September

Loko Petro a tshaha vuprofeta bya Yuwele u byi antswisile. (Mit. 2:16, 17) Ematshan’weni yo sungula ntshaho wolowo hi marito lama nge “kutani endzhaku ka sweswo,” Petro u te: “Emasikwini yo hetelela,” laha ku vulavuriwa hi masiku yo hetelela ya mafambiselo ya Xiyuda, laha moya wa Xikwembu a wu ta chululeriwa “eka vanhu hinkwavo.” Leswi swi kombisa leswaku ku hundze nkarhi wo leha swinene vuprofeta bya Yuwele byi nga si hetiseka. Ntirho wo chumayela wu sungule ku hangalaka ni misava hinkwayo endzhaku ka loko Xikwembu xi chululele moya wa xona enkarhini wa vaapostola. Hi yona mhaka loko muapostola Pawulo a tsalela Vakolosa papila kwalomu ka 61 C.E., a vuleke leswaku mahungu lamanene ma karhi ma chumayeriwa “eka vanhu hinkwavo.” (Kol. 1:23) Enkarhini wa Pawulo, xiga lexi nge “ntumbuluko hinkwawo,” a xi kombetela emisaveni hinkwayo ya le nkarhini wolowo. Ninamuntlha, hikwalaho ko pfuniwa hi moya wo kwetsima wa Yehovha, ntirho wo chumayela wu endliwa ematikweni yo tala, ku ya fika ‘emisaveni hinkwayo’!—Mit. 13:47. w20.04 6-7 ¶15-16

Yehovha wa hi rhandza hinkwerhu, ku katsa ni lava tshikeke ku n’wi tirhela. (Mat. 18:12-14) Yehovha u tshembise leswaku u ta lavisisa tinyimpfu ta yena leti lahlekeke kutani a ti pfuna ti tlhela ti va ni vuxaka na yena. U vule magoza lawa a nga ta ma teka leswaku a ponisa tinyimpfu ta yena, ku nga magoza lawa varisi va le Israyele a va ma teka loko va lahlekeriwe hi nyimpfu. (Ezek. 34:12-16) Xo sungula, leswaku murisi a kota ku famba a lava nyimpfu leyi lahlekeke, a swi lava nkarhi ni matshalatshala. Loko a yi kumile, a yi tlherisela entlhambini. Ku engetela kwalaho, loko nyimpfu yo va yi vavisekile kumbe yi khomiwe hi ndlala, a yi tlakula hi ndlela ya rirhandzu, a yi bandicha a tlhela a yi nyika swakudya. Vakulu, ku nga varisi va “ntlhambi wa Xikwembu,” va fanele endla hilaha ku fanaka leswaku va pfuna vanhu lava tshikeke ku ta etinhlengeletanweni ta vandlha. (1 Pet. 5:2, 3) Vakulu va lavisisa vanhu volavo, va va pfuna va tlhelela evandlheni, va va komba leswaku va va rhandza ni ku va pfuna va lulamisa vuxaka bya vona na Yehovha. w20.06 20 ¶10

Xana Yesu a a languta masimu tanihi lama lunghekeleke ku tshoveriwa hikwalaho ka leswi a ehleketa leswaku vanhu vo tala va ta n’wi landzela? Doo! Matsalwa ma vule ka ha ri emahlweni leswaku a hi vangani lava a va ta va ni ripfumelo eka yena. (Yoh. 12:37, 38) Yesu a ri ni vuswikoti byo tiva leswi nga etimbilwini ta vanhu. (Mat. 9:4) Hambileswi a lavisisa vanhu volavo va nga ri vangani lava a va ta n’wi yingisa kambe a a chivirikela ku chumayela vanhu hinkwavo. Hikwalaho, leswi hi nga swi kotiki ku tiva leswi nga etimbilwini ta vanhu, hi fanele hi papalata moya wa ku avanyisa vanhu! Kurinasweswo, languta vanhu tanihi lava nga vaka vadyondzisiwa. Tsundzuka leswi Yesu a swi byeleke vadyondzisiwa vakwe. Masimu ma basile, leswi vulaka leswaku ma lunghekele ku tshoveriwa. Vanhu va nga cinca kutani va va vadyondzisiwa va Kreste. Yehovha u teka vanhu volavo lava nga vaka vadyondzisiwa tanihi “swilo swa risima.” (Hag. 2:7) Loko hi languta vanhu hilaha Yehovha na Yesu va va langutaka hakona, hi ta tikarhatela ku tiva ndlela leyi va kuleke hayona ni swilo leswi va swi rhandzaka. Hi ta va teka tanihi vanhu lava nga ta va vamakwerhu siku rin’wana. w20.04 13 ¶18-19

Rito ra Xikwembu ri swi veka erivaleni leswaku hi fanele hi rhandza Yesu, hi kona hi nga ta kota ku tsakisa Yehovha. Leswi hi faneleke hi swi endla leswaku hi va vanghana va Yesu, i ku va hi n’wi tiva. Hi nga endla tano hi ku hlaya tibuku leti landzelaka ta Bibele: Matewu, Marka, Luka na Yohane. Loko hi anakanyisisa hi rungula ra le Bibeleni leri vulavulaka hi vutomi bya Yesu, hi ta n’wi rhandza hi tlhela hi n’wi xixima hikwalaho ka ndlela leyinene leyi a tirhisaneke ni vanhu hayona. Hi xikombiso, hambileswi a ri N’wini wa vona kambe a nga va khomanga tanihi mahlonga vadyondzisiwa vakwe. Ematshan’weni ya sweswo, u va byele swilo hinkwaswo leswi a a swi tiva ni ndlela leyi a titwa hayona. Loko vadyondzisiwa vakwe va twa ku vava na yena a a twa ku vava a tlhela a rila na vona. (Yoh. 11:32-36) Hambi ku ri vakaneti vakwe va swi xiyile leswaku a ri munghana wa vanhu lava amukelaka rungula rakwe. (Mat. 11:19) Loko hi tekelela ndlela leyi Yesu a va khoma hayona vadyondzisiwa vakwe, hi ta va ni vuxaka lebyinene ni van’wana, hi ta eneriseka, hi ta tsaka naswona ndlela leyi hi rhandzaka Kreste hayona yi ta kula. w20.04 22 ¶9-10

