¿La xlilakaskinka kiliʼakxilhatkan xtukuwani Jehová?

1, 2. ¿Tuku likatsiyaw pi Jesús lu xlakaskinka liʼakxilha xtukuwani Jehová?

TUKU tlakg xlakaskinka liʼakxilha Jesús wa xtukuwani Jehová. Wa tiku tlakg kgalhmakgtaya xtukuwani xTlat. Chuna la lichuwinaw kxliʼakgtati artículo xla uma revista, xatapaxuwan makamastalh xlatamat xpalakata xtukuwani Jehová, xlakata xlimasiyalh pi ni xlikana tuku limawakakan xTlat (Mar. 14:36; Heb. 10:​7-9). Chu akxni nasputa xTamapakgsin xaʼAkgtum Mil Kata, xatapaxuwan namaspitni xTlat Tamapakgsin xlakata natasantujli xtukuwani (1 Cor. 15:​26-28). Putum tuku Jesús tlawanit chu tuku natlawa xpalakata xtukuwani Jehová limasiya pi lu paxki xTlat.

² Jesús milh kKatiyatni kxtukuwani xTlat (Juan 5:43; 12:13). Kamasiyanilh uma tukuwani xtamakgalhtawakgen (Juan 17:​6, 26). Akxni wi tuku tlawalh chu akxni tlawalh milagros, chuna tlawalh kxtukuwani Jehová (Juan 10:25). Chu kʼakgtum oración niku kapalakaskilh kstalaninanin, wanilh Jehová: «Kakakuentajtlawa xpalakata mintukuwani» (Juan 17:11). Wa xlakata, komo Jesús lu xlakaskinka liʼakxilha xtukuwani Jehová, ¿tuku xlakata makgapitsi tiku wankgo pi kstalaninanin Cristo litaxtukgo nipara tsinu lakgapaskgo chu ni maklakaskinkgo xtukuwani Jehová?

3. ¿Tuku nalichuwinanaw kʼuma artículo?

³ Xaxlikana kstalaninanin Jesús lu liskujaw xlakata natlawayaw chuna la xla tlawalh, chu wa xlakata na lu xlakaskinka liʼakxilhaw xtukuwani xTlat (1 Ped. 2:21). Kʼuma artículo nalichuwinanaw pi tiku lichuwinankgo «xatlan tamakatsinin xla Tamapakgsin» linkgo xtukuwani Jehová (Mat. 24:14). Na nalichuwinanaw la xlilakaskinka kiliʼakxilhatkan xtukuwani Jehová.

«NAKALAKSAKA LATAMANIN TIKU [...] NALINKGO XTUKUWANI»

4. 1) ¿Tuku kawanilh Jesús kstalaninanin akxni nina xtaspita kʼakgapun? 2) ¿Tukuya takgalhskinin nakgalhtiyaw?

⁴ Akxni Jesús nina xtaspita kʼakgapun, kawanilh kstalaninanin: «Pero namakglhtinanatit litliwakga akxni espíritu santo nakalakgminan, chu nalichuwinanatit kimpalakata kJerusalén, kputum Judea chu kSamaria, chu kxlikalanka katiyatni» (Hech. 1:8). Wa xlakata, xatlan tamakatsin ni kajwatiya xʼamaka lichuwinankan kʼIsrael, wata chuna la xtitaxtulh kilhtamaku, xʼamaka kalitachuwinankan latamanin xalak atanu kachikinin xlakata na kstalaninanin Jesús xlitaxtukgolh (Mat. 28:​19, 20). Pero kalakapastakwi pi Jesús wa: «Nalichuwinanatit kimpalakata». ¿Wamputun uma pi xasasti kstalaninanin Jesús kajwatiya xʼamakgo lichuwinankgo Jesús, o na xtalakaskilh pi xlakgapaskgolh xtukuwani Jehová? Hechos capítulo 15 kinkamakgtayayan nakgalhtiyaw uma takgalhskinin.

