¿Lakgati Dios putum fiestas?

Jehová lakaskin pi kalipaxuwaw kilatamatkan chu wa xlakata min kilhtamaku tlan natlawayaw fiesta. ¿Pero lakgati Jehová putum fiesta o paskua nema tlawakgokan? ¿La nalimasiyayaw pi paxkiyaw chu kuenta tlawayaw tuku xla lakpuwan?

1. ¿Tuku xlakata Jehová ni lakgati makgapitsi fiestas?

Max kaks nalilakawana akxni nakatsiya pi makgapitsi fiestas anta takilhtinit knixaxlikana takanajla o kmakgapitsi tamasiy nema ni min kBiblia. Max umakgolh fiestas anta tlawakan knixaxlikana takanajla, makgtanuma tuku xla taskuwan o tataya tamasiy pi xlistakna chatum lataman ni niy. Nachuna, makgapitsi fiestas anta takilhtiya tuku kanajlakgo latamanin nema nixaxlikana chu na makgtanuma tuku xla suerte (Isaías 65:11). Wa xlakata Jehová kawani xlakskujnin: «Kakatamakgatlinitit chu nialh kaxamatit tuku xalixkajni» (2 Corintios 6:17).a

2. ¿Lakgati Jehová fiestas niku kamalankikan latamanin?

Jehová kinkawaniyan pi ni katlawaw chuna la “tiku kalipawango latamanin”, xlakata uma akgtum liʼakgsiyat (kalikgalhtawakga Jeremías 17:5). Makgapitsi fiestas katlawanikan mapakgsinanin o latamanin tiku wi tuku lu xlakaskinka tlawakgolh xpalakata xpaiskan. Kʼatanu fiestas malankikan tuku litalakgapasa akgtum país la xbandera, o akxni xʼakstu tapakgsilh (1 Juan 5:21). Na wilakgo fiesta nema masiyakgo xtapuwankan mapakgsinanin o grupos nema lakgpaliputunkgo kakilhtamaku. Komo lu xmalankiw chatum lataman o akgtum grupo, liwaka nema masiyakgo tuku Dios ni lakgati, ¿la lakpuwana wix pi xmakgkatsilh Dios?

3. ¿Tuku tayat tlawa pi Jehová ni nalakgati akgtum fiesta?

Biblia liwana wan pi nitlan “malakatsalikan chuna la wakan kuchu, xaʼakglakgwa paskua chu tamakxtumikan kaj xlakata nakgotkan” (1 Pedro 4:3). Kmakgapitsi fiestas, latamanin malakatsalikgo chu tsukukgo tlawakgo tuku xalimaxana. Komo chuntiya xʼamigo Jehová wamputunaw, talakaskin natamakgatliniyaw putum uma tuku xalixkajni.

TLAKG KALAKPUTSANANIW

4. Ni kamakgtlawa fiestas nema ni maxki kakni Jehová

Kalikgalhtawakgatit Efesios 5:10 chu kalichuwinantit uma:

• ¿Tuku kililakapastakatkan akxni nalaksakaw komo namakgtlawayaw o ni namakgtlawayaw akgtum fiesta?

• ¿Tuku fiesta tlawakan niku wix lapat?

• ¿Lakpuwana pi Jehová lakgati?

Akgtum liʼakxilhtit, ¿lilakpuwanita la akxilha Dios cumpleaños? Biblia ni lichuwinan pi chatum kskujni Dios makgtlawalh cumpleaños, pero lichuwinan akgtiy cumpleaños nema tlawakgolh chatiy latamanin tiku ni xkakninanikgo Dios. Kalikgalhtawakgatit Génesis 40:20-22 chu Mateo 14:6-10. Alistalh kalichuwinantit uma:

• ¿Tuku akxtum katlawa uma akgtiy cumpleaños?

• Chuna la likgalhtawakgaw kʼumakgolh texto, ¿la lakpuwana wix pi akxilha Jehová cumpleaños?

Maski chuna, max wix nalakpuwana: «¿Xlikana nitlan limakgkatsi Jehová komo akit naktlawa cumpleaños o nakan kʼakgtum fiesta nema Biblia wan pi nitlan?». Kalikgalhtawakgatit Éxodo 32:1-8. Alistalh kaʼakxilhtit VIDEO chu kalichuwinantit uma:

VIDEO: Fiestas nema Dios ni lakgati (5:07)

• ¿Tuku xlakata lu xlakaskinka nakatsiyaw tuku lakgati Jehová?

• ¿La tlan chuna natlawayaw?

¿La nakatsiya komo Dios lakgati o ni lakgati akgtum fiesta?

