Disemba

Wanpela gutpela pasin bilong Jisas em olsem, em inap pilim tru ol hevi i painim yumi. Taim Jisas i stap long graun, em i “amamas wantaim ol man i amamas, na krai wantaim ol man i krai.” (Rom 12:15) Taim 70 disaipel bilong Jisas i go autim tok na ol i amamas wantaim na kam bek, Jisas tu i “amamas na holi spirit i pulap long em.” (Luk 10:​17-21) Taim Lasarus i dai na susa bilong em, Maria i krai, “bel bilong [Jisas] i sori tru na em i wari.” (Jon 11:33) Jisas i gutpela olgeta, tasol em i sori tru na pilim hevi bilong ol manmeri. Wanem samting i kirapim Jisas long pilim olsem? Em i laikim tru ol manmeri. “Samting i givim bikpela amamas long [Jisas], em ol manmeri.” (Prov. 8:31) Dispela pasin laikim i kirapim em long save gut long tingting tru bilong ol. Aposel Jon i tok: “Em yet i save long bel bilong ol.”—Jon 2:25. w19.03 20 par. 1-2

Satan i kirapim ol birua long stilim ol animal bilong Jop, kilim i dai ol wokman bilong em, na bagarapim gutnem bilong em. Satan i kamapim bagarap we i kilim i dai olgeta 10-pela pikinini bilong Jop. Na tu, em i kamapim ol strongpela boil nogut long bodi bilong Jop, kirap long het na i go daun olgeta long lek. Meri bilong Jop i bel hevi na bel sori wantaim, olsem na em i tokim Jop long givap, na tok nogut long God na bai em i ken i dai. Jop i pilim olsem em i laik dai, tasol em i stap gut yet long God. Olsem na Satan i yusim narapela rot bilong traim Jop. Em i yusim 3-pela pren bilong Jop. Ol i visitim Jop, na inap sampela de ol i sindaun tasol na ol i no mekim wanpela tok. Ol i no pilim hevi bilong em. Ol i kros na sutim tok long em. Ol i tok God i kamapim ol dispela hevi na em i no tingim pasin bilong Jop long i stap gut long em. Ol i tok Jop em man nogut na i stret long ol dispela hevi i painim em!—Jop 1:13-22; 2:7-11; 15:4, 5; 22:3-6; 25:4-6. w19.02 4 par. 7-8

Sampela kain pasin bilong pret inap lukautim yumi. Yumi mas pret long mekim ol samting em Jehova i no orait long en. Adam na Iv i no kisim dispela pasin. Sapos tupela i bin kisim dispela pasin, ol i no inap bikhet long Jehova. Tasol tupela i bikhet, na bihain ol i luksave olsem ol i mekim rong. Pasin bikhet bilong ol i kamapim sin na dai long ol pikinini bilong ol. Taim ol i luksave olsem ol i stap as nating, ol i sem na ol i karamapim ol yet. (Stt. 3:7, 21) I stret long yumi pret long mekim ol samting Jehova i no laikim, tasol i no stret long yumi pret long dai. Jehova i stretim rot pinis long yumi inap kisim laip oltaim. Maski sapos yumi mekim rong, taim yumi tanim bel tru na bilip long ofa bilong Jisas long baim bek yumi, Jehova bai fogivim yumi. Nambawan rot bilong kamapim bilip bilong yumi em long dediketim laip bilong yumi long God na kisim baptais.—1 Pita 3:21. w19.03 5-6 par. 12-13

Planti gutpela samting i kamap long lain Israel na i stret long ol i soim tenkyu bilong ol. Ol i lusim kalabus bihain long Jehova i kamapim Tenpela Bikpela Hevi long Isip. God i helpim ol long abrusim bagarap taim em i pinisim lain ami bilong Isip long Solwara Retsi. Lain Israel i belgut long ol i winim pait, na ol i singim ol song bilong preisim Jehova. Tasol olsem wanem? Ol i holim yet pasin bilong tok tenkyu? Taim lain Israel i bungim ol nupela hevi, kwiktaim ol i lusim tingting long olgeta gutpela samting Jehova i bin mekim bilong helpim ol. Ol i lusim pasin bilong tok tenkyu. (Sng. 106:7) Ol i mekim wanem? “Olgeta manmeri bilong Israel i kirap toktok planti long Moses na Aron”—i olsem ol i toktok planti long Jehova. (Kis. 16:2, 8) God i bel hevi tru long pasin ol i mekim. Olsem na em i tok jeneresen olgeta bilong ol bai dai long ples nating—Josua na Kalep tasol bai stap laip.—Nam. 14:​22-24. w19.02 17 par. 12-13

