Disemba

Inap 3-pela taim, Baibel i kolim Abraham olsem pren bilong God. (2 Sto. 20:7; Ais. 41:8; Jems 2:23) Baibel i mekim dispela tok long Abraham tasol. Yu ting Abraham tasol i stap olsem pren bilong Jehova? Nogat. Baibel i soim klia olsem yumi olgeta wan wan inap kamap pren bilong God. Baibel i pulap long stori bilong ol bilipman na ol bilipmeri husat i pret long Jehova, bilip long em, na kamap pren bilong em. Aposel Pol i tok, i gat “bikpela lain manmeri ol i olsem bikpela klaut,” na olgeta i stap olsem ol pren bilong God. (Hib. 12:1) Ol dispela manmeri i gat planti gutpela pasin. Ol i kisim blesing bilong i stap olsem ol pren bilong God. Yumi mas wok yet long bihainim eksampel bilong ol long stap strong long bilip. (Hib. 6:11, 12) Taim yumi mekim olsem, yumi bai kisim gutpela blesing tru—yumi bai i stap gutpela pren bilong Jehova inap oltaim oltaim! w16.02 2:1, 2, 19

Tingim dispela tok piksa: Wanpela pren i givim yu wanpela kar olsem presen. Tasol em i tok: “Mi bai holim ki bilong kar. Mi yet bai draivim kar; yu no inap draiv.” Yu bai pilim olsem wanem? Yu ting Jehova i laik bai man i mekim wanem taim man i dediketim laip bilong em na tok: “Mi givim laip bilong mi long yu, mi bilong yu”? Olsem wanem sapos dispela man i bihainim pasin i no stret, na long pasin hait em i prenim wanpela man o meri husat i no wanbilip? Olsem wanem sapos dispela man i kisim wok mani we i pasim em long givim bel olgeta long mekim wok autim tok na kam long ol miting? Dispela pasin i olsem man i givim kar olsem presen long narapela, tasol em i no laik givim ki bilong kar. Taim man i dediket long Jehova, i olsem em i tok: “Mi putim laip bilong mi long han bilong yu. Sapos laik bilong mi i no stret wantaim laik bilong yu, orait oltaim mi bai daunim laik bilong mi na bihainim laik bilong yu.” Dispela pasin bai i stret wantaim tingting bilong Jisas, olsem i stap long skripsa teks bilong tude. w16.03 1:16, 17

Inap olsem 3 tausen yia i go pinis, profet Elaija i askim yangpela man, Elisa, long kamap wokman bilong em. Kwiktaim Elisa i tok orait long mekim dispela wok, na em i mekim gut olgeta liklik wok bilong helpim Elaija. (2 Kin. 3:11) Elisa i kisim trening inap olsem 6-pela yia, na bihain em i kisim save olsem Elaija i no inap stap moa long Israel na mekim wok profet. Long dispela taim, Elaija i stopim Elisa long bihainim em, tasol Elisa i tingting strong long stap oltaim wantaim Elaija. Sapos yu wanpela yangpela brata, olsem wanem yu inap bihainim pasin bilong Elisa? Yu mas redi long mekim olgeta kain wok insait long kongrigesen. Holim stretpela tingting long elda i trenim yu; tingim em olsem pren, na tokim em olsem yu pilim tru olgeta hatwok em i mekim bilong helpim yu. Yu mas mekim gut olgeta kain wok ol brata i askim yu long mekim. Wai na em i bikpela samting tru long yu mas mekim olsem? Taim yu soim klia olsem yu inap mekim gut asainmen bilong yu na ol narapela inap trastim yu, ol elda bai pilim olsem Jehova i laik bai ol i ken makim yu long mekim sampela wok moa insait long kongrigesen.—Sng. 101:6; 2 Tim. 2:2. w15 4/15 2:13, 14

Sol i tokim Jonatan long tingim laik bilong em yet. (1 Sml. 20:31) Tasol Jonatan i stap gut long God, olsem na em i stap yet olsem pren bilong Devit na em i no mekim ol samting bilong kisim wok king. Jonatan i “inapim ol promis em i bin mekim” long Devit, olsem na yumi tu i mas inapim ol tok promis bilong yumi. Sapos yumi insait long wok bisnis na kontrak bilong en i hatwok tumas long bihainim, pasin bilong yumi long i stap gut long God i mas kirapim yumi long inapim dispela kontrak. Olsem wanem sapos planti hevi moa i kamap insait long marit bilong yumi? Pasin bilong yumi long laikim God bai kirapim yumi long i stap gut long poroman marit. (Mal. 2:13-16) Na tu, yumi mas i stap gut long ol manmeri bilong Jehova, maski sampela bilong ol i mekim yumi bel hevi. Long dispela rot, yumi soim olsem yumi stap gut long Jehova. Taim yumi stap gut long God Jehova long taim bilong hevi, yumi bai mekim em i amamas. (Snd. 27:11) Sapos yumi stap gut long Jehova, yumi bai lukim olsem isi isi em bai mekim ol samting bilong helpim ol manmeri husat i laikim em. w16.02 3:16, 17

