October

Hinkwerhu hi nga endla leswaku tinhlengeletano ta vandlha ti va leti akaka hi ku yimbelela swin’we hi rito ra le henhla ni ku nyikela tinhlamulo leti hi ti lunghiseleleke. Van’wana a swi va oloveli ku yimbelela kumbe ku nyikela nhlamulo etinhlengeletanweni ta vandlha. Xana na wena swa ku tikela? Loko swi ri tano kambisisa leswi van’wana va swi endleke leswaku va nga ha chavi. Van’wana swa va pfuna ku yimbelela hi mbilu hinkwayo. Loko hi yimbelela tinsimu ta Mfumo, xikulu i ku va hi dzunisa Yehovha. Hikwalaho, praktisa tinsimu leti hi nga ta ti yimbelela loko wa ha ri ekaya, swi ta ku pfuna tanihi laha swi ku pfunaka hakona loko u lunghiselela tinhlengeletano ta vandlha. Nakambe, ringeta ku vona ndlela leyi marito ya risimu ma fambisanaka hayona ni nhlokomhaka leyi ku dyondziwaka ha yona. Naswona u nga karhateki ngopfu hi mayimbelelelo ya wena kambe languta marito ya risimu. Van’wana a swi va oloveli ku hlamula. I yini leswi nga va pfunaka? Ringeta ku hlamula nkarhi ni nkarhi. Tsundzuka leswaku swi kahle loko nhlamulo ya wena yi olova, yi komile naswona yi ba nhloko ya mhaka. Yehovha wa swi tlangela swinene loko hi tiyimisele ku n’wi dzunisa etinhlengeletanweni ta vandlha. w22.04 7-8 ¶12-15

Rito “mupfuni” ri kombetela eka munhu loyi a hatliselaka ku pfuna loyi a lavaka ku pfuniwa. Vona Yehovha hi mahlo ya mianakanyo a ri karhi a hatlisela ku ponisa munhu loyi a nga emaxangwini. A swi kanakanisi leswaku wa pfumela ku nhlamuselo leyi, yi swi kombisa kahle leswaku Yehovha u tiyimiserile naswona wa swi lava ku va Mupfuni wa hina. Leswi Yehovha a hi pfunaka, hi nga tiyisela miringo ya hina hi tsakile. Hi tihi tindlela tin’wana leti Yehovha a hi pfunaka ha tona? Leswaku hi kuma nhlamulo, a hi voneni buku ya Esaya. Hikwalahokayini? Hikuva vuprofeta byo tala lebyi Yehovha a byi paluxeleke Esaya bya tirha eka malandza ya Xikwembu namuntlha. Nakambe, mikarhi yo tala Esaya u hlamusela Yehovha hi tindlela leti swi nga hi olovelaka ha tona ku n’wi twisisa. Hi kuma xikombiso xo tano eka Esaya ndzima 30. Eka ndzima leyi, u tirhisa swifaniso leswi twisisekaka hi ku olova leswi hlamuselaka ndlela leyi Yehovha a hi pfunaka hayona tanihi vanhu vakwe (1) hi ku yingisa hi vurhon’wana ni ku tlhela a hlamula swikhongelo swa hina, (2) ku hi nyika nkongomiso naswona (3) hi ku hi nyika mikateko sweswi ni le nkarhini lowu taka. w22.11 8 ¶2-3

Eka marungula ya Yesu lawa a ma byeleke vandlha ra le Smirna ni ra le Filadelfiya, u byele Vakreste volavo leswaku va nga chavi ku xanisiwa hikuva Yehovha a a ta va katekisa loko va tshama va tshembekile. (Nhlav. 3:10) Hi fanele hi langutela ku xanisiwa naswona hi tiyimisela ku tiyisela. (Mat. 24:​9, 13; 2 Kor. 12:10) Buku ya Nhlavutelo yi hi byela leswaku vanhu va Xikwembu a va ta xanisiwa “esikwini ra Hosi” leri hi hanyaka eka rona namuntlha. (Nhlav. 1:10) Nhlavutelo ndzima 12 yi hi byela hi nyimpi leyi tlhekekeke etilweni endzhaku ka loko Yesu a ve Hosi ya Mfumo wa Xikwembu. Mikayele ku nga Yesu Kreste loko a tlhelele etilweni swin’we ni tintsumi takwe va lwe na Sathana ni madimona yakwe. (Nhlav. 12:​7, 8) Valala va Xikwembu va hluriwile ivi va lahleriwa emisaveni laha va nga fika va xanisa vanhu.—Nhlav. 12:​9, 12. w22.05 5 ¶12-13