Jisas i no mekim bikpela kaikai na bai ol man i givim biknem long em, nogat. Em i tokim ol disaipel long mekim wankain liklik bung long olgeta yia bilong tingim dai bilong em. (Jon 13:15; 1 Kor. 11:23-25) Dispela liklik bung i soim olsem Jisas i gat pasin daun. Yumi ken amamas olsem pasin daun em wanpela bikpela pasin bilong King bilong yumi long heven. (Fili. 2:​5-8) Olsem wanem yumi inap bihainim pasin daun bilong Jisas? Yumi mas tingim laik bilong ol narapela na no ken tingim tasol laik bilong yumi yet. (Fili. 2:3, 4) Tingim gen laspela nait bilong Jisas long graun. Em i save olsem em bai karim bikpela pen na i dai; tasol em i tingim moa yet ol aposel bikos ol bai krai na bel sori long em. Olsem na em i skulim, strongim, na mekim isi bel bilong ol. (Jon 14:25-31) Jisas i daunim em yet na tingim ol narapela, na em i no tingim em yet. Em i soim gutpela eksampel tru yumi ken bihainim! w19.01 21 par. 5-6

Olsem wanem? Yu save bel sut taim yu laik apim han na bekim tok? Ol narapela tu i save pilim olsem. Planti bilong yumi i save pret taim yumi bekim tok. Dispela kain pret em gutpela bikos em i makim olsem yu gat pasin daun na yu holim tingting olsem ol narapela i winim yu. Jehova i laikim man i gat pasin daun. (Sng. 138:6; Fili. 2:3) Tasol Jehova i laik bai yu litimapim nem bilong em na strongim ol bratasista long taim bilong miting. (1 Tes. 5:11) Em i laikim yu na em bai strongim yu. Skelim sampela stiatok bilong Baibel. Yumi olgeta i save popaia long ol tok yumi mekim na wei bilong yumi long tromoi tok. (Jems 3:2) Jehova na ol bratasista i save olsem sampela taim yumi bai popaia. (Sng. 103:12-14) Ol bratasista i stap olsem famili bilong yumi na ol i laikim yumi. (Mak 10:29, 30; Jon 13:35) Ol i save olsem sampela taim yumi popaia na kolim ol tok yumi no minim long kolim. w19.01 8 par. 3; 10-11 par. 10-​11

Long nau, i hatwok long mekim olsem. Tasol yu inap mekim. Jehova i laik bai yu stap amamas na olgeta samting yu mekim i ken kamap gutpela. God inap helpim yu long taim yu yangpela yet na long laip olgeta bilong yu. Tingim skul yumi inap kisim long stori bilong lain Israel i kisim Graun Bilong Promis. Taim lain Israel i go klostu long Graun Bilong Promis, God i no tokim ol long mekim trening bilong pait, nogat. (Lo 28:1, 2) Em i tokim ol long bihainim tok bilong em na trastim em. (Jos. 1:7-9) Long tingting bilong ol man, dispela kain edvais i no stret long kain taim olsem! Tasol dispela em nambawan gutpela edvais bikos Jehova i helpim ol manmeri bilong em long winim planti pait na daunim lain Kenan. (Jos. 24:11-13) Tru tumas, yumi mas i gat bilip bambai yumi inap bihainim tok bilong God. Kirap long bipo yet na i kam inap long nau, oltaim bilip i save kamapim gutpela samting. w18.12 25 par. 3-4

Sampela wanbilip i no amamas long ol senis i kamap long save bilong yumi long tok bilong Baibel. Ol narapela i joinim ol apostet na ol birua husat i mekim ol tok giaman bilong paulim bilip bilong yumi. Olsem na long laik bilong ol yet, ol i “lusim” Jehova na kongrigesen. (Hib. 3:12-14) Sapos ol i bin holim stretpela tingting, ol bai bilip na stap gut yet long Jisas, wankain olsem aposel Pita i bin mekim! Isi isi sampela i lusim tok i tru na ating ol i no luksave long dispela samting. Ol i olsem bot i trip isi isi na lusim nambis. Baibel i tok, “isi isi [ol i] lusim bilip.” (Hib. 2:1) Sampela man i lusim tok i tru long laik bilong ol yet. Tasol sampela i trip isi isi i go longwe long Jehova na ol i no luksave olsem dispela inap bagarapim pasin bilong ol long pas gut wantaim Jehova. w18.11 9 par. 5-6

