Disemba

Yu ting Jehova i gat strong long kirapim bek ol daiman? Yes, em i gat strong long mekim olsem! Em i “God i Gat Olgeta Strong.” (Rev. 1:8) So em i gat bikpela strong long daunim ol birua, na dai tu. (1 Kor. 15:26) Narapela risen na yumi bilip tru olsem God inap kirapim bek ol daiman em olsem, memori bilong em i ken holim planti infomesen na i no gat mak bilong en. Em i save kolim olgeta wan wan sta long nem bilong ol. (Ais. 40:26) Na tu, em i tingim ol man i dai pinis. (Jop 14:13; Luk 20:38) Em i tingim gut olgeta liklik samting long ol manmeri em bai kirapim bek—olsem lukluk na pasin bilong ol, ol ekspiriens bilong ol long laip, na ol memori bilong ol. Yumi ken bilip tru long tok promis bilong Jehova olsem bai i gat kirap bek long bihain, long wanem, yumi save olsem em i gat laik tru na em i gat strong long inapim dispela tok promis. Tingim narapela risen na yumi ken bilipim tok promis bilong God long kirap bek: Jehova i bin kirapim bek sampela man i dai pinis long bipo. Long taim bilong ol man i raitim Baibel, em i givim strong long sampela bilipman, na Jisas tu, long kirapim bek ol daiman. w23.04 9-10 par. 7-9

Taim yumi tingting gut na toktok long pasin isi, ol narapela bai redi long putim gut yau na ol bai laik stori yet wantaim yumi. Tasol sapos wanpela i laik tok pait o tok bilas long ol bilip bilong yumi, orait yumi no gat wok long toktok moa wantaim em. (Prov. 26:4) Tasol i no olgeta man bai mekim olsem, ating planti bai putim yau. Em i klia tru olsem gutpela samting inap kamap taim yumi wok strong long mekim pasin isi. Beten na askim Jehova long strongim yu long mekim yet pasin isi taim ol narapela i kamapim ol strongpela askim o ol i sutim ol tok giaman long yumi. Tingim, pasin isi yu mekim inap pasim yupela long tok pait maski yu na narapela i no holim wankain tingting long ol samting. Na taim yu bekim tok long pasin isi na pasin rispek, dispela inap kirapim sampela husat i putim yau long senisim tingting ol i gat long yumi na long ol tok i tru bilong Baibel. “Oltaim [yu] mas redi long bekim tok” bilong sambai long ol bilip bilong yu, na “mekim olsem long pasin isi na pasin rispek.” (1 Pita 3:15) Yes, soim olsem yu gat strong long rot bilong mekim pasin isi! w23.09 19 par. 18-19

Skelim 4-pela rot we yumi ken mekim pasin bilong i no les kwik. Namba 1, man i no save les kwik em i no save belhat kwik. Em i save stap isi na em i no save bekim rong taim ol narapela i sikirapim bel bilong em o taim em i stap long presa. (Kis. 34:6) Namba 2, man i no save les kwik em i save stap isi na wet. Taim wanpela samting i no kamap long taim stret em i ting long en, em i no save les hariap o larim dispela i sikirapim bel bilong em. (Mat. 18:​26, 27) Namba 3, man i no save les kwik em i no save hariap long mekim samting. Taim man i gat pasin bilong i no les kwik, em i no save hariap hariap long pinisim wanpela bikpela wok em i gat, nogat. Em i save makim gut haptaim long plenim gut wanem samting em bai mekim. Na em i lusim inap taim long mekim dispela wok. Namba 4, man i no save les kwik em i save karim ol hevi na em i no save komplein. Em i save wok strong yet long karim hevi na long wankain taim holim stretpela tingting. (Kol. 1:11) Olsem ol Kristen, yumi mas wok yet long kisim pasin bilong i no les kwik long olgeta dispela samting. w23.08 20-21 par. 3-6

Nambawan bikpela risen na yumi mas lukautim bel bilong yumi em olsem, Jehova i save skelim bel bilong yumi. Dispela i makim olsem em i lukim bel bilong yumi na em i save yumi wanem kain man o meri tru, em samting ol narapela i no inap long lukim. Em bai laikim yumi sapos yumi pulimapim tingting bilong yumi wantaim savetingting bilong em we bai helpim yumi long stap laip oltaim. (Jon 4:14) Taim yumi mekim olsem, ol pasin nogut na ol tingting nogut bilong Satan na ol man bilong dispela graun i no inap bagarapim tingting na pasin bilong yumi. (1 Jon 5:​18, 19) Na taim yumi pas gut moa wantaim Jehova, dispela bai strongim pasin bilong yumi long laikim na rispektim em. Yumi no laik mekim Papa bilong yumi i bel hevi, olsem na yumi bai heitim tru tingting bilong mekim sin. Marta em wanpela sista long Kroesia na traim i painim em long mekim pasin pamuk. Em i tok: “Mi pilim hatwok long tingting klia na long daunim dispela laik bilong mekim sin bilong kisim amamas bilong sotpela taim. Tasol pasin bilong pret long Jehova i lukautim mi.” Olsem wanem pasin bilong pret long God i bin lukautim em? Marta i tok em i tingim tingim long bel ol hevi we inap kamap sapos em i mekim disisen i no stret. Yumi tu i ken mekim olsem. w23.06 20-21 par. 3-4