Jehova i save long ol samting yumi no inap long mekim. (Sng. 103:14) Olsem na em i no holim tingting olsem yumi inap karim hevi long strong bilong yumi yet, nogat, em i redi long helpim yumi olsem papa i save redi long helpim pikinini. Em tru olsem sampela taim yumi pilim olsem yumi no gat strong moa long karim ol hevi. Jehova i laik bai yumi save olsem em i no inap tru long larim ol wokman bilong em i karim hevi we i winim strong bilong ol. “Em bai wokim rot bilong helpim [yumi].” (1 Kor. 10:13) Olsem na i stret long yumi bilip tru olsem Jehova i save bihainim stretpela pasin taim em i larim ol hevi i painim yumi. Taim yumi beten long kisim helpim na yumi no kisim kwik bekim long beten bilong yumi, orait yumi mas bilip na wet long Man husat i save long taim stret bilong helpim yumi. Dispela Man i laik tru long helpim yumi, tasol em tu i bihainim pasin bilong wet. Baibel i tok long Jehova olsem: “Em i God bilong mekim stretpela pasin tasol. Olsem na em i sori long yupela na em i wet long soim marimari bilong em long yupela.” w15 4/15 4:8, 9

Long taim bilong Famili Lotu, yumi stadi long tok bilong Baibel na dispela i helpim famili long i stap wanbel. Yusim haptaim bilong Famili Lotu long prektisim ol tok bilong yusim long autim tok, na dispela bai redim famili long mekim gut wok autim tok. Taim olgeta wan wan insait long famili i kamapim tok bilong Baibel long bekim bilong ol, dispela i helpim ol long pas gut wantaim—olgeta i laikim wankain God na ol i laik tru long bihainim laik bilong em. Olsem wanem ol poroman marit inap wok bung wantaim long givim biknem long Jehova? Sapos 2-pela poroman marit wantaim i stap gut long Jehova, tupela bai i stap wanbel. Tingim Abraham na Sara, Aisak na Rebeka, na Elkana na Hana—olgeta i kamapim klia olsem ol i laikim tru poroman marit bilong ol. Yumi tu i mas tokim poroman marit olsem yumi laikim em. (Stt. 26:8; 1 Sml. 1:5, 8) Dispela bai helpim yumi long i stap wanbel wantaim poroman marit bilong yumi na yumi bai pas gut moa wantaim Papa bilong yumi long heven.—Sav. 4:12. w16.03 3:12, 13

Satan i pait long liklik hap lain bilong ol Kristen God i bin makim em ol i stap yet long graun, na “ol arapela sipsip.” (Jon 10:16) Satan i gat sotpela taim tasol, olsem na em i tingting strong long daunim planti wokman bilong Jehova. (Rev. 12:9, 12) Yu ting yumi inap daunim Satan na winim pait? Yes! Baibel i tok: “Yupela i mas sakim Satan, na em bai lusim yupela na ranawe.” (Jems 4:7) Planti man i ting Satan i no stap tru. Ol i ting Satan na ol ensel nogut i olsem ol lain insait long ol stori nating bilong ol buk, ol muvi, na ol vidio gem. Ol i ting ol longlong man tasol i bilip olsem ol spirit nogut i stap. Yu ting Satan i bel hevi olsem ol man i holim dispela tingting? Nogat tru! Satan i amamas, long wanem, dispela em rot bilong em long pasim tingting bilong ol manmeri. (2 Kor. 4:4) Satan i yusim planti rot long giamanim ol man, na wanpela rot em olsem: Em i kirapim ol long holim tingting olsem ol spirit nogut i no stap tru. w15 5/15 2:1, 2

Ating papamama tru bilong Moses i skulim em long Jehova na tokim em olsem God i tingting pinis long kisim bek lain Israel long kalabus na bringim ol i go long Graun Bilong Promis. (Stt. 13:14, 15; Kis. 2:5-10) Taim Moses i tingim tingim tok promis bilong Jehova long kisim bek lain Israel, dispela i strongim bilip bilong em na em i laikim God moa yet. Wankain olsem ol arapela manmeri husat i lotuim God, ating Moses i piksaim wanpela haptaim we Jehova bai kisim bek ol manmeri long kalabus bilong dai. (Jop 14:13-15; Hib. 11:17-19) Olsem na Moses i laikim tru God, em Man husat i soim pasin sori long lain Israel na olgeta lain manmeri. Bilip na pasin laikim i stiaim ol samting Moses i mekim long laip olgeta bilong em. (Lo 6:4, 5) Taim Fero i tok long kilim Moses i dai, Moses i no pret na surik, nogat. Em i sanap strong, long wanem, em i gat pasin bilong bilip, laikim tru God, na em i piksaim ol gutpela samting bai kamap bihain.—Kis. 10:28, 29. w15 5/15 3:11-13