Mikarhi hinkwayo Yehovha u avanyisa hi ndlela leyinene. A nga hlawuli ndluwa a siya hove. A nga rivaleli munhu hi ku ya hi ku languteka kakwe, ku enta ka xikhwama xakwe, ndhuma kumbe vuswikoti byakwe. (1 Sam. 16:7; Yak. 2:​1-4) A hi nge n’wi sindzisi Yehovha kumbe hi n’wi xava. A nga endli swiboho swa vuavanyisi hi ku hlundzuka. (Eks. 34:7) Yehovha i Muavanyisi lonene hikuva u twisisa swilo hinkwaswo ku katsa ni swiyimo swa hina. (Det. 32:4) Vatsari va Matsalwa ya Xiheveru va xiye leswaku Yehovha u rivalela hi ndlela leyi hambaneke ni ya vanhu. Eka Matsalwa man’wana va tirhise rito ra Xiheveru leri hi ku ya hi buku yin’wana yi vulaka leswaku “ri tirhisiwa ntsena ku hlamusela ndlela leyi Xikwembu xi rivalelaka vadyohi hayona. Nakambe rito leri a ri nge tirhisiwi ku hlamusela ndlela leyi vanhu va rivalelanaka hayona hikuva a yi fani ni ya Xikwembu.” I Yehovha ntsena loyi a nga ni matimba yo rivalela mudyohi la hundzukeke hilaha ku heleleke. w22.06 4 ¶10-11

Loko u kurisa vana u ri wexe kumbe loko nuna wa wena a nga ri Mbhoni, tiyiseka leswaku xikombiso xa wena xa va khutaza van’wana ni ku va tiyisa. Ku vuriwa yini loko swi vonaka onge matshalatshala ya wena yo dyondzisa n’wana ko va nyuku wa mbyana? Tsundzuka leswaku ku dyondzisa n’wana swi lava nkarhi. Loko u byala mbewu u nga ha tivutisa loko yi ta mila yi va nsinya lowu vekaka mihandzu. Hambileswi u nga ta ka u nga swi koti ku endla leswaku nsinya wu veka mihandzu, u ya emahlweni u wu cheleta leswaku wu kota ku kula kahle. (Mar. 4:​26-29) Hilaha ku fanaka, mikarhi yin’wana u nga ha tivutisa loko u kota ku fikelela mbilu ya n’wana wa wena. A wu nge va sindzisi vana va wena leswaku va va leswi u swi lavaka. Kambe loko u ya emahlweni u va dyondzisa hilaha u nga kotaka hakona, u ta va pfuna leswaku va va ni vuxaka lebyinene na Yehovha. w22.04 19-20 ¶16-17

Loko Solomoni a ha ri mugandzeri wo tshembeka wa Yehovha, a a ri ni langutelo lerinene hi yena n’wini. Loko a ha ri jaha, u swi xiyile leswaku a ku ri ni leswi a a nga ta kota ku swi endla naswona u kombele Yehovha leswaku a n’wi kongomisa. (1 Tih. 3:​7-9) Loko a ha ku sungula ku fuma, Solomoni u tlhele a swi xiya leswaku swi ni khombo ku tikukumuxa. Khombo ra kona, hi ku famba ka nkarhi Solomoni a nga xi yingisanga xitsundzuxo xakwe. Hi ku famba ka nkarhi loko a ri hosi u sungule ku va ni makatla ivi a nga ha yingisi milawu ya Xikwembu. Hi xikombiso, nawu wun’wana a wu vula leswaku hosi ya Muheveru a yi nga fanelanga yi “va ni vavasati vo tala, leswaku mbilu ya yona yi nga hambuki.” (Det. 17:17) Solomoni u bakanye nawu wolowo ivi a teka vasati va 700 ni vasati lavatsongo va 300! (1 Tih. 11:​1-3) Kumbexana a a tibyela leswaku yena a swi nge n’wi endli nchumu. Hi ku famba ka nkarhi u kume vuyelo byo vava hikwalaho ka leswi a nga n’wi yingisangiki Yehovha.—1 Tih. 11:​9-13. w22.05 23 ¶12

Namuntlha vanhu hinkwavo va fanele va endla xiboho xa nkoka. Xana va ta seketela Yehovha Xikwembu tanihi Mufumi loyi a faneleke wa vuako hinkwabyo, kumbe va ta seketela Sathana Diyavulosi, nala wa tihanyi wa Xikwembu? A swi koteki ku seketela matlhelo mambirhi hi nkarhi wun’we. Xiboho xin’wana ni xin’wana lexi va xi endlaka xi ta khumba vumundzuku bya vona. (Mat. 25:​31-33, 46) Hi nkarhi wa ‘nhlomulo lowukulu,’ va ta fungheriwa ku pona kumbe ku lovisiwa. (Nhlav. 7:14; 14:​9-11; Ezek. 9:​4, 6) Loko u hlawule ku seketela vuhosi bya Yehovha u endle xiboho xa vutlhari. Sweswi u lava ku pfuna van’wana va endla leswi fanaka. Mikateko yi ta kumiwa hi lava va seketelaka vuhosi bya Yehovha hi ku tshembeka. I swinene ku yi kambisisa kahle mhaka leyi ya nkoka. Loko hi endla tano, hi ta ya emahlweni hi tiyimisela ku tirhela Yehovha. Ku engetela kwalaho, hi nga tirhisa leswi hi swi dyondzeke ku pfuna van’wana va hlawula ku tirhela Yehovha ni ku tshama va tshembekile. w22.05 15 ¶1-2

