Kgawasa, kaliskujti tlakg tlan kstalanina Cristo nalitaxtuya

1. ¿Tuku xlitlawatkan lakchixkuwin tiku kstalaninanin Cristo litaxtukgo xlakata tlan nakakitaxtuni?

MAPAKGSINA David wanilh Salomón: «Tliwakga kawanti chu kalimasiya pi chixku wix» (1 Rey. 2:​1-3). Putum lakchixkuwin tiku kstalaninanin Cristo litaxtukgo xlikgalhakgaxmatatkan uma tastakyaw. Xlakata tlan nakakitaxtuni, talakaskin nakgalhakgaxmatkgo xtastakyaw Jehová chu ankgalhin nalilatamakgo (Luc. 2:52). ¿Tuku xlakata lu xlakaskinka pi lakgkgawasan lu naliskujkgo tlakg tlan kstalaninanin Cristo nalitaxtukgo?

2, 3. ¿Tuku xlakata xlakaskinka pi lakgkgawasan lu naliskujkgo tlakg tlan kstalaninanin Cristo nalitaxtukgo?

² Lakchixkuwin tiku kstalaninanin Cristo litaxtukgo, kgalhikgo lu xlakaskinka talakgatay kxfamiliajkan chu kcongregación. Komo wix kgawasaku, max lilakpuwanita talakgatay nema nakgalhiya alistalh. Max lakpuwanita precursor regular nalitaxtuya, naskuja la siervo ministerial chu alistalh kgolotsin nalitaxtuya. Max na tamakgaxtokgputuna chu kgalhiputuna kamanan (Efes. 6:4; 1 Tim. 3:1). Xlakata tlan namakgantaxtiya tuku lakpuwanita chu tlan nakitaxtuniyan, talakaskin lu naliskuja tlakg tlan kstalanina Cristo nalitaxtuya.b

³ ¿Tuku namakgtayayan tlakg tlan kstalanina Cristo nalitaxtuya? ¿Tuku talakaskin nakatsiniya natlawaya? Chu ¿la tlan naliskuja la uku xlakata tlan namakgantaxtiya tuku nalakgayawakana alistalh? Kaʼakxilhwi.

¿TUKU NAMAKGTAYAYAN TLAKG TLAN KSTALANINA CRISTO NALITAXTUYA?

4. ¿Niku tlan natekgsa xalaktlan liʼakxilhtit? (Na kaʼakxilhti dibujos).

⁴ Kastalani xatlan liʼakxilhtit. Kaʼakxilhti tuku wan Biblia pi tlawakgolh lakchixkuwin tiku xpaxkikgo Dios chu tipalhuwa la kuentajtlawakgolh xkachikin. Kmifamilia chu kmincongregación na max wilakgo natalan tiku tliwakga kgalhikgo xtakanajlakan chu tlan nastalaniya xliʼakxilhtitkan (Heb. 13:7). Nachuna, kgalhiya lu xatlan xliʼakxilhtit Jesucristo (1 Ped. 2:21). Akxni nalilakpuwana putum umakgolh liʼakxilhtit, kalilakpuwanti tuku tayat lakgatiya nema kgalhikgo umakgolh lakchixkuwin (Heb. 12:​1, 2). Alistalh, kalilakpuwanti tuku tlan natlawaya xlakata nastalaniya xliʼakxilhtitkan.

5. ¿Tuku militlawat xlakata liwana nalakapastaknana akxni nina wi tuku tlawaya, chu tuku xlakata lu xlakaskinka? (Salmo 119:9).

