Vanhu Va Manguva Lawa Lava Tshamaka eMabakweni

HI MUYIMERI WA XALAMUKA! ELESOTHO

XANA va ha ri kona vanhu lava tshamaka emabakweni enkarhini wa hina? Hi kume van’wana eLesotho, etikweni ra le dzongeni wa Afrika leri nga ni tintshava. Ximutana xa vona, lexi vuriwaka Ha Kome, xi kumeka eka mpfhuka wa kwalomu ka 60 wa tikhilomitara ku suka eMaseru ku nga ntsindza wa Lesotho, ehansi ka Tintshava letikulu ta Maluti. Hi minkarhi ya ximumu, tintshava leti ti tala ku funengetiwa hi swiluva swa mivalavala yo xonga. Swiluva leswi swi tiviwa tanihi swiluva swo tshwuka, swiluva leswi swo saseka swi humesa muvala lowu fambelanaka ni nhova ya rihlaza ya ndhawu leyi.

Endhawini leyi, mindyangu yo hlayanyana yi hanya hi ndlela ya xikhale swinene. Kahle-kahle, vanhu va kona va aka tindlu ta vona emabakweni ya tintshava. Timhandzi ni swo aka swin’wana swo kota tinhlanga swi tirhisiwa ku endla khumbi leri anameke, leri pfalaka. Khumbi leri ri phamiwa hi misava leyi nga pfuviwa hi vulongo bya tihomu. Ku phama loku ku va sirhelela eka vuxika lebyi titimelaka bya le Lesotho, loko xirhami xi vuyisa n’wana evukatini. Endzeni, ku ni ndhawu leyi nga le hansi leyi vuriwaka ifo leswi vulaka “xitiko,” xitiko lexi xi tlhela xi tirhiseriwa ku kufumeta yindlu loko ku titimela.

Lwangu, khumbi ra hala ndzhaku ni makhumbi ya hala matlhelo, hinkwawo ku va ku ri ribye ra bako hi roxe. Va sindza bako leri hi misava leyi nga pfuviwa hi vulongo bya tihomu, va sindza lembe ni lembe. Leswi swi sasekisa ribye leri swi tlhela swi endla leswaku ri rhetela. Endzeni va sasekisa hi madzovo ya tihomu, va tlhela va ma tirhisa tanihi sangu loko va etlela.

Valungu lava nga ta endzela endhawini leyi va ta tsakisiwa swinene hi ndhavuko lowu. Va tala ku ambala tinguvu ta mivalavala ni xihuku xa xirhendzevutana lexi lukiweke hi byanyi. Hakanyingi u vona vafana lava nga ambalangiki tintangu va ri karhi va risa mintlhambi ya vona. Vavanuna va muti u va vona va ri karhi va tirha emasin’wini ya swifaki kumbe va dya mabulo ni vanuna-kulobye.

Nkarhi ni nkarhi ku vonakala swilo swa manguva lawa swa thekinoloji. Swihaha-mpfhuka leswitsongo leswi hahelaka ehansinyana ni mimovha leyi kokaka hi mavhilwa ya mune leyi tisaka vaendzi emabakweni, swi tsakisa vana ni vanhu lavakulu emutini lowu. Swakudya swo tala swi swekiwa ehandle hi mbita ya milenge yinharhu leyi tlhandlekiwaka exitikweni. Hikwalaho ko pfumaleka ka tihunyi, ndzilo wu tshiveriwa hi maqacha, mahlanga ni tihunyi timbirhi tinharhu. Swingolongondzwana swa le ndlwini leswi kumekaka etindlwini leti ta mabako i xigayo lexi va tiendleleke xona xo gaya mavele ni nkombe wo vondza vuswa ha wona.

Lesotho ri dume hi swifaniso leswi dirowiweke hi Varhwa, leswi kumekaka emabakweni yo hlayanyana ni le maribyeni etikweni hinkwaro. Eku sunguleni a ku ri Varhwa lava a va tshama emabakweni ya le Ha Kome. Swifaniso swa vona swi komba mintirho yo hlayanyana, ku sukela eka ku phasa tinhlampfi hi mabyatso ni tinkoka ku ya eka mincino yo hambana-hambana laha swi vonakaka onge vacini a va ambala madzovo ya swiharhi. Swifaniso swin’wana i swa swiharhi, ku fana ni timfenhe, tinghala, timpfuvu, timhofu ni timhunti letikulu. Swifaniso swo tala leswi a swi ri le Ha Kome swi nyamalarile. Ku lo sala mimfungho ntsena leyi nga xitsundzuxo xa swifaniso swa Varhwa.

Ntlawa wa Timbhoni ta Yehovha wu chumayela endhawini leyi nga ekusuhi ni le Ha Kome. Nkarhi ni nkarhi ti endzela vanhu lava tshamaka emabakweni, lava va dumeke hi ku va ni malwandla. Hakanyingi Timbhoni ti amukeriwa hi ku nyikiwa madleke ya kwalaho, lama vuriwaka motoho. Vanhu vo tala lava tshamaka le Ha Kome va swi tsakela ku amukela tibuku ta Bibele. Hakanyingi va kombisa leswaku va ti tlangela hi ku humesa matsavu, mandza ni swilo swin’wana, swi va munyikelo wa ntirho wo dyondzisa wa Timbhoni.

Vanhu lava va manguva lawa lava tshamaka emabakweni va yi xixima swinene Bibele naswona va rhandza ku vutisa swivutiso swo tala malunghana ni vutomi, rifu ni mindhavuko ya vona leyi va yi kholwelaka. Mintirho ya Timbhoni leti hisekaka endhawini yoleyo, yi endle leswaku ti sungula tidyondzo to tala ta Bibele. Hi ndlela leyi, timbewu ta ntiyiso ti kume misava yo nona etimbilwini ta vanhu lava vo titsongahata.—Matewu 13:8.

[Mepe lowu nga eka tluka 26]

(Leswaku u vona rungula leri hleriweke hi ku helela, vona nkandziyiso wa kona)

HA KOME