April

Xana ku ni ndzingo wo karhi lowu nga ku dyisiki byi rhelela? Swi nga endleka u twa ku vava hileswi u khunguvanyisiweke hi makwerhu un’wana evandlheni. (Yak. 3:2) Kumbexana wa hlekuriwa entirhweni kumbe exikolweni hileswi u tirhelaka Yehovha. (1 Pet. 4:3, 4) Kumbexana maxaka ya wena ma ringeta ku ku tshikisa ku ya etinhlengeletanweni ta vandlha kumbe ku chumayela van’wana. (Mat. 10:35, 36) Loko ndzingo wa kona wu ku tikela swinene, u nga vona onge swa antswa ku tshika ku tirhela Yehovha. Kambe swi tive leswaku swi nga ri na mhaka leswaku u langutana ni miringo ya njhani, Yehovha u ta ku nyika vutlhari ni matimba yo kota ku tiyisela. Yehovha u endle leswaku eRitweni rakwe, ku tsariwa vuxokoxoko bya vanhu lava velekiweke ni xidyoho lava koteke ku tiyisela miringo. Hikwalahokayini? Leswaku hi ta dyondza eka vona. Hi yona mhaka a rhumeke muapostola Pawulo ku tsala hi mhaka leyi. Loko hi hlaya hi timhaka ta muxaka lowu hi ta chaveleleka ni ku va ni ntshembo. Kambe leswaku hi vuyeriwa hi fanela hi endla swo tlula sweswo. Hi fanele hi pfumelela Matsalwa ma cinca ndlela leyi hi ehleketaka hayona ni ku fikelela timbilu ta hina. w21.03 14 ¶1-2

Xana u teka vanhu lava u va chumayelaka tanihi maxalana lama lunghekeleke ku tshoveriwa? Loko swi ri tano, u ta endla swilo leswi landzelaka: Xo sungula, u ta teka ntirho wo chumayela wu ri wa xihatla. Nkarhi wa tshovela wu komile, u nga yimayimi. Xa vumbirhi, u ta tsaka loko vanhu lava u va chumayelaka va amukela mahungu lamanene. Bibele yi ri: ‘Vanhu va tsaka hi nkarhi wa ntshovelo.’ (Esa. 9:3) Xa vunharhu, u ta teka munhu un’wana ni un’wana tanihi loyi a nga vaka mudyondzisiwa kutani u ta sungula bulo na yena hi swilo leswi a swi rhandzaka. Yesu a nga va tsan’wanga Vasamariya hilaha valandzeri vakwe va endleke hakona. Kurinasweswo, a a va teka tanihi lava nga vaka vadyondzisiwa vakwe. Na hina hi fanele hi teka vanhu va le nsin’wini ya ka hina tanihi lava nga vaka vadyondzisiwa va Kreste. Muapostola Pawulo u hi vekele xikombiso lexinene emhakeni leyi. A a tiva tidyondzo leti vanhu lava a va chumayelaka a va pfumela eka tona, a a tiva leswi a va swi rhandza naswona a a va vona va ri vadyondzisiwa va Yesu vamundzuku. w20.04 8-9 ¶3-4

Ematshan’weni yo avanyisa munhu hikwalaho ka swiendlo swakwe, tikarhatele ku twisisa ndlela leyi a titwaka hayona. Yehovha hi yena ntsena loyi a hi tivaka hi ku helela. Hikwalaho, n’wi kombele a ku pfuna u vona leswi a swi vonaka eka van’wana ni ku tiva ndlela leyi u nga va kombaka ntwelavusiwana hayona. A wu nge hlawuli leswaku hi vahi vamakwerhu lava u faneleke u va ni ntwelavusiwana eka vona. Hinkwavo va langutana ni swiphiqo leswi swo tala swa swona swi fanaka ni leswi Yonasi, Eliya, Agara na Lota va langutaneke na swona. Swiphiqo swo tala leswi va langutaneke na swona a va lo tivangela. Entiyisweni, hinkwerhu hi tshame hi endla swihoxo leswi fanaka. Kutani swa twala leswi Yehovha a hi kombelaka leswaku hi twelana vusiwana. (1 Pet. 3:8) Loko hi yingisa Yehovha, hi tiyisa vun’we bya ndyangu wa hina lowu hlamarisaka emisaveni hinkwayo. Onge loko hi tirhisana ni van’wana, hi nga tiyimisela ku yingisa, ku dyondza ni ku kombisa ntwelavusiwana. w20.04 18-19 ¶15-17

Yesu u hi vekele xikombiso lexinene loko swi ta emhakeni yo yingisa Yehovha. Ndlela ya nkoka leyi hi nga swi kombisaka hayona leswaku hi yingisa Yehovha, i ku landzelerisisa mikondzo ya Yesu hilaha hi nga kotaka hakona. (Yoh. 8:29) Leswaku hi hambeta hi famba entiyisweni, hi fanele hi kholwa leswaku Yehovha i Xikwembu xa ntiyiso nileswaku hinkwaswo leswi a hi byelaka swona eRitweni rakwe, ku nga Bibele, i ntiyiso. Nakambe, hi fanele hi kholwa leswaku Yesu i Mesiya loyi a tshembisiweke. Vanhu vo tala namuntlha a va kholwi leswaku Yesu u totiwile tanihi Hosi ya Mfumo wa Xikwembu. Yohane u lemukise vanhu leswaku ku ta va ni “vaxisi vo tala,” lava nga ta hambukisa lava nga swi lunghekelangiki ku yimela ntiyiso mayelana na Yehovha na Yesu. (2 Yoh. 7-11) U te: “Muhembi i mani loko ku nga ri loyi a landzulaka leswaku Yesu i Kreste?” (1 Yoh. 2:22) Lexi nga ta hi pfuna leswaku hi nga hambukisiwi, i ku tinyika nkarhi wo dyondza Rito ra Xikwembu. Sweswo hi swona leswi nga ta hi pfuna hi tiva Yehovha na Yesu. (Yoh. 17:3) Nakambe, hi swona swi nga ta endla hi kholwa leswaku hi kume ntiyiso. w20.07 21 ¶4-5