⁵ Kakatsini liwana nalakapastaknana akxni nina wi tuku tlawaya (Prov. 3:21). Lakchixkuwin tiku liwana lakapastaknankgo limaxtukgo kilhtamaku nalilakpuwankgo tuku natlawakgo akxni nina wi tuku laksakkgo. Wa xlakata kaliskujti nachuna natlawaya. ¿Tuku xlakata? Kʼuma kakilhtamaku, lhuwa lakgkgawasan tlawakgo tuku xʼakstukan lakpuwankgo chu tuku makgkatsikgo (Prov. 7:7; 29:11). Nachuna, televisión, películas, internet chu tuku wilikan kredes sociales max wi tuku namatlawikgoyan. ¿Tuku militlawat xlakata pulana liwana nalilakapastaknana akxni nina wi tuku tlawaya? Pulana, kalakgapasti tastakyaw nema masta Biblia chu kalilakpuwanti tuku xlakata tlan nakitaxtuniyan komo nakgalhakgaxpata Jehová. Alistalh, kalimaklakaskinti tuku katsininita xlakata nalaksaka tuku lakgati Jehová (kalikgalhtawakga Salmo 119:9). Komo nakatsiniya liwana nalakapastaknana akxni nina wi tuku laksaka, namakgtayayan tlakg tlan kstalanina Cristo nalitaxtuya (Prov. 2:​11, 12; Heb. 5:14). Kalichuwinaw la namakgtayayan uma xlakata 1) nakamaxkiya kakni natalan lakpuskatin chu 2) tlan tuku nalaksaka xlakata la natakaxtayaya.

6. ¿La nalimasiya chatum kgawasa tiku liwana lakapastaknan pi kamaxki kakni natalan lakpuskatin?

⁶ Komo liwana nalakapastaknana akxni nina wi tuku tlawaya namakgtayayan nakamaxkiya kakni lakpuskatin. Akgtum liʼakxilhtit, max chatum kgawasa lakgati chatum tala tsumat chu tlakg lakgapasputun. Uma ni talakgalhin. Pero kgawasa tiku liwana lakapastaknan ni katiwanilh, ni katitsokgnanilh chu nitu katitlawalh nema namalakpuwani tala pi lakgati komo ni liwana katsi pi tatamakgaxtokgputun (1 Tim. 5:​1, 2). O komo talalakgapasmaja chatum tala tsumat, kuenta xlitlawat xlakata nikxni xʼakstukan natamakgxtakgkgo xlakata ni natlawa pi nitlan nalichuwinankan tala tsumat, wata ankgalhin naskinikgo chatum tala tiku tliwakga kgalhi xtakanajla pi akxtum nakataʼan akxni wi niku naʼankgo (1 Cor. 6:18).

7. ¿La natakaxtaya chatum kgawasa tiku liwana lakapastaknan?

⁷ Atanu la chatum kgawasa limasiya pi lakpuwan chuna la Jehová, wa chuna la lhakganan chu la akxkita. Tiku tlawakgo lhakgat chu tiku masiyakgo la xlitalhakganat ni maxkikgo kakni Jehová chu lixkajni linkgo xlatamatkan. Wa xlakata lhakgat nema tlawakgo lu lhtank kachipa lakchixkuwin chu kamasiya chuna la lakpuskatin. Chatum kgawasa tiku liskujma xlakata tlakg tlan kstalanina Cristo nalitaxtu, kuentajtlawa tastakyaw xalak Biblia chu xatlan liʼakxilhtit nema kgalhi kcongregación akxni laksaka la nalhakganan chu la natakaxtaya. Tlan nalakpuwan: «¿Klimasiya chuna la klhakganan pi kkgalhi tlan talakapastakni chu kmaxki kakni tuku makgkatsikgo amakgapitsin? ¿Limasiya kintalhakgan pi kskujnani Dios?» (1 Cor. 10:​31-33; Tito 2:6). Akxni lakgkgawasan liwana lakapastaknankgo, tlawa pi amakgapitsin natalan nakamaxkikgo kakni chu Jehová tlan kaʼakxilha.

8. ¿Tuku xlitlawat chatum kgawasa xlakata nalimasiya pi tlan lipawankan?

