«Lu kaliskujtit xlakata chuntiya makxtum natawilayatit»
APÓSTOL Pablo kawanilh kstalaninanin Cristo xalak Éfeso: «Kalimasiyatit tapaxkit akxni latatayaniyatit chatunu chatunu. Makxtum wilatit xpalakata espíritu santo. Lu kaliskujtit xlakata chuntiya makxtum natawilayatit, ni nalatakgalhiyatit taʼakglhuwit chatunu chatunu» (Efes. 4:2, 3).
Pablo lichuwinalh pi akinin makxtum wilaw «xpalakata espíritu santo». Uma wamputun pi xlimakgatliwakga Dios wa tuku tlawa pi makxtum natawilayaw. Pero Pablo na lichuwinalh pi talakaskin pi chatunu kstalaninanin Cristo naliskujaw xlakata chuntiya makxtum natawilayaw.
Kalilakpuwanti pi wi tiku maskiwiyan akgtum xasasti putlaw. Wix lakgchanan nakuentajtlawaya xlakata nitu nalani. Komo putlaw wi tuku xlanilh kaj xlakata ni kuentajtlawa, nila xwanti pi wa lin kuenta tiku maskiwin.
Xtachuna la uma, Dios kinkamaxkinitan akgtum tamaskiwin, pi makxtum wilaw kxkachikin. Pero chatunu akinin kinkalakgchanan nakuentajtlawayaw uma. Wa xlakata, komo ni talalinaw chatum tala, kalilakpuwaw: «¿Ktlawama putum tuku kmatlani xlakata chuntiya makxtum naktawilayaw chu ni naklatakgalhiyaw taʼakglhuwit?».
«LU KALISKUJTIT XLAKATA CHUNTIYA MAKXTUM NATAWILAYATIT»
Chuna la lichuwinanitaw, Pablo wa pi namin kilhtamaku natalakaskin pi lu naliskujaw xlakata makxtum natawilayaw. Chu tlakg talakaskin chuna natlawayaw akxni chatum tala xalak congregación nitlan nakinkamamakgkatsiniyan. Akinin makgtayanamputunaw xlakata makxtum natawilayaw, pero ¿talakaskin pi ankgalhin natachuwinanaw tiku nitlan kinkamamakgkatsiniyan? Nichuna. Min kilhtamaku tlakg tlan nawan nalilakpuwanaw uma: «Komo kajwatiya naklilakpuwantawila tuku lalh, ¿nakmakgtayanan makxtum naktawilayaw, o tlakg nakmalhuwi taʼakglhuwit?». Namin kilhtamaku tlakg tlan nawan pi nialh nalakapastakaw tuku lanit chu natapatinanaw (Prov. 19:11; Mar. 11:25).
«Komo kajwatiya naklilakpuwantawila tuku lalh, ¿nakmakgtayanan makxtum naktawilayaw, o tlakg nakmalhuwi taʼakglhuwit?».
Pablo mastalh uma tastakyaw: «Kalimasiyatit tapaxkit akxni latatayaniyatit chatunu chatunu» (Efes. 4:2). Maktum libro wan pi uma maʼakgatekgsninan pi «kakapaxkiw amakgapitsin maski ni lakgatiyaw chuna la likatsikgo» (Comentario para exégesis y traducción. Carta a los Efesios, Mariano Ávila Arteaga). Uma wamputun pi talakaskin nalakapastakaw pi kinatalankan na makglakgalhinanin chuna la akinin. Xlikana pi kimputumkan liskujmaw xlakata nalilhakgananaw «xasasti tayat» (Efes. 4:23, 24). Pero ni ankgalhin tlan limasiyayaw uma tayat (Rom. 3:23). Komo nalakapastakaw uma, tlakg ni tuwa katimakgkatsiw nakatatayaniyaw amakgapitsin, nakatapatiyaw chu chuna namakgtayananaw chuntiya makxtum natawilayaw.
Akxni tapatinanaw chu patsankgayaw tuku nitlan kinkalimamakgkatsinikgoyan amakgapitsin, kinkamakgtayayan “ni nalatakgalhiyaw taʼakglhuwit”. Tachuwin xagriego nema maklakaskinka kʼEfesios 4:3 niku wan pi ni nalatakgalhiyaw taʼakglhuwit, kilhchanima tuku lalichipa lukut. Xtachuna la tuku lalichipa lukut tlawa pi akgatunu lukut tliwakglh nalachipa, takaksni chu tapaxkit nema kakgalhiniyaw natalan kinkamakgtayayan chuntiya makxtum nakatatawilayaw maski min kilhtamaku wi tuku nitlan lalimamakgkatsiniyaw.
Wa xlakata, akxni chatum tala nitlan nakinkamamakgkatsiniyan o asta lu nakinkamakgasitsiyan, kaliskujwi xlakata nalakgalhamanaw chu ni kajwatiya naʼakxilhaw tuku nitlan tlawa (Col. 3:12). Xlakata putum akinin makglakgalhinanin, max minit kilhtamaku na wi tiku makgasitsinitaw o nitlan mamakgkatsininitaw. Komo nalakapastakaw uma, nakinkamakgtayayan chuntiya naliskujaw xlakata makxtum natawilayaw.