Ndlela yin’wana leyi hi nga papalataka ku “khunguvanyisa” switsutsumikulorhi hayona, i ku papalata ku sindzisa leswaku swilo swi endliwa hi ndlela ya hina ntsena. (Rhom. 14:19-21; 1 Kor. 8:9, 13) Leswi swi endla hi hambana ni switsutsumi leswi nga emphikizanweni wo tsutsuma wa xiviri. Switsutsumi sweswo swi ehleketelela swona ntsena. Swi nga ringeta ni ku dlidlimbeta switsutsumikulobye leswaku swi suka egondzweni. Ku hambana ni switsutsumi sweswo, hina a hi phikizani hi xihina. (Gal. 5:26; 6:4) Xikongomelo xa hina, i ku pfuna vanhu vo tala hilaha hi nga kotaka hakona leswaku va heta mphikizano kutani hi kuma hakelo ya vutomi swin’we. Hikwalaho, hi yingisa xitsundzuxo lexi nga eBibeleni lexi vulaka leswaku hi nga ‘ehleketi hi leswi vuyerisaka hina ntsena, kambe hi ehleketelela ni van’wana.’ (Filp. 2:4) Eka mphikizano lowu hi nga eka wona, Yehovha u tshembise vanhu vakwe leswaku loko vo heta mphikizano, va ta kuma hakelo ya vutomi lebyi nga heriki etilweni kumbe eparadeyisini laha misaveni. w20.04 28 ¶10; 29 ¶12

Vakreste va timiliyoni lava katsaka vavasati ni vavanuna va ta ya hanya emisaveni leyintshwa. Lava nga ta pona laha misaveni va ta vona ku hluriwa kun’wana ka rifu, ku nga ku pfuxiwa ka vanhu va tibiliyoni lava feke khale. Mayana ntsako lowu nga ta va kona loko nkarhi wolowo wa ku hluriwa ka rifu wu fika! (Mit. 24:15) Hinkwavo lava tshameke va tshembekile eka Yehovha va ta hlula rifu leri va ri kumeke eka Adamu. Va ta tiphina hi vutomi hilaha ku nga heriki. Mukreste un’wana ni un’wana u fanele a tlangela marito lama tiyisaka nhlana lawa Pawulo a ma tsaleleke Vakorinto mayelana ni ku pfuxiwa ka vafi. Hi ni swivangelo leswi twalaka swo yingisa xitsundzuxo xa Pawulo xo tshama hi khomekile sweswi hi ‘ntirho wa Hosi.’ (1 Kor. 15:58) Loko hi endla ntirho wolowo hi ku tshembeka, hi ta tiphina hi vutomi enkarhini lowu taka. Ntsako lowu hi nga ta va na wona enkarhini lowu taka a wu nge pimanisiwi na nchumu. Sweswo swi ta kombisa leswaku ntirho wa Hosi lowu hi wu endleke hi tinghitsi, a ku nga ri nyuku wa mbyana wo helela evoyeni. w20.12 13 ¶16-17

Loko hi teka vuprofeta bya Ezekiyele 38:10-23; Daniyele 2:43-45; 11:44–12:1; na Nhlavutelo 16:13-16, 21 tanihi lebyi vulavulaka hi nkarhi wun’we ni hi swiendlakalo leswi fanaka, hi nga langutela swiendlakalo leswi landzelaka. Endzhaku ka loko ku sungule nhlomulo lowukulu, “tihosi ta misava hinkwayo” ti ta hlangana leswaku ti vumba ntlawa wa matiko. (Nhlav. 16:13, 14) EMatsalweni ntlawa wolowo wa matiko lowu hlanganeke wu vuriwa “Gogo wa tiko ra Magogo.” (Ezek. 38:2) Ntlawa wolowo wa matiko wu ta hlasela vanhu va Xikwembu hinkwavo wu ringeta ku va lovisa. Loko a vulavula hi nkarhi lowu, muapostola Yohane u vone xihangu lexikulu swinene xi hlasela valala va Xikwembu. Xihangu xolexo xi nga ha va xi fanekisela rungula ra vuavanyisi leri nga ni matimba, leri nga ta va ri vuriwa hi vanhu va Yehovha naswona rungula leri ri ta hlohlotela Gogo wa Magogo leswaku a hlasela vanhu va Xikwembu hi xikongomelo xo va herisa emisaveni.—Nhlav. 16:21. w20.05 15 ¶13-14