⁸ Kalimasiya pi tlan lipawankana. Xlakata tlan chuna nala, talakaskin namakgantaxtiya tuku lakgayawakana (Luc. 16:10). Kalilakpuwanti xatlan xliʼakxilhtit Jesús. Xla ankgalhin kuentajtlawalh tuku xlakgayawakanit. Chu makgantaxtilh tuku xlimapakgsinit Jehová, asta maski milh kilhtamaku tuwa makgkatsilh. Xkapaxki latamanin, liwaka kstalaninanin, chu wa xlakata makamastalh xlatamat xpalakatakan (Juan 13:1). Xtachuna la Jesús, kaliskujti namakgantaxtiya kaxatukawa taskujut nema nalakgayawakana. Komo ni katsiya la natlawaya, kataktuju chu kawani chatum tala tiku tliwakga kgalhi xtakanajla pi kamakgtayan. Nikxni kalakpuwanti pi ni talakaskin lu naliskuja (Rom. 12:11). Wata kamasputu putum tuku lakgayawakana; chuna katlawa xlakata makgapaxuwaputuna «Jehová chu ni wa lakchixkuwin» (Col. 3:23). Xlikana, wix makglakgalhina, wa xlakata namin kilhtamaku natalakaskin nalitayaya pi nila putum tlan tlawaya chu na natalakaskin nalitayaya tuku nitlan tlawaya (Prov. 11:2).

WI TUKU KAKATSINI NATLAWAYA

9. ¿Tuku xlakata chatum kgawasa wi tuku xlikatsinit natlawa?

⁹ Xlakata tlakg tlan kstalanina Cristo nalitaxtuya, talakaskin wi tuku nakatsiniya natlawaya. Uma namakgtayayan tlakg tlan namakgantaxtiya tuku nalakgayawakana kcongregación, tlan nakatalalipina amakgapitsin chu namakgtayayan natekgsa chu ni namakgatsankgaya taskujut niku natlajaya tumin nema nakalimakgtayaya mifamilia. Kaʼakxilhwi makgapitsi tuku tlan xkatsini.

10, 11. ¿Tuku xlakata lu tlan nakitaxtuni chatum kgawasa chu tlakg tlan namakgtayanan kcongregación komo nakatsini liwana nakgalhtawakga chu natsokgnan? (Salmo 1:​1-3; na kaʼakxilhti dibujo).

¹⁰ Kakatsini liwana nakgalhtawakgaya chu natsokgnana. Biblia wan pi tiku likgalhtawakga xTachuwin Dios chali chali chu lilakpuwan, paxuwa chu tlan kitaxtuni (kalikgalhtawakga Salmo 1:​1-3). Uma makgtaya nakatsi tuku lakpuwan Jehová, chu liwana nalakapastaknan (Prov. 1:​3, 4). Kcongregación talakaskin lakchixkuwin tiku chuna tlawakgo. ¿Tuku xlakata?

¹¹ Natalan maklakaskinkgo xtamakgtaykan lakchixkuwin tiku tlan nakamasiyanikgo chu nakamaxkikgo laktlan tastakyaw xalak Biblia (Tito 1:9). Komo liwana nakatsiniya kgalhtawakgaya chu tsokgnana, tlan liwana nalakkaxwiliya taʼakgchuwin chu takgalhtin nema namastaya ktamakxtumit, chu uma namatliwakglha xtakanajlakan amakgapitsin. Nachuna, akxni miʼakstu nakgalhtawakgaya chu nakgaxpata taʼakgchuwin ktamakxtumit chu kʼasambleas, tlan natsokgwiliya tuku namatliwakglha mintakanajla chu tuku nakalimakgpuwantiniya amakgapitsin.

12. ¿Tuku namakgtayayan nakatsiniya nakatakgalhchuwinana amakgapitsin?

¹² Kakatsini nakatakgalhchuwinana amakgapitsin. Lu xlakaskinka pi natalan lakchixkuwin nakatsinikgo tlawakgo uma. Uma kilhchanima pi liwana nakgaxmatkgo chu naʼakgatekgskgo tuku lakpuwankgo chu tuku makgkatsikgo amakgapitsin (Prov. 20:5). Tlan nakatsiya tuku waniputunan tiku tachuwinampat komo kuenta natlawaya la takgaxmata xtachuwin chu la matsuwi xlakan. Wa xlakata, kalimaxtu kilhtamaku nakatachuwinana latamanin. Komo ankgalhin kteléfono katachuwinana amakgapitsin, chu kajwatiya kamalakgachaniya correos electrónicos chu mensajes, tuwa namakgkatsiya kalakan nakatachuwinana. Wa xlakata kaliskujti kalakan nakatachuwinana amakgapitsin (2 Juan 12).

