LECCIÓN 11

Xatapaxuwan kachuwinanti

Romanos 12:11

TUKU NATALICHUWINAN: Xatapaxuwan kachuwinanti xlakata nakamaʼakgpuwantiniya tiku kgaxmatnimakgon.

Kalakgchalh minaku tuku nalichuwinana. Akxni lakkaxwilipat la namastaya mintaʼakgchuwin, kalakpuwanti la xlilakaskinka tuku nalichuwinana. Liwana kalakgapasti tuku nalichuwinana xlakata kminaku nataxtuyacha tuku nawana.
Kakalilakpuwanti tiku nakgaxmatnikgoyan. Kalilakpuwanti la tuku nalikgalhtawakgaya o namasiyaya nakamakgtaya amakgapitsin. Kalakpuwanti la tipalhuwa tlan nalichuwinana xlakata tiku kgaxmatnimakgon tlakg xtapalh naʼakxilhkgo tuku lichuwinampat.
Xatapaxuwan kamasta mintaʼakgchuwin. Xatapaxuwan kachuwinanti. Kamatsuwi mimakan, miʼakgxakga chu milakan xlakata nalimasiyaya tuku makgkatsipat.

Kuenta katlawa pi ni watiya watiya la natatsuwiya o natasakgaliya xlakata ni natlawa pi tiku kgaxmatnimakgon nialh kuenta natlawanikgoyan. Akxni namatsuwiya mimakan o miʼakgxakga, katasiyalh pi wi tuku masiyaputuna. Tlakg xatapaxuwan kachuwinanti akxni masiyaputuna tuku tlakg xlakaskinka chu akxni kamakgpuwantiniputuna pi katlawakgolh tuku kalitachuwinampat. Pero ni putumininka kmintaʼakgchuwin chuna kachuwinanti, xlakata ni nakamakgatlakgwana tiku kgaxmatnimakgon.