Moya lowo kwetsima wa Xikwembu i nyiko leyi hi faneleke hi yi tlangela. Hi nga kurisa ndlela leyi hi wu tlangelaka hayona moya lowo kwetsima hi ku xiya ndlela leyi wu hi pfunaka hayona namuntlha. Loko Yesu a nga si tlhandlukela etilweni, u byele vadyondzisiwa va yena a ku: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina . . . ku ya fika emakumu ka misava.” (Mit. 1:8) Hi ku pfuniwa hi moya lowo kwetsima, vanhu va kwalomu ka nhungu wa timiliyoni ni hafu va hlengeletana emisaveni hinkwayo leswaku va gandzela Yehovha. Nakambe, ha tiphina hi vun’we hikwalaho ka leswi moya wa Xikwembu wu hi pfunaka hi hlakulela “mihandzu ya moya” yo tanihi rirhandzu, ntsako, ku rhula, ku lehisa mbilu, musa, vunene, ripfumelo, ku olova ni ku tikhoma. (Gal. 5:22, 23) Hakunene moya lowo kwetsima i nyiko ya risima! w20.05 28 ¶10; 29 ¶13

Hi ni swivangelo swo tala leswi endlaka hi tiyiseka leswaku lava nga ta hoyozela lava pfuxiweke ekufeni, va ta ma tiva maxaka ya vona. Hi xikombiso, loko hi xiya leswi Yehovha a swi endleke eka vanhu lava tshameke va pfuxiwa, swi tikomba onge u ta endla hilaha ku fanaka enkarhini lowu taka, u ta pfuxa vanhu va languteka, va vulavula ni ku ehleketa hi ndlela leyi a va ehleketa hayona va nga si fa. Tsundzuka, Yesu u fanise rifu ni ku etlela ivi a fanisa ku pfuxiwa ka vafi ni ku pfuxiwa evurhongweni. (Mat. 9:18, 24; Yoh. 11:11-13) Loko munhu a pfuxiwa evurhongweni, wa ha languteka hi ndlela leyi a a languteka hayona a nga si ya eku etleleni naswona ku va ku nga cincanga nchumu eka yena. Tsundzuka Lazaro, se a swi endla mune wa masiku a lovile naswona miri wakwe a wu sungula ku bola. Kambe, loko Yesu a n’wi pfuxile vamakwavo va n’wi tivile, swi le rivaleni leswaku na yena u va tivile.—Yoh. 11:38-44; 12:1, 2. w20.08 14 ¶3; 16 ¶8

Ku ni tindlela to tala leti Vakreste lava hlawuriweke ni lava tinyimpfu tin’wana va fanaka hatona. Mitlawa leyi hayimbirhi i ya risima eka Xikwembu. Xi yi xave hi ntsengo wun’we, ku nga vutomi bya N’wana wa xona loyi xi n’wi rhandzaka. Mitlawa leyimbirhi yi hambana ntsena hi ntshembo lowu yi nga na wona. Hayimbirhi ka yona yi fanele yi tshama yi tshembekile eka Xikwembu na Kreste. (Ps. 31:23) Tsundzuka, moya wa Xikwembu wu tirha hi ndlela leyi fanaka eka hinkwerhu. Leswi swi vula leswaku Yehovha u nyika munhu un’wana ni un’wana moya wakwe lowo kwetsima hi ku ya hi xilaveko xakwe. Yehovha u nyike malandza yakwe hinkwawo ntshembo wo tsakisa hi vumundzuku. (Yer. 29:11) Xitsundzuxo xa rifu ra Kreste xi hi nyika nkarhi wo dzunisa Xikwembu na Kreste hikwalaho ka swilo leswi va hi endleleke swona leswaku hi ta kuma vutomi lebyi nga heriki. Xitsundzuxo i nhlengeletano ya nkoka swinene leyi Vakreste va ntiyiso va vaka na yona lembe ni lembe. w21.01 18 ¶16; 19 ¶19

Vunyingi bya vanhu lava va vaka kona eXitsundzuxweni va ni ntshembo wo hanya laha misaveni. Hikwalahokayini va va kona? Va va kona ku fana ni vanhu lava yaka enkhubyeni wa vukati wa vanghana va vona. Va lava ku seketela vatekani ni ku va komba leswaku va va rhandza. Hilaha ku fanaka, lava tinyimpfu tin’wana va va kona eXitsundzuxweni hi xikongomelo xo seketela Kreste ni Vakreste lava hlawuriweke ni ku va komba leswaku va va rhandza. Nakambe va va kona hi xikongomelo xo kombisa ku tlangela gandzelo ra Yesu leri endleke leswaku va va ni ntshembo wo hanya hilaha ku nga heriki laha misaveni. Xin’wana lexi endlaka va va kona eXitsundzuxweni hileswi va yingisaka xileriso lexi Yesu a va nyikeke xona. Loko Yesu a simeka Xilalelo xa Hosi ni vaapostola vakwe vo tshembeka, u va byele leswi: “Tshamani mi ri karhi mi endla leswi leswaku mi ndzi tsundzuka.” (1 Kor. 11:23-26) Hikwalaho, va ta ya emahlweni va va kona eXitsundzuxweni ntsena loko Vakreste lava hlawuriweke va ha ri kona laha misaveni. w21.01 17-18 ¶13-14