5. ¿La limasiyakgolh apóstoles chu lakgkgolotsin xalak Jerusalén pi xtalakaskin xlakgapaska xtukuwani Jehová? (Na kaʼakxilhti dibujo).

⁵ Kkata 49, apóstoles chu lakgkgolotsin xalak Jerusalén tamakxtumikgolh xlakata xlichuwinankgolh tuku xlitlawatkan xwanit tiku ni judíos xlakata kstalaninanin Cristo xlitaxtukgolh. Akxni ksputmaja uma tamakxtumit, Santiago, xtutala Jesús, wa: «Symeón (Pedro) liwana kinkalitachuwinanitan chuna la Dios kamakgamakglhtinanit tiku ni judíos, xlakata anta tlan nakalaksaka latamanin tiku ni judíos xlakata nalinkgo xtukuwani». ¿Tiku xtukuwani xlichuwinama? Kikilhtiyalh tuku xlichuwinanit palakachuwina Amós, chu wa: «Xlakata lakchixkuwin tiku natamakgxtakgkgo xlikana lakxtum nakataputsakgo Jehová latamanin xalak atanu kachikinin, latamanin tiku kalimapakuwikan kintukuwani, wan Jehová» (Hech. 15:​14-18). Wa xlakata, xasasti kstalaninanin Jesús ni kajwatiya xʼamakgo katsinikgo xlakata Jehová, wata na xʼamaka kalimapakuwikan xtukuwani. Uma wamputun pi xʼamaka kalilakgapaskan uma tukuwani chu xʼamakgo lichuwinankgo.

6, 7. 1) ¿Tuku xlakata milh Jesús kKatiyatni? 2) ¿Tuku tlakg xlakaskinka lakgmilh Jesús kKatiyatni?

⁶ Kalakapastakwi pi xtukuwani Jesús wamputun «Jehová lakgtaxtut». Chu chuna kitaxtulh: Jehová maklakaskilh Jesús xlakata xkalakgmaxtulh putum latamanin tiku limasiyakgo takanajla. Jesús milh kKatiyatni xlakata xmakamastalh xlatamat kimpalakatakan (Mat. 20:28). Xlakata mastalh xlatamat chu kinkalakgmaxtun, kimputumkan tlan nakinkatapatikanan kintalakgalhinkan chu tlan nakgalhiyaw latamat nema ni kgalhi xlisputni (Juan 3:16).

⁷ Pero ¿tuku xlakata xtalakaskin xkalakgmaxtuka latamanin? Xlakata tuku lalh kjardín xaʼEdén. Chuna la katsiniw kxliʼakgtati artículo xla uma revista, xapulana kinatlatnikan, Adán chu Eva, ni kgalhakgaxmatkgolh Jehová chu nialhla latamakgolh putum kilhtamaku (Gén. 3:​6, 24). Pero ni kajwatiya xtalakaskin pi xkalakgmaxtuka latamanin, tuku tlakg xlakaskinka xwanit wa pi xtasantujlilh xtukuwani Jehová (Gén. 3:​4, 5). Xlakata tlan xkalakgmaxtuka xkamanan Adán chu Eva, xtalakaskin pi xmasantujlika xtukuwani Jehová. Chu Jesús wa tiku tlakg masantujlilh xtukuwani Jehová xlakata chuwinalh kxtukuwani xTlat chu liwana makgantaxtilh putum tuku Jehová xlakaskin pi xtlawalh.

8. ¿Tuku xliʼakgatekgsatkan xwanit chu tuku xlimakgamakglhtinatkan xwanit putum kstalaninanin Cristo?

