¿Lakapastaka?

¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku kilhchanima namasastiyaw la lakpuwanaw? (Rom. 12:2).

Ni kaj kilhchanima natlawayaw makgapitsi tuku tlan. Wata talakaskin nalakputsananiyaw tuku wi kkinakujkan chu nalakgpaliyaw tuku talakaskin xlakata nalilatamayaw xlimapakgsin Jehová (w23.01, págs. 8, 9).

¿Tuku kilitlawatkan xlakata ni namalakatsaliyaw la akxilhaw tuku lama?

Lu kuenta tlawayaw tuku lama kxlikalanka katiyatni xlakata uma makgantaxtima tuku xwanit Biblia. Pero ni lichuwinamputunaw tuku akinin lakpuwanaw nema natlawa pi naʼanan tapapitsit kcongregación, wata wa kuenta natlawayaw tuku xaʼawatiya kinkawanikanitan kxkachikin Jehová (1 Cor. 1:10) (w23.02, pág. 16).

¿Tuku litalakgpali tuku xlakata tamunulh Jesús chu tuku xlakata tamunukgo kstalaninanin?

Ni talakaskilh pi Jesús natamakamastani Jehová xlakata xlakachinit kʼakgtum kachikin nema xtamakamastaninita Dios. Na ni makglakgalhina xwanit, wa xlakata ni xtalakaskin pi wi tuku xtapatika (w23.03, pág. 5).

¿Tuku tlan natlawayaw xlakata tlakg lhuwa natalan namastakgo xtakgalhtinkan ktamakxtumit?

Ni lhuwa tuku nawanaw. Chuna amakgapitsin na namastakgo xtakgalhtinkan. Chu ni pulaklhuwa tuku nalichuwinanaw xlakata amakgapitsin tlan nalichuwinankgo atanu tuku min kpárrafo (w23.04, pág. 23).

¿Tuku tiji xaSanto nema lichuwinan Isaías 35:8?

Xpalakatakan judíos, uma tiji xkilhchanima akxni taxtukgocha kBabilonia chu tlan chankgolh kʼIsrael. ¿Chu kkinkilhtamakujkan? Akxni akglhuwa ciento kata xtsankga nachan kata 1919, tsukuka lakkaxwilikan tiji. Akgtum liʼakxilhtit, tsukuka matitaxtikan Biblia k’atanu tachuwin chu tsukuka imprimirlikan. Tiji xaSanto kalin xkachikin Dios kparaíso xaʼespiritual, chu kkilhtamaku nema aku mima tlan nalipaxuwakgo xtasikulunalin xTamapakgsin Dios (w23.05, págs. 15-19).

¿Tiku chatiy lakpuskatin tiku kalichuwinankan kProverbios capítulo 9?

Proverbios lichuwinan chatum «puskat tiku xatonta» chu wan pi komo namakgamakglhtinanaw x’invitación nakinkalinan «klinin». Pero na lichuwinan chatum puskat nema kilhchanima «xaxlikana liskgalala» chu wan pi komo namakgamakglhtinanaw x’invitación nakinkalinan «ktiji xla ta’akgatekgsni» chu klatamat (Prov. 9:​1, 6, 13, 18) (w23.06, págs. 22-24).

¿La limasiyalh Jehová pi taktuju chu pi ni xatsakatwa chuna la likatsinilh Lot?

Jehová wanilh Lot pi xtaxtulh kSodoma chu x’alh kkasipijni. Akxni Lot tasaskinilh pi xmaxkilh talakaskin x’alh kZóar, Dios kgaxmatnilh chu maxkilh talakaskin (w23.07, pág. 21).

¿Tuku tlan xtlawa komo minchixku akxilha pornografía?

Kalakapastakti pi wix ni lipina kuenta. Wa kalilakpuwanti la talalipina Jehová chu xliʼakxilhtitkan lakpuskatin tiku kalichuwinankan kBiblia nema titaxtukgolh tuku lu tuwa chu Jehová tlan kamamakgkatsinilh. Tlan namakgtayaya minchixku xlakata ni natlawa tuku namalakpuwani pi naʼakxilhputun pornografía (w23.08, págs. 14-17).

¿La kinkamakgtayayan liskgalala nakgalhiyaw tsatata naku akxni nakinkakgalhskinkanan xlakata kintakanajlakan?

Kalilakpuwaw pi tuku kinkawaniyan nakinkamakgtayayan nakatsiyaw tuku lakpuwama o tuku lilakgaputsama tiku tachuwinamaw. Uma nakinkamakgtayayan ni xatasitsi nakgalhtinanaw (w23.09, pág. 17).

¿Tuku kinkamasiyaniyan tuku tlawalh María xlakata xmakglhtinalh litliwakga?

Akxni katsilh pi xtse Mesías x’ama litaxtu, María makglhtinalh xtamakgtaykan amakgapitsin. Gabriel chu Elisabet limatliwakglhkgolh tuku xwan Tatsokgni. Kinatalankan na tlan nakinkamatliwakglhkgoyan (w23.10, pág. 15).

¿La tlan nakgalhti Jehová kiʼoracioneskan?

Kinkamalaknuniyan pi nakgaxmata putum kiʼoracioneskan chu nakinkakgalhtiyan chuna la namakgtayanan nakgantaxtu xtalakaskin (Jer. 29:12). Ni lakxtum kinkakgalhtiyan kiʼoracioneskan maski watiya tuku skiniyaw, pero ankgalhin nakinkamakgtayayan (w23.11, págs. 21, 22).

Komo Romanos 5:2 lichuwinan takgalhkgalhin, ¿tuku xlakata lichuwinampara kversículo 4?

Lata akxni chatum lataman xlimakgtumku kgaxmata xatlan tamakatsinin, tsuku kanajla pi tlan nalatama kKatiyatni k’akgtum paraíso. Pero akxni tayani tuku tuwa titaxtu, chu akxni katsi pi makgapaxuwama Jehová, tlakg lipawan pi tuku kgalhkgalhima nakgantaxtu (w23.12, págs. 12, 13).