Rirhandzu ra xiviri ri kombisiwa hi marito ni hi swiendlo. (Ringanisa na Yakobo 2:17, 26.) Hi xikombiso, Yehovha wa hi rhandza. (1 Yoh. 4:19) U hi byela ndlela leyi a hi rhandzaka hayona hi ku tirhisa Bibele. (Ps. 25:10; Rhom. 8:38, 39) Ha tiyiseka leswaku Yehovha wa hi rhandza hikuva u hi kombisa sweswo hi marito ni hi swiendlo. U pfumelele N’wana wakwe loyi a n’wi rhandzaka leswaku a xanisiwa a tlhela a fa hikwalaho ka hina. (Yoh. 3:16) Swi lo tlangandla, leswaku Yehovha wa hi rhandza hakunene! Hi fanele hi yingisa Yehovha na Yesu ku kombisa leswaku ha va rhandza. (Yoh. 14:15; 1 Yoh. 5:3) Yesu u tlhele a hi lerisa leswaku hi rhandzana. (Yoh. 13:34, 35) Hi fanele hi komba vamakwerhu leswaku ha va rhandza hi marito ni hi swiendlo.—1 Yoh. 3:18. w21.01 9 ¶6; 10 ¶8

Vakreste lava hlawuriweke va ni ntshembo wo ya va na Yesu hilaha ku nga heriki naswona va ta fuma swin’we na yena eMfun’weni wa Xikwembu. Va ta tshama na Kreste, va vulavula na yena ni ku heta nkarhi va tiphina na yena. (Yoh 14:2, 3) Lava nga ni ntshembo wo hanya laha misaveni, na vona va ta vuyeriwa eka rirhandzu ra Yesu. Hambileswi va nga ta ka va nga n’wi voni Yesu kambe vunghana bya vona na yena byi ta kula swinene loko va ri karhi va tiphina hi vutomi lebyi Yehovha na Yesu va endleke leswaku va byi kuma. (Esa. 9:6, 7) Loko hi amukela xirhambo xa Yesu xo va vanghana vakwe, hi kuma mikateko yo tala. Hi xikombiso, ha vuyeriwa eka ndlela leyi a hi rhandzaka ni ku hi seketela hayona sweswi. Hi ni ntshembo wo hanya hilaha ku nga heriki. Xa nkoka swinene, vunghana bya hina na Yesu byi ta endla hi kuma nkateko wo va ni vuxaka lebyinene ni Tata wakwe, ku nga Yehovha. Mayana nkateko wonghasi wo vitaniwa vanghana va Yesu! w20.04 25 ¶15-16

Papila leri, muapostola Pawulo a a ri tsalela Vakreste va le Korinto lava hlawuriweke, lava a va ta pfuxeriwa ku ya hanya etilweni. Vakreste volavo a va ri ni “vun’we na Kreste Yesu” naswona ‘va vitaniwe leswaku va ya va vakwetsimi.’ Pawulo u tlhele a vulavula hi vanhu “lava feke va ri ni vun’we na Kreste.” (1 Kor. 1:2; 15:18; 2 Kor. 5:17) Eka papila rin’wana, Pawulo u vule leswaku lava va ‘hlanganisiweke na Yesu hi rifu leri fanaka ni ra yena,’ va ta “hlanganisiwa na yena hi ku pfuxiwa loku fanaka ni ka yena.” (Rhom. 6:3-5) Yesu u pfuxiwe a ri munhu wa moya kutani a tlhandlukela etilweni. Swi ta va tano ni hi vanhu hinkwavo lava nga “ni vun’we na Kreste,” ku nga Vakreste lava hlawuriweke. Pawulo u vule leswaku Kreste hi yena “wo sungula ku pfuxiwa eka lava feke.” (1 Kor. 15:20) Yesu hi yena wo sungula ku pfuxiwa eku feni kutani a nyikiwa vutomi lebyi nga heriki. w20.12 5-6 ¶15-16

Vakreste lava hlawuriweke lava faka namuntlha, va namba va pfuxeriwa etilweni. Muapostola Pawulo u tiyisekise mhaka leyi eka 1 Vakorinto 15:51, 52. Loko vamakwavo lava Vakreste va pfuxiwa, va ta tiphina hi ntsako Bibele yo boxa ntirho lowu lava nga ta hundzuriwa hi “ku tsopeta ka tihlo” va nga ta wu endla etilweni. Yesu u va byela leswi: “Loyi a hlulaka ni loyi a endlaka leswi ndzi swi leriseke ku ya fika emakumu, ndzi ta n’wi nyika matimba yo fuma matiko, u ta risa vanhu hi nhonga ya nsimbhi leswaku va fayeleriwa va va swipetlu ku fana ni xibya xa vumba, hilaha Tatana a ndzi nyikeke matimba hakona.”—Nhlav. 2:26, 27. w20.12 12 ¶14-15