Hi 1870, tiko ra Britain a ri ri mfumo lowukulu emisaveni naswona a ri ri ni masocha ya matimba swinene. Mfumo wolowo a wu fanekisela rimhondzo leritsongo leri hluleke timhondzo tin’wana tinharhu, ku nga Furwa, Spaniya na Netherlands. (Dan. 7:7, 8) Rimhondzo rolero a ri ri hosi ya le dzongeni ku fikela hi nkarhi wa Nyimpi yo Sungula ya Misava. Hi nkarhi wolowo, tiko ra Amerika a ku ri rona leri a ri fuwile swinene emisaveni naswona a ri sungule ku tirhisana na Britain. Hi nkarhi wa Nyimpi yo Sungula ya Misava, tiko ra Amerika ni ra Britain ma vumbe nyandza yin’we kutani ma va ni matimba swinene. Hi nkarhi wolowo, tiko ra Britain ni ra Amerika ma ve Mfumo wa Misava lowu vuriwaka Mfumo wa Manghezi ni Maamerika. Hilaha Daniyele a profeteke hakona, hosi leyi a yi hlengelete “vuthu lerikulu swinene leri nga ni matimba.” Emasikwini lawa yo hetelela, hosi ya le dzongeni i Mfumo Wa Manghezi Ni Maamerika. w20.05 4 ¶7-8

Mati i swi halaki leswi kumekaka laha misaveni hikuva pulanete ya hina yi vekiwe eka mpfhuka lowu faneleke ku suka edyambyini. Loko misava a yi lo tshinela katsongo edyambyini, mati a ma ta va ma vile khale ivi misava yi sala yi ri ribye ro hisa leri nga riki na vutomi. Loko a mo va ekulenyana ni dyambu, mati hinkwawo a ma ta tiya ivi misava yi hundzuka ayisi leyikulu ya xirhendzevutana. Leswi Yehovha a vekeke misava endhawini leyi faneleke, ndzhendzheleko wa mati wu endla leswaku ku va ni vutomi emisaveni. Dyambu ri vavula mati lama nga elwandle ni le henhla ka rivala kutani ma humesa nkahelo lowu endlaka mapapa. Lembe ni lembe, dyambu ri virisa mati ya kwalomu ka 500 000 wa tikhubiki ta tikhilomitara leswaku ma hundzuka mapapa. Mati lawa ma tshama kwalomu ka khume wa masiku ma nga si wa tanihi mpfula kumbe gamboko. Eku heteleleni, mati ma tlhelela elwandle kumbe eswinambyanini kutani ku tlhela ku endleka leswi fanaka nakambe. Ndzhendzheleko lowu wa mati lowu endlaka hi kuma vutomi, wu kombisa leswaku Yehovha u tlharihile naswona u ni matimba.—Yobo 36:27, 28. w20.05 22 ¶6

Yesu u hi khutaze ku ya emahlweni hi khongela hi kombela moya lowo kwetsima. (Luka 11:9, 13) Yehovha u tirhisa moya wakwe leswaku a hi nyika “matimba lama tlulaka lama tolovelekeke.” (2 Kor. 4:7) Moya wa Xikwembu wu ta hi pfuna hi kota ku tiyisela loko hi langutana ni miringo. Moya lowo kwetsima wu nga hi pfuna hi kota ku hetisisa mitirho leyi Xikwembu xi hi nyikaka yona ni ku antswisa vuswikoti bya hina. Ha swi tiva leswaku hi kota ku hetisisa vutihlamuleri bya hina hi ndlela leyinene hikwalaho ko pfuniwa hi moya wa Xikwembu. Hi nga kombisa leswaku ha wu tlangela moya lowo kwetsima wa Xikwembu hi ku khongela hi kombela wu hi pfuna hi tikambela ku vona loko ku ri ni ku navela ko karhi ko biha etimbilwini ta hina. (Ps. 139:23, 24) Loko hi endla tano, Yehovha u ta hi pfuna hi ku tirhisa moya wakwe leswaku hi xalamukela ku navela koloko. Hi fanele hi khongela hi kombela moya wa Xikwembu wu hi nyika matimba yo lwisana ni ku navela koloko. Loko hi endla tano, hi kombisa leswaku hi tiyimisele ku papalata swilo leswi nga endlaka Yehovha a tshika ku hi pfuna hi ku tirhisa moya wakwe wo kwetsima.—Efe. 4:30. w20.05 28-29 ¶10-12