• ¿Anta takilhtiyanit ktamasiy nema ni min kBiblia? Xlakata nakatsiya, kaputsananti niku kilhtsukulh uma fiesta.

• ¿Kamalanki latamanin, organizaciones o tuku lilakgapaskan akgtum kachikin, la bandera? Akinin kajwatiya Jehová kakninaniyaw chu lipawanaw pi kajwatiya xla tlan nalakkaxtlawa taʼakglhuwit nema anan kkakilhtamaku.

• ¿Lakatsala xlimapakgsin Biblia tuku tlawakan kʼuma fiesta? Talakaskin pi akinin nitu nalixkajwananaw.

5. Kaliskujti xlakata amakgapitsin namaxkikgo kakni tuku kanajlaya

VIDEO: Kalimasiyaw kakni akxni lichuwinanaw tuku kanajlayaw (2:01)

Kalikgalhtawakgatit Mateo 7:12 chu kalichuwinantit uma:

• Chuna la wan uma texto, ¿miliwanit chatum tiku xalak mifamilia tiku ni kanajla tuku wix kanajlaya pi ni kamakgtlawalh akgtum fiesta?

• ¿La nakalimasiyaniya mifamilia pi kapaxkiya chu xlakaskinka kaʼakxilha maski ni katatlawaya makgapitsi fiesta?

6. Jehová lakaskin pi kapaxuwaw

Jehová na lakaskin pi makxtum kakatapaxuwaw kifamiliajkan chu kiʼamigoskan. Kalikgalhtawakgatit Eclesiastés 8:15 chu kalichuwinantit uma:

• ¿La limasiya uma texto pi Jehová lakaskin kapaxuwaw?

Jehová lakaskin pi kskujnin kapaxuwakgolh chu kalimaxtukgolh kilhtamaku xlakata akxtum natawilakgo. Kaʼakxilhtit VIDEO xlakata nakatsiyatit pi uma chuna litasiya akxni tlawakan asambleas internacionales.

VIDEO: Lu tlan kamakgamakglhtinankan tiku minkgo kʼasambleas internacionales (5:40)

Kalikgalhtawakgatit Gálatas 6:10 chu kalichuwinantit uma:

• Komo tlawaputuna tuku tlan xpalakata amakgapitsin, ¿talakaskin namakgtlawaya makgapitsi fiestas?

• ¿Tuku tlakg makgapaxuwayan: tamaskiwin nema xafuerza mastaya kaj xlakata tlawamaka akgtum fiesta o tamaskiwin nema mastaya xlakata chuna taxtucha kminaku?

• Lhuwa xtatayananin Jehová lakkaxwilikgo natlawakgo akgtum tamakxtumit xlakata nakatapaxuwakgo xkamanankan chu asta wi tuku kamaskiwikgo. Komo wix kgalhiya kamanan, ¿tuku tlan xtlawa xlakata minkamanan napaxuwakgo?

TUKU KATSINIW

Jehová lakaskin pi kakatapaxuwaw kifamiliajkan chu kiʼamigoskan, pero xla ni lakaskin kamakgtlawaw fiestas nema ni lakgati.

¿Tuku xkgalhtinanti?

• ¿Tuku takgalhskinin tlan akstu nakinkatlawanikanan xlakata nakatsiyaw komo Jehová lakgati o ni lakgati akgtum fiesta?

• ¿Tuku tlan natlawayaw xlakata nakamakgtayayaw kifamiliajkan chu kiʼamigoskan naʼakgatekgskgo tuku xlakata ni makgtlawayaw makgapitsi fiestas?

• ¿Tuku xlakata wanaw pi Jehová lakaskin kapaxuwaw?

TLAKG KAKATSINI

Kaʼakxilhti makgapitsi fiestas nema kstalaninanin Cristo ni tlawakgo.

“¿Por qué los testigos de Jehová no celebran ciertas fiestas?” (Artículo xalak jw.org)

Kaʼakxilhti pulaktati tuku masiya pi Dios ni lakgati natlawakan cumpleaños.

«¿Tuku xlakata xtatayananin Jehová ni paskuajnankgo akxni makgatsikgo kata?» (Artículo xalak jw.org)

Kaʼakxilhti laktsu kamanan tiku paxkikgo Jehová tlan namakgapaxuwakgo akxni tlawakan paskua.

Lhuwa xtapalh akxilhan Jehová (11:35)

Lhuwa kstalaninanin Cristo ni makgtlawakgo Navidad. ¿Lipaxuwakgo tuku laksakkgonit natlawakgo?

«Tekgskgonit tuku tlakg tlan» (Artículo xla Makatsinina)