Loko muapostola Pawulo a vula leswaku Yesu hi yena “wo sungula ku pfuxiwa eka lava feke,” a a vula leswaku van’wana a va ta pfuxiwa endzhaku ka yena kutani va ya hanya etilweni. Hi ku famba ka nkarhi, vaapostola ni van’wana lava nga “ni vun’we na Kreste” a va ta landzela Yesu. (1 Kor. 15:18) Loko va fa, a va ta pfuxeriwa etilweni ku fana na Yesu. Loko Pawulo a tsalela Vakorinto papila, lava feke va ri ni “vun’we na Kreste” a va nga si sungula ku pfuxiwa. Pawulo a a vulavula hi swilo leswi a swa ha ta endleka, u te: “Un’wana ni un’wana u ta pfuxiwa hi nkarhi wakwe: ku rhange ku pfuxiwa Kreste kutani ku ta landzela lava nga va Kreste hi nkarhi wa ku vuya kakwe.” (1 Kor. 15:23; 1 Tes. 4:15, 16) Namuntlha hi hanya enkarhini lowu ku profetiweke ha wona wa ku “vuya” ka Kreste. Vaapostola ni Vakreste van’wana lava hlawuriweke lava a va file, va boheke ku rindza nkarhi wa ku vuya ka Yesu leswaku va ta kuma hakelo ya vona ya ku pfuxeriwa etilweni leswaku va “hlanganisiwa na [Yesu] hi ku pfuxiwa loku fanaka.”—Rhom. 6:5. w20.12 5 ¶12; 6 ¶16-17

Muapostola Pawulo a a vulavula hi munhu loyi a nga ta pfuxeriwa ku ya hanya etilweni a ri ni “miri wa moya.” (1 Kor. 15:43, 44) Loko Yesu a ha ri laha misaveni a ri ni miri wa nyama. Kambe loko a pfuxiwa, u “ve moya lowu nyikaka vutomi” naswona u tlhelele etilweni. Hilaha ku fanaka, Vakreste lava hlawuriweke va ta pfuxiwa va ri ni miri wa moya. Pawulo u te: “Leswi hi fanaka ni loyi a endliweke hi ntshuri, hi ta tlhela hi fana ni lowa le tilweni.” (1 Kor. 15:45-49) Xiya leswaku Yesu a nga pfuxiwanga a ri na miri wa nyama. Pawulo u te: “Nyama ni ngati a swi nge yi dyi ndzhaka ya Mfumo wa Xikwembu” etilweni. (1 Kor. 15:50) Vaapostola ni Vakreste van’wana lava hlawuriweke a va nge pfuxeriwi etilweni va ri ni mimiri leyi onhakaka ya nyama ni ngati. w20.12 10-11 ¶10-12

Xikwembu xi huhutele vadyondzisiwa van’wana va Yesu va le nkarhini wa vaapostola leswaku va tsala hi ta ntshembo wa ku pfuxeriwa etilweni. Muapostola Yohane u te: “Sweswi hi vana va Xikwembu, kambe a hi si swi tiva leswi hi nga ta va swona. Ha swi tiva leswaku loko a humelela hi ta fana na yena.” (1 Yoh. 3:2) Vakreste lava hlawuriweke a va swi tivi leswaku va ta va va ri njhani loko va pfuxeriwa etilweni. Kambe va ta n’wi vona Yehovha loko va kuma hakelo ya vona. Bibele yi boxa vuxokoxoko byi nga ri byingani mayelana ni mhaka leyi. Vahlawuriwa va ta va va ri na Kreste loko a herisa “mifumo hinkwayo, vuhosi ni matimba,” ku katsa ni “nala wo hetelela ku nga rifu.” Eku heteleleni, Yesu swin’we ni vafumikulobye, va ta tlherisela tintambu eka Yehovha. (1 Kor. 15:24-28) Ntsako wu ta va wu kulu swinene hi nkarhi wolowo! w20.12 8 ¶2

Vakreste hinkwavo vo tshembeka lava nga riki na wona ntshembo wo ya hanya na Kreste etilweni na vona va ni ntshembo wa ku pfuxiwa eku feni. Bibele yi vula leswaku muapostola Pawulo ni van’wana lava nga ta ya hanya etilweni, va ta va van’wana va lava va nga ta “pfuxiwa ku sungula eka lava feke.” (Filp. 3:11) Xana leswi a swi hi byeli swona leswaku ku ta va ni ku pfuxiwa kun’wana loku nga ta landzela? Leswi swi pfumelelana kahle ni leswi Yobo a vuleke leswaku swi ta endleka enkarhini lowu taka. (Yobo 14:15) “Lava nga va Kreste hi nkarhi wa ku vuya kakwe,” va ta va va ri etilweni na Yesu loko a herise mifumo hinkwayo ni vuhosi hinkwabyo ni matimba. Hambi ku ri “nala wo hetelela ku nga rifu, u ta herisiwa.” Swi le rivaleni leswaku hinkwavo lava pfuxeriweke etilweni a va nge he fi. (1 Kor. 15:23-26) Vanhu lava nga ta hanya laha misaveni ntshembo wa vona wu sekeriwa eka marito ya Pawulo lama tekiwe eka ndzimana ya hina ya siku. Swi le rivaleni leswaku marito lawa ma kombetala eka ku pfuxiwa loku nga ta endleka enkarhini lowu taka laha misaveni. w20.12 6-7 ¶18-19