Yu laik kisim sampela moa trening bambai yu inap mekim gut asainmen bilong yu? Sapos olsem, yu inap i go long Skul Bilong Ol Kingdom Evanselis. Dispela skul i save trenim ol lain i stap long fultaim sevis na bai ol i ken mekim bikpela wok moa bilong autim tok. Ol lain i go long dispela skul i mas redi long mekim wanem wanem asainmen ol i kisim taim ol i grediuet. Olsem wanem? Yu redi long i go long dispela skul na insait moa long mekim wok bilong Kingdom? (1 Kor. 9:23) Yumi ol lain bilong Jehova, olsem na yumi mekim gut long ol narapela bilong soim olsem yumi tingim ol long olgeta de. Dispela i kamapim klia pasin helpim na pasin laikim bilong yumi. Taim yumi mekim olsem, yumi bai amamas na stap bel isi. (Gal. 5:22, 23) Maski yu gat wanem kain sindaun, yu inap amamas taim yu bihainim pasin bilong Jehova long mekim gut long ol narapela na stap olsem wanwok bilong em!​—Prov. 3:9, 10. w18.08 27 par. 16-18

Ating wanpela inap askim yu, ‘I gat risen long Kristen inap divos na marit gen?’ Jisas i tok: “Man i katim marit na maritim narapela meri, dispela man i mekim pasin adaltri, na em i rongim meri bilong em. Na sapos meri i katim marit na lusim man bilong em na maritim narapela, em i mekim pasin adaltri.” (Mak 10:11, 12; Luk 16:18) Jisas i onarim marit na em i laik bai ol narapela tu i mekim olsem. Sapos man o meri i mekim eskius na divosim poroman marit husat i stap gut long em na em i maritim narapela, orait em i mekim pasin adaltri. Maski em i divos, dispela i no pinisim marit. Long ai bilong God, tupela i stap yet olsem “wanpela bodi tasol.” Na tu, Jisas i tok sapos man i divosim meri maski meri i no mekim rong, dispela inap kirapim meri long mekim pasin adaltri. Bilong wanem yumi tok olsem? Long taim bilong Jisas, meri em man i divosim, em inap pilim olsem em i mas marit gen bambai i gat man bilong lukautim em long sait bilong mani. Tasol sapos meri i mekim olsem, em i mekim pasin adaltri. w18.12 11 par. 8-9

Habakuk i toktok wantaim Jehova na dispela i helpim em long i stap bel isi. Em i bilip tru olsem Jehova bai helpim em. Em i tokaut gen olsem: “Mi stap isi na wetim taim bilong bagarap bai kamap.” (Hab. 3:16) Yumi kisim wanem skul long pasin bilong Habakuk? Namba 1: Maski wanem ol hevi i painim yumi, yumi no ken tru lusim pasin bilong beten long Jehova. Namba 2: Yumi mas putim yau long tok Jehova i givim long rot bilong Baibel na oganaisesen bilong em. Namba 3: Yumi mas bilip na wet long Jehova, na bilip tru olsem em bai pinisim pen na hevi bilong yumi long taim em yet i makim. Olsem Habakuk, sapos yumi autim olgeta tingting na wari bilong yumi long Jehova, na stap isi na putim yau long em, yumi bai stap bel isi na sanap strong yet long karim hevi. Sapos yumi gat pasin bilong bilip na wet, dispela bai strongim yumi na yumi no inap les kwik, na yumi bai stap amamas yet maski kain kain hevi i painim yumi. Yumi bai bilip tru olsem Papa bilong yumi long heven bai pinisim tru olgeta pen na hevi.—Rom 12:12. w18.11 15-16 par. 11-12

God i pilim olsem wanem long ol man i gat pasin bilong pundaunim ol narapela? Jisas i tok: “Man i pundaunim wanpela bilong ol dispela man i no gat nem em ol i bilip long mi, mobeta ol i pasim wanpela ston bilong wilwilim wit long nek bilong em na tromoi em i go daun long solwara.” (Mak 9:42) Dispela tok i soim olsem God i heitim tru pasin bilong pundaunim narapela! Jisas i bihainim gut pasin bilong Papa, olsem na yumi luksave olsem Jehova i heitim tru ol man i gat pasin bilong pundaunim ol disaipel bilong Jisas. (Jon 14:9) Olsem wanem? Yumi holim wankain tingting olsem Jehova na Jisas? Yumi bihainim tingting bilong tupela? Ol samting yumi mekim i soim olsem yumi bihainim tingting bilong husat? Ating yumi werim wanpela kain stail bilong klos o bilas we i bagarapim bel bilong ol narapela, o i mekim ol i bel kirap. Yumi no inap mekim olsem sapos yumi laikim tru ol wanbilip. w18.11 25 par. 9-10