Jisas i save olsem Jehova i tingting pinis long mekim holi nem bilong Em, na pinisim olgeta tok giaman Satan i bin kamapim long em. Em risen na Jisas i skulim ol disaipel bilong em long beten olsem: “Papa bilong mipela long heven, nem bilong yu i mas i stap holi.” (Mat. 6:9) Jisas i save olsem dispela em bikpela tok i bin kamap na yumi olgeta manmeri i insait long en. Jisas i mekim olgeta samting bilong mekim holi nem bilong Jehova winim ol ensel long heven na ol manmeri long graun. Tasol taim ol birua i arestim Jisas, ol i sutim wanem tok long em? Ol i tok olsem em i tok bilas long God! Jisas i pilim olsem pasin bilong bagarapim o krungutim nem holi bilong Papa bilong em, dispela em wanpela bikpela sin. Em i bel hevi tru olsem ol man bai sutim tok long em olsem em i tok bilas long God na ol i kotim em long dispela. Ating dispela em nambawan risen na Jisas i “pilim hevi tru” insait long ol aua paslain long ol i arestim em.—Luk 22:​41-44. w24.02 11 par. 11

Taim yumi ran long dispela resis bilong laip, yumi mas laikim Jehova na Jisas moa yet winim ol wanfamili bilong yumi. (Mat. 10:37) Tasol dispela i no makim olsem yumi mas abrusim ol wok bilong yumi insait long famili, na ting olsem ol dispela wok i pasim yumi long amamasim God na Krais, nogat. Bilong God na Krais i ken orait long yumi, yumi mas inapim ol wok bilong yumi insait long famili. (1 Tim. 5:​4, 8) Taim yumi mekim olsem, yumi bai stap amamas moa. Jehova i wokim ol famili bilong ol i ken stap amamas taim man marit na meri marit i laikim na rispektim narapela narapela, taim papamama i laikim na trenim ol pikinini, na taim ol pikinini i bihainim tok bilong papamama. (Efe. 5:33; 6:​1, 4) Maski wanem wok yu gat insait long famili, trastim savetingting i stap long Baibel na no ken bilip long save bilong yu yet, kalsa, o tok bilong ol saveman. Yusim gut ol pablikesen bilong yumi em Baibel i as bilong en. Ol dispela pablikesen i stori long ol rot yu ken bihainim ol stiatok bilong Baibel. w23.08 28 par. 6-7

Wanpela meri Kristen i mas lainim sampela skil bilong lukautim em yet. Sampela skil em wanpela pikinini meri i lainim taim em i liklik, dispela inap lukautim em long laip olgeta bilong em. Olsem, lain gut long rit na rait. Long sampela kalsa, em i no bikpela samting long ol meri i lain long rit na rait. Tasol em i bikpela samting long olgeta Kristen i mas lain gut long rit na rait. (1 Tim. 4:13) So no ken larim wanpela samting i pasim yu long lain gut long rit na rait. Dispela inap helpim yu olsem wanem? Kain skil olsem inap helpim yu long kisim wanpela wok mani na holim inap longpela taim. Yu bai kamap gutpela sumatin na tisa bilong Tok Bilong God. Na bikpela samting moa, yu bai go klostu moa long Jehova taim yu ritim tok bilong em long Baibel na tingim tingim long bel.—1 Tim. 4:15. w23.12 20-21 par. 10-11

Askim Jehova long helpim yu long sakim traim. Yumi no gutpela olgeta, olsem na oltaim yumi save pait strong long sakim laik bilong mekim pasin nogut. Satan i wok strong tru long daunim yumi bambai yumi no winim dispela pait. Wanpela rot em i traim long bagarapim tingting bilong yumi em long rot bilong ol piksa na ol musik nogut. Ol kain muvi na musik olsem inap pulapim tingting bilong yumi long ol tingting i doti—em ol tingting we inap mekim yumi kamap doti long ai bilong Jehova na i ken kirapim yumi long mekim ol bikpela sin. (Mak 7:​21-23; Jems 1:​14, 15) Yumi nidim helpim bilong Jehova sapos yumi laik sakim traim bilong mekim pasin i no stret. Long beten Jisas i mekim bilong skulim ol disaipel bilong em, em i tok: “No ken larim mipela i pundaun long traim, tasol kisim bek mipela long han bilong Satan.” (Mat. 6:13) Jehova i laik helpim yumi, olsem na yumi mas askim em long helpim yumi. Na tu, yumi mas mekim samting i stret wantaim ol beten bilong yumi. w23.05 6-7 par. 15-17

