Ndlela Leyi Ndyangu Wa Hina Wu Tlheleke Wu Hlangana Ha Yona

Hi ku vula ka Lars na Judith Westergaard

YINDLU ya vona yi languteka tanihi ndhawu leyi tolovelekeke ya ndyangu lowu tsakeke eDenmark. I yindlu leyinene leyi nga ni ntanga wo saseka, leyi kumekaka eximutanini lexi rhuleke. Endzeni ka yona, ku ni xifaniso lexikulu ekhumbini, xa vana va ndyangu wolowo lava n’wayitelaka, lava hanyeke bya cheleni.

Lars, tata wa vona, i nkulu evandlheni ra Timbhoni ta Yehovha. Nsati wakwe Judith, i phayona (muvuri wa evhangheli wa nkarhi hinkwawo). Hambileswi sweswi va tsakeke, kambe a swi nga ri tano enkarhini lowu hundzeke. Lars na Judith va tshame va langutana ni swiphiqo ni maxangu yo tala lama endleke leswaku va dlaya vukati kutani swirho swa ndyangu wa vona swi hambana. Kambe sweswi, ndyangu wa vona wu tlhele wu hlangana. Ha yini? Vona hi voxe va hlamusela leswi humeleleke.

Lars na Judith a va chavi ku vula leswi peteke ndyangu wa vona endzhopeni ni ndlela leyi wu tlheleke wu hlangana ha yona. Va vona onge ntokoto wa vona wu nga pfuna van’wana.

Swi Sungule Kahle

Lars: Eku sunguleni hi April 1973 a ku ri ntsako lowukulu loko vukati bya hina byi sungula. A swi vonaka onge swilo hinkwaswo swi ta famba kahle. A hi nga yi tivi Bibele hambi ku ri Timbhoni ta Yehovha, kambe a hi tiyiseka leswaku misava leyi yi ta va ndhawu yo antswa yo hanya eka yona loko vanhu hinkwavo vo tirha hi ku tiyimisela. Hikwalaho, hi hoxe xandla eka matshalatshala yo tala ya tipolitiki. Ntsako wa hina wu engetelekile loko hi kuma vana vanharhu va vafana lava hanyeke kahle—Martin, Thomas na Jonas.

Judith: A ndzi ri mulanguteri erhavini ra kwalaho ra tihofisi ta hulumendhe. Hi nkarhi lowu fanaka, a ndzi nghenele yuniyoni ya tipolitiki ni ya vatirhi. Hakatsongo-tsongo ndzi nyikiwe swikhundla swa vurhangeri.

Lars: Loko ku ri mina, a ndzi tirha eka yuniyoni leyikulu ya vatirhi, naswona ndzi tlakusiwile ndzi ya fika exikhundleni xa le henhla. A ku ri hava ni xirhalanganya xitsongo emahlweni ka hina, swilo a swo rhelela kunene.

Hi Hambana

Lars: Kambe a hi tinyiketele ngopfu entirhweni wa hina lerova a hi nga vi na nkarhi lowu ringaneke hi ri swerhu. A hi tirhela nhlengeletano yin’we ya tipolitiki, kambe etindhawini leti hambaneke. Vana va hina vanharhu a va khathaleriwa hi vanhu van’wana, minkarhi yin’wana a va khathaleriwa emakaya vanhu lava kumbe etindhawini to khathalela vana ninhlikanhi. Tanihi leswi ha un’we wa hina a a khomekile hi timhaka ta yena n’wini, vutomi bya hina bya ndyangu byi sungule ku pfilunganyeka. Loko havumbirhi bya hina ho tshuka hi va ekaya hi nkarhi wun’we, a ku tala ku pfuka ritshuri. Kutani ndzi sungule ku tshungula xiphiqo lexi hi ku nwa byala.

Judith: Ina, a ha ha rhandzana naswona a hi rhandza vana va hina, kambe rirhandzu ra hina a ri nga hlakuleriwi hi ndlela leyi ri faneleke ri hlakuleriwa ha yona; a ri vonaka ri tsana. Vuxaka bya hina a byi nga tsakisi, naswona sweswo swi endle leswaku vana va xaniseka.