13. ¿Tuku atanu xlikatsinit chatum tala kgawasa? (1 Timoteo 5:8; na kaʼakxilhti dibujo).

¹³ Kakatsini akgtum taskujut. Putum kstalaninanin Cristo xlikatsinitkan namakgskujkgo xlakata nakgalhikgo tuku maklakaskinkgo chu namakgskujwikgo xfamiliajkan (kalikgalhtawakga 1 Timoteo 5:8). Kmakgapitsi kachikinin, kamanan katsinikgo tlawakgo taskujut nema kgalhikgo xnatlatnikan o atanu tiku xalak xfamiliajkan, pero amakgapitsin atanu tuku katsinikgo tlawakgo nema kamasiyanikan kʼescuela. Maski tanu tanu la nakatsiniya akgtum taskujut, lu xlakaskinka pi nakatsiniya makgskuja (Hech. 18:​2, 3; 20:34; Efes. 4:28). Palha kaskujti chu kamasputu tuku matlawikana. Uma natlawa pi amakgapitsin naʼakxilhkgo pi skulujwa wix, chu tlakg ni tuwa namaxkikana akgtum taskujut chu ni namakgatsankgaya. Tayat chu tuku nakatsiniya natlawaya nema lichuwinanitawa na namakgtayayan tlakg tlan namakgantaxtiya talakgatay nema nakgalhiya alistalh. Kalichuwinaw makgapitsi.

KATLAWA TUKU NAMAKGTAYAYAN KKILHTAMAKU NEMA AKU MIMA

14. ¿Tuku namakgtaya chatum kgawasa naskujnani Jehová putum kilhtamaku?

¹⁴ Tlan kskujni Jehová putum kilhtamaku. Lhuwa natalan tiku la uku lu tlan kstalaninanin Cristo litaxtukgo, tsukukgolh skujkgo la precursores akxni lakgkgawasanku xwankgonit. Komo wix precursor nawana, nakatsiniya la akxtum nakataskuja amakgapitsin chu nakatsiniya kuenta natlawaya mintumin (Filip. 4:​11-13). Tlan xlimatsuki precursorado auxiliar. Uma namakgtayayan precursor regular nawana alistalh. Chu uma namakgtayayan tipalhuwa la tlan naskujnaniya Jehová putum kilhtamaku, chuna la siervo de construcción o betelita nalitaxtuya.

15, 16. ¿Tuku xlitlawat chatum tala kgawasa tiku siervo ministerial o kgolotsin litaxtuputun?

¹⁵ Tlan siervo ministerial o kgolotsin xlitaxtu. Putum natalan lakchixkuwin xliskujatkan namakgatsikgo tuku talakaskin xlakata lakgkgolotsin xalak congregación nalitaxtukgo. Biblia wan pi natalan tiku lakgchamputunkgo uma, tlawaputunkgo «akgtum xatlan taskujut» (1 Tim. 3:1). Xlakata kgolotsin nalitaxtuya, pulana siervo ministerial miliwanat. Siervos ministeriales tipalhuwa la kamakgtayakgo lakgkgolotsin. Lakgkgolotsin chu siervos ministeriales lu kamakgtayakgo natalan chu xatapaxuwan lichuwinankgo Dios. Chatum kgawasa tlan namakgatsi tuku talakaskin xlakata siervo ministerial nalitaxtu maski lu kgawasaku. Chu chatum siervo ministerial tlan kgolotsin nalimaxtukan komo liwana katsini tlawa xtaskujut maski aku makgatsilh 20 kata.

¹⁶ Biblia wan tuku xlimakgatsitkan tiku siervos ministeriales chu lakgkgolotsin litaxtuputunkgo. Chu tuku nakamakgpuwantini naliskujkgo uma wa tapaxkit nema kgalhinikgo Jehová, xfamiliajkan chu congregación (1 Tim. 3:​1-13; Tito 1:​6-9; 1 Ped. 5:​2, 3). ¿Tuku nakamakgtaya nalakgchankgo uma? Xliʼakgatekgsatkan tuku kilhchanima pulakatunu tuku skin Biblia chu naskinikgo Jehová pi kakamakgtayalh namakgatsikgo.c

17. ¿Tuku xlitlawat chatum kgawasa xlakata tlan chixku nalitaxtu chu tlan napulalin akgtum familia? (Na kaʼakxilhti dibujo).