Bilong wanem em i bikpela samting tru long yumi olgeta wan wan i mas i stap gut long God? Wanpela ensel i bin sutim tok long Jehova na em i sutim tok long yu tu. Dispela ensel i bikhet na bagarapim gutnem bilong Jehova na sutim tok olsem God em man nogut, na em i tingim laik bilong em yet tasol, na em i no mekim stretpela wok bos. Adam na Iv i sapotim Satan na ol i bikhet long Jehova. (Stt. 3:1-6) Taim tupela i stap long Iden, ol i gat planti rot long strongim pasin bilong ol long laikim Jehova. Tasol taim Satan i sutim tok long God, Adam na Iv i no givim bel olgeta long stap gut long God. Yumi laik save: Pasin laikim bai i gat strong long kirapim ol manmeri long i stap gut long God Jehova? Ol manmeri long graun inap i stap gut long God? Dispela askim i kamap long taim bilong Jop. (Jop 1:8-11) Jop em i sinman olsem yumi. Em i mekim ol popaia. Tasol Jop i stap gut long Jehova, olsem na Jehova i laikim Jop. w19.02 3-4 par. 6-7

Jisas i laik skulim ol manmeri olsem tok i tru bilong Kingdom em samting i dia tumas, olsem na em i mekim tok piksa long wanpela bisnisman i painim ol gutpela pel. Em i lukim wanpela pel i dia tumas, na kwiktaim “em i go salim” olgeta samting em i gat bambai em inap baim dispela pel. (Mat. 13:45, 46) Olsem tasol, yumi kisim save pinis long tok i tru—tok i tru i stori long Kingdom Bilong God na olgeta narapela samting yumi lainim long Baibel. Dispela tok i tru i stap olsem samting i dia tumas long yumi, olsem na long laik bilong yumi yet, kwiktaim yumi bin lusim ol narapela samting bambai yumi inap kisim dispela tok. Sapos yumi laikim dispela tok i tru, yumi bai i no inap tru long “salim.” (Prov. 23:23) Tasol sori tru olsem sampela manmeri bilong God i no tingim tok i tru olsem samting i dia tumas, olsem na ol i salim. Yumi no ken tru larim dispela samting i kamap long yumi! Sapos yumi tingim tok i tru olsem samting i dia tumas na yumi no inap tru long salim, orait yumi mas bihainim tok bilong Baibel long “wokabaut yet long tok i tru.” (3 Jon 2-4) Dispela i makim olsem tok i tru i mas i stap nambawan bikpela samting long laip bilong yumi, na yumi mas larim dispela tok i stiaim olgeta samting yumi mekim. w18.11 9 par. 3

God i tokim lain Israel long mats raunim taun Jeriko wanpela taim long olgeta de i go inap 6-pela de i pinis, na long de namba 7 ol i mas raunim taun inap 7-pela taim. Sampela soldia inap pilim olsem, ‘Mipela i westim nating taim na strong bilong mipela!’ Tasol God em Lida bilong lain Israel na em i save long risen bilong samting em i tokim ol long mekim. Dispela samting bai strongim bilip bilong lain Israel, na ol yet i no inap pait long ol strongpela soldia bilong Jeriko. (Jos. 6:2-5) Yumi inap kisim wanem skul long dispela stori? Sampela taim yumi no inap kliagut long risen bilong ol senis i kamap insait long oganaisesen. Olsem: Ating pastaim yumi gat tupela tingting long yusim ol teblet na fon long mekim stadi bilong yumi yet, autim tok, na yusim long miting. Tasol ating long nau yumi luksave long ol gutpela risen bilong yusim ol dispela samting. Taim yumi bihainim ol senis na gutpela samting i kamap, dispela bai strongim bilip bilong yumi na helpim yumi long i stap wanbel insait long oganaisesen. w18.10 23 par. 8-9

Ol manmeri long Galili i holim wankain tingting olsem ol disaipel long Mesaia, olsem na ol manmeri i laik mekim Jisas i kamap king bilong ol. Ol i pilim olsem Jisas bai stap gutpela lida. Em i gat gutpela pasin bilong toktok; em inap oraitim ol sikman; na em inap givim kaikai long ol man i hangre. Bihain long Jisas i givim kaikai long 5 tausen man, “[em] i save olsem ol i laik kam na holim em na mekim em i kamap king, olsem na em i lusim dispela hap na em wan i go gen long maunten.” (Jon 6:​10-15) Long neks de long hapsait bilong Raunwara Galili, ol manmeri i no tingting moa long mekim Jisas i kamap king. Jisas i tokim ol manmeri long wok God i givim long em. Em i kam bilong helpim ol manmeri long sait bilong bilip, na em i no kam bilong givim kaikai long ol manmeri na oraitim ol sik. Jisas i tokim ol: “Yupela i no ken wok bilong kisim kaikai i save bagarap, nogat. Yupela i mas wok bilong kisim kaikai i no save bagarap na i save givim laip oltaim.”—Jon 6:25-27. w18.06 4 par. 4-5