Loko hi yimela vito ra Yehovha, hi va hi tekelela Yesu Kreste. Yesu u endle leswaku vito ra Tata wakwe ri tiviwa hi ku ri tirhisa ni hi ku dyondzisa vanhu ndlela leyi Yehovha a nga xiswona. Hi xikombiso, u kanete Vafarisi lava a va hlasela vito ra Yehovha hi tindlela to tala va vula leswaku u ni tihanyi, wa tikisa, a nga na xinghana naswona u ni mona. Yesu u pfune vanhu va vona leswaku Tata wakwe wa anakanyela, u lehisa mbilu, u ni rirhandzu naswona wa rivalela. Nakambe, u pfune vanhu va tiva leswaku Yehovha u njhani hi ku kombisa timfanelo ta Tata wakwe loko a ha ri laha misaveni. (Yoh. 14:9) Ku fana na Yesu, hi nga byela vanhu leswi hi swi tivaka hi Yehovha, hi va dyondzisa leswaku Yehovha i Xikwembu xa rirhandzu ni musa. Loko hi endla tano, hi kombisa leswaku mavunwa ni swihehlo leswi Yehovha a hehliwaka ha swona a hi ntiyiso. Hi kwetsimisa vito ra Yehovha ni ku pfuna vanhu leswaku va ri teka tanihi leri kwetsimaka. Loko hi komba vanhu hi marito ni hi swiendlo leswaku Yehovha u njhani, hi hoxa xandla eku kwetsimiseni ka vito ra yena. Hi kwetsimisa vito rero hi ku pfuna vanhu va tiva ntiyiso mayelana na rona. w20.06 6 ¶17-18

Social media ya pfuna, hi xikombiso, yi endla hi kota ku vulavurisana ni swirho swa ndyangu ni vanghana va hina. Kambe, xana u tshame u swi xiya leswaku swin’wana leswi vanhu va swi vekaka eka social media, va swi veka hi xikongomelo xo lava ku ndhundhuzeriwa hi vanhu? Kahlekahle, swi tikomba onge va byela vanhu va ku, ndzi voneni. Van’wana va tsala swilo leswi nga basangiki loko va vulavula hi swinepe swa vona kumbe swa van’wana. Leswi swi hambane ekule ni ku titsongahata ni ntlhaveko wa xinakulobye lowu Vakreste va tsundzuxiwaka ku va na wona. (1 Pet. 3:8) Loko u tirhisa social media, tivutise: ‘Xana leswi ndzi swi tsalaka, swinepe ni tivhidiyo leti ndzi ti vekaka eka social media, swi kombisa leswaku ndzi lava ku voniwa? Xana swi ta endla leswaku van’wana va va ni mavondzo?’ Vakreste a va titeki va antswa ku tlula vanhu van’wana. Va yingisa xitsundzuxo xa Bibele lexi kumekaka eka ndzimana ya siku ya namutlha. Ku titsongahata, swi ta hi pfuna hi papalata ku ngheniwa hi moya wa misava leyi wa ku titeka hi antswa ku tlula van’wana.—1 Yoh. 2:16. w20.07 6 ¶14-15

Loko muapostola Pawulo a ha ri jaha naswona a nga se va Mukreste, a a delela naswona u xanise valandzeri va Yesu. (Mit. 7:58) Yesu u byele Pawulo, loyi hi nkarhi wolowo a vuriwa Sawulo leswaku a tshika ku xanisa vandlha ra Vukreste. Yesu u vulavule na Pawulo a a ri etilweni kutani a n’wi hundzula bofu. Leswaku Pawulo a tlhela a kota ku vona, u boheke ku ya kombela ku pfuniwa eka vanhu lava a a va xanisa. Hi ku titsongahata, u amukele ku pfuniwa hi mudyondzisiwa loyi a a vuriwa Ananiya, loyi a fikeke a n’wi pfula mahlo. (Mit. 9:3-9, 17, 18) Hi ku famba ka nkarhi, Pawulo u ve xirho lexi tivekaka swinene xa vandlha ra Vukreste kambe a nga yi rivalanga dyondzo leyi Yesu a n’wi dyondziseke yona loko a ri endleleni yo ya eDamaska. U tshame a titsongahatile naswona u amukele ku pfuniwa hi vamakwerhu. U vule leswaku va “ve mpfuno lowu tiyisaka” eka yena.—Kol. 4:10, 11. w20.07 18-19 ¶16-17

Hambileswi Yehovha a nga ni matimba hinkwawo kambe u nyika van’wana vutihlamuleri byo endla mitirho yo karhi. Hi xikombiso, u hlawule Yesu leswaku a va Hosi ya Mfumo wakwe naswona u ta nyika vanhu va 144 000 vutihlamuleri, lava va nga ta fuma swin’we na Yesu. Yehovha u letele Yesu leswaku a va Hosi ni Muprista Lonkulu. (Hev. 5:8, 9) U tlhela a letela lava nga ta fuma na Yesu kambe a nga va xopaxopi eka ntirho lowu va wu endlaka. Kurinasweswo, wa tshemba leswaku va ta wu endla kahle ntirho lowu a va nyikeke wona. (Nhlav. 5:10) A hi tekeleleni Tata wa hina wa le tilweni loyi a nyikaka van’wana vutihlamuleri byo karhi hambileswi swi nga bohiki leswaku a pfuniwa! Hi xikombiso, xana u nhloko ya ndyangu kumbe u nkulu evandlheni? Tekelela Yehovha hi ku nyika van’wana ntirho naswona u papalata ku va xopaxopa. Loko u tekelela Yehovha hi ku letela van’wana, va ta wu tiva kahle ntirho naswona va ta wu endla handle ko chava.—Esa. 41:10. w20.08 9 ¶5-6