Taim tupela marit i tingim pasin pren bilong ol wantaim Papa bilong ol long heven olsem bikpela samting, ol bai redi long bihainim edvais bilong em. Dispela bai helpim ol long abrusim na winim ol hevi we i laik kilim i dai pasin bilong ol long laikim narapela narapela. Ol man i gat strongpela bilip, ol i wok strong long bihainim ol pasin bilong Jehova olsem mekim pasin helpim long narapela, i no les kwik, na fogivim narapela. (Efe. 4:32–5:1) Tupela marit husat i bihainim ol dispela pasin, em isi long pasin laikim bilong ol i kamap strong moa. Wanpela sista nem bilong em Lena, em i marit inap 25 yia, em i tok: “Em isi long laikim na rispektim poroman marit husat i laikim Jehova.” Skelim wanpela eksampel long Baibel. Taim Jehova i laik makim tupela man na meri long kamap papa na mama bilong Mesaia, em i makim Josep na Maria namel long planti tumbuna pikinini bilong Devit. Bilong wanem? Josep na Maria wantaim i gat pasin bilong pas gut wantaim Jehova, na Jehova i save olsem marit bilong ol bai stap strong taim ol i wok yet long laikim Em tru. w23.05 21 par. 3-4

Lida bilong yumi Jisas em i gutpela olgeta, tasol ol man em i yusim bilong go pas long mekim wok bilong em hia long graun ol i no gutpela olgeta. Sampela taim yumi inap pilim hatwok long bihainim tok bilong ol, moa yet long taim ol i tokim yumi long mekim wanpela samting em yumi no laik mekim. Wanpela taim aposel Pita i surik long bihainim tok. Taim wanpela ensel i tokim Pita long kaikai ol animal i no klin em Lo Bilong Moses i tambuim ol long kaikai, Pita i sakim dispela tok, i no wanpela taim tasol, nogat, inap 3-pela taim olgeta! (Apo. 10:​9-16) Wai na em i mekim olsem? Dispela nupela daireksen em i kisim i no stret liklik long tingting bilong em. Tasol aposel Pol i redi long bihainim tok taim ol hetman Kristen long Jerusalem i tokim em long kisim 4-pela man na go wantaim long tempel na mekim ol yet i kamap klin olsem Lo i makim, na long dispela rot em i ken soim olsem em i bihainim Lo. Pol i save olsem ol Kristen i no stap aninit moa long Lo Bilong Moses. Na em i no mekim wanpela rong. Maski i olsem, “long de bihain Pol i kisim dispela 4-pela man i go, na olsem lo i makim, em i bihainim pasin bilong mekim em yet i kamap klin na mekim ol tu i kamap klin.” (Apo. 21:​23, 24, 26) Pasin bilong Pol long bihainim tok i strongim pasin wanbel.—Rom 14:​19, 21. w23.10 10 par. 15-16

Ating yu no inap tingim pret olsem wanpela pasin i mas stap namel long tupela gutpela pren. Tasol ol man husat i laik pas gut wantaim Jehova, ol i mas “pret long em.” Maski yumi mekim wok bilong Jehova inap longpela taim o nau tasol, yumi olgeta i mas i gat pasin bilong pret na rispek tru long em. Tasol pret long God i makim wanem samting? Man husat i save pret o rispek tru long God em i save laikim Em na em i no laik mekim wanpela samting bilong bagarapim pasin pren bilong em wantaim God. Jisas i gat dispela kain pasin bilong “pret long God.” (Hib. 5:7) Em i no pret nogut tru long Jehova, nogat. (Ais. 11:​2, 3) Em i laikim tru God na em i laik bihainim tok bilong em. (Jon 14:​21, 31) Olsem Jisas, yumi rispek tru long Jehova na pilim tru ol gutpela pasin bilong em, long wanem, em i gat pasin laikim, savetingting, stretpela pasin, na bikpela strong. Na tu, yumi save olsem Jehova i laikim yumi na pasin yumi mekim bilong bihainim ol stiatok bilong em o nogat, dispela i mekim sampela samting long em. Pasin bilong yumi i ken mekim Jehova i bel hevi o mekim em i amamas.—Sng. 78:41; Prov. 27:11. w23.06 14 par. 1-2; 15 par. 5

Taim wok king bilong Usia i stap strong tru, em i lusim tingting long Jehova em As bilong strong na olgeta gutpela samting em i gat. Yumi inap kisim wanem skul long em? I gutpela long yumi mas wok yet long tingim olsem ol blesing na ol gutpela wok yumi kisim i kam long Jehova. So yumi no ken hambak long ol wok yumi mekim, nogat, yumi mas givim glori na preis i go long Jehova long ol wok yumi mekim. (1 Kor. 4:7) Long pasin daun yumi mas luksave olsem yumi no gutpela olgeta na yumi mas kisim ol tok bilong stretim yumi. Wanpela brata i gat 60 krismas samting, em i tok: “Mi lain olsem mi no ken bel hevi taim ol narapela i luksave long ol popaia bilong mi. Taim mi kisim ol tok bilong stretim mi long ol popaia mi mekim, mi traim long stretim ol pasin bilong mi na mekim ol samting i kamap gutpela moa.” Tru tumas, taim yumi bihainim yet tok bilong Jehova na mekim yet pasin daun, yumi bai stap amamas tru.—Prov. 22:4. w23.09 10 par. 10-11

