¿La tlan chuntiya napaxuwayaw maski wi tiku kuentajtlawamaw?

1, 2. ¿La liʼakxilha Jehová putum tuku tlawaya xlakata nakuentajtlawaya tiku tatatla o tiku lina kata? (Proverbios 19:17; na kaʼakxilhti dibujos).

JIN-YEOL, chatum tala xalak Corea del Sur, wan: «Kimpuskat chu akit liwakaya 32 kata lata kmakgaxtokgaw. Titaxtunita akgkitsis kata lata kkuentajtlawama xlakata tatatla. Tajatat nema kgalhi wanikan párkinson chu nila lu tatsuwi. Akit lu kpaxki chu xatapaxuwan kkuentajtlawa. Kimputama lakatsu ya niku ya xputama chu chali chali klamakgachipanitaw klhtatayaw».

² ¿Kuentajtlawapat mintlat, minkgawasa o mintsumat, chatum miʼamigo, minchixku o mimpuskat? Komo chuna, max xatapaxuwan kuentajtlawapat xlakata paxkiya uma lataman chu xlakata paxkiya Jehová (1 Tim. 5:​4, 8; Sant. 1:27). Maski chuna, max titaxtuya tuku lu tuwa nema amakgapitsin ni katsikgo o asta max lakpuwana pi kajwatiya wix titaxtupat tuku tuwa. Max kxlakatin amakgapitsin litsina o tsiyana, pero max lu lipuwana chu akxni miʼakstu wila, tsukuya tasaya (Sal. 6:6). Maski amakgapitsin ni katsikgo tuku wix titaxtupat, Jehová katsi chu akgatekgsa tuku makgkatsiya (katamalakxtupi tuku wan Éxodo 3:7). Xla akxilha akxni makgatunu tasaya, chu xtapalh liʼakxilha putum tuku tlawapat xlakata nakuentajtlawaya tiku tatatla o tiku lina kata (Sal. 56:8; 126:5). Biblia wan pi akxni wi tiku makgtayaya, xtachuna la wi tuku tlawapat xpalakata Jehová, chu xla wan pi naxokgoniyan putum tuku tlawapat (kalikgalhtawakga Proverbios 19:17).

3. ¿Tuku xlakata max lu tuwa makgkatsikgolh Abrahán chu Sara nakuentajtlawakgo Taré?

³ Biblia kinkalitachuwinanan lhuwa lakchixkuwin chu lakpuskatin tiku kakuentajtlawakgolh amakgapitsin. Akgtum liʼakxilhtit, akxni Abrahán chu Sara taxtukgolh kʼUr, xtlatkan, Taré, xkgalhi max 200 kata. Maski chuna, xla kataʼalh. Tlawankgolh max 960 kilómetros xlimakgat xlakata xchankgolh kʼHarán (Gén. 11:​31, 32). Abrahán chu Sara lu xpaxkikgo Taré, pero max lu tuwa makgkatsikgolh nakuentajtlawakgo, liwaka akxni xʼamakgo ktiji. Max xpuʼamakgo camellos o burros, chu max lu litlakgwa xwanit. Pero tiku max tlakg lakapala xtlakgwan, wa Taré. Wa xlakata, max xmin kilhtamaku Abrahán chu Sara lu xtlakgwankgo chu nialhtu xtlawaputunkgo. Pero Jehová kamaxkilh litliwakga. Chu Jehová nachuna natlawa mimpalakata (Sal. 55:22).

4. ¿Tuku nalichuwinanaw kʼuma artículo?

⁴ Tlakg ni tuwa katimakgkatsi nakuentajtlawaya tiku tatatla o tiku lina kata komo chuntiya napaxuwaya (Prov. 15:13). Kalakapastakti pi akinin ni kajwatiya paxuwayaw akxni tlan kinkakitaxtuniman (Sant. 1:​2, 3). ¿La tlan chuntiya napaxuwaya? Pulaktum tuku tlan natlawaya wa pi naskiniya Jehová pi kamakgtayan naʼakxilha tuku tlan kgalhiya. Kʼuma artículo nalichuwinanaw atanu tuku namakgtayayan chuntiya napaxuwaya. Na nalichuwinanaw tuku tlan natlawakgo amakgapitsin xlakata nakamakgtayakgo tiku kuentajtlawakgo chatum tiku lina kata o tiku tatatla. Pero pulana kalichuwinaw tuku xlakata lu xlakaskinka pi tiku kuentajtlawanamakgo chuntiya napaxuwakgo, chu tuku max xtlawalh pi nialh xpaxuwakgolh.