Lars: Ndzi endle xiboho xo tshika ntirho leswaku ndzi ta ringeta ku hangalasa papa ra ntima leri a ri funengete ndyangu wa hina. Hi 1985, hi rhurhile edorobeni hi ya eximutanini lexi hi tshamaka eka xona sweswi. Timhaka ti fike ti antswa swa xinkarhana, kambe mina ni nsati wa mina hi ye emahlweni hi khathalela timhaka ta hina ta ntirho. Eku heteleleni, hi February 1989, vukati bya hina bya malembe ya 16 byi hahlukile. Ndyangu wa hina a wu onhakile.

Judith: A swi vava ku vona ndyangu wa hina wu pandzeka hi le xikarhi ni ku vona vana va xaniseka. A hi hlundzuke ngopfu lerova a hi pfumelelananga ku wundlisana vana lava, kutani ndzi va teke hi vanharhu ka vona.

Lars: Mina na Judith hi endle matshalatshala yo hlayanyana lama nga nyawuriki ya ku ringeta ku hlanganisa ndyangu wa hina lowu a wu hahluka. Hi tlhele hi khongela eka Xikwembu hi kombela mpfuno. Kambe a hi nga tivi nchumu hi Xikwembu.

Judith: Loko hi heta ku khongela, a hi vona onge Xikwembu a xi hi yingisanga. Ha tsaka leswaku ku sukela kwalaho, hi swi vonile leswaku Xikwembu xa swi yingisa swikhongelo.

Lars: A hi nga swi tivi leswaku hi fanele hi endla matshalatshala, kutani hi cinca vutomi bya hina. Hikwalaho, hi twe ku vava loko hi dlaya vukati.

Lars A Cinca Hi Ndlela Leyi Nga Languteriwangiki

Lars: Loko ndzi tshama ndzi ri ndzexe, timhaka ti ndzi cincele hi ku helela, hi ndlela leyi a ndzi nga yi langutelanga. Siku rin’wana ndzi teke timagazini timbirhi eka Timbhoni ta Yehovha. Khale a ndzi ti bakanya Timbhoni. Kambe loko ndzi ri karhi ndzi languta timagazini teto, ndzi lemuke leswaku Timbhoni ta pfumela eka Xikwembu na Yesu Kreste. Sweswo swi ndzi hlamarise ngopfu. A ndzi nga swi tivi leswaku i Vakreste.

Hi nkarhi wolowo, ndzi sungule ku tshama ni nsati un’wana loyi ndzi hlanganeke na yena. Ndzi kume leswaku u tshama a va Mbhoni ya Yehovha. Loko ndzi sungula ku vutisa swivutiso, u ndzi kombe eBibeleni leswaku Yehovha i vito ra Xikwembu. Hikwalaho, “Timbhoni ta Yehovha” swi vula “Timbhoni ta Xikwembu”!

Wansati loyi u hlele leswaku ndzi ya enkulumeni ya le rivaleni eHolweni ya Nhlengeletano ya Timbhoni ta Yehovha. Swi ndzi tsakisile leswi ndzi swi voneke kwalaho. Ndzi endzele Holo ya Mfumo ya kwalaho leswaku ndzi dyondza swo tala, naswona ndzi sungule ku dyondzeriwa Bibele. A swi ndzi tekelanga nkarhi wo leha ku lemuka leswaku ndlela leyi a ndzi hanya ha yona yi hoxile, hikwalaho, ndzi hambane ni xigangu xa mina, kutani ndzi ya tshama edorobeni leri nga ekusuhi ni le kaya. Endzhaku ko kanakananyana, ndzi tihlanganise ni Timbhoni ta Yehovha kwalaho kutani ndzi ya emahlweni ni dyondzo ya mina ya Bibele.