Ol Kristen long taim bilong ol aposel i mas i gat pasin bilong sanap strong na karim hevi. Ol i karim ol hevi em planti man long dispela taim i karim, na ol i karim ol narapela hevi tu. Planti bilong ol i karim hevi long han bilong ol hetman bilong lotu Juda na ol bikman bilong Rom, na tu, ol i karim hevi long han bilong ol wanfamili bilong ol. (Mat. 10:21) Na insait long kongrigesen yet, sampela taim ol i mas wok strong long sakim ol tingting bilong ol apostet na ol bilip giaman em ol i skulim ol man long en bilong brukim lain. (Apo. 20:​29, 30) Tasol ol dispela Kristen i sanap strong na karim hevi. (Rev. 2:3) Hau ol i mekim olsem? Ol i tingim ol eksampel bilong ol bilipman long Baibel em ol i sanap strong na karim hevi, olsem Jop. (Jems 5:​10, 11) Ol i beten long God i ken strongim ol. (Apo. 4:​29-31) Na ol i putim tingting long ol gutpela samting i kamap long pasin bilong ol long sanap strong na karim hevi. (Apo. 5:41) Yumi tu i ken sanap strong na karim hevi sapos oltaim yumi stadi na tingim tingim long bel ol eksampel bilong ol bilipman na meri long Baibel na long ol pablikesen bilong yumi. w23.07 3 par. 5-6

Jehova na Jisas bai i no inap givap long yumi. Bihain long aposel Pita i tok em i no save long Jisas, em i mas mekim wanpela bikpela disisen long laip bilong em. Em bai givap o em bai wok strong yet long stap olsem wanpela disaipel bilong Krais? Jisas i bin beten strong na askim Jehova long helpim Pita na bai bilip bilong Pita i no ken pundaun. Jisas i tokim Pita long dispela beten na em i tok em i bilip long Pita olsem bihain em bai strongim ol brata bilong em. (Luk 22:​31, 32) Taim Pita i tingim gen tok bilong Jisas, ating dispela i strongim em! Taim yumi laik mekim wanpela bikpela disisen long laip bilong yumi, Jehova inap yusim ol gutpela wasman long givim ol tok em yumi nidim bilong helpim yumi long stap gut yet long Em. (Efe. 4:​8, 11) Jehova i bin helpim Pita na ol arapela aposel long kisim ol samting bilong skin em ol i nidim, olsem tasol Em inap helpim yumi tu long kisim ol samting bilong skin em yumi nidim taim yumi putim wok autim tok i stap nambawan samting long laip bilong yumi. w23.09 24-25 par. 14-15

Jehova i luksave long olgeta liklik samting yumi mekim bilong helpim ol narapela. Em i tingim dispela olsem gutpela ofa tru na olsem dinau em yet bai bekim. Sapos yu bin mekim wok olsem wanpela kongrigesen sevan o elda long pastaim, orait Jehova i tingim gutpela wok yu bin mekim long bipo na pasin laikim we i bin kirapim yu long mekim olsem. (1 Kor. 15:58) Na tu, em i luksave long pasin laikim em yu wok yet long mekim long nau. Jehova i laik bai yumi olgeta i strongim pasin bilong yumi long laikim tru em na laikim ol narapela. Yumi ken strongim pasin bilong yumi long laikim tru Jehova long rot bilong ritim Baibel na tingim tingim long bel ol tok bilong en na oltaim beten long Em. Yumi ken strongim pasin bilong yumi long laikim tru ol bratasista bilong yumi taim yumi mekim ol samting bilong helpim ol. Taim yumi strongim pasin laikim bilong yumi, yumi bai pas gut moa wantaim Jehova na pas gut moa wantaim ol wanbilip Kristen bilong yumi. Na yumi bai amamas long pas gut wantaim Jehova na pas gut wantaim ol wanbilip Kristen inap oltaim oltaim! w23.07 10 par. 11; 11 par. 13; 13 par. 18

Olgeta wan wan Kristen i mas wokim disisen bilong ol yet long hau long lukautim helt bilong ol. I gat sampela lo bilong Baibel i stiaim disisen bilong ol Kristen long wanem kain medikal tritmen long kisim, olsem lo bilong sakim blut na wok bilong ol spirit nogut. (Apo. 15:20; Gal. 5:​19, 20) Long ol narapela samting, yumi yet i ken wokim disisen bilong yumi yet. Maski yumi yet i laikim o i no laikim wanpela tritmen, yumi mas rispektim raits bilong ol bratasista bilong yumi long mekim ol disisen bilong ol yet long sait bilong helt-ke. Bilong mekim olsem, yumi mas tingim dispela 4-pela samting: (1) Kingdom Bilong God tasol bai pinisim olgeta sik na oraitim ol man. (Ais. 33:24) (2) Olgeta wan wan Kristen i mas “pilim tru olsem samting ol i bilip long en em i stret” na em bai helpim ol. (Rom 14:5) (3) Yumi no ken skelim ol narapela long ol disisen ol i mekim na yumi no ken mekim wanpela samting bilong pundaunim ol. (Rom 14:13) (4) Ol Kristen i save mekim pasin laikim long ol narapela na ol i no larim ol pesenel disisen bilong ol yet i bagarapim pasin wanbel insait long kongrigesen.—Rom 14:​15, 19, 20. w23.07 24-25 par. 15