⁸ Putum kstalaninanin Cristo xliʼakgatekgsatkan xwanit chu xlimakgamakglhtinatkan xwanit pi kajwatiya Jehová, xTlat Jesús, tlan xkalakgmaxtulh (Juan 17:3). Chu chuna la Jesús, xʼamakgo litapakuwikgo xtukuwani Dios. Na xliʼakgatekgsatkan xwanit pi lu xlakaskinka xmasantujlikgolh xtukuwani Jehová. Kajwatiya komo chuna xtlawakgolh tlan xlakgtaxtukgolh (Hech. 2:​21, 22). Wa xlakata, putum kstalaninanin Jesús xlikatsinitkan xwanit xlakata Jehová chu xlakata Jesús. Wa uma tuku xpalakata akxni Jesús maʼakgasputulh xʼoración nema tatsokgtawilanit kJuan capítulo 17, wa: «Akit kkamasiyaninit mintukuwani, chu chuntiya nakmasiya, xlakata xlakan nakapaxkikgo amakgapitsi latamanin chuna la kimpaxkinita chu akit tlan akxtum nakkatatawila» (Juan 17:26).

«WIXIN KINTATAYANANIN»

9. ¿La kiliʼakxilhatkan xtukuwani Jehová?

⁹ Chuna la akxilhnitaw, putum kstalaninanin Cristo lu xlakaskinka xliʼakxilhatkan namasantujlikgo xtukuwani Jehová (Mat. 6:​9, 10). Kimpalakatakan, ni anan atanu tuku tlakg xlakaskinka nixawa xtukuwani Jehová. Chu tuku tlawayaw xlimasiyat pi xlikana chuna liʼakxilhaw. ¿Tuku tlan natlawayaw xlakata namakgtayananaw natasantujli xtukuwani Jehová chu nalimasiyayaw pi tuku Satanás limawakalh kaj taʼakgsanin?

10. ¿Tuku lichuwinan libro xla Isaías capítulos 42 asta 44? (Isaías 43:9; 44:​7-9; na kaʼakxilhti dibujo).

¹⁰ Libro xla Isaías capítulos 42 asta 44, lichuwinan la tlan namakgtayananaw natasantujli xtukuwani Jehová. Kʼumakgolh capítulos Jehová kawani latamanin tiku ni kakninanikgo pi kalimasiyakgolh komo xdioseskan xaxlikana chu staknankgo. Chuna la akxni wi tiku lakputsananimaka, Jehová kgalhskininan komo anankgo tiku tlan nalimasiyakgo pi umakgolh dioses xaxlikana, pero ni anan tiku tlan nalimasiya pi chuna (kalikgalhtawakga Isaías 43:9; 44:​7-9).

11. Chuna la wan Isaías 43:​10-12, ¿tuku kawani Jehová xlakskujnin?

¹¹ (Kalikgalhtawakga Isaías 43:​10-12). Jehová kawani kskujnin: «Wixin kintatayananin, […] chu akit Dios». Kaskini pi kakgalhtikgolh uma takgalhskinin: «¿Anan atanu Dios nixawa akit?» (Is. 44:8). Kgalhiyaw talakgalhaman pi nakgalhtiyaw uma takgalhskinin. Kintachuwinkan chu tuku tlawayaw limasiya pi kajwatiya Jehová xaxlikana Dios chu pi xtukuwani tlakg xlakaskinka nixawa atanu tukuwani. Chuna la linaw kilatamatkan limasiyayaw pi paxkiyaw Jehová xliputum kinakujkan maski Satanás natlawa pi lhuwa tuku tuwa natitaxtuyaw. Chuna namakgtayananaw pi katasantujlilh xtukuwani Dios.

12. ¿La kgantaxtulh tuku lichuwinan Isaías 40:​3, 5?

¹² Isaías na lichuwinalh pi xʼama min chatum tiku xʼama lakkaxwili «xtiji Jehová» (Is. 40:3; nota). ¿La kgantaxtulh uma tuku xlichuwinanit? Juan Mununa, lakkaxwililh xtiji Jesús, tiku milh kxtukuwani Jehová chu chuwinalh kxtukuwani Jehová (Mat. 3:3; Mar. 1:​2-4; Luc. 3:​3-6). Isaías na lichuwinalh: «Natasiya xlilanka Jehová» (Is. 40:5). Umakgolh tachuwin kgantaxtulh akxni Jesús milh kKatiyatni, xlakata xla likatsilh chuna la likatsi xTlat, xtachuna la komo wa Jehová tiku xminit kKatiyatni (Juan 12:45).