Hi nga tivutisa, ‘Ndzi nga tiyiseka njhani leswaku Yehovha u ndzi rivalerile?’ Kahlekahle loko hi vutisa xivutiso lexi, hi hala tlhelo hi va hi ri eku ti hlamuleni. Eka malembe yo tala lama hundzeke, Xihondzo xo Rindza xi tshame xi ku: “Mikarhi yo tala hi nga tikuma hi hele matimba hikwalaho ka mikhuva yo karhi yo biha ya khale leyi a yi dzime timitsu etimbilwini ta hina handle ko swi xiya. . . . U nga gimeti hi ku tibyela leswaku u endle xidyoho lexi nga rivalelekiki. Phela Sathana u lava u titwa hi ndlela yoleyo. Ku karhateka ka wena hi mhaka yoleyo ku kombisa leswaku a wu munhu wo biha naswona Yehovha u ta ku rivalela. Titsongahate u tlhela u ya emahlweni u khongela eka Yehovha u kombela a ku rivalela ni ku endla leswaku u va ni ripfalo leri baseke.” Loko a nga si va Mukreste, muapostola Pawulo u endle swidyoho swo tala leswikulu. Pawulo a a swi tsundzuka swilo leswi a swi endleke. (1 Tim. 1:12-15) Kambe a teka nkutsulo tanihi nyiko leyi humaka eka Xikwembu. Pawulo a a nga titwi nandzu ku tlula mpimo kambe a a ehleketa ngopfu hi ku tirhela Yehovha. w20.11 27 ¶14; 29 ¶17

Ku na swo tala leswi Sathana a hi ringaka ha swona. Xana hi angula njhani? Swa olova ku vula leswaku a swi bihanga. Hi xikombiso, hi nga ku: ‘A ndzi nge susiwi hikwalaho ko endla swilo leswi, a swi bihanga ngopfu.’ Langutelo ro tano ri bihile. Swi ta va swinene ku tivutisa swivutiso leswi: ‘Xana Sathana u ringeta ku ava mbilu ya mina hi ku tirhisa ndzingo lowu? Loko ndzo pfumela ku hluriwa hi ndzingo, xana ndzi ta endla leswaku vito ra Yehovha ri sandziwa? Xana ku endla leswi, swi ta tiyisa vuxaka bya mina ni Xikwembu kumbe swi to byi onha?’ Anakanyisisa hi swivutiso leswi. Khongela u kombela vutlhari leswaku u ta swi hlamula hi ku tshembeka. Ku endla tano, swi ta ku sirhelela. Swi ta endla u va ni xivindzi xo bakanya ndzingo, hilaha Yesu a endleke hakona loko a ku: “Suka, Sathana!” (Mat. 4:10) Tsundzuka leswaku mbilu leyi avaneke a yi pfuni nchumu. w20.06 12-13 ¶16-17

Hi yingisa milawu ya Yehovha hi ku titsongahata hikuva ha swi tiva leswaku mikarhi hinkwayo Yehovha u tiva leswi nga swinene eka hina. (Efe. 4:22-24) Ku titsongahata swi endla hi teka ku endla ku rhandza ka Yehovha ku ri ka nkoka ku tlula swilo hinkwaswo ni ku teka van’wana va ri lava tlakukeke ku tlula hina. Sweswo swi endla hi va ni vuxaka lebyinene na Yehovha swin’we ni vamakwerhu. (Filp. 2:3) Loko hi nga tivoneli, vanhu va misava leyi lava lawuriwaka hi Sathana, va nga hi chela moya wo tikukumuxa ni ku nga khathali hi vanhu van’wana. Swi tikomba onge van’wana enkarhini wa vaapostola a va ngheniwe hi moya lowu, hi yona mhaka muapostola Pawulo a tsaleleke Varhoma a ku: “Ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona; kambe a a ehlekete hi xikongomelo xo va ni mianakanyo leyi hlutekeke.” Pawulo u vule leswaku hi fanele hi tiehleketelela. Kambe ku titsongahata swi ta endla hi va ni langutelo lerinene mayelana ni ndlela leyi hi tiehleketelelaka hayona naswona swi ta hi pfuna hi nga tiehleketeleli ku tlula mpimo. w20.07 2 ¶1-2

Enkarhini wa Asa, ku rhula loku a ku ri kona ku vuye ku hela. Ku te vuthu ra masocha ra ntsandzavahlayi leri nga ni matimba ri huma eEtiyopiya. Murhangeri wa vuthu rero Zara, a tshemba leswaku yena ni vuthu rakwe va ta hlula tiko ra Yuda. Hambiswiritano, Hosi Asa a a nga titsheganga hi masocha ya yena kambe a a titshege hi Yehovha Xikwembu xakwe. U khongerile a ku: “Hi pfune, Yehovha Xikwembu xa hina, hikuva hi tshembe wena naswona hi te ku ta lwa ni ntshungu lowu hi vito ra wena.” (2 Tikr. 14:11) Hambileswi masocha ya Vaetiyopiya a ma tele ngopfu, Asa a a swi tiva leswaku Yehovha u ni matimba naswona U ta sirhelela vanhu vakwe. Yehovha a nga n’wi khomisanga tingana, u hlule Vaetiyopiya hi ndlela leyi hlamarisaka. (2 Tikr. 14:8-13) Hambileswi hi nga swi tiveki hi ku helela leswi vumundzuku byi hi khomeleke swona, ha swi tiva leswaku ku rhula loku vanhu va Xikwembu va tiphinaka hakona ku ta hela. Yesu u vule leswaku enkarhini wa makumu, vadyondzisiwa vakwe a va “ta vengiwa hi matiko hinkwawo.”—Mat. 24:9 w20.09 17-18 ¶14-16

