KAKAMAKGTAYA LATAMANIN KSTALANINANIN JESÚS NAWANKGO
TAKGALHTAWAKGA 11
Kataʼakgatekgsli la namasiyaya
Tastakyaw xalak Biblia: «Komo namaklakaskinatit tachuwin nema tuwa akgatekgskan, ¿la nakatsikan tuku lichuwinampatit?» (1 Cor. 14:9).
Tuku tlawalh Jesús
1. Kaʼakxilhti VIDEO o kalikgalhtawakga Mateo 6:25-27. Alistalh kalilakpuwanti umakgolh takgalhskinin:
1. ¿Tuku liʼakxilhtit limaklakaskilh Jesús xlakata nalimasiya pi Jehová kinkakuentajtlawayan?
2. Maski Jesús lhuwa tuku xkatsi xlakata laktsu tsiktsi, ¿tuku xlakata ni tuwa tuku masiyalh, chu tuku xlakata lu tlan kitaxtulh?
¿Tuku kinkamasiyaniyan tuku tlawalh Jesús?
2. Komo ni tuwa la namasiyayaw, latamanin nalakapastakkgo tuku kamasiyaniw chu nalakgchan xnakujkan.
Katlawa chuna la Jesús
3. Ni lhuwa kachuwinanti. Ni kalitachuwinanti tiku makgalhtawakgepat putum tuku katsiya xlakata tuku lichuwinampatit, wata kamaklakaskinti tuku min klikgalhtawakga. Akxni natlawaniya akgtum takgalhskinin, kakgalhkgalhi asta akxni nakgalhtiyan. Pero ¿tuku natlawaya komo ni katsi xatakgalhtin o nawan tuku ni min kBiblia? Katlawani atanu takgalhskinin xlakata liwana naʼakgatekgsa. Komo tiku makgalhtawakgepat akgatekgslita tuku lichuwinampatit, kalikgalhtawakgatit tuku stala.
4. Kalimaklakaskinti tuku katsiya tiku makgalhtawakgepat xlakata namakgtayaya naʼakgatekgsa tuku xasasti. Akgtum liʼakxilhtit, komo namatsukiyatit takgalhtawakga nema lichuwinan talakastakwanat, tlan nalikgalhchuwinanatit tsinu tuku katsiya tiku makgalhtawakgepat xlakata tuku kinkaʼakgspulayan akxni niyaw.
5. Liwana kalaksakti tuku liʼakxilhtit namaklakaskina. Akxni nina maklakaskina akgtum liʼakxilhtit, pulana kalilakpuwanti:
1. «¿Ni tuwa akgatekgskan uma liʼakxilhtit?».
2. «¿Lakapala naʼakgatekgsa tiku kmakgalhtawakgema?».
3. «¿Nalakapastaka tuku kmasiyaniputun, o kajwatiya nalakapastaka liʼakxilhtit?».