Yu tingim pasin bilong yu long pas gut wantaim Jehova olsem samting i dia tumas? Tru tumas, yu pilim olsem! Long bipo yet na i kam inap long nau, planti manmeri i amamas long pas gut wantaim God wankain olsem yu. (Sng. 104:​33, 34) Planti i daunim ol laik bilong ol yet bilong mekim wok bilong Jehova. Dispela em samting sampela long Israel bilong bipo i bin mekim, em ol i kolim ol olsem ol Nasarait, o wanpela i givim em yet bilong mekim laik bilong God long laip olgeta bilong em. Dispela tok i stret long ol man na meri Israel bilong bipo em ol i daunim laik bilong ol yet bilong mekim wok bilong Jehova long wanpela spesel wei. Lo Bilong Moses i orait long wanpela man o meri Israel i ken mekim spesel promis long Jehova olsem em bai stap olsem wanpela Nasarait insait long sampela haptaim. (Nam. 6:​1, 2) Taim em i mekim dispela spesel promis, dispela i makim olsem em i mas bihainim ol lo em ol narapela Israel i no gat wok long bihainim. Orait bilong wanem wanpela Israel bai mekim spesel promis long stap olsem wanpela Nasarait? Ating em i mekim olsem bikos em i laikim tru Jehova na em i tenkyu long planti blesing em i kisim long Em.—Lo 6:5; 16:17. w24.02 14 par. 1-2

Long Baibel, dispela tok Hibru ol i tanim olsem “stap gut long narapela,” o “gutpela pasin laikim” i makim pasin bilong laikim tru na pas gut wantaim wanpela na planti taim Baibel i yusim dispela tok long makim pasin bilong God long laikim tru ol wokman bilong em. Baibel i yusim dispela wankain tok long makim pasin laikim i stap namel long ol wokman bilong God. (2 Sml. 9:​6, 7) Pasin bilong yumi long stap gut long narapela i ken kamap strong insait long longpela haptaim. Yumi ken stori long hau pasin bilong Daniel long stap gut long God i kamap strong moa. Long laip olgeta bilong Daniel, planti samting i kamap na i traim pasin bilong em long stap gut long God. Tasol wanpela bikpela traim tru i painim em taim em i winim pinis 90 krismas. Ol ofisa bilong king i no laikim Daniel na ol i no rispek liklik long God em i lotuim. So ol i wokim wanpela plen bilong kilim i dai Daniel. Ol i kamapim wanpela lo bilong traim Daniel na lukim em bai stap gut long God bilong em o long king. Bilong bihainim dispela lo, Daniel i no ken beten long Jehova inap 30 de, na long dispela rot em bai soim olsem em i stap gut long king na em i wankain olsem ol narapela manmeri. Daniel i laik stap gut long God na em i no bihainim dispela lo.—Dan. 6:​12-15, 20-22. w23.08 5 par. 10-12

Jehova i laik yumi mas wok yet long laikim ol bratasista bilong yumi. Sapos sampela bratasista i no mekim ol pasin Kristen, yumi ken ting olsem ol i gat laik long bihainim ol stiatok bilong Baibel, tasol ol i popaia na mekim pasin i no stret. (Prov. 12:18) God i laikim ol gutpela wokman bilong em, maski ol i save mekim ol popaia. Em i no save lusim yumi i go longwe o belhat yet long yumi taim yumi mekim ol popaia. (Sng. 103:9) Olsem na em i bikpela samting long yumi mas bihainim pasin bilong Papa bilong yumi long fogivim ol narapela! (Efe. 4:32–5:1) Yumi mas tingim tu olsem taim bilong pinis i kam klostu tru, olsem na yumi mas pas gut wantaim ol bratasista bilong yumi. Yumi ken save olsem pasin birua bai go bikpela moa. Na tu, ol man inap kalabusim yumi bikos long bilip bilong yumi. Sapos kain samting i kamap, yumi bai nidim tru ol bratasista bilong yumi winim olgeta taim bipo.—Prov. 17:17. w24.03 15-16 par. 6-7