13. ¿La tlan nastalaniyaw xliʼakxilhtit Jesús?

¹³ Akxni tatayayaw xtukuwani Jehová, tlawamaw chuna la Jesucristo. Xtachuna la xla, akinin xtatayananin Jehová Dios litaxtuyaw. Linaw xtukuwani chu kalitachuwinanaw putum latamanin putum tuku tlawanit. Pero xlakata liwana namakgantaxtiyaw uma, na talakaskin liwana nakalitachuwinanaw tuku Jesús tlawalh chu tuku natlawa xlakata namasantujli xtukuwani Jehová (Hech. 1:8). Ni anan atanu tiku tlakg kgalhmakgtayanit xtukuwani Jehová nixawa Jesús, chu akinin stalaniyaw xliʼakxilhtit (Apoc. 1:5). Pero ¿tuku atanu tlan natlawayaw xlakata nalimasiyayaw pi xlakaskinka liʼakxilhaw xtukuwani Jehová?

ATANU LA NALIMASIYAYAW PI XLAKASKINKA LIʼAKXILHAW XTUKUWANI JEHOVÁ

14. Chuna la wan Salmo 105:​3, ¿la liʼakxilhaw xtukuwani Jehová?

¹⁴ Ni limaxananaw xtukuwani Jehová (kalikgalhtawakga Salmo 105:3). Jehová lu lakgati pi ni nalimaxananaw xtukuwani chu nalichuwinanaw (Jer. 9:​23, 24; 1 Cor. 1:31; 2 Cor. 10:17). Ni nalimaxananaw xtukuwani Jehová kilhchanima pi nakawaniyaw amakgapitsin pi wa Dios. Akgtum talakgalhaman liʼakxilhaw namalankiyaw xtukuwani chu namakgtayananaw natasantujli. Nikxni kilimaxanatkan nawanaw kkimputaskujutkan, kkiʼescuelajkan, kkinkachikinkan chu kaxanikawa niku lamaw pi akinin xtatayananin Jehová. Akgskgawini lakaskin pi nialh kamakatsininaw xtukuwani Jehová (Jer. 11:21; Apoc. 12:17). Xla chu tiku tatayakgo lakaskinkgo pi latamanin kapatsankgakgolh xtukuwani Jehová (Jer. 23:​26, 27). Pero akinin lu paxkiyaw xtukuwani Jehová chu ankgalhin malankiputunaw (Sal. 5:11; 89:16).

15. ¿Tuku kilhchanima pi namapakuwiyaw Jehová?

¹⁵ Chuntiya mapakuwiyaw Jehová (Joel 2:32; Rom. 10:​13, 14). Namapakuwiyaw Jehová ni kajwatiya kilhchanima pi nalakgapasaw chu namaklakaskinaw xtukuwani. Na kilhchanima pi nakatsiyaw la likatsi, nalipawanaw chu naputsayaw xtamakgtay chu xtapulalit (Sal. 20:7; 99:6; 116:4; 145:18). Na kilhchanima pi nakalitachuwinanaw amakgapitsin xtukuwani chu xtayat, chu nakamakgpuwantiniyaw namakgxtakgkgo tuku nitlan tlawamakgo chu nalakgpalikgo tuku natalakaskin xlakata Jehová tlan nakaʼakxilha (Is. 12:4; Hech. 2:​21, 38).

16. ¿La nalimasiyayaw pi Satanás chatum akgsanina?

