«Nialh klakpuwan pi naklakgpali kakilhtamaku»

LA XAKLAMA:

Akxni aktsujku xakwanit lu xaklakgati kakxilha tuku anan kKatiyatni. Kifamilia lu xlakgatikgo ankgo niku xʼanan lhuwa kiwi, chu niku xtitaxtu stlan chuchut nema anan kkinkachikin, Jyväskylä, kFinlandia. Nachuna lu kkalakgati animales. ¡Xakʼakgpixtiputun, o xakkasnatputun, akxni xakakxilha chichi, mitsi, o mistun! Akxni kstakli lu nitlan xakmakgkatsi akxni xakakxilha la latamanin nitlan xkalikatsinikgo animales, wa xlakata kmakgtapakgsilh tiku na xkalakgalhamankgo animales. Anta kkalakgapasli latamanin tiku nachuna xlakpuwankgo la akit.

Xakkawaniyaw latamanin pi kuenta xtlawakgolh animales. Xakmakgpitsiyaw kapsnat niku xlichuwinan animales chu ni xakakxilhputunaw niku kstakan xmakgxuwa animales, chu niku xlilakputsananikan likuchun. Ktlawaw akgtum tamakxtumit nema xkamakgtaya animales. Chuna la xakkawaniyaw latamanin xkuentajtlawakgolh animales uma xtlawa pi xaktakgalhiw taʼakglhuwit mapakgsinanin. Makglhuwa kintamaknuka kpulachin chu kilinka kxlakatin juez.

Ni kajwatiya animales tiku xakkalilakgaputsa na xaklilakgaputsa taʼakglhuwit nema anan kkakilhtamaku wa xlakata kmakgtapakgsilh akgtum tamakxtumit nema wanikanan Amnistía Internacional y Greenpeace, kmaklakaskilh putum kilitliwakga xlakata xakkamakgtayalh. Nachuna xakkamakgtayaputun tiku ni xkgalhikgo tumin, chu tiku ni xkgalhikgo tuku nawakgo.

Titaxtulh kilhtamaku kkatsilh pi nila naklakgpali kakilhtamaku. Maski umakgolh tamakxtumit lakkaxtlawakgolh laktsu taʼakglhuwit, pero, nema tlakg xalaklanka tlakg klhuwan. Putum latamanin xtasiyakgo pi ni xlilakgaputsakgo tuku tlan. Lu nitlan xakmakgkatsi.

BIBLIA LAKGPALILH KILATAMAT:

Lu nitlan klimakgkatsilh xlakata nila tuku xaktlawa, ktsukulh lakapastaka Dios chu Biblia. Makgasa xakkatakgalhtawakganita xtatayananin Jehová, maski kakxilhli pi tlan kilikatsinikgolh, pero akit nina xaklakgpaliputum kilatamat. Pero la uku xaklakgpaliputum kilatamat.

Kmaxtulh kiBiblia chu ktsukulh likgalhtawakga. Xlikana lu kimakgtayanit chu tlan kimamakgkatsininit. Lhuwa textos xalak Biblia kukxilhnit nema kinkamasiyaniyan nakakuentajtlawayaw animales. Akgtum liakxilhtit, Proverbios 12:10 wan: «Tiku xaʼakgstitum kuentajtlawama xlatamat xʼanimales» (La Palabra de Dios para Todos). Kakgatekgsnilh pi ni xkuenta Dios xlakata lhuwa taʼakglhuwit anan kkatuxawat. Lhuwa anan taʼakglhuwit xlakata latamanin ni wa tlawakgo xtalakaskin Jehová. Lu klakgatilh tuku kkatsinilh xlakata Jehová, xtapaxkit, chu xlakata ni lu lakapala kinkasitsiniyan (Salmo 103:8-14).

Uma kilhtamaku ktekgsli maktum cupón xla libro ¿Tuku xlikana masiyay Biblia? Chu kmalakgachalh kcorreo. Ni lhuwa kilhtamaku titaxtulh chatiy xtatayananin Jehová kilakgminkgolh chu kiwanikgolh komo xakkgalhtawakgaputun, tlan ktlawalh. Nachuna ktsukulh kan kxtamakxtumitkan nema xtatlawa kxPukgalhtawakgakan. Uma tlawalh pi tuku xakkatsinima xchalh kkinaku.

Xlakata kkatsinilh tuku masiya Biblia lhuwa tuku klakgpalilh kkilatamat. Nialh kxkulilh, nialh kwalh kuchu, klakgpalilh kintalhakgan chu la xakchuwinan, nachuna klakgpalilh la xakakxilha mapakgsinanin (Romanos 13:1). Nachuna nialh ktlawalh talakgxtumit xalimaxana.

Tuku tlakg tuwa kmakgkatsilh naklakgpali kkilatamat, wa nakmakgxtakga niku xakmakgtapakgsi. Nila lakapala klakgpalilh kilatamat. Pulana tuwa xakmakgkatsi nakmakgxtakga umakgolh tamakxtumit. Pero kʼakgatekgsli pi kajwatiya xTamapakgsin Dios tlan nakalakgmaxtu latamanin, wa xlakata klimaklaskima kilatamat nakkamakgtaya amakgapitsin xlakata nalakgapaskgo Dios (Mateo 6:33).

TUKU TLAN KINKITAXTUNINIT:

Xapulana xakkamapapitsi latamanin, tiku tlan xlikatsi chu tiku nitlan xlikatsi xakkatalatlawa tiku akit xaklakpuwan pi nitlan xlikatsikgo. Xlakata kkatsinilh tuku masiya Biblia nialh kkasitsini latamanin la uku kkapaxki (Mateo 5:44). Tlan kkalimasiyani tapaxkit latamanin akxni kkalitachuwinan xtamapakgsin Dios. Lu tlan kmakgkatsi akxni kakxilha pi uma taskujut masta takaksni, tapaxuwan chu xaxlikana takgalhkgalhin.

Kkgalhinit takaksni xlakata kxmakan Jehová kamakgxtakgnit uma taʼakglhuwit. Xlikana kkatsi pi kiMalakatsukinakan ni putum kilhtamaku katimastalh talakaskin pi nakamapatinikan latamanin chu animales, chu ni katimastalh talakaskin namasputukan Katiyatni. Xtamapakgsin Dios nalakkaxtlawa putum tuku nitlan tlawanikanit Katiyatni (Isaías 11:1-9). Lhuwa tapaxuwan kmakgkatsi xlakata klakgapasli uma stlan tamakatsinin chu xlakata kkamakgtaya latamanin xlakata nalipawankgo chu nakgalhikgo takgalhkgalhin. Nialh klakpuwan pi naklakgpali kakilhtamaku.