Baibel i stori long ol yangpela em ol i pas gut wantaim Jehova, na Em i orait long ol, na gutpela samting i kamap long laip bilong ol. Devit em i wanpela bilong ol. Taim em i yangpela mangi yet, em i makim olsem em bai lotuim God na bihain em i kamap wanpela king husat i stap gut long God. (1 Kin. 3:6; 9:​4, 5; 14:8) Taim yu stadi long stori bilong Devit na wok bilong God em i bin mekim, dispela i ken kirapim yu na strongim yu tu long mekim laik bilong God. O yu ken mekim wanpela stadi projek long stori bilong Mak o Timoti. Yu bai lukim olsem ol i mekim wok bilong Jehova taim ol i yangpela yet na God i bin orait long ol. Ol samting yu mekim long nau bai makim wanem samting bai kamap long laip bilong yu long bihain. Taim yu trastim Jehova na yu no bilip long save bilong yu yet, em bai helpim yu long mekim ol gutpela disisen. Yu bai stap amamas na laip bilong yu bai i gat as tru bilong en. Tingim, Jehova i tingim tru ol wok bilong em yu mekim. Nambawan gutpela rot yu inap yusim laip bilong yu em long mekim wok bilong Papa bilong yumi long heven, Jehova. w23.09 13 par. 18-19

Aposel Pol i save olsem ol bratasista Kristen bilong em ol i no gutpela olgeta. Olsem, ol Kristen i bin gat tingting kranki long em bihain long em i kirap long bung wantaim kongrigesen. (Apo. 9:26) Bihain sampela i tok baksait long em bilong bagarapim gutnem bilong em. (2 Kor. 10:10) Pol i lukim wanpela brata i holim wok insait long kongrigesen i mekim rong disisen we inap pundaunim ol narapela. (Gal. 2:​11, 12) Na wanpela gutpela pren bilong Pol em Mak, em i bin bagarapim tru bel bilong Pol. (Apo. 15:​37, 38) Pol inap larim ol dispela samting i pasim em long bung wantaim ol dispela man. Tasol nogat, em i holim stretpela tingting long ol bratasista bilong em na em i givim bel yet long mekim wok bilong Jehova. Wanem samting i helpim Pol long mekim yet wok bilong God? Pol i laikim ol bratasista bilong em. Pasin bilong Pol long laikim tru ol narapela i helpim em long tingim tasol ol gutpela pasin bilong ol, na em i no tingim ol pasin kranki bilong ol. Na tu, pasin laikim i kirapim Pol long mekim samting em teks bilong tude i stori long en. w24.03 15 par. 4-5

I gat planti stori long Baibel i soim olsem pasin isi i save kamapim gutpela samting. Tingim eksampel bilong Aisak. Taim em i go sindaun long Gera, em wanpela ples i stap long graun bilong ol Filistia, ol man i stap klostu long em i jeles long em, olsem na ol i pasim ol hulwara em ol wokman bilong papa bilong em i bin digim. Tasol Aisak i no pait long raits bilong em, nogat. Em i kisim famili bilong em na ol i go sindaun long wanpela ples i stap longwe na em i digim ol narapela hulwara. (Stt. 26:​12-18) Tasol ol Filistia i tok olsem wara long ol dispela hulwara, ol tu i bilong ol. Maski i olsem, Aisak i mekim ol samting bilong kamapim bel isi. (Stt. 26:​19-25) Wanem samting i helpim em long mekim yet pasin isi maski ol narapela i laik sikirapim bel bilong em? Em i kisim gutpela skul long eksampel bilong papamama bilong em—em i lain long pasin bilong Abraham long stap bel isi wantaim ol narapela na pasin bilong Sara long mekim “pasin isi na bel isi.”—1 Pita 3:​4-6; Stt. 21:​22-34. w23.09 15 par. 4

Jehova i salim fesbon Pikinini bilong em i kam long graun bilong skulim ol manmeri long Kingdom na long givim laip bilong em olsem pe bilong baim bek ol manmeri long sin na dai. Na bihain God i kirapim bek Jisas long dai na em i go bek long heven na mekim wok King long Kingdom Bilong God. Bikpela astok bilong Baibel em olsem, Jehova bai stretim bek gutnem bilong em na kamapim samting em i tingting pinis long mekim long dispela graun long rot bilong Kingdom em Krais i stap king bilong en. Jehova i no inap tru long senisim samting em i tingting pinis long mekim. Em i bin tokaut olsem em bai kamapim laik bilong em na i no gat wanpela samting bai pasim em. (Ais. 46:10; Hib. 6:​17, 18) I no longtaim, graun bai kamap wanpela Paradais, na ol stretpela manmeri em ol tumbuna pikinini bilong Adam na Iv, ol bai “stap gut inap oltaim oltaim.” (Sng. 22:26) Na i no dispela tasol, Jehova i tingting pinis long mekim sampela bikpela samting moa. Em i tingting pinis long mekim ol ensel long heven na ol manmeri long graun i stap wanbel wantaim. Bihain, olgeta samting bai i stap aninit long em olsem King bilong ol. (Efe. 1:​8-11) Yu amamas long gutpela rot Jehova i yusim bilong kamapim ol samting em i tingting pinis long mekim? w23.10 20 par. 7-8