Yehovha u lava hi titwa njhani hi tinyimpfu ta yena leti lahlekeke? Yesu u hi vekele xikombiso lexinene emhakeni leyi. A a swi tiva leswaku Yehovha u teka tinyimpfu ta yena hinkwato ti ri ta risima, hikwalaho Yesu u endle matshalatshala yo pfuna “tinyimpfu leti lahlekeke ta yindlu ya Israyele” leswaku ti tlhelela eka Yehovha. (Mat. 15:24) Leswi Yesu a ri murisi lonene, a a nga lavi ku lahleka ni nyimpfu ni yin’we ya Yehovha. (Yoh. 6:39) Muapostola Pawulo u hlohlotele vakulu va le vandlheni ra Efesa leswaku va tekelela xikombiso xa Yesu. U te: “Mi fanele ku pfuna lava tsaneke, naswona mi fanele ku tsundzuka marito ya Hosi Yesu, loko yena a te, ‘Ku nyika swi tisa ntsako lowukulu ku tlula ku amukela.’” (Mit. 20:17, 35) Handle ko ba mariri, vakulu va ni vutihlamuleri bya nkoka lebyi va faneleke va byi byarha emhakeni leyi. Makwerhu Salvador, wa le Spain naswona a nga nkulu, u ri: “Loko ndzi ehleketa hi ndlela leyi Yehovha a khathalaka hayona hi tinyimpfu takwe leti lahlekeke, swi endla ndzi hisekela ku ti pfuna. Ndza swi tiva leswaku Yehovha u lava ndzi khathalela tinyimpfu takwe leti lahlekeke.” w20.06 23 ¶15-16

Yehovha u ta hi lehisela mbilu leswaku hi va vanhu lava hetisekeke ku kondza ku hela malembe ya gidi. Loko nkarhi wolowo wu nga si fika, Yehovha u tiyimiserile ku hi rivalela loko hi n’wi dyohela. Hikwalaho, swa fanela leswaku hi languta leswinene eka van’wana hi tlhela hi va lehisela mbilu. Yesu ni tintsumi a va tsakile loko ku tumbuluxiwa misava. Kambe va ta tsaka ngopfu loko va vona misava yi tele hi vanhu lava hetisekeke, lava rhandzaka Yehovha va tlhela va n’wi tirhela. Ehleketa hi ndlela leyi lava va yaka etilweni leswaku va ya fuma na Kreste va nga ta tsaka hayona, loko va vona vanhu va vuyeriwa eka ntirho wa vona. (Nhlav. 4:4, 9-11; 5:9, 10) Nakambe ehleketa hi nkarhi lowu hi nga ta xiririka mihloti ya ntsako ntsena, loko mavabyi, gome ni rifu swi nga ha ri kona. Loko nkarhi wolowo wu nga si fika, tiyimisele ku tekelela Tata wa wena loyi a ku rhandzaka, a tlhariheke naswona a lehisaka mbilu. Loko u endla tano, u ta tshama u tsakile hambiloko u langutana ni miringo. (Yak. 1:2-4) Ha xi tlangela swinene xitshembiso lexi Yehovha a hi tshembiseke xona xa leswaku “ku ta va ni ku pfuxiwa” ka vafi!—Mit. 24:15. w20.08 19 ¶18-19

Bibele i nyiko leyi humaka eka Xikwembu. Tata wa hina wa le tilweni u huhutele vavanuna leswaku va tsala Bibele hikuva wa khathala swinene hi vana vakwe va laha misaveni. Hi ku tirhisa Bibele, Yehovha u hlamula swivutiso swa hina swa nkoka swinene swo tanihi leswi nge: Xana hi huma kwihi? Hi xihi xikongomelo xa vutomi? Xana vumundzuku byi hi khomele yini? Yehovha u lava leswaku vana vakwe va tiva tinhlamulo ta swivutiso leswi, hikwalaho ku sukela khale u susumetele vavanuna leswaku va hundzuluxela Bibele hi tindzimi to tala. Namuntlha, Bibele yi kumeka hi tindzimi to tlula 3 000 yi helerile kumbe xiphemu xo karhi xa yona! Bibele i buku leyi hundzuluxeriweke yi tlhela yi hangalasiwa ku tlula tibuku hinkwato ematin’wini. Hi nga kombisa leswaku ha yi tlangela Bibele hi ku yi hlaya siku ni siku, hi ku anakanyisisa hi leswi yi swi dyondzisaka ni hi ku tirhisa leswi hi swi dyondzaka. Hi nga tlhela hi kombisa leswaku ha xi khensa Xikwembu hi ku tikarhatela ku chumayela vanhu vo tala hilaha hi nga kotaka hakona.—Ps. 1:1-3; Mat. 28:19, 20. w20.05 24-25 ¶15-16

Muprofeta Yeremiya a a chumayela endhawini leyi a swi tika swinene ku chumayela eka yona. U kale a hela matimba lerova a twa onge a nga tshika ku chumayela. Kambe a nga tshikanga. Hikwalahokayini? Eka Yeremiya “rito ra Yehovha” a ri fana ni ndzilo endzeni ka swirho swakwe naswona a a nga ta swi kota ku tshama hi rona! (Yer. 20:9) Na hina hi nga titwa hilaha ku fanaka loko hi hlaya Rito ra Xikwembu siku ni siku hi tlhela hi anakanyisisa hi leswi hi swi hlayaka. Sweswo swi ta endla hi tsakela ntirho wa hina wo chumayela naswona vanhu va ta tsakela ku yingisa rungula ra hina. (Yer. 15:16) Loko u titwa u hele matimba, khongela eka Yehovha u kombela leswaku a ku tiyisa. U ta ku pfuna u lwisana ni ku tsana ka wena swin’we ni xidyoho lexi u velekiweke na xona kumbe loko u vabya. U ta ku pfuna u va ni langutelo lerinene hi ku va ni vutihlamuleri enhlanganweni wakwe. U ta tlhela a ku pfuna u va ni langutelo lerinene hi ntirho wo chumayela. Ku engetela kwalaho, phofulela Tata wa wena wa le tilweni hinkwaswo leswi ku karhataka. U ta ku pfuna leswaku u hlula ku hela matimba. w20.12 27 ¶20-21