¿TUKU XLAKATA TUWA KITAXTU CHUNTIYA NAPAXUWAKAN?

5. ¿Tuku xlakata lu xlakaskinka chuntiya napaxuwakan?

⁵ Komo tiku kuentajtlawanamakgo nialh xpaxuwakgolh, tlakg lakapala xtlakgwankgolh (Prov. 24:10). Chu komo tlakgwankgonit, max nialh tlan xkalikatsinikgolh tiku kakuentajtlawakgo chu nialhla liwana xkamakgtayakgolh. Kalichuwinaw tuku max xtlawalh pi nialh xpaxuwakgolh.

6. ¿Tuku xlakata makgapitsi tiku kuentajtlawanankgo snun tlakgwankgo?

⁶ Tiku kuentajtlawanankgo max snun natlakgwankgo chu nalakgaputsakgo. Chatum tala tiku wanikan Leah, wan: «Asta akxni kmakgkatsi pi ni lu klakgaputsa, tuwa kinkitaxtuni nakkuentajtlawa tiku tatatla. Akxni kgotanukgo, kmakgkatsi pi snun ktlakgwanit chu asta nialhtu ktlawaputun. Nialhpara kaj kkgalhtinamputun mensajes nema kimalakgachanikan». Amakgapitsin natalan tiku kuentajtlawanamakgo, tuwa makgkatsikgo nalimaxtukgo kilhtamaku najaxkgo maski maklakaskimakgo chu makgkatsikgo pi nila limakgxtakgkgo tuku tlawamakgo. Chatum tala tiku wanikan Inés, wan: «Ni liwana klhtata. Min kilhtamaku xʼakgatiyun hora ktaki katsisni xlakata kkuentajtlawama xtse kinchixku. Kinchixku chu akit, makgasata ni klimaxtuyaw kilhtamaku nakjaxaw o nakkanaw paxialhnanaw». Makgapitsi natalan tiku kuentajtlawanamakgo nila ankgo makgpaskuanankgo akxni natalan wi tuku tlawakgo o nila makgamakglhtinankgo taskujut kcongregación xlakata nila xʼakstukan kamakgxtakgkgo xtatatlakan. Wa xlakata max min kilhtamaku makgkatsikgo pi xʼakstukan wilakgo o pi xtachuna la xatachin wilakgo.

7. ¿Tuku xlakata makgapitsi tiku kuentajtlawanankgo nitlan tsukukgo makgkatsikgo?

⁷ Tiku kuentajtlawanamakgo max nitlan natsukukgo makgkatsikgo xlakata lakpuwankgo pi nila makgtayakgo tiku tatatla. Jessica, chatum tala puskat, wan: «Lu klilakgaputsa xlakata lhuwa tuku nila ktlawa. Lakgachunin talakaskin naklimaxtu kilhtamaku nakjaxa, pero akxni chuna ktlawa, nitlan klimakgkatsi xlakata klakpuwan pi kaj kiʼakstu kililakgaputsamaka». Wilakgo tiku na nitlan limakgkatsikgo xlakata min kilhtamaku lisitsikgo tuku titaxtumakgo. Amakgapitsin nitlan limakgkatsikgo xlakata lakpuwankgo pi ni makgtayamakgo xtatatlakan chuna la xlilat. Chu wilakgo tiku lu nitlan limakgkatsikgo xlakata minit kilhtamaku xtasitsikan tlawanit pi nitlan nalikatsinikgo tiku kuentajtlawamakgo (Sant. 3:2). Max na lu lilakgaputsakgo akxni akxilhkgo pi tiku paxkikgo tsinu tsinu tlakg snunama. Chatum tala puskat tiku wanikan Bárbara, wan: «Pulaktum tuku tlakg tuwa kmakgkatsi wa akxni kakxilha pi chali chali kiʼamiga tlakg snunantilhama».

8. ¿La limakgkatsikgonit makgapitsi tiku kuentajtlawanankgo akxni kapaxtikatsinikanit?