Taim ol Juda em ol i bin lusim Babilon i go kamap long Jerusalem, i no longtaim na ol i bungim hevi bilong mani na hevi insait long gavman, na tu, ol kantri i stap klostu i birua long ol. Olsem na sampela i pilim hatwok long putim tingting olgeta long wokim gen tempel bilong Jehova. So Jehova i salim tupela profet em Hagai na Sekaraia i go bilong strongim ol manmeri long givim bel yet long mekim dispela wok, na dispela i helpim tru ol. (Hag. 1:1; Sek. 1:1) Tasol klostu 50 yia bihain, ol Juda i nidim gen ol tok bilong strongim ol. Esra em wanpela man i save gut long raitim tok bilong Lo, em i lusim Babilon na em i go long Jerusalem bilong strongim ol manmeri bilong God long putim lotu i tru i stap nambawan samting long laip bilong ol. (Esr. 7:​1, 6) Ol tok profet em Hagai na Sekaraia i bin mekim i helpim lain bilong God long bipo long wok yet long trastim Jehova long taim ol man i birua long ol. Olsem tasol ol dispela tok inap helpim yumi long nau long wok yet long trastim Jehova olsem em bai helpim yumi taim yumi bungim ol hevi.—Prov. 22:19. w23.11 14-15 par. 2-3

Hau yumi ken soim pasin laikim long ol wanbilip? Wanpela rot yumi ken mekim olsem em long mekim isi bel bilong ol. Yumi bai “wok yet long mekim isi bel bilong narapela narapela” sapos yumi sori tru long ol. (1 Tes. 4:18) Olsem wanem yumi ken strongim yet pasin bilong yumi long laikim narapela narapela? Yumi ken mekim olsem long rot bilong wok strong long fogivim ol popaia bilong ol narapela. Wai na em i bikpela samting long soim olsem yumi laikim narapela narapela moa yet long nau? Pita i kolim wanpela risen, em i tok: “Pinis bilong olgeta samting i kam klostu. Olsem na . . . yupela i mas laikim tru ol arapela.” (1 Pita 4:​7, 8) Pinis bilong haptaim nogut bilong nau i wok long i kam klostu, olsem na ol man bai mekim wanem long yumi? Jisas i tok profet long ol samting bai painim ol disaipel bilong em, na em i tok: “Ol man bilong olgeta lain bai heitim yupela, long wanem, nem bilong mi i stap long yupela.” (Mat. 24:9) Bilong stap gut yet long Jehova maski ol man i heitim yumi, yumi mas strongim pasin wanbel. Taim yumi mekim olsem, ol samting Satan i mekim bilong bagarapim pasin wanbel bilong yumi bai i lus nating, long wanem, yumi pas gut wantaim long pasin laikim.—Fili. 2:​1, 2. w23.11 13 par. 18-19

Ol tok i tru i stap long Tok Bilong God i gat bikpela strong. Taim yumi skulim ol manmeri long Jehova na ol pasin bilong em, gutpela samting i kamap long dispela. Isi isi ol manmeri i luksave long ol tok giaman bilong Satan na ol i no bilipim moa ol dispela tok giaman, na ol i kirap long luksave long ol gutpela pasin bilong Papa bilong yumi. Ol i kirap nogut long bikpela strong bilong em. (Ais. 40:26) Ol i bilip tru long stretpela pasin bilong em. (Lo 32:4) Ol i lainim planti samting long bikpela savetingting bilong em. (Ais. 55:9; Rom 11:33) Na ol i kisim bel isi long save olsem em i As bilong pasin laikim. (1 Jon 4:8) Taim ol i go klostu moa long Jehova, dispela i strongim pasin bilong ol long bilip na wet long taim ol bai stap laip oltaim olsem ol pikinini bilong em. Yumi amamas tru olsem yumi gat gutpela wok tru long helpim ol manmeri long i go klostu long Papa bilong ol! Taim yumi mekim olsem, Jehova i tingim yumi olsem “ol wanwok” bilong em.—1 Kor. 3:5. w24.02 12 par. 15

Sapos yu wanpela Baibel sumatin o papamama bilong yu ol i Witnes na ol i mekim bikpela long yu, orait olsem wanem? Yu tingting long kisim baptais? Dispela em gutpela mak yu putim! Tasol paslain long yu kisim baptais, yu mas dediketim yu yet long Jehova. Olsem wanem yu ken dediketim yu yet long Jehova? Yu ken dediket long Jehova taim yu beten na tok promis long em olsem yu bai lotuim em wanpela tasol na putim laik bilong em i stap nambawan samting long laip bilong yu. Taim yu mekim olsem, yu tok promis long Jehova olsem yu bai wok yet long laikim em “long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Taim yu dediket long Jehova, dispela em samting namel long yu na Jehova tasol na ol narapela i no save long dispela. Tasol taim yu kisim baptais long ai bilong ol narapela, ol i save olsem yu dediket pinis long Jehova. Dediket bilong yu em wanpela spesel tok promis yu mekim, na Jehova i laik bai yu truim dispela tok promis bilong yu, wankain olsem yu tu i laik mekim olsem.—Ekl. 5:4. w24.03 2 par. 2; 3 par. 5