Ina, a ndza ha kanakananyana. Xana Timbhoni ta Yehovha a ti ri vanhu va Xikwembu hakunene? Ku vuriwa yini hi swilo hinkwaswo leswi ndzi swi dyondzeke loko ndza ha ri n’wana? Tanihi leswi ndzi kurisiweke ndzi nghena kereke ya Seventh-Day Adventist, kutani ndzi ye eka mufundhisi wa Maadventist. U pfumerile ku dyondza na mina hi Ravunharhu wun’wana ni wun’wana, kasi Timbhoni ta Yehovha a ti dyondza na mina hi Musumbhunuku wun’wana ni wun’wana. A ndzo lava nhlamulo leyi nga erivaleni eka mintlawa leyi hayimbirhi malunghana ni timhaka ta mune ntsena: ku vuya ka Kreste, ku pfuka ka vafi, dyondzo ya Vunharhu-un’we ni ndlela leyi vandlha ri faneleke ri hleriwa ha yona. Swi ndzi teke tin’hweti ti nga ri tingani ntsena ku susa ku kanakana hinkwako. Eka tinhla leti ta mune—ni le ka letin’wana hinkwato—a ku ri tidyondzo ta Timbhoni ta Yehovha ntsena leti a ti sekeriwe eBibeleni hi ku helela. Hikwalaho ka sweswo, ndzi sungule ku hlanganyela emintirhweni hinkwayo ya vandlha, kutani hi ku hatlisa ndzi tinyiketela eka Yehovha. Ndzi khuvuriwe hi May 1990.

Ku Vuriwa Yini Hi Judith?

Judith: Loko swiphiqo swa vukati bya hina swi tika ngopfu, ndzi tlhelele ekerekeni. A ndzi hlundzuke ngopfu loko ndzi twa leswaku Lars u va Mbhoni ya Yehovha. Jonas, n’wana wa hina lontsongo la nga ni malembe ya khume, minkarhi yin’wana a a endzela tata wakwe, kambe ndzi alele Lars ku famba na Jonas eka nhlangano hambi wu ri wihi wa Timbhoni. Lars u ririle eka valawuri, kambe va yime na mina.

Ndzi hlangane ni wanuna un’wana. Nakambe, ndzi nghene hi nhloko eka tipolitiki ni le ka timhaka to hambana-hambana ta tiko. Kutani, loko a ku ve ni munhu loyi a vulavuleke hi leswaku ndyangu wa hina wu nga ha tlhela wu hlangana siku rin’wana, a swi ta vonaka o nge wa lorha.

Leswaku ndzi kuma swivangelo swo hehla Timbhoni ta Yehovha, ndzi ye eka mufundhisi wa kereke ya laha ndzi tshamaka kona, loyi a vuleke hi ku kongoma leswaku a nga tivi nchumu hi Timbhoni naswona a nga na tona tibuku ta tona. Leswi a ndzi byeleke swona ntsena, hileswaku ndzi nga karhateki hi tona. Kambe sweswo a swi ri cincanga langutelo ra mina ro biha hi Timbhoni ta Yehovha. Kambe ndzi tikume ndzi bohekile ku hlangana na tona hi ndlela leyi a ndzi nga yi langutelanga.

Makwerhu la tshamaka eSweden u ve Mbhoni ya Yehovha, kutani ndzi rhambiwe emucatweni wakwe lowu a wu khomeriwe eHolweni ya Mfumo! Xiendlakalo xexo xi ri cince ngopfu langutelo ra mina hi Timbhoni. Lexi ndzi hlamariseke, a va nga ri vanhu lava phirhaka hilaha a ndzi ehleketa hakona minkarhi hinkwayo. A va ri ni musa naswona va tsakile, va ri vanhu va misavu.

Kasi khale ka nuna wa mina Lars, a a cincile hi ku helela. Sweswi a swi kota ku byarha vutihlamuleri, a a tinyika nkarhi wa ku va ni vana, a a ri ni musa naswona a kota ku lawula ndlela leyi a vulavulaka ha yona, a nga ha kukutleli byala ku tlula mpimo ku fana ni le ku sunguleni. Vumunhu byakwe a byi tsakisa! Sweswi a a ri leswi minkarhi hinkwayo a ndzi lava leswaku a va swona. A swi ndzi heta matimba ku tiva leswaku a ha ha tekananga nileswaku kumbexana u ta teka nsati un’wana siku rin’wana!