⁸ Tiku kuentajtlawanamakgo max namakgkatsikgo pi ni xtapalh liʼakxilhkan tuku tlawakgo. ¿Tuku xlakata? Xlakata min kilhtamaku ni kapaxtikatsinikan o ni kawanikan pi lu tlan taskujut tlawamakgo. Pero putum akinin katsiyaw pi akxni kinkapaxtikatsinikanan, lu tlan limakgkatsiyaw (1 Tes. 5:18). Kalilakpuwaw tuku wan Melissa: «Min kilhtamaku lu nitlan kmakgkatsi chu tsuku tasa. Pero akxni tiku kkakuentajtlawama kiwanikgo, “Paxtikatsinilh putum tuku tlawaya kimpalakata”, lu tlan klimakgkatsi. Uma kimakgtaya pi lichali tsisa xatapaxuwan naktaki chu xatapaxuwan nakkakuentajtlawapara». Chatum tala tiku wanikan Ahmadu, lichuwinan la limakgkatsi akxni paxtikatsinikan. Xla chu xpuskat kuentajtlawakgo aktsu xpuxnimatkan tiku kgalhi epilepsia. Ahmadu wan: «Maski xla ni katsi putum tuku ktlawayaw xpalakata, lu tlan klimakgkatsi akxni xla kinkapaxtikatsiniyan o akxni tsokgwili kmaktum kapsnat, “Lu kkapaxkiyan”».

¿TUKU NAKINKAMAKGTAYAYAN CHUNTIYA NAPAXUWAYAW?

9. ¿La limasiyakgo tiku kuentajtlawanankgo pi katsikgo pi ni putum matlanikgo?

⁹ Kalakapastakti pi ni putum matlaniya (Prov. 11:2). Putum akinin kinkakitsankganiyan litliwakga chu kilhtamaku. Wa xlakata, mililakkaxwilit tuku tlan natlawaya chu tuku nila, chu namin kilhtamaku max natalakaskin nawana pi wi tuku nila katitlawa. Chu uma ni talakgalhin; wata limasiya pi wix akgatekgsa pi ni putum matlaniya. Komo amakgapitsin makgtayaputunkgoyan, xatapaxuwan kamakgamakglhtinanti xtamakgtaykan. Chatum tala chixku tiku wanikan Jay, wan: «Nila tlawakgoyaw putum tuku tlawaputunaw. Xlakata chuntiya napaxuwayaw, talakaskin naʼakgatekgsaw pi wi tuku nila tlawayaw chu ni natlawaputunaw tuku ni matlaniyaw».

10. ¿Tuku xlakata talakaskin nakgalhikgo liskgalala tiku kuentajtlawanankgo? (Proverbios 19:11).

¹⁰ Kalilakpuwanti tuku ni tasiya (kalikgalhtawakga Proverbios 19:11). Liskgalala namakgtayayan naʼakgatekgsa tuku xlakata tiku kuentajtlawapat wi tuku wan o wi tuku tlawa, chu uma namakgtayayan ni lakapala nasitsiya. Makgapitsi tajatat tlawa pi chatum lataman natsuku tlawa tuku ni xtlawa xapulana (Ecl. 7:7). Akgtum liʼakxilhtit, max chatum lataman tiku lu tlan xlikatsi chu lu xlakgalhamanan, xasitsin nawan chu putum nalitaʼakglhuwi. Max lu tsuku taliksa o skalajwa wan, chu ni lakgati putum tuku tlawa tiku kuentajtlawama. Atanu tuku namakgtayayan wa nalakputsanana xpalakata xtajatat. Komo tlakg liwana nakatsiya xlakata uma, tlakg ni tuwa katimakgkatsi naʼakgatekgsa pi tajatat wa tuku tlawama pi uma lataman nitlan natsuku likatsi (Prov. 14:29).

11. ¿Tuku xlitlawatkan chali chali tiku kuentajtlawanankgo? (Salmo 132:​4, 5).

¹¹ Kalimaxtu kilhtamaku xlakata namatliwakglha chuna la talalipina Jehová. Namin kilhtamaku natalakaskin wi tuku nalimakgxtakga xlakata natlawaya “tuku tlakg xlakaskinka”, pulaktum uma wa pi namatliwakglha chuna la talalipina Jehová (Filip. 1:10). Mapakgsina David lhuwa tuku xlitlawat xwanit, pero limasiyalh pi tuku tlakg xlakaskinka xliʼakxilha wa pi xkakninanilh Jehová (kalikgalhtawakga Salmo 132:​4, 5). Xtachuna la David, maski lhuwa tuku militlawat, lu xlakaskinka nalimaxtuya kilhtamaku chali chali xlakata nalikgalhtawakgaya Biblia chu natlawaya oración. Chatum tala tiku wanikan Elisha, wan: «Tuku kimakgtaya chuntiya nakpaxuwa wa pi ktlawa oración chu klilakpuwan tuku wan makgapitsi salmos. Oración wa tuku tlakg kimakgtayanit. Chali chali kskini Jehová pi kakimakgtayalh ni lu naklakgaputsa».

