Revelesen

4 Bihain long dispela mi lukluk i stap na mi lukim wanpela dua i op long heven. Na namba 1 nek mi harim i krai olsem wanpela trampet. Na em i tokim mi olsem: “Yu kam antap long hia, na bai mi soim yu ol samting i mas kamap.” 2 Bihain long dispela, wantu strong bilong holi spirit i kamap long mi. Na lukim! wanpela sia king i stap long heven, na wanpela man i sindaun long dispela sia king. 3 Na dispela man i sindaun long sia king i lait olsem ston jaspa na wanpela retpela ston i dia tumas. Na i gat renbo i raunim sia king, na renbo i lait olsem ston emeral.*

4 Na i gat 24 sia king i raunim dispela sia king. Na i gat 24 hetman i sindaun i stap long ol dispela sia king. Ol i werim waitpela klos na ol i gat ol gol kraun i stap long het bilong ol. 5 Na laitning i sut i kam ausait long dispela sia king wantaim pairap bilong tanda na nois bilong ol nek i toktok. Na long ai bilong sia king i gat 7-pela lam em paia i lait long ol i stap. Na dispela 7-pela lam i makim 7-pela spirit bilong God. 6 Na long ai bilong sia king i gat wanpela samting i stap em i olsem wanpela bikpela wara na i luk olsem glas na i lait olsem ston kristal.

Na 4-pela serap* i sanap klostu long sia king na ol i raunim dispela sia king. Na dispela 4-pela serap i gat ol ai i pulap long bodi bilong ol long fran na long baksait bilong ol. 7 Na namba 1 serap i luk olsem laion, na namba 2 serap i luk olsem yangpela bulmakau, na namba 3 serap i luk olsem wanpela man, na namba 4 serap i luk olsem wanpela tarangau i flai i stap. 8 Na dispela 4-pela serap, olgeta wan wan bilong ol i gat 6-pela wing. Na long olgeta hap bilong ol wing, ol ai i pulap long antap bilong ol na long aninit bilong ol. Na long san na long nait ol serap i wok long tok: “God Jehova, em i God i Gat Olgeta Strong, em i holi, em i holi, em i holi. Em Man husat i stap bipo, na husat i stap nau, na husat bai kam.”

9 Ol dispela serap i givim glori na ona na tok tenkyu long dispela Man i sindaun long sia king, em dispela Man husat i stap oltaim oltaim. Na taim ol i mekim olsem, 10 ol 24 hetman i save brukim skru klostu long Man i sindaun long sia king na ol i lotuim dispela Man husat i stap oltaim oltaim, na ol i tromoi kraun bilong ol i go klostu long sia king, na ol i tok: 11 “Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting. Na long laik bilong yu yet yu bin wokim ol na ol i stap.”