Wilakgolh ksipi wanikan olivos

UMA chixku, tiku wi unu ksipi wanikan olivos wa Jesús. Chu kgalhtati lakchixkuwin tiku na anta tawilakgolh wa xʼapóstoles. Andrés chu Pedro linatalan, Santiago chu Juan na linatalan. Uma lanka chiki nema tasiyay klakgamakgat wa xtemplo Dios nema wi kJerusalén.

Akgtiy kilhtamaku titaxtunitta akxni Jesús xkgewi tantum burro akxni tanulh kJerusalén. Uku martes. Tlakg tsisajku Jesús anta xwi ktemplo. Anta sacerdotes xmakgniputunkgoy. Pero nimakgnikgolh xlakata xpekuanikgoy kristianos tiku paxkikgoy Jesús.

Anta Jesús kawanilh pulalinanin xla ktakanajla: ¡Wixin luwa, xkamanan luwa! Chu akxni tama kilhtamaku kawanilh pi Dios xʼama kamalakgaxokgey xlakata katuwa tuku nitlan tlawakgonit. Alistalh, Jesús tawakalh anta ksipi wanikan Olivos chu akxni uma kgalhtati apóstoles tsukukgolh tlawanikgoy takgalhskinin. ¿Katsiya wix tuku kgalhskimakgolh?

Xʼapóstoles kgalhskininamakgolh xlakata tuku aku nalay. Katsikgoy pi Jesús namasputuy putum tuku nitlan kKatiyatni. Pero katsiputunkgoy tukuya kilhtamaku chuna nalay. ¿Tukuya kilhtamaku naminpara Jesús xlakata namapakgsinan?

Jesús katsi pi kstalaninanin nila katiʼakxilhkgolh akxni namimpara amakgtum. Xlakata Jesús natawilayacha anta kʼakgapun chu xlakan nila katiʼakxilhkgolh. Wa xlakata Jesús kawani xʼapóstoles, tuku lama nawan kKatiyatni akxni mapakgsinan anta kʼakgapun. ¿Tuku lama nawan?

Jesús wan pi naʼanan laklanka guerra, lhuwa kristianos natatatlakgoy, natsinksnikgoy, lhuwa tuku nitlan nalatlawanikan chu natachikiy Katiyatni. Na wan pi natalichuwinan xalaksasti xalakwan xlakata xtamapakgsin Dios xlikalanka Katiyatni. ¿Uku chuna lama la lichuwinalh Jesús? ¡Xlikana! Liwana katsiyaw uku pi Jesús mapakgsinama kʼakgapun. Nialh makgas namasputuy putum tuku nitlan kKatiyatni.