12. ¿Tuku atanu kuenta xlitlawatkan tiku kuentajtlawanankgo chu tuku xlakata?

¹² Kalimaxtu kilhtamaku xlakata miʼakstu nakuentajtlawakana xlakata ni natatatlaya. Xlakata max lu liskujpat nakuentajtlawaya tiku tatatla o tiku lina kata, max nialh liwana wayampat xlakata ni kgalhiya kilhtamaku napina tamawaya chu nakaxtlawaya miliwat. Pero kalakapastakti pi akxni liwana wayanaw chu tlawayaw ejercicio, kinkamakgtayayan ni lu natatatlayaw chu ni lu nalakgaputsayaw. Wa xlakata maski nialh lhuwa kilhtamaku akgataxtuniyan, liwana kawayanti chu katlawa ejercicio (Efes. 5:​15, 16). Nachuna, xaʼakchan kalhtata (Ecl. 4:6). Akgtum artículo nema tlawakgolh makuchinanin, wan pi akxni chatum lataman xaʼakchan lhtata makgtaya ni lu nalakgaputsa chu liwana nalakapastaknan akxni titaxtu tuku tuwa. Atanu tuku na namakgtayayan wa pi nalimaxtuya kilhtamaku natlawaya tuku lakgatiya (Ecl. 8:15). Chatum tala puskat tiku kuentajtlawanama, wan tuku makgtaya chuntiya napaxuwa: «Akxni kawan xkgakga, ktaxtu puntsu xlakata nakintala chichini. Chu maski kaj makgtum akgtum papaʼ ktalakkaxla chatum kiʼamiga xlakata akxtum naktlawayaw tuku klakgati».

13. ¿Tuku xlakata lu tlan kitaxtu litsinkan o tsiyankan? (Proverbios 17:22).

¹³ Kalitsinti o katsiyanti (kalikgalhtawakga Proverbios 17:22; Ecl. 3:​1, 4). Akxni litsinaw, makgtaya kimaknikan chu kintalakapastaknikan. Xlikana pi akxni wi tiku kuentajtlawamaw ni ankgalhin tlan kinkakitaxtuniyan tuku tlawayaw, pero komo nalilitsina asta tuku max nitlan taxtuniyachan, namakgtayayan ni lu nalilakgaputsaya uma. Chu komo akxtum natalitsina tiku kuentajtlawapat, tlakg tlan nalatalalipinatit.

14. ¿Tuku xlakata tlan kitaxtu natachuwinana chatum amigo?

¹⁴ Katachuwinanti chatum xatlan miʼamigo. Maski lu naliskuja xlakata chuntiya napaxuwaya, namin kilhtamaku namakgkatsiya pi lu lakgaputsapat chu natalakaskin pi wi tiku natachuwinana. Katachuwinanti chatum amigo tiku ni nalakpuwan pi malakatsalipat tuku makgkatsiya (Prov. 17:17). Uma amigo nakgaxmatniyan chu nawaniyan tuku tlan namamakgkatsiniyan, chu uma namakgtayayan chuntiya napaxuwaya (Prov. 12:25).

15. ¿Tuku tlan kitaxtu akxni lichuwinankan la nawan latamat kParaíso?

¹⁵ Kalilakpuwanti tuku natlawayatit kParaíso. Kalakapastakti pi akxni Jehová kamalakatsukilh latamanin, ni xlakaskin pi xtatatlakgolh chu xlinkgolh kata. Wa xlakata ni putum kilhtamaku katikakuentajtlawaw tiku tatatlakgo o tiku linkgoya kata (2 Cor. 4:​16-18). Kkilhtamaku nema aku mima nakgalhiyaw «xaxlikana latamat» (1 Tim. 6:19). Komo wix chu tiku kuentajtlawapat nalichuwinanatit tuku akxtum natlawayatit kParaíso, lu nakamakgtayayan (Is. 33:24; 65:21). Chatum tala puskat tiku wanikan Heather, wan: «Klismani kkalitachuwinan tiku kkakuentajtlawa pi nialh makgas akxtum naktlawayaw lhakgat, akxtum nakkgosnanaw o naktsalanana chu nakkanaw paxialhnanaw kbici. Nakkatlawaniyaw kaxtalanchu chu lakgkgama liwat tiku xalak kifamiliajkan nema nalakastakwanankgo. Chu ankgalhin paxtikatsiniyaw Jehová xlakata kinkamaxkinitan uma takgalhkgalhin».