A nga kona munhu loyi a tsakelaka ku rhukaniwa. Hambiswiritano, loko ho karhateka ngopfu loko valala va hina va hi rhukana, hi nga hela matimba. (Swiv. 24:10) Hi fanele hi angula njhani loko vanhu lava hi kanetaka va hi rhukana? Ku fana na Pawulo, hi nga ‘tsaka . . . loko hi rhukaniwa.’ Hikwalahokayini? Hikuva loko hi rhukaniwa niloko hi kanetiwa swi kombisa leswaku hi vadyondzisiwa va Yesu va ntiyiso. (1 Pet. 4:14) Yesu u vule leswaku valandzeri vakwe a va ta xanisiwa. (Yoh. 15:18-20) Marito yakwe ma hetisekile enkarhini wa vaapostola. Hi nkarhi wolowo, lava a va namarhele ndhavuko wa Xigriki, a va teka Vakreste tanihi vanhu lava nga dyondzekangiki ni lava tsaneke. Kasi ni Vayuda van’wana a va teka Vakreste tanihi lava nga “dyondzekangiki, lava tolovelekeke,” vo tanihi muapostola Petro na Yohane. (Mit. 4:13) Vakreste a va vonaka va tsanile hikuva a va nga hlanganyeli eka swa tipolitiki kumbe enyimpini naswona vanhu a va va teka tanihi lava nga pfuniki nchumu. Xana Vakreste volavo va ri pfumelerile langutelo ro biha ra vakaneti va vona ri va tshikisa ku tirhela Yehovha? Doo! w20.07 14-15 ¶3-4

Muapostola Yohane a a karhateka ngopfu hi vuxaka bya vamakwavo na Yehovha, sweswo swi vonake kahle eka xitsundzuxo lexi a va tsaleleke xona eka mapapila yakwe manharhu lama huhuteriweke. Mayana ku tsakisa ka swona ku tiva leswaku vavanuna ni vavasati lava nga ni rirhandzu ku fana na yena, va totiwile leswaku va ya fuma na Kreste! (1 Yoh. 2:27) Onge hi nga xi tekela enhlokweni xitsundzuxo lexi a hi nyikeke xona. A hi tiyimiseleni ku hambeta hi famba entiyisweni, hi yingisa Yehovha eka swilo hinkwaswo. Dyondza Rito rakwe naswona u n’wi tshemba hi ku helela. Vana ni ripfumelo leri tiyeke eka Yesu. Papalata filosofi ya vanhu ni tidyondzo ta vagwinehi. Papalata ku hanya vutomi bya mikoka yimbirhi ni ku endla xidyoho. Hanya hi milawu leyi tlakukeke ya Yehovha. Nakambe, a hi pfuneni vamakwerhu leswaku va tshama va ri ni ripfumelo leri tiyeke hi ku va rivalela loko va hi twise ku vava, hi tlhela hi pfuna lava lavaka ku pfuniwa. Loko hi endla tano, hi ta hambeta hi famba entiyisweni hambiloko hi langutana ni mitlhontlho. w20.07 24-25 ¶15-17

Yehovha u pfumelele nandza un’wana ni un’wana wakwe wo tshembeka leswaku a va xiphemu xa vandlha rakwe. Hambileswi hi endlaka mitirho yo hambanahambana, hinkwerhu hi va nkoka naswona ha lavana. Muapostola Pawulo u vule leswaku a nga kona ni un’we wa hina loyi a nga byelaka nandza un’wana wa Yehovha a ku, “A ndzi na mhaka na [wena].” (1 Kor. 12:21) Leswaku swilo swi famba kahle evandlheni, hi fanele hi tekana hi ri va nkoka hi tlhela hi tirhisana kahle. (Efe. 4:16) Loko hi tirhisana kahle hi vun’we, moya wa rirhandzu wu ta khapakhapa evandlheni. Vakulu hinkwavo evandlheni va hlawuriwe hi moya wo kwetsima wa Yehovha. Hambiswiritano, va ni tinyiko ni vuswikoti lebyi nga faniki. (1 Kor. 12:17) Van’wana va ha ku hlawuriwa naswona a va na ntokoto. Van’wana a va ha koti ku endla swo tala hikwalaho ka mavabyi ni ku dyuhala. Kambe nkulu a nga fanelanga a languta vakulukulobye kutani a ku, “A ndzi na mhaka na n’wina.” Kurinasweswo, nkulu ha un’we u fanele a yingisa xitsundzuxo xa Pawulo lexi tsariweke eka Varhoma 12:10. w20.08 26 ¶1-2; 27 ¶4

Yehovha u hi kongomisa hi ku tirhisa xiphemu xa nhlangano wakwe wa laha misaveni. Swi le rivaleni leswaku ha wu yingisa nkongomiso lowu hi nyikiwaka wona lowu sekeriweke eBibeleni loko ku antswisiwa tidyondzo tin’wana. Kambe hi angula njhani loko nhlangano wa Xikwembu wu endla ku cinca loku hi khumbaka ko tanihi ku xavisiwa ka Holo ya Mfumo ya ka n’wina? Hi ta tshama hi tsakile loko hi tsundzuka leswaku hi tirhela Yehovha naswona hi yena loyi a kongomisaka nhlangano wakwe. (Kol. 3:23, 24) Hosi Davhida u hi vekele Xikombiso lexinene hi ku nyikela leswaku ku ta akiwa tempele. U te: “Ndzo va mani mina ni vanhu va mina vo va yini lerova hi kota ku endla magandzelo yo tirhandzela yo fana ni lawa? Hikuva swilo hinkwaswo swi huma eka wena naswona hi ku nyike leswi hi swi kumaka eka wena.” (1 Tikr. 29:14) Loko hi nyikela, na hina hi nyika Yehovha swilo leswi a hi nyikeke swona. Yehovha wa wu tlangela nkarhi, matimba ni rifuwo leri hi nyikelaka ha rona entirhweni wakwe.—2 Kor. 9:7. w20.11 22-23 ¶14-16