¹⁷ Tlan xtamakgaxtokgti chu xpulalipi akgtum familia. Chuna la wa Jesús, wilakgo natalan tiku laksakkgo ni natamakgaxtokgkgo (Mat. 19:12). Pero komo wix natamakgaxtokga, lata uma kilhtamaku napulalipina akgtum familia (1 Cor. 11:3). Jehová lakaskin pi xachixku napaxki xpuskat, namaxki tuku maklakaskin, na’akgatekgsa la makgkatsi chu namakgtaya namatliwakglha xtakanajla (Efes. 5:​28, 29). Komo nakgalhiya tayat chu naliskuja natlawaya tuku lichuwinanitaw k’uma artículo, chuna la liwana nalakapastaknana akxni nina wi tuku tlawaya, nakamaxkiya kakni lakpuskatin chu naliskuja xlakata amakgapitsin nalipawankgoyan, namakgtayayan tlan chixku nalitaxtuya chu tlan napulalipina akgtum familia.

18. ¿Tuku xlitlawat chatum kgawasa xlakata tlan tlat nalitaxtu?

¹⁸ Tlan xkgalhi kamanan. Komo natamakgaxtokga, max nakgalhiya kamanan. Xliʼakxilhtit Jehová namakgtayayan tlan tlat nalitaxtuya (Efes. 6:4). Jehová ni tuwa makgkatsilh nawani xKgawasa, Jesús, pi xpaxki chu xmakgapaxuwa (Mat. 3:17). Komo nakgalhiya kamanan, xlakaskinka nakawaniya pi kapaxkiya chu nakawaniya laktlan tachuwin akxni natlawakgo tuku tlan. Natlatni tiku stalanikgo xliʼakxilhtit Jehová kamakgtayakgo xkamanankan xlakata tlan kstalaninanin Cristo nalitaxtukgo. ¿Tuku militlawat la uku xlakata tlan tlat nalitaxtuya? Kakapaxki natalan xalak congregación chu mifamilia, chu kakawani pi kapaxkiya chu xtapalh kaliʼakxilha (Juan 15:9). Komo chuna natlawaya, ni kajwatiya katimakgtayan akxni natamakgaxtokga o akxni nakgalhiya kamanan, wata uma natlawa pi la uku, Jehová, mifamilia chu congregación lanka xtapalh naliʼakxilhkgoyan.

¿NATLAWAYA TUKU KATSINI?

19, 20. ¿Tuku xlitlawat chatum tala kgawasa xlakata tlakg tlan kstalanina Cristo nalitaxtu? (Kaʼakxilhti xmakni revista).

¹⁹ Komo kgawasaku wix, kalakapastakti pi wi tuku militlawat xlakata tlakg tlan kstalanina Cristo nalitaxtuya. Milistalanit xatlan xliʼakxilhtitkan amakgapitsin, liwana mililakapastaknat akxni nina wi tuku laksaka, miliskujat xlakata amakgapitsi nalipawankgoyan, wi tuku milikatsinit natlawaya chu naliskuja tuku namakgtayayan alistalh.

²⁰ Max nalakpuwana pi lu lhuwa tuku talakaskin natlawaya chu lakpuwana pi nila katimakgantaxti. Pero ni kataxlajwani, ¡wix tlan namakgantaxtiya! Kalakapastakti pi Jehová lu makgtayaputunan (Is. 41:​10, 13). Chu putum natalan xalak mincongregación na namakgtayakgoyan. Akxni tlakg tlan kstalanina Cristo nalitaxtuya chuna la Jehová lakaskin, lu nalipaxuwaya milatamat. Lu kkapaxkiyan chu klakaskinaw pi Jehová chuntiya kasikulunatlawan xlakata lu liskujpat tlakg tlan kstalanina Cristo nalitaxtuya (Prov. 22:4).