Kutani ndzi hlele ku n’wi “hlasela” hi vurhon’wana. Siku rin’wana loko Jonas a ri eka tata wakwe, ndzi hlele ku ya vona Jonas na Lars ndzi ri ni vamakwerhu vambirhi va xisati, ndzi endla onge va lava ku vona n’wana wa hina. Hi hlangane ephakeni ya vuhungasi. Loko vamakwerhu va ri karhi va khathalela mufana loyi, mina na Lars hi kume xitulu hi tshama ehansi.

Lexi ndzi hlamariseke, loko ndzi pfula nomu ndzi vulavula hi vumundzuku bya hina, Lars u humese buku exikhwameni xakwe. Buku leyi a yi vitaniwa Ku Endla Vutomi Bya Ndyangu Wa Wena Byi Tsakisa.a U ndzi nyike buku leyi kutani a ringanyeta leswaku ndzi hlaya tindzima leti vulavulaka hi vutihlamuleri bya wanuna ni wansati endyangwini. U ndzi khutaze hi ku hlawuleka leswaku ndzi hlaya matsalwa lama kombisiweke.

Kutani, loko mina na Lars hi suka hi yima, a ndzi lava ku khoma voko rakwe, kambe u arile hi ndlela ya musa. Lars a a nga swi lavi ku endla vuxaka na mina a nga yi tivi ndlela leyi a ndzi ri languta ha yona ripfumelo rakwe lerintshwa. Sweswo swi ndzi tlhavile hi ndlela yo karhi, kambe ndzi swi twisisile leswaku langutelo rakwe a ri ri rinene naswona a ku ta vuyeriwa mina loko o tlhela a va nuna wa mina.

Hinkwaswo leswi swi endle leswaku ndzi lava ku tiva swo tala hi Timbhoni ta Yehovha ku tlula hambi ku ri rini eku sunguleni. Esikwini leri landzelaka, ndzi tihlanganise ni wansati loyi a ndzi tiva leswaku i Mbhoni, naswona hi hlele leswaku yena ni nuna wakwe va ndzi nyika rungula leri a ndzi ri lava malunghana ni vukhongeri bya vona. Va tirhise Bibele ku hlamula swivutiso swa mina hinkwaswo. Ndzi swi vonile leswaku leswi Timbhoni ta Yehovha ti swi dyondzisaka swi sekeriwe eBibeleni hilaha ku tiyeke. Eka yinhla yin’wana ni yin’wana, a ndzi boheka ku pfumela ntiyiso.

Hi nkarhi wolowo, ndzi sule vito ra mina eKerekeni ya Evangelical Lutheran ndzi tlhela ndzi tshika tipolitiki. Ndzi tshike ni ku dzaha. Sweswo a swi tika ku tlula hinkwaswo. Ndzi sungule ku dyondza Bibele hi August 1990, naswona hi April 1991, ndzi khuvuriwile ndzi va Mbhoni ya Yehovha.

Mucato Wa Vona Wa Vumbirhi

Judith: Sweswi havumbirhi bya hina a hi ri Timbhoni leti khuvuriweke. Hambileswi a hi fambe hi tindlela timbirhi leti hambaneke, hinkwerhu hi dyondze Bibele. Hi ku pfuniwa hi dyondzo ya yona leyinene, a hi nga ha ri swona leswi a hi ri swona eku sunguleni. A ha ha khathalelana, kumbexana hi ndlela leyi antswaka ngopfu ku tlula eku sunguleni. Kutani, a hi ntshunxekile leswaku hi tekana nakambe—kutani hi tekanile. Hi tlhele hi hlambanya, kambe sweswi a hi hlambanyela eHolweni ya Mfumo ya Timbhoni ta Yehovha.

Lars: A swi kholweki leswi endlekeke—ndyangu wa hina wu tlhele wu hlangana! Mawaku ntsako lowu hi nga na wona sweswi!

