Ta Rivala
◼ “Hi langutane ni khombo lerikulu [minkitsikitsi ya tipolitiki eGeorgia] . . . Xikwembu xi na hina naswona Wanhwana Mariya u le ku [hi] sirheleleni, kambe nchumu lowu hi karhatekaka ngopfu ha wona hileswaku Maorthodox ya le Rhaxiya ma dlayetela Maorthodox ya le Georgia.”—GEORGIAN CATHOLICOS PATRIARCH ILLIA II.
◼ “Vanhu lava endzelaka madokodela leswaku ma va nyika maphilisi hi xihatla yo sivela ku veleka, nhlayo ya vona yi phindheke ka nharhu eka tin’hweti ta tsevu leti hundzeke, naswona ku xavisiwa ka maphilisi lawa ku engeteleke hi tiphesente leti tlulaka 200 ku sukela hi 2004. . . . Hi kuma tinqingho to tala ta lava lavaka mpfuno hi Musumbhunuku. To tala ta tinqingho leti hi ti kumaka ti huma eka vana va kondlo-a-ndzi-dyi.”—CLARÍN, ARGENTINA.
◼ Vana va le Amerika lava nga emalembeni ya le xikarhi ka 13 na 17 lava va tirhisaka selfoni ha un’we wa vona u “rhumele kumbe ku rhumeriwa ti-SMS ta kwalomu ka 1 742 hi tin’hweti ta April, May na June [hi 2008].”—THE NEW YORK TIMES, U.S.A.
◼ “Vuvabyi bya mianakanyo byi hlasela vanhu lava endlaka tiphesente ta kwalomu ka 12 emisaveni hinkwayo.”—WORLD FEDERATION FOR MENTAL HEALTH, U.S.A.
◼ “Ku ringanyetiwa leswaku munhu un’we eka va ntlhanu wa vanhu lavakulu lava tshamaka eYuropa u tshame a ringeta ku dzaha [mbangi].”—EUROPEAN MONITORING CENTRE FOR DRUGS AND DRUG ADDICTION, PORTUGAL.
Ku Pfukuriwa Ka Mavito Ya Le Bibeleni
Loko Vayimburi va cela le Yerusalema eMutini wa khale wa Davhida, va tshubule tsalwa leri nga ni malembe ya 2 600 leri lemiweke hi vumba, leri nga ni vito ra “Gedaliya n’wana wa Paxahuru.” Gedaliya ku vulavuriwa ha yena eBibeleni eka Yeremiya 38:1, swin’we na Yehukali loyi a vuriwaka “Yukala [vito leri komisiweke ra Yehukali] n’wana wa Xelemiya,” loyi vito rakwe ri kumiweke eka xilemo xa vumba endhawini leyi fanaka hi lembe ra 2005. Vavanuna lava vambirhi a va ri tindhuna ehubyeni ya Hosi Sedekiyasi. The Jerusalem Post yi ri: “Mhaka leyi i yo sungula ku humelela eka matimu ya vuyimburi bya le Israyele bya leswaku swilemo swimbirhi swa vumba leswi nga ni mavito ya le Bibeleni lama humelelaka endzimaneni yin’we eBibeleni swi kumiwe endhawini yin’we.”
Thekinoloji Leyi Tirhisiwaka Ku Lwisana Ni Vugevenga
Ndzawulo ya Maphorisa ya le New York yi kuma tinqingho to tala leti humaka eka vanhu lava lavaka ku pfuniwa hi xihatla. Nhluvuko lowu endliweke eka thekinoloji wu endla leswaku swi koteka ku vulavula ni maphorisa hi ku ma rhumela rungula hi SMS. Phepha-hungu leri vuriwaka The New York Times ri vika leswaku “sweswi vaaka-tiko va khutaziwa leswaku va teka vhidiyo hi tiselfoni ta vona loko va vona ku ri karhi ku endliwa vugevenga ivi va ti rhumela eka maphorisa.” Phepha leri ri vula leswaku nakambe maphorisa ma teka goza, “hi ku va Ndzawulo leyi Amukelaka Marungula ya Maphorisa yi rhumela swifaniso emimovheni ya maphorisa laman’wana hinkwawo lama tirhaka endhawini leyi ku humelelaka vugevenga.”
Swinyenyana Leswi Vuriwaka Rijajani Swa Titiva
Xiviko lexi humaka eka Reuters xi vula leswaku “a ku anakanyiwa leswaku i tichimpanzi, tidolfini ni tindlopfu ntsena leswi nga ni vuswikoti lebyi fanaka ni bya munhu byo kota ku tiva mimiri ya swona loko swi tivona exivonini.” Sweswi swinyenyana leswi swa le Yuropa ni le Asia swi tekiwa swi ri ni vuswikoti byebyo hambileswi a swi tekiwa swi nga weli kona eka “ntlawa” lowu. Vakambisisi va tote mimiri ya swinyenyana leswi hi pende ya muvala wo karhi leswaku swi kota ku wu vona ntsena loko swi ri exivonini. Xiviko xolexo xi ri: “Swinyenyana leswi a swi tshamela ku susa pende yoleyo emimirini ya swona, leswi kombisaka leswaku xifaniso lexi nga exivonini swa xi tiva leswaku hi swona ku nga ri xiharhi xin’wana.”