Taim Jisas i lukim ol manmeri em ol i olsem lam i no lait gut o olsem pitpit i no gat strong na i laik bruk, em i sori tru long ol. Em i tingim gut ol, helpim ol, na em i no les kwik long ol. (Mak 10:14) Em tru olsem yumi no inap bihainim stret pasin bilong Jisas long mekim wok tisa na yumi no inap save long tingting bilong ol narapela! Maski i olsem, yumi mas soim klia olsem yumi tingim tru ol manmeri long teritori. Yumi mas skelim gut pasin bilong yumi long toktok, wanem taim yumi go bilong autim tok, na hamas taim yumi lusim bilong toktok wantaim ol man long teritori. Long nau, ol bisnis lain, lain politik, na ol lida bilong lotu i “mekim nogut” long planti milion manmeri na ol manmeri i “stap nogut tru.” (Mat. 9:36) I hatwok long ol man i trastim narapela narapela na ol i no gat hop bilong kisim gutpela sindaun long bihain. Olsem na taim yumi toktok wantaim ol, krai bilong nek na ol tok yumi mekim i mas soim olsem yumi pilim tru hevi bilong ol! Planti manmeri i save amamas long putim yau bikos yumi tingim ol na mekim gutpela pasin helpim long ol. w18.09 31-32 par. 13-14

Olsem wanem yumi inap soim olsem yumi laik tru long kisim save long God? Yumi mas kisim kaikai bilong strongim bilip, laikim ol pasin em God i as bilong en, na putim wok bilong lotuim God bilong amamas i stap nambawan samting. Sapos yumi mekim olsem, amamas bilong yumi bai go bikpela. Dispela bai strongim bilip bilong yumi olsem klostu nau God bai truim ol tok promis bilong em. (Tai. 2:13) Yumi mas strongim pasin pren bilong yumi wantaim Jehova na bai amamas bilong yumi i no inap pinis. Aposel Pol i tok: “Amamas oltaim long Bikpela. Mi tok gen, yupela i mas amamas!” (Fili. 4:4) Sapos yumi laik stap pren bilong God, yumi mas kisim savetingting i kam long em. (Prov. 3:13, 18) Yumi mas ritim Tok Bilong God na bihainim ol dispela tok, na dispela bai helpim yumi long i stap amamas oltaim. Tok bilong Jisas i soim olsem yumi mas bihainim ol tok yumi lainim. Em i tok: “Yupela i save long ol dispela samting, olsem na yupela bai amamas sapos yupela i mekim ol dispela samting.” (Jon 13:17; Jems 1:25) Dispela em i bikpela samting long helpim yu long kisim save long God na stap amamas oltaim. w18.09 18 par. 4-6

Epafras i save gut long ol wanbilip na em i tingim tru ol. Em i “wankalabus” bilong Pol, tasol em i tingting long olsem wanem em inap strongim bilip bilong ol narapela Kristen. (File. 23) Em i beten askim God long helpim ol. Dispela i soim olsem em i tingim ol narapela na em i no tingim em yet. Taim yumi beten askim Jehova long strongim ol bratasista, dispela beten i gat strong long helpim ol. Moa yet taim yumi kolim nem bilong ol long beten bilong yumi. (2 Kor. 1:11; Jems 5:16) Tingim ol bratasista em yu inap kolim nem bilong ol na beten askim God long helpim ol. Olsem Epafras, planti bratasista i save beten askim God long strongim ol narapela long kongrigesen, na ol lain i mekim bikpela wok long lukautim ol wanfamili, na ol lain husat i mas mekim bikpela disisen, o traim i painim ol. Na tu, yumi mas tingim ol lain em wanfamili o pren i dai, ol lain i abrusim disasta na woa, na ol lain i karim hevi bilong mani. Planti bratasista i karim hevi, olsem na yumi mas beten askim God long sambai long ol. w18.09 5-6 par. 12-13