Jisas i wokim fes mirakel bilong em taim em i stap long wanpela marit kaikai long Kana, em wanpela ples long Galili. Ating planti man tru i kam long dispela bung. Long taim bilong dispela kaikai, wain i pinis. Maria, em mama bilong Jisas, em i stap tu long dispela bung. Inap planti yia, Maria i tingim tingim olgeta tok profet i stori long pikinini bilong em, na em i save olsem ol bai kolim Jisas olsem “Pikinini bilong God Antap Tru.” (Luk 1:30-32; 2:52) Yu ting em i bilip olsem Jisas i gat strong bilong wokim mirakel? Long Kana, Maria na Jisas i sori long tupela nupela marit na ol i no laik bai dispela tupela marit i pilim sem. Jisas i save olsem em stretpela pasin long mekim gut long ol narapela. Olsem na Jisas i wokim mirakel na tanim 380 lita wara i kamap “gutpela wain.” (Jon 2:6-11) Yu ting em wok bilong Jisas long wokim mirakel? Nogat. Jisas i tingim tru ol manmeri na em i bihainim pasin bilong Papa long heven na givim ol samting long ol narapela. w15 6/15 1:3

Paslain long Jisas i go long heven, ol aposel i givim em askim em teks bilong nau i kolim. Bekim bilong Jisas i soim olsem, taim i no kamap yet long ol disaipel bai save long wanem taim Kingdom Bilong God bai kirap mekim wok. Em i tokim ol disaipel long putim tingting i go long bikpela wok ol i mas mekim, em wok bilong autim tok. (Apo. 1:7, 8) Tasol Jisas i skulim ol long putim tingting i go long taim we Kingdom Bilong God bai kirap long mekim wok. Olsem na kirap long taim bilong ol aposel na i kam inap long nau, ol Kristen i save beten long Kingdom i mas i kam. Klostu long taim we Jisas bai kirap mekim wok king long Kingdom Bilong God long heven, Jehova i helpim lain bilong em long kliagut long wanem taim ol samting bai kamap. Long 1876, Charles Taze Russell i raitim wanpela atikol long wanpela nius bilong Baibel (Bible Examiner). Het tok bilong dispela atikol em, “Taim Bilong Ol Arapela Lain: Wanem Taim Em Bai Pinis?” Atikol i tok, 1914 em wanpela spesel yia. Na tu, em i tok, “7-pela yia” em Daniel i kolim long tok profet i wankain long “haptaim bilong ol manmeri bilong ol arapela lain” em Jisas i tok long en.—Dan. 4:16; Luk 21:24. w15 6/15 4:11, 12

Jisas i pilim tru pen na hevi bilong ol narapela. Taim ol narapela i bel sori na krai long dai bilong Lasarus, em pren bilong Jisas, dispela i mekim “bel bilong [Jisas] i sori tru na em i wari.” Em i sori long ol maski em i save olsem klostu nau em bai kirapim bek Lasarus. (Jon 11:33-36) Jisas i no sem long soim bel sori bilong em. Ol manmeri inap luksave olsem Jisas i laikim tru Lasarus na famili bilong em. Jisas i soim pasin sori taim em i yusim strong i kam long God long kirapim bek pren bilong em! (Jon 11:43, 44) Baibel i kolim Jisas olsem “piksa tru bilong [God].” (Hib. 1:3) Long rot bilong ol mirakel, Jisas i kamapim klia olsem em na Papa bilong em i laik tru long pinisim hevi bilong sik na dai. Olsem na Papa i givim strong long Jisas na em i kirapim bek 3-pela lain em Baibel i stori long ol, tasol bikpela samting moa bai kamap long bihain. Jisas i tok: “Taim i laik kamap na olgeta man i stap long memorial matmat ol bai . . . kam ausait.”—Jon 5:28, 29. w15 6/15 2:13, 14

Ol manmeri bilong sampela lotu i ting olsem ol bai givim biknem long God taim ol i lusim graun na i go long heven. Tasol olgeta Witnes Bilong Jehova i luksave olsem ol i mas givim biknem long God long nau yet taim ol i stap hia long graun. Yumi bihainim wankain pasin olsem ol gutpela wokman bilong Jehova i bin mekim, na Song 99:1-3, 5 i stori long en. Olsem Buk Song i stori long en, Moses, Aron, na Samuel i bin givim bel olgeta long sapotim ol wok insait long lotu i tru. (Sng. 99:6, 7) Long nau, hap lain bilong ol Kristen God i bin makim i helpim wok bilong lotu i tru hia long graun, na bihain ol bai i go long heven na mekim wok pris wantaim Jisas. Planti milion manmeri bilong lain “arapela sipsip” i helpim ol. (Jon 10:16) Ol Kristen God i bin makim bai kisim laip long heven, na ol “arapela sipsip” bai kisim laip long graun, tasol 2-pela lain wantaim i lotuim Jehova hia long graun. Tasol yumi olgeta wan wan i ken askim yumi yet olsem, ‘Mi givim bel olgeta long sapotim ol wok insait long lotu i tru?’ w15 7/15 1:4, 5