Olgeta marit i gat hevi bilong ol. Baibel i tokaut klia olsem olgeta marit bai “karim pen na hevi long bodi bilong ol.” (1 Kor. 7:28) Bilong wanem? Long wanem, marit i save bungim tupela man na meri em ol i no gutpela olgeta, tupela i gat ol pasin bilong ol yet, ol samting ol i laikim, na ol samting ol i no laikim. Ating man na meri marit i bikpela long narapela narapela kalsa o bekgraun. Bihain long sampela haptaim, sampela pasin bilong ol inap stap ples klia, em ol pasin we i no bin stap ples klia paslain long weding. Ol dispela samting inap kamapim hevi. Ating ol i kirap long sutim tok long poroman marit, na ol i no luksave olsem ol yet i gat sampela pasin kranki em ol yet i mas wok long stretim. Ating ol inap tingting long seperet o divos bilong stretim dispela hevi. Tasol taim ol i seperet o divos, dispela bai stretim hevi bilong ol? Nogat. Jehova i tok long ol marit man na meri i mas rispektim marit bilong ol, maski poroman marit i gat sampela pasin na i hatwok long stap wantaim em. w24.03 16 par. 8; 17 par. 11

Bihain long yu dediket na baptais, yu wok long kisim sampela save moa na yu kamap strong long bilip, na long dispela rot pasin bilong yu long bilip na wet long stap laip oltaim long Paradais long graun i kamap strong moa. (Hib. 5:13–6:1) Ating yu yet i lukim truim bilong ol tok i stap long Rom 5:​2-4. Yu bin bungim sampela hevi, tasol yu sanap strong na karim ol dispela hevi na yu luksave olsem God i orait long yu. Yu save olsem God i amamas long yu, na dispela i helpim yu long save tru olsem yu bai kisim ol samting Em i tok promis long en. Pasin bilong yu long bilip na wet i kamap strong moa winim long pastaim. Yu bilip tru olsem dispela samting yu wetim, em bai kamap tru. Na dispela i mekim sampela samting long yu, em i stiaim ol samting yu mekim long laip bilong yu na pasin yu mekim long famili bilong yu, hau yu mekim ol disisen, na hau yu yusim taim bilong yu. Aposel Pol i tok gutpela samting bai kamap taim God i orait long yu, na dispela em i wanpela bikpela tok. Pol i strongim yu olsem samting yu bilip na wet long en, em bai kamap tru.—Rom 15:13. w23.12 12-13 par. 16-19

Taim yumi karim wanpela bikpela hevi, filings, tingting, na pasin bilong yumi bai senis senis na bai yumi no inap stap isi. Yumi inap pilim olsem ol tingting na filings bilong yumi i sakim yumi i go i kam wankain olsem ol weiv long solwara i sakim wanpela sip i go i kam. Olsem wanem Jehova i save helpim yumi taim ol kain tingting na filings olsem i daunim yumi tru? Em i tok promis olsem em bai mekim yumi stap gut. Taim wanpela sip i ron long solwara na bikpela win i sakim strong dispela sip long wanpela sait i go long narapela sait, dispela inap kamapim bikpela hevi. Bilong sip i ken stap isi na win i no ken sakim em i go i kam, em i gat ol spesel pul long sait sait bilong en we i save kam ausait aninit long wara. Ol dispela pul i helpim sip bambai strongpela win na ren i no ken sakim sip i go i kam, na bai ol pasindia long sip i stap seif na ol i no kisim bagarap. Tasol ol dispela pul i save wok gut taim sip i wok long ron i go na em i no stap tasol long wanpela hap. Olsem tasol, Jehova bai strongim yumi taim yumi stap gut long em na mekim yet wok bilong em taim yumi bungim ol bikpela hevi. w24.01 22 par. 7-8

Taim yu pret, askim yu yet olsem, ‘Jehova i bin mekim wanem samting pinis?’ Tingim ol samting em i bin wokim. Olsem, taim yumi “lukim gut” hau Jehova i lukautim ol pisin na ol plaua—em ol i no inap kamapim ol pasin bilong em na ol i no inap lotuim em—dispela bai strongim tru pasin bilong yumi long bilip olsem em bai lukautim yumi tu. (Mat. 6:​25-32) Tingim tu ol samting Jehova i bin mekim bilong helpim ol manmeri i lotuim em. Ating yu ken stadi long stori bilong wanpela man o meri long Baibel em ol i gat strongpela bilip, o yu ken ritim ekspiriens bilong wanpela wokman bilong Jehova i stap long taim bilong yumi. Na tu, tingim tingim long bel ol rot Jehova i bin lukautim yu. Long wanem rot em i bringim yu i kam insait long tok i tru? (Jon 6:44) Hau em i bekim ol beten bilong yu? (1 Jon 5:14) Long olgeta wan wan de, olsem wanem yu wok long kisim helpim long ofa bilong Pikinini bilong em?—Efe. 1:7; Hib. 4:​14-16. w24.01 4 par. 6; 7 par. 17