Tok bilong Pol i makim pasin bilong givim ol samting long sait bilong skin, na tu, taim yumi mekim tok bilong strongim narapela, na stiaim na helpim ol man i nidim helpim. (Apo. 20:31-35) Toktok na pasin bilong aposel Pol i skulim yumi long yusim gut taim na strong bilong yumi long helpim narapela, na tu, yumi mas redi long harim tingting bilong ol na laikim ol. Sampela saveman i painimaut olsem pasin bilong givim i save mekim man i amamas. Wanpela atikol i tok: “Ol manmeri i kisim bikpela amamas moa taim ol i mekim ol samting bilong helpim ol narapela.” Ol saveman i tok, em i bikpela samting long helpim ol narapela bikos dispela i helpim ol man long “pilim olsem laip bilong ol i gat as bilong en na em samting yumi olgeta i mas mekim.” Olsem na planti saveman i tok ol manmeri i mas volantia long helpim ol narapela na helt bilong ol yet bai kamap gutpela moa na ol bai stap amamas. Ol manmeri husat i luksave olsem Baibel em Tok Bilong Jehova, em Krieta bilong yumi, ol i wanbel long tok em ol saveman i kamapim.—2 Tim. 3:16, 17. w18.08 22 par. 17-18

Aisaia i mekim tok profet long Bikpela bilong yumi Jisas Krais, na dispela tok i mekim isi bel bilong yumi. Aisaia i tok profet olsem Jisas “bai no jasim man long samting em i lukim tasol long ai, o stretim man long samting em i harim tasol long yau. Em bai jasim ol taranguman long pasin i fea.” (Ais. 11:3, 4) Bilong wanem dispela tok i strongim yumi? Long wanem, yumi stap long taim we ol manmeri i gat pasin bilong laikim wanpela lain tasol na heitim narapela lain. Yumi amamas olsem long bihain, bai i gat wanpela stretpela Jas husat i no inap jasim yumi long lukluk bilong yumi! Long olgeta wan wan de, yumi save jasim ol manmeri. Tasol yumi gat sin, olsem na yumi no inap jasim ol man long stretpela pasin olsem Jisas i save mekim. Yumi save skelim ol man long ol samting yumi lukim long ai. Taim Jisas i stap long graun, em i tokim yumi long lusim pasin bilong “skelim samting long ai,” na kisim pasin bilong “skelim samting long pasin i stret.” Jisas i laik bai yumi bihainim pasin bilong em na lusim pasin bilong skelim samting long ai. w18.08 8 par. 1-2

Yumi no inap harim nek bilong God i kam long heven. Tasol long rot bilong Baibel, em i givim ol tok bilong skulim yumi. Na tu, holi spirit bilong Jehova i kirapim “gutpela bosboi” long givim kaikai bilong strongim bilip bilong ol wokman bilong em. (Luk 12:42) Yumi gat planti pablikesen, vidio, na odio rekoding! Tok Bilong God long Baibel i ken strongim yumi olsem Jehova i kontrolim olgeta samting, na em bai pinisim olgeta pen na hevi em Satan na lain bilong em i kamapim. Yumi mas tingting strong long harim gut tok bilong Jehova. Sapos yumi mekim olsem, yumi bai winim olgeta kain hevi i painim yumi long nau na ol hevi bai kamap bihain. Baibel i tok: “Yupela i mas i gat pasin bilong sanap strong bai yupela i ken kisim ol samting God i promis long en. Tasol pastaim yupela i mas mekim laik bilong God.”—Hib. 10:36. w19.03 13 par. 17-18

Moses i bin stap lida bilong lain Israel longpela taim tru, olsem na ating Josua i tingting planti long ol manmeri bilong God bai amamas long em i lidim ol, o nogat. (Lo 34:​8, 10-12) Wanpela dikseneri bilong Baibel i stori long tok bilong Josua 1:1, 2 olsem: “Long bipo na long nau tu, sapos i gat nupela lida, ol manmeri bai wari na tingting planti long sindaun bilong ol bai olsem wanem.” Ating Josua i tingting planti na pret, na em nomol long em i pilim olsem. Tasol insait long sampela de, em i kirap mekim ol samting bilong lidim lain Israel. (Jos. 1:​9-11) Em i trastim God na God i helpim em. Baibel i tok long rot bilong wanpela ensel, Jehova i stiaim Josua na lain Israel. I stret long yumi ting olsem dispela ensel em Tok, em fesbon Pikinini Bilong God. (Kis. 23:20-23; Jon 1:1) Jehova i helpim lain Israel na olgeta samting i ron gut taim Josua i kisim ples bilong Moses olsem lida bilong ol. w18.10 22-23 par. 1-4

