgonit pi tlakg lakgchan kxnakujkan tuku wan Biblia ni xawa tuku nawankgo (Heb. 4:12). Akxni akxilhkgo xtukuwani Dios kBiblia tlakg katsiputunkgo». Chu sucursal xalak India tsokgli: «Hindúes lu katsiputunkgo tuku wan Biblia xlakata latamat chu linin. Nachuna lakgatikgo akxni katsikgo pi Dios namasputu talaksakpaxkit». Lichuwinankan tuku lilakgaputsakgo latamanin kamaxki talakaskin tiku lichuwinankgo Dios nakamasiyanikgo tuku wan Biblia chu nakamasiyanikgo tuku natlawa xTamapakgsin Dios xlakata namasputu xtaʼakglhuwitkan.
8. ¿Tuku xkawaniw tiku ni kanajlakgo tuku wan Biblia kaj xlakata xkuentajkan tiku wankgo pi kstalaninanin Cristo?
8 Komo wi tiku ni katsiputun tuku wan Biblia xlakata xkuenta ni xaxlikana takanajla, talakaskin nawaniyaw pi tuku masiyakgo chu tuku tlawakgo ni anta takilhtinit kBiblia. Sucursal xalak India wa: «Lakgachunin talakaskin nakawaniya latamanin pi ni xaxlikana takanajla ni stalanikgo tuku wan Biblia». Wa pi hindúes kaks kamalakawani tuku wan capítulo 4 xla folleto ¿Qué propósito tiene la vida? ¿Cómo descubrirlo?, niku masiya tuku tlawakgonit ni xaxlikana takanajla xlakata lakgpalikgonit o masputuputunkgo xTachuwin Dios. Chatum precursor xalak Brasil kawani latamanin: «Lhuwa latamanin lakpuwankgonit nalikgalhtawakgakgo Biblia maski ni kgalhikgo akgtum takanajla. ¿Na tlan xlikgalhtawakga? Max natekgsa tuku ni xlakpuwanita».
9. ¿Tuku xlakata ni kilitaxlajwanitkan komo wi tiku nakinkawaniyan pi ni katsiputun xlakata Biblia?
9 Jehová akxilha tuku wi kxnakujkan latamanin (1 Sam. 16:7; Prov. 21:2). Chu kalimin kxaxlikana takanajla tiku tlan naku kgalhikgo (Juan 6:44). Lhuwa ni xlakgapaskgo Dios chu ni xlikgalhtawakgakgonit xTachuwin. Akxni lichuwinanaw Dios kamaxkiyaw talakaskin xlakata «naʼakgaputaxtukgoy» akxni kgalhikgo «ntalulokgtat» o xaxlikana (1 Tim. 2:4). Wa xlakata komo wi tiku nakinkawaniyan pi ni katsiputun xlakata Biblia, ni kalitaxlajwaniw. Kaputsaw likgalhtawakga nema kgalhiyaw chu max nalakgati. Max namin kilhtamaku akxni tlan namaklakaskinaw nema limakgalhtawakgananaw: libro ¿Tuku xlikana masiyay Biblia?
[Recuadro xla página 4]
La nakamakgtayayaw tiku ni kanajlakgo pi wi Dios
• Xlakata nakatsiyaw tuku xlakata lataman ni kanajlani Dios, kakgalhskiw: «¿Putum kilhtamaku chuna lakpuwananita?».
• Komo budista, kamaklakaskiw folleto Cómo hallar paz y felicidad duraderas kpáginas 9 asta 12.
• Komo kanajlani evolución, kamaklakaskiw umakgolh likgalhtawakga:
Kamasini serie «¿Casualidad o diseño?», xla ¡Despertad!
Video nema wanikan Las maravillas de la creación revelan la gloria de Dios
Xlipulaktati folleto Cómo lograr una vida llena de satisfacción, chu folletos ¿Es la vida obra de un Creador? chu El origen de la vida. Cinco cuestiones dignas de análisis
• Komo tuku ni xaʼakgstitum chu tapatin tlawanit pi ni nakanajlani Dios, kamaklakaskiw umakgolh likgalhtawakga:
Libro ¿Existe un Creador que se interese por nosotros? kcapítulo 10
Kxlipulakchaxan folleto ¿De veras se interesa Dios por nosotros? chu kxlipulakchaxan folleto ¿Qué propósito tiene la vida? ¿Cómo descubrirlo?
• Komo naʼakxilhaw pi tiku tachuwinamaw tsuku lakpuwan pi max wi Dios, tlan namasiyaniyaw libro ¿Tuku xlikana masiyay Biblia? Max tlan xwa komo namasiyaniyaw capítulo 2 o atanu nema nalakgati.