¿LA TLAN NAKAMAKGTAYAYAW TIKU KUENTAJTLAWANAMAKGO?

16. ¿Tuku tlan natlawayaw komo kkincongregacionkan anan chatum tiku kuentajtlawama chatum tatatla? (Na kaʼakxilhti dibujo).

¹⁶ Kakamakgtayaw xlakata tlan najaxkgo. Tlan natalaknuyaw xlakata nakuentajtlawayaw tiku tatatla o tiku lina kata. Chuna tiku kuentajtlawama nakgalhi kilhtamaku xlakata najaxa puntsu o natlawa tuku xla tlawaputun (Gál. 6:2). Makgapitsi natalan lakkaxwilikgonit pi akgatunu semana tanu tanu tiku namakgtayanankgo. Natalya, chatum tala tiku kuentajtlawama xchixku nema nila tlawan, wan: «Chatum tala chixku xalak congregación min kkinchikkan makgtum o makgtiy akgatunu semana xlakata nakuentajtlawa kinchixku. Akxtum lichuwinankgo Dios, kgalhchuwinankgo o akxilhkgo películas. Kinchixku lu xtapalh liʼakxilha pi uma tala limaxtu kilhtamaku xlakata nalakgapaxialhnan. Akxni min uma tala, akit kjaxa puntsu o kan paxialhnan puntsu». Komo tatlani, asta tlan natalaknuyaw xlakata nakuentajtlawayaw katsisni tiku tatatla xlakata tiku kuentajtlawama tlan nalhtata.

17. ¿La tlan nakamakgtayayaw akxni anan tamakxtumit tiku kuentajtlawanamakgo?

¹⁷ Kakamakgtayaw tiku kuentajtlawanamakgo akxni anan tamakxtumit. Max chatum tala tiku kuentajtlawanama nila kgaxmata tuku lichuwinankan ktamakxtumit o kʼasambleas xlakata wa lilakgaputsanit namakgtaya tiku kuentajtlawama. Wa xlakata, tlan natalaknuyaw xlakata akxtum natatawilayaw tiku kuentajtlawamaka maski kaj puntsu. Komo tiku kuentajtlawamaka nila taxtu kxchik, tlan nawaniyaw xkuentajtlawana pi naʼanaw kxchik chu anta nataconectarliyaw ktamakxtumit xlakata tiku kuentajtlawama tlan naʼan ktamakxtumit kPukgalhtawakga.

18. ¿Tuku atanu tlan nakalimakgtayayaw tiku kuentajtlawanamakgo?

¹⁸ Kakamatliwakglhwi chu kakapalakaskiw kkioracioneskan. Talakaskin pi lakgkgolotsin xalak congregación ni xmakgasni nakalakgapaxialhnankgo umakgolh natalan xlakata nakamatliwakglhkgo (Prov. 27:23). Chu putum akinin, kalismaniw nakawaniyaw tuku nakamaʼakgpuwantini chu kakalimasiyaniw pi kapaxkiyaw. Na tlan naskiniyaw Jehová pi chuntiya kakamatliwakglhli chu kakamakgtayalh chuntiya napaxuwakgo (2 Cor. 1:11).

19. ¿Tuku kgalhkgalhimaw nakgantaxtu nialh makgas kilhtamaku?

¹⁹ Nialh makgas, Jehová nakaxakani xlakgpixtajatkan putum tiku patinamakgo. Tajatat chu linin nialh katiʼanalh (Apoc. 21:​3, 4). «Tiku nila tlawan natlawan chuna la juki» (Is. 35:​5, 6, TNM). Nialh katililakgaputsaw tuku nitlan kitaxtu akxni linkana kata chu talakgaputsit nema limin akxni kuentajtlawakan chatum tiku tatatla. Nialh katilakapastakwi putum uma tuku nitlan (Is. 65:17). Katsiyaw pi Jehová ankgalhin nakinkamakgtayayan, asta akxni nakgantaxtu putum tuku xla kinkamalaknuninitan. Komo chuntiya naskiniyaw pi kakinkamaxkin litliwakga, Jehová nakinkamakgtayayan “xlakata xatapaxuwan natayaniyaw” (Col. 1:11).