Ku humelela ka hina Timbhoni ta Yehovha entirhweni wo chumayela, a swi titsheganga hi nhlayo ya vanhu lava hi va tisaka enhlanganweni wa Yehovha. (Luka 8:11-15) Loko hi ya emahlweni hi tiyisela entirhweni wa hina wo chumayela ni ku dyondzisa van’wana, Yehovha u hi teka tanihi vachumayeri lava nga ni vutshila. Hikwalahokayini? Hikuva hi endla ntirho lowu yena ni N’wana wakwe va lavaka leswaku hi wu endla. (Mar. 13:10; Mit. 5:28, 29) Xivangelo xin’wana lexi endlaka leswaku hi chumayela namuntlha hi lexi: Nkarhi wa leswaku misava leyi yi lovisiwa wu kwala nyongeni! Nkarhi lowu saleke wo endla ntirho lowu, lowu ponisaka vutomi i wutsongo ngopfu. U nga ha yimayimi kumbe u tibyela leswaku u yimele nkarhi lowu faneleke wo endla ntirho lowu wa nkoka swinene. Teka goza sweswi u tikarhatela ku rhandza ntirho wa wena, u yi tiva kahle Bibele, u va ni xivindzi naswona u tiyimisela. Joyina vaphasi va vanhu lava tlulaka timiliyoni ta nhungu emisaveni hinkwayo kutani u ta tiphina hi ntsako lowu humaka eka Yehovha. (Neh. 8:10; Luka 5:10) Tiyimisele ku hoxa xandla hilaha u nga kotaka hakona entirhweni lowu, ku fikela loko wu fika emakumu. w20.09 7 ¶18-20

A hi fanelanga hi pfumelela rifuwo ra misava leyi ri hi kavanyeta loko hi ri karhi hi tirhela Yehovha. “Rifuwo leri kanganyisaka” ri nga hi endla hi nga ha n’wi rhandzi Yehovha, hi nga ha ri tlangeli Rito ra Xikwembu ni ku ri dyondzisa van’wana. (Mat. 13:22) Leswaku hi kota ku hlayisa swilo leswi Yehovha a hi nyikeke swona, hi fanele hi teka goza hi ku hatlisa loko hi vona khombo. Hi nga pulana leswaku hi ta endla yini loko hi ri eku tirhiseni ka Inthanete kumbe eku hlaleleni ka TV kutani hi xitshuketa ku humelela swifaniso leswi hlohlotelaka timhaka ta masangu, madzolonga kumbe rungula ra vagwinehi. Loko hi tshama hi lunghekile, hi ta swi kota ku balekela khombo leri nga ha vaka kona kutani hi tshama hi ri ni vuxaka lebyinene na Yehovha. (Ps. 101:3; 1 Tim. 4:12) Hi fanele hi hlayisa swilo swa risima leswi Yehovha a hi nyikeke swona, ku nga ntiyiso wa risima lowu nga eBibeleni ni nkateko wo dyondzisa van’wana ntiyiso. Loko hi endla tano, hi ta va ni ripfalo leri baseke, hi ta hanya vutomi lebyi nga ni xikongomelo naswona hi ta tiphina hi ntsako hikwalaho ko pfuna van’wana leswaku va tiva Yehovha. w20.09 30 ¶16-19

Xana u khuvuriwile? Loko swi ri tano, u swi kombise erivaleni leswaku u ni ripfumelo eka Yehovha naswona u tiyimisele ku n’wi tirhela u ri eka nhlangano wakwe. Ndlela leyi Yehovha a kongomisaka nhlangano wakwe hayona namuntlha yi paluxa vumunhu, xikongomelo ni milawu yakwe. Xiya swilo swinharhu leswi Yehovha a swi kombisaka hi ku tirhisa nhlangano wakwe. Xo sungula, “Xikwembu a xi na xihlawuhlawu.” (Mit. 10:34) Hikwalaho ka leswi Yehovha a rhandzaka vanhu, u nyikele hi N’wana wakwe tanihi “nkutsulo wa vanhu hinkwavo.” (1 Tim. 2:6; Yoh. 3:16) Yehovha u tirhisa vanhu vakwe leswaku va chumayela vanhu mahungu lamanene hi xikongomelo xo va pfuna leswaku va vuyeriwa eka gandzelo ra nkutsulo. Xa vumbirhi, Yehovha i Xikwembu lexi hlelekeke xi tlhela xi va ni ku rhula. (1 Kor. 14:33, 40) Sweswo hi swona leswi endlaka leswaku vagandzeri vakwe va va lava hlelekeke va tlhela va va ni ku rhula. Xa vunharhu, Yehovha i ‘Muleteri Lonkulu.’ (Esa. 30: 21) Nhlangano wakwe wu tikarhatela ku dyondzisa vanhu Bibele evandlheni ni le nsin’wini. w20.10 20 ¶1-3