Jehova i save long ol manmeri husat i mekim wok bilong em na em i raitim nem bilong ol long “buk i gat nem bilong ol man em i tingim ol.” Taim Jehova i raitim nem bilong yumi long “buk i gat nem bilong ol man em i tingim ol,” orait yumi mas mekim sampela samting. Malakai i tok yumi mas ‘pret long Jehova na tingim tingim nem bilong em.’ Sapos yumi lusim bikpela haptaim long mekim ol narapela wok na yumi no mekim wok lotu, Jehova bai rausim nem bilong yumi long buk bilong laip. (Kis. 32:33; Sng. 69:28) Taim yumi dediket long Jehova, yumi tok promis long mekim laik bilong em na yumi kisim baptais bilong kamapim klia dediket bilong yumi. Yumi dediket na baptais wanpela taim tasol. Maski i olsem, yumi stap lain manmeri bilong Jehova, olsem na yumi mas daun long Em long laip olgeta bilong yumi.—1 Pita 4:1, 2. w18.07 23-​24 par. 7-9

Dispela samting i no inap kamap nating. Sapos yumi laik kamap strong long bilip, yumi mas “taitim bun” na wok yet long kisim planti moa save long tok bilong Baibel na kliagut long ol dispela tok. Olsem na oltaim yumi kisim tok bilong kirapim yumi long ritim Baibel long olgeta de. (Sng. 1:1-3) Yu putim mak long ritim Baibel long olgeta de? Sapos yu mekim olsem, yu bai save gut moa long ol lo na stiatok bilong Jehova, na save bilong yu long Tok Bilong God bai kamap bikpela moa. Nambawan lo ol Kristen i mas bihainim em olsem: Ol i mas laikim narapela narapela. Jisas i tokim ol disaipel: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Jems, hap brata bilong Jisas, i kolim pasin laikim olsem “lo i gutpela tru.” (Jems 2:8) Pol i tok: “Pasin laikim em i inapim lo.” (Rom 13:10) I stret yumi kamapim pasin laikim bikos Baibel i tok: “God em i pasin laikim.”—1 Jon 4:8. w18.06 19 par. 14-​15

Lain Israel i bikhet long Jehova, tasol Moses i bel nogut long pasin ol i mekim. Em i no bosim gut bel, olsem na em i mekim tok i no stret na hevi i painim em. Moses i larim pasin bilong lain Israel i pulim nabaut tingting bilong em na em i bikhet long Jehova. Pastaim Moses i mekim olgeta samting olsem God i tok. (Kis. 7:6) Tasol bihain, ating Moses i les tru long pasin bikhet em lain Israel i mekim inap planti yia, olsem na em i no bihainim stret olgeta tok bilong God. Yu ting Moses i tingting tasol long em yet na em i no mekim gut ol samting bilong givim glori long Jehova? Moses em wanpela gutpela profet, tasol em i larim pasin bilong ol narapela i pulim nabaut tingting bilong em na em i pundaun. Wankain samting inap kamap long yumi. Klostu nau yumi bai go insait long nupela taim em Jehova i tok promis long en. (2 Pita 3:13) Yumi no laik lus long kisim dispela blesing. Olsem na yumi mas lukluk i go long Jehova na oltaim bihainim laik bilong em.—1 Jon 2:17. w18.07 15 par. 14-16

Satan i no inap pasim ol manmeri long bihainim laik bilong ol yet. (Jems 1:14) Tasol planti manmeri i no luksave olsem ol i mekim ol samting i stret wantaim laik bilong Satan. Taim ol i kisim save long tok i tru, ol inap mekim disisen long ol bai mekim wok bilong God o wok bilong Satan. (Apo. 3:17; 17:30) Sapos yumi tingting strong long mekim laik bilong God, Satan i no inap bagarapim pasin bilong yumi long pas gut wantaim God. (Jop 2:3; 27:5) I gat narapela samting tu em Satan na ol spirit nogut i no inap mekim. I no gat wanpela hap bilong Baibel i stori olsem Satan na ol spirit nogut inap save long tingting bilong man. Baibel i tok Jehova na Jisas tasol inap mekim olsem. (1 Sml. 16:7; Mak 2:8) Sapos toktok na pasin bilong yumi i stret wantaim laik bilong God, yumi ken bilip tru olsem Jehova i no inap larim Satan i mekim wanpela samting bilong bagarapim yumi na bai yumi lus long kisim laip oltaim. (Sng. 34:7) Yumi mas save gut long birua bilong yumi, tasol yumi no ken pret long em. Maski yumi gat sin, Jehova inap helpim yumi long winim Satan. Sapos yumi sakim em, em bai lusim yumi.—Jems 4:7; 1 Pita 5:9. w18.05 26 par. 15-​17