Judith: Emucatweni wa hina a ku ri ni vana va hina, maxaka ya hina ni vanghana va hina vo tala lavantshwa ni va khale. A ku ri mhaka leyi hlamarisaka. Van’wana lava a va ri kona hi lava a va hi tiva ha ha tekanile eku sunguleni; a va tsakile ku hi vona hi ri swin’we nakambe naswona a va hlamarile ku vona ntsako wa xiviri exikarhi ka Timbhoni ta Yehovha.

Vana

Lars: Ku sukela loko hi khuvuriwile, hi tsakile ku vona vana va hina vambirhi va endla xiboho xa vona xa ku nyiketela vutomi bya vona eka Yehovha.

Judith: Jonas u tlangele ntiyiso wa Bibele ku sukela loko a wu twe a ha ri mufana loko a endzela tata wakwe. A a ri ni malembe ya khume ntsena loko a ndzi byela leswaku u lava ku ya tshama ni tata wakwe, hi ku vula kakwe, “Tatana u landzela Bibele.” Jonas u khuvuriwile loko a ri ni malembe ya 14. U hetile xikolo, sweswi i mutirheli wa nkarhi hinkwawo.

Lars: Martin, n’wana wa hina lonkulu, sweswi u ni malembe ya 27. Ndlela leyi a voneke hi cinca ha yona yi endle leswaku a sungula ku ehleketa. U suke ekaya a ya tshama endhawini yin’wana. Emalembeni mambirhi lama hundzeke u sungule ku dyondza Bibele ni vandlha ra kwalaho ra Timbhoni ta Yehovha. Endzhaku ka tin’hweti ta ntlhanu ntsena, a a lunghekele ku khuvuriwa. U ya emahlweni ni makungu lamanene ya vutomi byakwe bya nkarhi lowu taka tanihi Mukreste.

Thomas, n’wana wa hina wa vumbirhi, a hi Mbhoni ya Yehovha sweswi. Ina, ha ha n’wi rhandza, naswona hi ni vuxaka lebyinene na yena. U tsakile hi ku cinca loku ku endlekeke endyangwini wa hina. Hinkwerhu ha pfumela leswaku hi ku pfuniwa hi misinya ya milawu leyi hina vatswari hi yi dyondzeke eBibeleni, ndyangu wa hina wu hlanganile nakambe. Mawaku nkateko wonghasi eka hina leswaku ha swi kota ku hamba hi hlangana minkarhi yo tala, ku ri hina vatswari ni vafana lavanharhu hinkwavo!

Vutomi Bya Hina Namuntlha

Lars: A hi vuli leswaku se hi hetisekile. Kambe hi dyondze swo karhi—leswaku rirhandzu ni ku xiximana ka vanhu vambirhi i swilotlelo leswikulu endyangwini lowu humelelaka. Xisekelo lexi vukati bya hina byi akiweke ehenhla ka xona sweswi xi hambane ngopfu ni lexiya xo sungula. Sweswi havumbirhi bya hina hi tiveke ehansi ka vulawuri lebyi tlakukeke ku hi tlula, hikuva havumbirhi bya hina ha swi lemuka leswaku hi hanyela Yehovha. Mina na Judith hi titwa hi ri ni vun’we naswona hi langutele vumundzuku hi ri ni ntshembo.

Judith: Ndzi kholwa leswaku hina hi vumbhoni bya xiviri bya leswaku Yehovha i mutsundzuxi lonkulu wa vatekani ni wa ndyangu ku tlula hinkwavo.

[Nhlamuselo ya le hansi]

[Xifaniso lexi nga eka tluka 28]

Lars na Judith hi nkarhi wa mucato wa vona wo sungula, hi 1973

[Xifaniso lexi nga eka tluka 29]

Vafana vanharhu va lahlekeriwe hi ndyangu wa ka vona lowu nga ni vun’we kambe va tlhele va wu kuma

[Xifaniso lexi nga eka tluka 31]

Lars na Judith namuntlha, va hlanganisiwe nakambe hi ku landzela misinya ya milawu ya Bibele