Kirap long bipo yet i kam inap long nau, ol wokman bilong Jehova i bilip na wet long lukim truim bilong ol tok promis em God i bin mekim. Aisaia i tok profet olsem Jehova bai stretim bek taun Jerusalem bihain long bagarap i painim Juda, na em i tok: “Ol manmeri i bilip long Bikpela na i wetim em i helpim ol, ol i ken amamas.” (Ais. 30:18) Maika tu i bin tok profet long ol samting bai kamap long ol manmeri bilong God long bipo, na em i tok: “Mi yet mi bilip long Bikpela.” (Mai. 7:7) Inap planti handret yia, ol wokman bilong God i bilip na wet long lukim truim bilong ol tok profet i stori long Mesaia, em Krais. (Luk 3:15; 1 Pita 1:10-12) Ol wokman bilong God long nau tu i bilip na wet long lukim truim bilong ol tok profet i stori long Mesaia, long wanem, truim bilong ol i wok yet long kamap long nau. Dispela graun i stap aninit long strong bilong Satan, olsem na ol man nogut i wok long givim hevi long ol manmeri. (1 Jon 5:19) Tasol klostu nau, Jehova bai yusim Kingdom Bilong Mesaia long pinisim olgeta man nogut na kisim bek ol manmeri bilong em. Olsem na yumi mas was i stap na luksave olsem pinis bilong dispela haptaim bilong nau i wok long i kam klostu tru. w15 8/15 2:1, 2

Jehova i tokim lain Israel long wokim haus lotu sel. (Kis. 25:8) Bihain, ol i wokim tempel bilong bung long en na lotuim Jehova. (1 Kin. 8:27, 29) Taim ol Juda i lusim kalabus long Babilon na i go bek long asples bilong ol, olgeta taim ol i save bung long ol sinagog long mekim lotu. (Mak 6:2; Jon 18:20; Apo. 15:21) Long taim bilong ol aposel, ol Kristen i save bung long haus bilong narapela narapela insait long kongrigesen. (Apo. 12:12; 1 Kor. 16:19) Long nau, ol manmeri bilong Jehova i save bung long kisim skul na mekim lotu, na ol i bung long planti tausen Haus Kingdom long olgeta hap bilong graun. Jisas i laikim tru tempel bilong Jehova long Jerusalem. Olsem na man bilong raitim Gutnius i tok, pasin bilong Jisas i stret wantaim tok profet i stap long teks bilong tude. (Sng. 69:9) Long bipo, tempel long Jerusalem i gat nem olsem “haus bilong Bikpela,” tasol dispela nem i no stap long ol Haus Kingdom long nau. (2 Sto. 5:11-13; 33:4) Maski i olsem, Baibel i gat ol tok bilong stiaim yumi long rispektim ol Haus Kingdom na bihainim stretpela pasin. w15 7/15 4:1, 2

Long nupela taim, yumi bai soim pasin laikim long narapela narapela, o nogat? Sapos yumi amamas long fogivim ol narapela na pas gut wantaim ol, orait long nupela taim em bai isi long yumi kamapim dispela pasin. (Kol. 3:12, 13) Long nupela taim, ating sampela taim yumi no inap kisim ol samting yumi laikim. Tasol yumi kisim ol blesing taim yumi stap daun long gutpela wok bos bilong Jehova, olsem na yumi mas i gat pasin bilong tok tenkyu na stap belgut. Dispela i makim olsem yumi mas bihainim ol pasin em Jehova i skulim yumi long bihainim long nau. Sapos yumi bihainim ol pasin em yumi bai bihainim long nupela taim, yumi kamapim ol pasin em yumi bai bihainim i go inap oltaim oltaim. Yumi strongim bilip bilong yumi long “dispela graun bai kamap bihain.” (Hib. 2:5; 11:1) Na tu, yumi soim klia olsem yumi laik tru long lukim stretpela pasin we bai i stap long nupela taim. Yumi redim yumi yet long kisim laip oltaim long nupela taim em God bai kamapim. w15 8/15 3:11, 12