Tingim olsem yu laik go long wanpela taun i stap longwe bilong mekim wanpela spesel bung. Yu mas kalap long bas na ron long wanpela longpela rot inap long yu kamap long dispela ples. Taim yu go long bas stop, yu lukim olsem i gat planti bas. Tasol yu mas kalap long bas we bai go stret long hap yu laik go long en! Sapos yu kalap long bas i go long narapela hap, yu no inap kamap long ples yu tingting long go long en. Ol yangpela long nau i kain olsem ol pasindia i laik kalap long bas na ol bai go long wanpela longpela rot. Sampela taim, ol inap tingting planti long ol disisen na ol wok ol i mas mekim. Ol yangpela, sapos yu save pinis long rot yu mas bihainim, dispela bai helpim yu. Olsem wanem? Yu bai strongim laik bilong yu long amamasim Jehova? Dispela i makim olsem yu mas larim Jehova i stiaim olgeta samting yu mekim​—⁠long sait bilong ediukesen, wok mani, wok bilong famili, na ol narapela samting. Na tu, yu mas winim ol mak long sait bilong bilip. Ol yangpela husat i tingting long mekim wok bilong Jehova, ol i ken bilip tru olsem em bai blesim ol na ol bai stap amamas tru. w18.04 25 par. 1-3

Jepta i truim tok promis bilong em na em i salim pikinini bilong em i go long Silo bilong mekim wok long haus lotu sel long laip olgeta bilong em. (Het. 11:30-35) Ating Jepta i pilim hatwok tru long truim tok promis bilong em, na ating pikinini meri tu i pilim olsem, tasol em i daunim laik bilong em yet na inapim tok promis bilong Papa. (Het. 11:36, 37) Em i daunim laik bilong em long marit na kamapim ol pikinini husat inap holim nem bilong famili na kisim graun bilong ol. Pikinini meri bilong Jepta i nidim tru tok bilong strongim em na mekim isi bel bilong em. Baibel i tok: “Dispela pasin i kamap olsem kastam bilong ol Israel: Inap 4-pela de long olgeta wan wan yia, ol yangpela meri bilong Israel i save go givim tok amamas long pikinini meri bilong Jepta, em man Gileat.” (Het. 11:39, 40) Ol Kristen husat i stap singel bambai ol i ken “tingim ol samting bilong Bikpela,” ol tu i nidim ol tok bilong strongim na mekim isi bel bilong ol.—1 Kor. 7:32-35. w18.04 17 par. 10-11

Taim Satan i bikhet long God, planti ensel i bihainim Satan. Paslain long Bikpela Tait, em i pulim sampela ensel long slip wantaim ol meri long graun. Baibel i stori long dispela samting na i tok long traipela snek i kisim namba 3 hap bilong ol lain sta long heven. (Stt. 6:1-4; Rev. 12:3, 4) Taim ol dispela ensel i lusim famili bilong God, ol i stap aninit long wok bos bilong Satan. Ol dispela ensel i bikhet. Na tu, Satan i yusim ol long kamapim wanpela kingdom em yumi no inap lukim long ai, na em yet i stap king bilong en. Em i oganaisim ol bikhet ensel long kamapim ol gavman, na em i givim namba long ol na larim ol i bosim graun. (Efe. 6:12) Long rot bilong oganaisesen bilong em, Satan i bosim olgeta gavman bilong graun. w18.05 23 par. 5-6

God i stap olsem Papa na em i laikim tru yumi, na sampela taim em i save stretim pasin kranki bilong yumi. Devit i amamas long God i givim tok bilong stretim em. Em i tingim na skelim tingting bilong God, na em i redi long bihainim na stretim tingting na pasin bilong em yet. Taim yu bilip na mekim ol dispela samting, yu tu bai laikim God moa yet na oltaim yu bai redi long bihainim tok bilong em. Na tu, bilip bilong yu bai kamap strong moa. Christin em sista bilong yumi, na em i tok: “Taim mi mekim wok painimaut na skelim na tingim ol samting mi ritim, mi pilim olsem Jehova i tingim mi stret na raitim dispela tok!” Sapos yu tingim na skelim tingting bilong God, yu bai kisim savetingting na dispela bai stiaim tingting yu holim long ol samting i kamap long nau na ol samting bai kamap long bihain. Bilong wanem God i givim yu savetingting? Em i laik bai yu skelim gut ol samting i bikpela samting long laip bilong yu, mekim ol gutpela disisen, na bilip olsem gutpela samting tru bai kamap bihain!—Ais. 26:3. w18.12 26 par. 9-10