Vamakwerhu van’wana vaxisati, va kuma nkarhi wo hlangana ni vamakwerhu etinhlengeletanweni ta vandlha ntsena. A hi tirhiseni nkarhi wolowo leswaku hi va amukela, hi bula na vona hi tlhela hi va komba leswaku ha khathala hi vona. Ku fana na Yesu, a hi tinyikeni nkarhi wo dzumba ni vamakwerhu vaxisati. (Luka 10:38-42) Hi nga va rhamba ekaya hi ta tiphina ni ku hungasa na vona. Xikongomelo xa hina, i ku tiyisa ripfumelo ra vona. (Rhom. 1:11, 12) Vakulu va fanele va tekelela Yesu. A a swi tiva leswaku van’wana a swi ta va tikela ku tshama va nga catanga, kambe u swi veke erivaleni leswaku ntsako wa xiviri a wu tisiwi hi ku cata kumbe ku va ni vana. (Luka 11:27, 28) Kurinasweswo, hi ta tsaka ntsena loko hi rhangisa ntirho wa Yehovha evuton’wini bya hina. (Mat. 19:12) Vakulu va fanele va khoma vamakwerhu vaxisati tanihi vamakwavo ni vamanana. Vakulu va fanele va tinyika nkarhi wo vulavula ni vamakwerhu vaxisati loko tinhlengeletano ta vandlha ti nga si sungula ni loko se ti herile. w20.09 21-22 ¶7-9

EIsrayele, murimi a a byala mbewu yakwe hi xixikana loko ku sungula timpfula kutani a tshovela hi ximun’wana. (Mar. 4:28) Onge na hina hi nga lehisa mbilu ku fana ni murimi! Kambe leswaku hi kota ku endla tano, swi lava ku tikarhata swinene. Hakanyingi vanhu va lava ku hatla va vona vuyelo bya ntirho wa vona. Loko hi lava leswaku nsimu ya hina yi humesa ntshovelo lowunene, hi fanele hi yi khathalela nkarhi ni nkarhi, hi yi rima, hi byala, hi yi hlakula ni ku yi cheleta. Ntirho wo endla vadyondzisiwa na wona wu lava matshalatshala. Swi lava nkarhi ku pfuna vanhu lava hi va dyondzisaka leswaku va tshika xihlawuhlawu. Ku lehisa mbilu swi ta hi pfuna leswaku hi nga heli matimba loko vanhu va nga hi yingisi. Hambiloko vanhu lava hi va chumayelaka va hi yingisa, hi fanele hi lehisa mbilu. A hi nge va sindzisi vanhu lava hi va dyondzisaka Bibele leswaku va va ni ripfumelo. Hambi ku ri vadyondzisiwa va Yesu, mikarhi yin’wana a va hlwela ku twisisa leswi a a va dyondzisa swona. (Yoh. 14:9) A hi tsundzukeni leswaku hina ho byala ni ku cheleta kambe i Xikwembu lexi swi kurisaka.—1 Kor. 3:6. w20.09 11 ¶10-11

Hinkwerhu hi lava leswaku swichudeni swa hina swi khuvuriwa. Ndlela yin’wana leyi hi nga swi pfunaka hayona, i ku swi khutaza ku va kona etinhlengeletanweni ta vandlha. Mikarhi yo tala swichudeni leswi yaka etinhlengeletanweni ta vandlha to ho suka swi endla nhluvuko hi ku hatlisa. Vadyondzisi van’wana va byela swichudeni swa vona leswaku loko swi ta etinhlengeletanweni ta vandlha swi ta dyondza leswi engetelekeke hi Yehovha. Hlaya Vaheveru 10:24, 25 ni xichudeni xa wena kutani u xi hlamusela leswi xi nga ta vuyeriwa ha swona loko xi ta etinhlengeletanweni ta vandlha. Xi byele leswi ku tsakiseke leswi wa ha ku swi dyondzaka enhlengeletanweni ya vandlha. Sweswo swi nga xi khutaza leswaku xi tsakela ku ta. Leswi xi nga ta swi vona loko xi ta enhlengeletanweni ro sungula, xi ta swi xiya leswaku swi hambane ngopfu ni leswi endliwaka eka vukhongeri byin’wana. (1 Kor. 14:24, 25) Xi ta hlangana ni vanhu lava nga ni mahanyelo lamanene lawa xi nga ma tekelelaka naswona va nga ta xi pfuna xi fanelekela ku khuvuriwa. w20.10 10-11 ¶14-15

Moya lowo kwetsima wu ta ku pfuna leswaku u hanya hi leswi u swi dyondzaka eRitweni ra Xikwembu. Khongela ku fana ni mupisalema loyi a nga te: “Yehovha Xikwembu xanga, ndzi dyondzise ndlela ya wena. Ndzi ta famba entiyisweni wa wena. Ndzi endle ndzi chava vito ra wena hi mbilu ya mina hinkwayo.” (Ps. 86:11) Yana emahlweni u tiwundla hi ku hlaya Bibele ni mikandziyiso hinkwayo leyi Yehovha a hi nyikaka yona hi ku tirhisa nhlangano wakwe. Tsundzuka leswaku xikongomelo xa wena a hi ku kuma vutivi ntsena kambe u lava ku hanya ni ku tirhisa leswi u swi dyondzaka. Moya lowo kwetsima wa Yehovha wu ta ku pfuna u endla tano. Nakambe u lava ku khutaza vamakwenu. (Hev. 10:24, 25) Hikwalahokayini? Hikuva mi ndyangu wun’we. Khongela u kombela moya lowo kwetsima leswaku wu ku pfuna u nyikela tinhlamulo leti akaka etinhlengeletanweni ta vandlha ni loko u nyikela mbulavulo. Loko u endla tano, u komba Yehovha ni N’wana wakwe leswaku wa ti rhandza ‘tinyimpfu’ ta vona ta risima. (Yoh. 21:15-17) Hikwalaho, yingisa Muleteri wa wena Lonkulu hi ku tirhisa hinkwaswo leswi nhlangano wu swi humesaka leswaku u tiyisa vuxaka bya wena na Yehovhha. w20.10 24-25 ¶15-17

