Biblia kalakgpalinilh xlatamatkan
¿TUKU tlawalh pi nalakgpali xlatamat chatum tiku xmakgkgamanan xlakata tumin chu xmakgkgalhanan? Kamaxkiw talakaskin xla nakinkawaniyan.
«Lu xaklakgati carreras de caballos» (RICHARD STEWART)
KATA AKXNI LAKACHILH: 1965
PAÍS: JAMAICA
ATANU: XKGAMANAN CHU XKGALHANAN
LA XAKLAMA: Kstakli akgtum kachikin niku ni xʼanan tumin chu xʼanan lhuwa latamanin anta kKingston, capital xla Jamaica, niku ni xʼanan taskujut chu makgapitsi latamanin lixkajni xlikatsikgo. Latamanin lu xkapekuanikgo tiku xtlawakgo tuku nitlan. Chali chali xakkgaxmata pi xlatalakan.
Kintse lu lipekua kskuja xlakata nakinkakuentajtlawayan akit chu achatiy kinatalan, chu xlakaskin pi xakkgalhtawakgaw. Pero akit lu xaklakgati carreras de caballos, chu ni xaklakgati escuela. Makglhuwa ni xaktanu kʼescuela xlakata xakkan niku kgosnankgo caballo. Asta xakkgetawilanit makgapitsi caballos.
Ni lhuwa kilhtamaku titaxtulh lu xaklakgati kgamanan xlakata tumin chu xakkgalhi lhuwa lakpuskatin. Na xakxkuli marihuana. Xlakata tlan xaklilh latamat, chuna la xakkgalhi ktsukulh kgalhanan chu uma tlawalh pi lhuwa xakkgalhilh tuku limakgninankan. ¡Lu tlan pi niti kmakgnilh akxni makglhuwa kkgalhanalh!
Alistalh kinchipaka chu kintamaknuka kpulachin. Pero akxni ktaxtupa kpulachin, tsukupa ktlawa tuku nitlan. Asta, tlakg lixkajnit ktsukulh klikatsi. Xtasiya pi nitu xaktlawa, pero nitlan xaklikatsi, ni xakkgalhakgaxmatninan chu xasitsin xakkwanit. Kaj xaklakpuwan tuku tlan xkinkitaxtunilh.
BIBLIA LAKGPALILH KILATAMAT: Wa uma kilhtamaku akxni kintse tsukulh likgalhtawakga Biblia chu xtatayana Jehová litaxtulh. Xlakata tsukulh lakgpali xtayat uma tlawalh pi na xakkatsiputulh tuku xla xkatsinima. Xakkatsiputun tuku xtlawanit pi xlakgpalilh xtayat, wa xlakata ktsukulh kalitachuwinan xlakata Biblia xtatayananin Jehová.
Lakapala kkatsilh pi tuku xmasiyakgo xtatayananin Jehová ni wa tuku xmasiyakgo amakgapitsi takanajla chu putum tuku xmasiyakgo xkilhtiyakgo kBiblia. Kajwatiya xlakan tiku xakkalakgapasa pi xʼankgo lichuwinankgo Dios akgatunu chiki, chuna la xtlawakgo xapulana kstalaninanin (Mateo 28:19; Hechos 20:20). Tuku tlawalh pi liwana xakkatsilh pi xaxlikana takanajla xwankgonit wa pi xlalimasiyanikgo tapaxkit (Juan 13:35).
Akxni ktsukulh klikgalhtawakga Biblia, kkatsilh pi kililakgpalit xwanit. Jehová Dios xkajni talakgxtumit xalimaxana, chu komo akit xakmakgapaxuwaputun, xtalakaskin pi xaklakgmakgalh putum tuku xmaxkajwi kimakni (2 Corintios 7:1; Hebreos 13:4). Lu tlan kmakgkatsilh akxni kkatsilh pi Jehová na wi tuku makgkatsi, chu pi tuku xaktlawalh xmakgapaxuwalh o xmakgalipuwa (Proverbios 27:11). Wa xlakata kmakgxtakgli marihuana chu likan, na kliskujli naklakgpali kintayat. Tuku tlakg tuwa kmakgkatsilh wa nakmakgxtakga lakpuskatin chu takgaman xlakata tumin.
Xapulana ni xaklakaskin pi kiʼamigos xkatsikgolh pi xakkatakgalhtawakgama xtatayananin Jehová. Pero klakgpalilh kintapuwan akxni klikgalhtawakgalh xtachuwin Jesús nema tatekgsa kMateo 10:33: «Putum tiku nakilakgmakgan kxlakatin latamanin na naklakgmakgan kxlakatin kinTlat xalak akgapun». Wa xlakata tukun kkawanilh tiku xakkatalalin tuku xaktlawama. Nitu kiwanikgolh, nila xkanajlakgo pi akit kstalanina Cristo xaklitaxtuputun. Maski chuna, kkawanilh pi xakama lakgpali kilatamat.
TUKU TLAN KINKITAXTUNINIT: Kintse lu lipaxuwalh akxni akxilhli pi xakmakgantaxtima tuku wan Biblia. Chu la uku ni lilakgaputsa tuku ktlawa. Lu klakgatiyaw klichuwinanaw xlakata tapaxkit nema kkgalhiniyaw Jehová. Akxni klakapastaka la xaklin kilatamat nila kkanajla pi Dios kimakgtayanit naklakgpali kintayat. Nialh klakgati lixkajni latamat nema xaklin chu nialh lu kkgalhiputun lhuwa tumin.
Liwana kkatsi pi la uku kpulachin xaktawi o nialh xaklatamalh komo ni xakkgalhtawakgalh Biblia. Xlakata tuku kkatsinilh la uku klipaxuwa kilatamat. Kkgalhi kimpuskat tiku kimakgtaya chu kintsumat kimaxki kakni chu kimputumkan kskujnanimaw Jehová. Ni kkatsi la nakpaxtikatsininan pi wi tiku kimasiyanilh tuku xlikana masiya Biblia. Wa xlakata akxni kmatlani ankgalhin kkalitachuwinan Biblia amakgapitsin. Kpaxtikatsini Jehová xlakata kimaxkilh talakaskin pi xakmakgtapakgsilh kxkachikin, pero tuku tlakg kpaxtikatsini wa pi kimaxkilh talakaskin naklakgapasa.
[Tuku wan página]
«Lu tlan kmakgkatsilh akxni kkatsilh pi Jehová na wi tuku makgkatsi chu tuku xaktlawalh xmakgapaxuwalh o xmakgalipuwa»
[Dibujo]
Ktawi kimpuskat chu kintsumat
[Dibujo]
Xlakata kintse tsukulh lakgpali xtayat uma tlawalh pi na xakkatsiputulh tuku xla xkatsinima