[Recuadro xla página 5]
La nakamakgtayayaw tiku ni kanajlanikgo Biblia
• Kaʼakxilhwi capítulos 17 chu 18 klibro La vida... ¿cómo se presentó aquí? ¿Por evolución, o por creación?
• Komo xla hindú, tlan namaklakaskinaw folleto ¿Por qué debemos adorar a Dios con amor y verdad?
• Komo judío, tlan namaklakaskina folleto ¿Habrá algún día un mundo sin guerra? páginas 3-11 (nialh tlawamaka xaʼespañol).
• Kakawaniw tuku tlan kitaxtu tlawakan tuku wan Biblia. Tlan namaklakaskinaw makgapitsi likgalhtawakga:
Kserie «Ayuda para las familias», xla ¡Despertad!
Video La Biblia: el poder que ejerce en su vida
Lecciones 9 chu 11 xla folleto Lakwan tamakatsin masta Dios, Un libro para todo el mundo, páginas 22-26 (nialh tlawamaka xaʼespañol) chu xlipulaktiy xla folleto Cómo lograr una vida llena de satisfacción
Komo budista, kaʼakxilhwi páginas 3 asta 7 xla folleto El camino de la paz y la felicidad
Komo musulman, kamaklakaskiw xlipulaktutu folleto La fe verdadera, la puerta a una vida feliz
Komo lama niku ni katsiputunkgokan xlakata Biblia, max tlan xwa pi ni tunkun xwaniw pi kBiblia kilhtimaw tuku wanimaw
• Kawaniw la kgantaxtunit tuku lichuwinanit Biblia. Xlakata uma kamaklakaskiw umakgolh likgalhtawakga:
Video La Biblia: historia exacta, profecía confiable
Folleto Un libro para todo el mundo páginas 27-29 (nialh tlawamaka xaʼespañol)
• Akxni naʼakxilhaw pi tlakg katsiputun tuku wan Biblia xlakata tanu tanu temas, tlan namasiyaniyaw libro ¿Tuku xlikana masiyay Biblia?
[Dibujo xla página 6]
Komo wi tiku wan: «Ni kkanajlani Dios»
• Tlan nakgalhskinaw: «¿Katsiya tuku kimakgtayalh xlakata xakkanajlalh pi wi chatum Malakatsukina?». Alistalh kalichuwinanti makgapitsi tuku wan páginas 87 asta 89 xla libro Razonamiento. Nachuna tlan nawaniyaw pi na liniyaw likgalhtawakga nema kinkamakgtayanitan.
• Tlan nakgalhskinaw: «Chu komo xlakpuwaw pi anan chatum Malakatsukina, ¿tuku tayat lakpuwana pi xlikgalhit?». Akxni chuna kakgalhskinkan, lhuwa kgalhtinankgo pi xaʼakgstitum xliwanat, ni nalaksakpaxkinan chu tlan nalikatsi. Akxni kgaxmatniwa xtakgalhtin, kamasiyaniw kBiblia pi Dios kgalhi uma tayat. (Max tlan xʼakxilhwi kcapítulo 1 xla libro ¿Tuku xlikana masiyay Biblia? chu katsukuw talikgalhtawakgayaw párrafo 6.)
Komo wi tiku wan: «Ni kkanajlani Biblia»
• Tlan nakgalhtinanaw: «Lhuwa lakpuwanankgo la wix. Makgapitsi wankgo pi Biblia ni tatalakxtumi tuku tekgskgonit científicos o ni kinkamakgtayayan la uku. Pero ¿likgalhtawakganitata tuku wan? [Kamaxki talakaskin nakgalhtinan. Alistalh katalikgalhtawakgaw párrafos 1 chu 2 xlipulaktutu folleto Cómo lograr una vida llena de satisfacción.] Atanu kilhtamaku naklimasiyaniyan uma folleto makgapitsi tastakyaw nema limin Biblia».
• O nawana: «Lhuwa nachuna kgalhtinankgo la wix. Pero kmasiyaniputunan akgtum versículo nema akit kaks kimalakawanilh [kalikgalhtawakgaw Job 26:7 o Isaías 40:22, niku masiya pi Biblia tatalakxtumi tuku wankgo científicos]. Biblia na limin lu tlan tastakyaw xlakata familia. Naktaspitpara xlakata nakmasiyaniyan akgtum liʼakxilhtit».
• Atanu tuku tlan nawanaw: «Paxtikatsiniyan xlakata kiwani tuku lakpuwana. Komo Dios xkinkamakgxtakgnin maktum libro, ¿tuku lakpuwana pi xlichuwinalh uma libro?». Alistalh kamasiyaniw kBiblia chuna la kinkakgalhtin tiku tachuwinamaw.