Yesu u va khome njhani vaapostola vakwe hi nkarhi lowu a va hele matimba? Endzhakunyana ka loko Yesu a pfuxiwile, u byele van’wana va valandzeri vakwe a ku: “Mi nga chavi! Fambani mi ya tivisa vamakwerhu [leswaku ndzi pfuxiwile].” (Mat. 28:10a) Yesu a nga va helelanga mbilu vaapostola vakwe. Hambileswi va balekeke va n’wi siya, a nga tshikanga ku va vitana “vamakwerhu.” Ku fana na Yehovha, Yesu a a ri ni musa naswona a a rivalela. (2 Tih. 13:23) Na hina ha khathala hi vamakwerhu lava tshikeke ku chumayela. Ha va rhandza hikuva i vamakwerhu! Ha wu tsundzuka ntirho lowu va tshameke va wu endla, van’wana va vona va hete malembe yo tala va ri karhi va tirhela Yehovha. (Hev. 6:10) Ha va tsundzuka swinene! (Luka 15:4-7) Khutaza vamakwerhu lava tshikeke ku tirhela Yehovha hi ku va rhamba leswaku va ta etinhlengeletanweni ta vandlha. Naswona loko loyi a tshikeke ku tirhela Yehovha a ta enhlengeletanweni ya vandlha hi fanele hi n’wi amukela hi ndlela leyi nga ta endla a titwa a ri ekaya. w20.11 6 ¶14-17

Yakobo na Yohane swin’we ni mana wa vona va ye eka Yesu kutani va kombela swilo leswi a swi ri ehenhla ka matimba yakwe. Handle ko ba mariri, Yesu u va byele leswaku i Tata wakwe wa le tilweni loyi a nga ni mfanelo yo hlawula leswaku i mani loyi a nga ta tshama evokweni rakwe ra xinene ni ra ximatsi eMfun’weni wa Xikwembu. (Mat. 20:20-23) Yesu u kombise leswaku wa swi xixima swipimelo leswi a nyikiweke swona. A a titsongahata hakunene. A nga endlanga nchumu ni wun’we lowu Yehovha a nga n’wi lerisangiki ku wu endla. (Yoh. 12:49) Hi nga n’wi tekelela njhani Yesu? Hi kombisa leswaku ha titsongahata ku fana na Yesu loko hi tirhisa xitsundzuxo lexi nga eka ndzimana ya siku ya namutlha. Loko vanhu va kombela ku pfuniwa hi timhaka to karhi, hi nga va sindzisi leswaku va endla swilo hi ndlela ya hina kumbe hi vula xin’wana ni xin’wana handle ko anakanya. Kurinasweswo, hi fanele hi va pfuna hi ku tirhisa Bibele ni mikandziyiso ya hina leyi sekeriweke eBibeleni. Loko hi endla tano, hi kombisa leswaku ha swi xixima swipimelo swa hina naswona loko hi titsongahata hi ndlela yoleyo, hi yisa ku dzuneka eka Lowa Matimba Hinkwawo loyi a “[avanyisaka] hi ndlela leyinene.”—Nhlav. 15:3, 4. w20.08 11-12 ¶14-15

Loko u vona onge u fanele u tsundzuxa makwerhu hi swin’wana, i yini leswi u faneleke u swi tsundzuka? Loko u nga si n’wi tsundzuxa, tivutise, ‘Xana ndzi tivona ndzi lulame “ku tlula mpimo”?’ Munhu loyi a tivonaka a lulame ku tlula mpimo, u avanyisa van’wana hi ku ya hi mavonelo yakwe, ku nga ri hi milawu ya Yehovha naswona a nga na tintswalo. Endzhaku ko tikambisisa naswona u vona swa ha fanerile ku ya tsundzuxa makwerhu, n’wi pfune a vona xihoxo lexi a xi endlaka. N’wi pfune hi ku tirhisa Bibele u ri karhi u tsundzuka leswaku makwerhu yoloye u ta tihlamulela eka Yehovha, ku nga ri eka wena. (Rhom. 14:10) Tirhisa Rito ra Xikwembu loko u tsundzuxa un’wana, u tlhela u va ni ntwelavusiwana ku fana na Yesu. (Swiv. 3:5; Mat. 12:20) Hikwalahokayini? Hikuva Yehovha u ta ku khoma hi ndlela leyi na wena u khomaka van’wana hayona.—Yak. 2:13. w20.11 21 ¶13

Xana u nga tsaka loko vanhu va ku avanyisa hi ku ya hi nhlonge ya wena, ku languteka ka nghohe ya wena kumbe hikwalaho ka xivumbeko xa miri wa wena? Swi le rivaleni leswaku a wu nge swi tsakeli. Swa tsakisa ku tiva leswaku Yehovha a nga hi avanyisi hi ku ya hi ndlela leyi vanhu va hi langutaka hayona! Hi xikombiso, loko Samuwele a languta vana va Yese, a a nga swi voni leswi Yehovha a swi vona. Yehovha u byele Samuwele leswaku un’wana wa vana va Yese a ta va hosi ya Israyele. Kambe hi wihi n’wana wa kona? Loko Samuwele a vona Eliyabu mativula ya Yese, u te: “Hakunene loyi hi yena loyi a hlawuriweke hi Yehovha.” Eliyabu a languteka ku fana ni hosi. “Kambe Yehovha u byele Samuwele a ku: ‘U nga languti xivumbeko xa yena kumbe ku leha ka yena, hikuva ndzi n’wi bakanyile.’” Hi dyondza yini? Yehovha u ye emahlweni a ku: “Munhu u vona ntsena leswi voniwaka hi matihlo, kambe Yehovha u vona leswi nga embilwini.” (1 Sam. 16:1, 6, 7) Hi endla kahle loko hi tekelela Yehovha loko hi ri karhi hi tirhisana ni vamakwerhu. w20.04 14 ¶1; 15 ¶3