Taim yu skelim ol prut long maket, olgeta bilong ol i no luk wankain. Tasol wanpela samting long ol i wankain—olgeta i mau. Olsem tasol, ol Kristen i gat kain kain krismas, helt, sindaun, na ol i kam long narapela narapela kantri, na ol i gat kain kain ekspiriens long laip. Na tu, pasin bilong ol na kalsa bilong ples i no wankain. Tasol ol i gat ol pasin i soim klia olsem ol i kamap man i bikpela pinis long sait bilong bilip. Man husat i wok strong long mekim wok bilong Jehova, em i bihainim eksampel bilong Jisas, long wanem, Jisas “i stap olsem gutpela piksa bai [yumi] ken bihainim gut lek mak bilong en.” (1 Pita 2:21) Jisas i tok em i bikpela samting tru long yumi mas mekim wanem? Yumi mas laikim Jehova long bel olgeta, laip olgeta, tingting olgeta bilong yumi, na yumi mas laikim ol arapela man olsem yumi laikim yumi yet. (Mat. 22:37-39) Strongpela Kristen i save wok hat long bihainim dispela stiatok. Em i bihainim pasin we i soim olsem em i tingim tru pasin bilong pas gut wantaim Jehova, na em i redi long daunim laik bilong em yet na helpim ol narapela. w15 9/15 1:3-5

Sapos yumi skulim gut maus bilong bel, dispela bai stiaim yumi long sakim ol pasin nogut, na mekim ol gutpela wok. Nambawan gutpela wok em long raun long haus bilong ol man na autim tok, na tu, yumi bai autim tok long olgeta kain taim na ples. Maus bilong bel i kirapim Pol long mekim olsem. Em i tok: “Em wanpela wok mi mas mekim. Tru tumas, sapos mi no autim gutnius, bai mi stap nogut tru!” (1 Kor. 9:16) Taim yumi bihainim pasin bilong Pol, maus bilong bel bai helpim yumi long save olsem yumi mekim gutpela wok. Taim yumi autim gutnius na ol man i putim yau, dispela bai kirapim ol long bihainim stretpela pasin. Maus bilong bel bai helpim tru yumi. Sapos oltaim yumi stadi long Baibel, tingim tingim ol samting yumi lainim, na yumi wok strong long bihainim ol dispela tok, i olsem yumi trenim maus bilong bel. Maus bilong bel bai i stap olsem samting i dia tumas na i helpim yumi long laip bilong yumi olsem ol disaipel bilong Krais! w15 9/15 2:16, 18

Baibel i stori gut long planti liklik samting em Josep, Moses, na Devit i mekim, na dispela i narapela kain long stori bilong ol narapela bilipman. Taim yumi ritim stori bilong ol long olsem wanem Jehova i sambai long ol long taim bilong hevi, na Jehova i yusim ol long mekim ol bikpela wok, dispela i helpim yumi long pilim tru pasin bilong Jehova long laikim na tingim tru ol wokman bilong em. Taim Jehova i stretim yumi, dispela i helpim yumi long luksave long narapela pasin bilong em. Taim ol man i mekim rong na Jehova i stretim ol na ol i tanim bel, “em i save lusim sin” bilong ol. (Ais. 55:7) Wanem mining bilong dispela tok? Devit i stori gut long pasin bilong Jehova long fogivim rong na em i tok: “Em i save lusim olgeta sin bilong mi, na em i save mekim orait olgeta sik bilong mi. Bikpela i kisim bek mi na mi no i dai. Em i save marimari na sori moa yet long mi.” (Sng. 103:3, 4) Taim Jehova i givim skultok na tok bilong stretim yumi, oltaim yumi mas redi long kisim ol dispela tok. Yumi mas luksave olsem em i givim ol dispela tok, long wanem, em i laikim tru yumi.—Sng. 30:5. w15 9/15 4:13, 14

Marta i bisi long redim naispela kaikai bilong Jisas, na em i belhat long Maria. Jisas i lukim olsem Marta i laik mekim planti wok tumas, olsem na long gutpela pasin, em i tok: “Marta, Marta, yu tingting planti na wari long planti samting.” Em i tokim Marta olsem, sapos em i redim kaikai inap long 1-pela dis tasol, dispela bai inap long ol. Orait, Jisas i tanim na lukluk long Maria na mekim tok bilong soim olsem Maria i no mekim wanpela rong, na em i tok: “Maria i bin makim gutpela samting long mekim, na dispela samting i no inap tekewe long em.” (Luk 10:38-42) Bihain, ating Maria bai lusim tingting long kaikai em i kisim long dispela taim, tasol em i no inap lusim tingting long gutpela tok amamas em Jisas i bin givim long em. Winim 60 yia bihain, aposel Jon i tok: “Jisas i laikim tru Marta na susa bilong en.” (Jon 11:5) Dispela tok i soim olsem Marta i bihainim tok bilong Jisas, na em i givim bel tru long mekim wok bilong Jehova long laip olgeta bilong em. w15 10/15 3:3, 4