¹⁶ Xatapaxuwan lipatinanaw xtukuwani Jehová (Sant. 5:​10, 11). Akxni ni makgxtakgaw Jehová maski titaxtuyaw tuku tuwa, limasiyayaw pi Satanás xaʼakgsanina. Kxkilhtamaku Job, Satanás kalimawakalh kskujnin Jehová uma taʼakgsanin: «Putum tuku kgalhi chatum chixku namasta xlakata nalilakgmaxtu xlatamat» (Job 2:4). Satanás xwamputun pi latamanin kajwatiya xʼamakgo skujnikgo Jehová komo tlan xkakitaxtunilh, pero akxni xtitaxtukgolh tuku tuwa, xʼamakgo makgxtakgkgo. Xlakata Job ni makgxtakgli Jehová, limasiyalh pi uma kaj taʼakgsanin. Chu akinin na kgalhiyaw talakgalhaman nalimasiyayaw pi nikxni katimakgxtakgwi Jehová maski Satanás natlawa pi lhuwa tuku tuwa natitaxtuyaw. Liwana katsiyaw pi Jehová chuntiya nakinkakuentajtlawayan xpalakata xtukuwani (Juan 17:11).

17. Chuna la wan 1 Pedro 2:​12, ¿tuku atanu tlan natlawayaw xlakata namalankiyaw xtukuwani Jehová?

¹⁷ Maxkiyaw kakni xtukuwani Jehová (Prov. 30:9; Jer. 7:​8-11). Xlakata akinin xtatayananin Jehová, tuku natlawayaw tlan namalanki o namaxkajwi xtukuwani (kalikgalhtawakga 1 Pedro 2:12). Wa xlakata, tlawaputunaw putum tuku matlaniyaw xlakata nalimalankiyaw Jehová tuku wanaw chu tuku tlawayaw. Chu chuna, maski makglakgalhinanin akinin, makgtayananaw xlakata natamalanki xtukuwani.

18. Kalichuwinanti atanu la limasiyayaw pi xlakaskinka liʼakxilhaw xtukuwani Jehová (na kaʼakxilhti nota).

¹⁸ Xtukuwani Jehová tlakg xlakaskinka nixawa tuku nawankan kimpalakatakan (Sal. 138:2). Chuna wanaw xlakata paxkiyaw xtukuwani Jehová chu tlawayaw putum tuku xla makgapaxuwa. Pero min kilhtamaku, uma tlawa pi latamanin nakinkalikgalhkgamanankgoyan chu nitlan nakinkalichuwinankgoyan.a Jesús mastalh talakaskin pi xmakgnika la chatum tiku xtlawanit tuku nitlan, xlakata xmalankilh xtukuwani Jehová. Chuna la wan Hebreos 12:​2-4, «nitu liʼakxilhli maski xmamaxanimaka», uma wamputun pi ni wa lu xlilakgaputsa tuku amakgapitsin xlakpuwankgo xpalakata. Tuku tlakg xlilakgaputsa wa pi xmakgantaxtilh xtalakaskin Dios (Mat. 26:39).

19. ¿La liʼakxilha wix xtukuwani Jehová, chu tuku xlakata?

¹⁹ Akinin ni limaxananaw xtukuwani Jehová chu lanka talakgalhaman liʼakxilhaw pi kinkalilakgapaskanan xtatayananin Jehová. Wa xlakata ni lilakgaputsayaw pi nakinkalikgalhkgamanankanan o nawankan tuku nitlan kimpalakatakan. Akinin tlakg xlakaskinka liʼakxilhaw xtukuwani Jehová nixawa tuku nawankan kimpalakatakan. Wa xlakata, liwana lakpuwanitaw chuntiya namalankiyaw xtukuwani Jehová maski Satanás natlawa pi lhuwa tuku nitlan natitaxtuyaw. Komo chuna natlawayaw, xtachuna la Jesús, nalimasiyayaw pi tuku tlakg xlakaskinka liʼakxilhaw wa xtukuwani Jehová.