Yesu a a hundza hi le masin’wini ya maxalana lama ha riki matsongo loko a teka maendzo. (Yoh. 4:3-6) Maxalana wolawo, a ma ta va ma lunghekele ku tshoveriwa endzhaku ka tin’hweti ta kwalomu ka mune. Yesu u vule marito man’wana lama tlakuseke swivutiso swo tala, u te: “Tlakusani matihlo mi languta masimu, ma lunghekele ku tshoveriwa.” (Yoh. 4:35, 36) A vula yini hi marito lawa? Yesu a a vulavula hi ntshovelo wo fanekisela, ku nga ku hlengeleta vanhu. Xiya leswi a swa ha ku endleka. Hambileswi Vayuda ni Vasamariya a va nga tovelani munyu, Yesu a ha ku chumayela wansati wa Musamariya naswona wansati yoloye u n’wi yingiserile! Loko Yesu a ri karhi a vulavula hi masimu lama lunghekeleke ku “tshoveriwa,” ntlawa wa Vasamariya lava tweke hi ta Yesu eka wansati luyani, a va ri endleleni yo ya dyondza swo tala eka Yesu. (Yoh. 4:9, 39-42) Muhlamuseri un’wana wa Bibele u ri: “Ndlela leyi vanhu a va swi hisekela hayona . . . yi kombisa leswaku a va fana ni maxalana lama lunghekeleke ku tshoveriwa.” w20.04 8 ¶1-2

Tinhlengeletano ta hina ta hi hlomisa leswaku hi va vachumayeri lava nga ni vutshila. Hi xikombiso, hi dyondzisiwa ndlela yo yi tirhisa kahle mikandziyiso leyi nga eka Switirhisiwa Swo Pfuna Ku Dyondzisa. Hikwalaho, lunghiselela kahle loko u ya etinhlengeletanweni ta vandlha. Loko ku ri karhi ku dyondziwa, rhiya ndleve. Endzhaku ka nhlengeletano, tikarhatele ku tirhisa leswi u swi dyondzeke. Loko u endla tano, u ta va “socha lerinene ra Kreste Yesu.” (2 Tim. 2:3) Ku ni tintsumi ta ntsandzavahlayi leti nga ni matimba lamakulu leti hi pfunaka. Ntsumi yin’we ntsena, yi nga endla swilo swo hlamarisa swinene! (Esa. 37:36) Loko ntsumi yin’we yi kota ku endla swilo swo hlamarisa, ehleketa hi leswi ti nga swi endlaka loko se ti hlanganile ti ri ntlawa. A ku na munhu kumbe dimona ni rin’we leri nga hlulaka tintsumi ta Yehovha. Loko Yehovha a ri na hina, hi ta swi kota ku hlula valala swi nga ri na mhaka leswaku va tale ku fikela kwihi. (Vaav. 6:16) Ha tiyiseka hi mhaka leyi! Mikarhi hinkwayo, loko u xanisiwa entirhweni, exikolweni kumbe hi maxaka lama nga riki Timbhoni, tsundzuka leswaku a wu wexe. Yehovha u ta ku sirhelela. w21.03 29 ¶13-14

Swi nga endleka leswaku muapostola Pawulo a a tshaha Esaya 22:13, leyi vulavulaka hi langutelo leri Vaisrayele a va ri na rona. Ematshan’weni yo tiyisa vuxaka bya vona ni Xikwembu, a va lava ku titsakisa. A va vula leswaku va fanele va titlonya hi vutomi va ha hanya hikuva nkarhi wun’wana ni wun’wana va nga fa, ku nga langutelo leri vo tala va nga na rona namuntlha. Mhaka ya leswaku Yehovha u ta pfuxa vafi yi fanele yi hi pfula matihlo loko swi ta emhakeni ya ku hlawula vanghana. Vamakwerhu va le Korinto a va fanele va papalata ku endla vunghana ni vanhu lava nga tshembiki leswaku vafi va ta pfuxiwa. Hi dyondza leswi emhakeni leyi: Ku endla vunghana ni vanhu lava nga tshembiki leswaku vafi va ta pfuxiwa, swi ta endla leswaku hi tekelela langutelo ra vona ro biha. Loko Mukreste a endla vunghana ni vanhu lava nga ni langutelo ro tano, u ta ngheniwa hi moya wo biha. A nga sungula ni ku hanya vutomi lebyi nyenyetsaka Xikwembu. Hikwalaho, Pawulo u te: “Xalamukani mi endla leswi lulameke naswona mi nga hanyi hi xidyoho.”—1 Kor. 15:33, 34. w20.12 9 ¶3, 5-6