Planti samting i kamapim ples klia olsem Jehova i helpim ol manmeri long nau. Planti taim yumi harim ekspiriens bilong man i beten long kisim helpim long sait bilong bilip, na ol samting i kamap stret olsem em i beten long en. (Sng. 53:2) Allan em wanpela brata long Filipins. Wanpela taim em i autim tok long wanpela liklik ailan na em i bungim wanpela meri, na dispela meri i krai. Allan i tok: “Long moning, dispela meri i beten askim Jehova long opim rot na ol Witnes inap bungim em. God i bekim kwik beten bilong em, olsem na em i krai.” Insait long wanpela yia, em i dediketim laip bilong em long Jehova. Planti wokman bilong God i luksave olsem God i helpim ol taim ol i lusim ol pasin nogut we i kalabusim ol, olsem pasin bilong smok, kisim drak, o lukim ponografi. Sampela i tok, planti taim ol i traim long yusim strong bilong ol yet long lusim ol dispela pasin, tasol ol i hatwok long lusim. Tasol taim ol i askim Jehova long helpim ol, Em i givim “strong i winim strong bilong yumi ol man,” olsem na ol inap lusim ol pasin nogut bilong ol.—Sng. 37:23, 24. w15 10/15 1:10, 11

Sampela i save kirap long moning na rit, tingim tingim ol samting ol i ritim, na beten. Sampela i mekim olsem long taim bilong belo. Yu inap mekim olsem long apinun o paslain long yu slip. Sampela i save amamas long ritim Baibel long moning na long nait, paslain long ol i slip. I olsem ol i bihainim tok bilong Baibel long “ritim . . . [buk bilong Lo] long san na long nait,” o long olgeta taim. (Jos. 1:8, NW) Sapos long olgeta de yumi save mekim sampela liklik samting, orait mobeta yumi lusim ol dispela samting na yusim dispela haptaim long tingim tingim Tok Bilong God. Planti skripsa i soim klia olsem God bai blesim ol manmeri husat i tingim tingim Tok Bilong God na wok strong long bihainim. (Sng. 1:1-3) Jisas i tok: “Ol man i harim tok bilong God na bihainim, ol i ken amamas!” (Luk 11:28) Long olgeta de, taim yumi tingim tingim wok lotu bilong yumi, dispela bai kirapim yumi long givim ona long Man i wokim naispela kru bilong yumi. Em bai helpim yumi long i stap amamas long nau na kisim laip oltaim long nupela taim we stretpela pasin tasol bai i stap long en.—Jems 1:25; Rev. 1:3. w15 10/15 4:17, 18

Aposel Pita i laik helpim Jisas, olsem na em i tokim Jisas long marimari long em yet na bai ol birua i no ken kilim em i dai. Tasol Jisas i skelim tok bilong Pita na em i luksave olsem Pita i holim tingting kranki. Jisas i laik helpim Pita na ol narapela disaipel, olsem na em i givim tok kaunsel, na em i kolim ol hevi bai painim man husat i tingim laik bilong em yet, na em i kolim ol blesing bai painim man husat i daunim laik bilong em yet. (Mat. 16:21-27) Pita i kisim skul long tok Jisas i mekim. (1 Pita 2:20, 21) Yu ken beten askim Jehova long givim yu savetingting bambai yu inap kliagut long ol samting yu ken mekim bilong helpim tineja. (Sng. 32:8) Hau bai yu luksave olsem pikinini i wok long kamap slek long bilip? Ating em i no amamas moa, o em i mekim kain kain tok bilong daunim ol bratasista, o em i mekim ol samting long pasin hait. No ken hariap long kisim tingting olsem pikinini i hait long yu na em i mekim bikpela rong. Na tu, no ken ting olsem ol samting pikinini i mekim i stret tasol. w15 11/15 2:12, 13

Ol manmeri husat i lotuim Jehova, ol i laikim tru narapela narapela na ol i stap wanbel, na dispela i soim klia olsem ol i bihainim lotu i tru. Jisas i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:34, 35) Aposel Jon i tok: “Samting i kamapim klia husat ol i pikinini bilong God na husat ol i pikinini bilong Satan i olsem: Olgeta man husat i no bihainim stretpela pasin ol i no stap long sait bilong God, na ol man i no laikim brata bilong ol, ol tu i no stap long sait bilong God. Long wanem dispela em tok yupela i harim long pastaim, olsem yumi mas laikim tru narapela narapela.” (1 Jon 3:10, 11) Pasin laikim i kirapim ol Witnes Bilong Jehova long i stap wanbel tru. Dispela i soim klia olsem ol i disaipel tru bilong Krais, na God i yusim ol long inapim laik bilong em long autim gutnius bilong Kingdom long olgeta hap bilong graun.—Mat. 24:14. w15 11/15 4:10, 11

Kalsa na lotu bilong ol manmeri i narapela narapela, olsem na yumi mas bihainim savetingting na makim taim i stret long toktok. Sampela taim, ating wanpela man i laik helpim yumi, tasol tok bilong em inap bagarapim tru bel bilong yumi. Yumi mas lusim sampela haptaim long skelim sapos i gutpela long yumi mekim sampela tok, o nogat. I no gutpela sapos yumi toktok long dispela man taim yumi bel hevi, long wanem, yumi no inap tingting gut na toktok. (Snd. 15:28) Na tu, yumi mas bihainim savetingting taim yumi laik autim tok long ol wanblut em ol i no Witnes. Yumi laik bai ol i kisim save long Jehova, tasol yumi mas i gat pasin bilong i no les kwik. Sapos yumi makim taim i stret long toktok na yumi mekim ol tok i stret, dispela bai kirapim laik bilong ol long putim yau long tok bilong yumi. w15 12/15 3:6, 8, 9

Sapos wanpela man i stori long sik bilong yu na rot bilong stretim dispela sik, tasol stori bilong em i paul nabaut, orait long kain taim olsem yu mas “bihainim gutpela tingting.” Yu ting dispela man i save gut long olsem wanem dispela marasin bai oraitim sik bilong yu? Yu ting stori bilong em i stret wantaim tok bilong ol dokta na nes? (Snd. 22:29) O yu ting em i laik kirapim nating tingting bilong yu? Ating em i tok olsem ol i painimaut na yusim dispela marasin long wanpela liklik ples i stap longwe long taun na ol saveman i no painimaut yet long dispela marasin. Yu ting dispela kain tok i stret na yumi mas bilipim? Taim man i laik painimaut sik bilong yu, em inap yusim sampela samting em ol i tok ol man i no ken save long en. Taim ol i stori long marasin bilong stretim sik, ol bai tok olsem bodi bilong yu yet i gat strong long yusim dispela marasin. Yumi mas was gut tru sapos yumi harim kain tok olsem, long wanem, God i tok yumi mas sakim “kain kain posin” na “olkain pasin bilong glasman.”—Wkp. 19:26; Lo 18:10-12. w15 12/15 4:16

Long Baibel, yumi kisim save long planti bilipman em holi spirit i bin stiaim ol, tasol ol i no holim tingting bilong kisim laip long heven. Wanpela bilong ol dispela bilipman em Jon Bilong Baptais. Jisas i bin givim biknem long em, tasol em i tok Jon i no inap mekim wok king long Kingdom bilong heven. Devit tu em wanpela man em holi spirit i bin stiaim em. (1 Sml. 16:13) Em i gat strongpela bilip, na tu, em i bin raitim sampela hap bilong Baibel. (Mak 12:36) Tasol long taim bilong Pentikos, Pita i tok: “Devit i no bin i go long heven.” (Apo. 2:34) Holi spirit i bin stiaim ol dispela bilipman long mekim ol strongpela wok, tasol holi spirit i no strongim tingting bilong ol olsem ol bai kisim laip long heven. Dispela i no makim olsem ol i no fit long mekim wok, nogat. Jehova bai kirapim bek ol na ol bai kisim laip long ples paradais long graun.—Jon 5:28, 29; Apo. 24:15. w16.01 3:16

Taim yumi wok wantaim ol lain yumi laikim, dispela bai helpim yumi long pas gut moa wantaim ol na save gut long ol pasin bilong ol. Yumi bai kisim save long samting ol i tingting pinis long kamapim na rot ol bai bihainim long kamapim dispela samting. Jisas i bin wok wantaim Jehova inap planti bilion yia, na tupela i gat strongpela pasin laikim i stap namel long tupela. Tupela i stap wanbel tru, na wok gut wantaim. Jisas i beten na askim Jehova long lukautim ol disaipel bilong em. Bilong wanem Jisas i mekim olsem? Em i tok: “Ol i ken i stap wanpela olsem mitupela i stap wanpela.” (Jon 17:11) Taim yumi bihainim ol lo bilong God na mekim wok autim tok, yumi bai kisim save long ol gutpela pasin bilong em. Yumi kisim save olsem taim yumi trastim em na bihainim tok bilong em, dispela bai helpim yumi. Taim yumi go klostu long God, em bai kam klostu long yumi. (Jems 4:8) Na tu, yumi bai i go klostu long ol bratasista bilong yumi bikos yumi bungim wankain hevi na kisim wankain amamas, na yumi gat wankain mak yumi laik winim. w16.01 5:9, 10