Ndzimana leyi, yi hlamusela ndlela leyi Yehovha a wu hleleke hayona ndyangu wakwe. Ku va nhloko swi katsa swilo swimbirhi, ku nga vulawuri ni vutihlamuleri. Yehovha i “nhloko” kumbe u ni vulawuri lebyi tlakukeke naswona vana vakwe hinkwavo va le tilweni ni va laha misaveni va ta tihlamulela eka yena. (Rhom. 14:10; Efe. 3:14, 15) Yehovha u nyike Yesu vulawuri byo va nhloko ya vandlha naswona Yesu u ta tihlamulela eka Yehovha mayelana ni ndlela leyi a hi lawulaka hayona. (1 Kor. 15:27) Yehovha u tlhele a nyika wanuna loyi a tekeke vutihlamuleri bya ku va nhloko ya ndyangu. I yini lexi nga pfunaka wanuna leswaku a va nhloko leyinene ya ndyangu? U fanele a rhanga a tiva leswi Yehovha a swi languteleke eka yena. U fanele a tlhela a tiva xivangelo lexi endleke Yehovha a nyika van’wana vutihlamuleri bya ku va tinhloko ni ndlela leyi a nga tekelelaka Yehovha na Yesu hayona emhakeni leyi. Hikwalahokayini wanuna a fanele a tiva mhaka leyi? Hikuva Yehovha u nyike vavanuna vutihlamuleri bya ku va tinhloko ta mindyangu naswona u langutele leswaku va byi tirhisa hi ndlela leyinene.—Luka 12:48b. w21.02 2 ¶1-3

Hi fanele hi tekelela Yehovha emhakeni ya swilo leswi a hlawulaka ku swi rivala. Hi xikombiso, Yehovha u ni miehleketo leyi hetisekeke kambe loko hi hundzuka, wa hi rivalela a tlhela a rivala hi swihoxo swa hina. (Ps. 25:7; 130:3, 4) U lava hi endla tano na hina loko lava hi dyoheleke va kombela ku rivaleriwa. (Mat. 6:14; Luka 17:3, 4.) Hi nga kombisa leswaku ha byi tlangela byongo bya hina lebyi hlamarisaka hi ku yisa ku dzuneka eka Loyi a hi nyikeke byona. Van’wana va tirhisa byongo bya vona leswaku ku vuyeriwa vona ntsena, va tivekela milawu ya leswinene ni leswo biha. Leswi hi tumbuluxiweke hi Yehovha, swa twala ku tshemba leswaku milawu yakwe i yinene ngopfu ku tlula leyi hi nga tivekelaka yona. (Rhom. 12:1, 2) Loko hi hanya hi milawu yakwe, hi ta kuma ku rhula evuton’wini. (Esa. 48:18) Nakambe, hi ta hanya vutomi lebyi nga ni xikongomelo hi tlhela hi yisa ku dzuneka eka Muvumbi tlhelo Tata wa hina ni ku n’wi endla a tinyungubyisa hi hina.—Swiv. 27:11. w20.05 23-24 ¶13-14

I yini lexi nga hi pfunaka leswaku hi va ni xinakulobye lexikulu ni vamakwerhu namuntlha? Loko hi tinyika nkarhi wo va tiva kahle vamakwerhu, swi ta hi olovela ku va komba xinakulobye lexikulu. Hi nga swi kota ku va vanghana va vona swi nga ri na mhaka leswaku va ni malembe mangani naswona va huma eka ndhavuko wihi. Tsundzuka, Yonathani a ri nkulu eka Davhida hi malembe ya kwalomu ka 30; kambe va ve vanghana lavakulu. Na wena tikarhatele ku endla vunghana ni vanhu lavakulu ni lavatsongo evandlheni ra ka n’wina. Loko u endla tano, u kombisa leswaku u “[rhandza] vamakwerhu hinkwavo.” (1 Pet. 2:17) Xana ku va ni xinakulobye lexikulu eka vamakwerhu, swi vula leswaku hi ta va rhandza ku fana hinkwavo evandlheni? Doo, sweswo a swi koteki. A swi hoxanga ku rhandza van’wana ngopfu hikwalaho ka leswi wena na vona mi rhandzaka swilo leswi fanaka. Yesu a teka vaapostola vakwe hinkwavo tanihi “vanghana” vakwe kambe a a rhandza Yohane ngopfu. (Yoh. 13:23; 15:15; 20:2) Hambiswiritano, Yesu a a nga n’wi khomi hi ndlela yo hlawuleka Yohane ku tlula lavan’wana.—Mar. 10:35-40. w21.01 23 ¶12-13

Ndlela leyi muapostola Pawulo a yi tirhiseke loko a chumayela vanhu Vamatiko eAtena, a yi hambanile ni leyi a yi tirhiseke loko a chumayela Vayuda esinagogeni. U xiyisise ndhawu leyi a va tshama eka yona kutani u vone mikhuva ya vukhongeri bya vona. (Mit. 17:22) Endzhaku, u kambisise tidyondzo leti va pfumelaka eka tona leti fambisanaka ni leswi Matsalwa ma swi vulaka. Pawulo a a tiyimiserile ku cinca ndlela leyi a chumayela hayona. U byele Vaatena leswaku rungula leri a ri twarisaka ri huma eka “Xikwembu Lexi Nga Tiviwiki,” lexi va ringetaka ku xi gandzela. Hambileswi vanhu Vamatiko a va nga ma tivi Matsalwa, Pawulo a nga va helelanga mbilu. Ematshan’weni ya sweswo, a va teka tanihi maxalana lama lunghekeleke ku tshoveriwa kutani u cince xingheniso xakwe hikwalaho ka mahungu lamanene. Vana ni vuxiyaxiya ku fana na Pawulo. Xiyisisa swilo leswi nga ku pfunaka u tiva tidyondzo leti vanhu va le nsin’wini ya ka n’wina va pfumelaka eka tona. Xana n’wini wa muti u ri khavise njhani kaya rakwe kumbe movha wakwe? Vito rakwe, ndlela leyi a ambalaka ni ku tisasekisa hayona kumbe ndlela leyi a vulavulaka hayona yi kombisa leswaku u le ka vukhongeri byo karhi? w20.04 9-10 ¶7-8