Naomi i tingting strong long i go bek long ples bilong em long Israel. Rut i stap yet wantaim em, na em bai mekim wanpela bikpela disisen. Rut bai i go bek long ples na lain bilong em long Moap, o em bai bihainim tambu mama bilong em Naomi na i go long Betlehem. (Rut 1:1-8, 14) Rut inap kisim tingting olsem em i gat famili long Moap—mama na ol narapela wanblut bai lukautim em. Moap em asples bilong em. Kalsa bilong Moap em kalsa bilong em, tokples bilong Moap em tokples bilong em, na lain Moap em lain bilong em. Naomi inap tokim Rut olsem kalsa, tokples, na ol manmeri long Betlehem bai i no wankain long Moap. Olsem na Naomi i tokim Rut long i go bek long Moap. Naomi i tingting planti, long wanem, em i no inap kamapim ol pikinini man bilong maritim Rut na Orpa. Na tu, em i no inap painim wanpela haus em ol tambu meri bilong em inap i stap long en. Rut bai mekim wanem? Tingim: Orpa i “go bek long lain bilong en na long god bilong ol tumbuna bilong en.” (Rut 1:9-15) Olsem wanem? Rut i tingting long i go bek long ol god giaman bilong lain bilong em? Nogat. w16.02 2:4, 5

Long biknait tru, Devit na Abisai i wokabaut isi isi i go namel long kem bilong 3 tausen soldia em ol i slip i stap. Taim ol i kamap namel long kem, ol i lukim olsem King Sol i slip i dai. King Sol i kam long ples drai nating bilong Judia bilong painim Devit na kilim em i dai. Abisai i toktok isi na i tok: “Larim mi sutim [Sol] long spia bilong em yet. Bai mi sutim em wanpela taim tasol na bai em i dai pinis. Mi no ken sutim em tupela taim.” Tasol Devit i holim narapela tingting! Em i tok: “Maski, yu no ken bagarapim em. Long wanem, Bikpela i bin makim Sol i kamap king, na sapos wanpela man i bagarapim Sol, orait bai Bikpela yet i mekim save long dispela man. . . . Bikpela i no ken larim mi i bagarapim dispela king em i bin makim.” (1 Sml. 26:8-12) Devit i save long ol samting em i mas mekim bilong soim olsem em i stap gut long God. Em i no tingting long bagarapim Sol bikos God yet i makim Sol long kamap king bilong Israel. Ol man i stap gut long Jehova, ol i save rispektim ol man em God i makim ol long mekim wok. Jehova i laik bai olgeta manmeri bilong em i stap gut long em na “i no lusim [em].” w16.02 4:1, 2

Olsem wanem? Yu wanpela yangpela husat i laik kisim baptais? Sapos olsem, dispela bai opim rot long yu long kisim gutpela blesing tru. Disisen bilong kisim baptais em i bikpela samting. Baptais i makim olsem yu dediket pinis long Jehova—yu mekim strongpela promis olsem yu bai putim laik bilong em i stap namba 1 winim olgeta narapela samting long laip bilong yu, na yu bai mekim wok bilong em inap oltaim oltaim. Olsem na yu inap kisim baptais sapos yu redi long mekim dispela disisen, na yu yet i gat laik long mekim olsem, na yu kliagut long ol samting yu mas mekim taim yu dediket long God. Olsem wanem? Yu gat 2-pela tingting long kisim baptais? Papamama i laik bai yu wet liklik inap long yu kisim sampela ekspiriens moa long bihainim pasin Kristen? Sapos olsem, orait yu no ken givap. Yu ken yusim dispela haptaim long winim sampela mak bambai yu inap kisim baptais. w16.03 2:1, 2

Sampela manmeri i bin marit pinis na bihain ol i kisim save long tok i tru, na poroman marit bilong ol i no wanpela Witnes. Maski i olsem, sapos poroman marit i bihainim ol stiatok bilong Baibel, dispela inap helpim famili long pas gut wantaim. Kristen i ken wok bung wantaim poroman marit bilong em, tasol em i no ken mekim ol samting em Baibel i tambuim. Ating Kristen bai pilim hatwok long mekim olsem, tasol em i ken tingim ol gutpela blesing em bai kisim. Satan i birua tru long ol famili long nau, olsem na em i bikpela samting long ol wokman bilong God i mas wok bung wantaim insait long marit. Maski yu bin marit inap hamas yia, tingim gut ol tok na ol pasin yu inap mekim bilong strongim marit bilong yu. Yupela ol poroman marit husat i kamap lapun, yupela i ken strongim ol yangpela marit insait long kongrigesen. Sampela taim yupela i ken singautim tupela yangpela marit long kam long haus bilong yupela na stap wantaim yupela long taim bilong Famili Lotu. Ol bai luksave olsem em i bikpela samting long tupela poroman marit i mekim ol tok na pasin i soim klia olsem ol i laikim tru narapela narapela, maski ol i marit inap hamas yia.—Tai. 2:3-7. w16.03 3:14, 15