Hi fanele hi yingisa Yehovha ku nga ri valala va hina. Yobo u rhiye ndleve loko Yehovha a vulavula na yena. Xikwembu xi pfune Yobo a vona swilo hi ndlela leyinene, kahlekahle xi te: ‘Ndza swi tiva hinkwaswo leswi ku endlekeleke. Xana u ehleketa leswaku a ndzi nge ku khathaleli?’ Hi ku titsongahata Yobo u kombise ndlela leyi a byi tlangelaka hayona vunene bya Yehovha. U te: “Ndzi twe mavarivari ha wena, kambe sweswi ndza ku vona hi matihlo ya mina.” (Yobo 42:5) Swi vonaka onge loko Yobo a vula marito lama a ha tshame enkumeni, miri wakwe wu tele hi swilondza. Nilokoswiritano, Yehovha u tiyisekise Yobo leswaku Wa n’wi rhandza ni ku n’wi amukela. (Yobo 42:​7, 8) Na hina namuntlha, vanhu va nga hi rhuketela va tlhela va hi teka hi nga pfuni nchumu. Va nga ha ringeta ku onha vito ra hina kumbe ra nhlangano wa hina. Mhaka ya Yobo hi yi dyondzisa leswaku Yehovha wa tshemba leswaku hi ta tshama hi tshembekile eka yena loko hi ri emiringweni. w22.06 24 ¶15-16

Hambileswi ku nga ta va ni ntsako lowukulu etilweni loko Babilona Lonkulu a lovisiwa, kambe ku ni nchumu wun’wana lowu nga ta endla leswaku ku biwa mikulungwana. (Nhlav. 19:​1-3) “Mucato wa Xinyimpfana” i xiendlakalo xa nkoka ebukwini ya Nhlavutelo. Loko ku nga si tlhekeka nyimpi ya Armagedoni hinkwavo lava 144 000 va ta va va ri etilweni. Hambiswiritano, wolowo wu ta va wu nga ri nkarhi wa mucato wa Xinyimpfana. (Nhlav. 21:​1, 2) Mucato wa Xinyimpfana wu ta endleka endzhaku ka nyimpi ya Armagedoni naswona valala hinkwavo va Xikwembu va ta va va lovisiwile. (Ps. 45:​3, 4, 13-17) Ku ta endleka yini emucatweni wa Xinyimpfana? Leswi mucato wu hlanganisaka wanuna na wansati, hilaha ku fanaka mucato lowu wo fanekisela wa Xinyimpfana wu ta hlanganisa Hosi Yesu Kreste ni “mutekiwa” ku nga lava 144 000. Xiendlakalo xexo xa nkoka xi ta simeka mfumo lowuntshwa lowu nga ta fuma misava hinkwayo ku ringana malembe ya 1 000.—Nhlav. 20:6. w22.05 17 ¶11-13

Yesu u vule leswaku enkarhini wa makumu a a ta hlawula “nandza wo tshembeka ni wo tlhariha” leswaku a hi nyika nkongomiso lowu humaka eRitweni ra Xikwembu. (Mat. 24:45) U endla tano. Mulanguteri wa hina u tirhise ntlawa lowu lowutsongo wa vahlawuriwa leswaku a nyika vanhu va Xikwembu ni lava navelaka ku dyondza hi xona “swakudya hi nkarhi lowu faneleke.” Vahlawuriwa lava a va titeki tanihi valawuri va ripfumelo ra van’wana. (2 Kor. 1:24) Ematshan’wini ya sweswo, va swi tiva leswaku Yesu Kreste hi yena “murhangeri ni ndhuna” ya vanhu vakwe. (Esa. 55:4) Ku sukela hi 1919, nandza wo tshembeka u humese tibuku to hambanahambana leti pfuneke vanhu lava tsakelaka leswaku va dyondza ntiyiso lowu humaka eRitweni ra Xikwembu. Hi 1921, nandza u humese buku ya Xinghezi leyi nge, The Harp of God leswaku yi pfuna lava tsakelaka ku dyondza Bibele. Loko nkarhi wu ri karhi wu famba, ku humesiwe tibuku tin’wana. Hi yihi buku leyi ku pfuneke u tiva ni ku rhandza Tata wa hina la nge matilweni? w22.07 10 ¶9-10

A ku na munhu la hananaka ku fana na Yehovha. Swi nga ri na mhaka leswaku u n’wi nyika yini, mikarhi hinkwayo u ta ku tlherisela swo tala swinene ku tlula leswi u n’wi nyikeke swona. (Mar. 10:​29, 30) U ta endla leswaku u hanya vutomi lebyi tsakisaka ni lebyi vuyerisaka hambiloko ha ha hanya emisaveni leyi yo biha. Kambe swo tala swa ha ri endleleni. U nga swi kota ku tirhela Tata wa wena loyi u n’wi rhandzaka hilaha ku nga heriki. Ndlela leyi u rhandzaka Tata wa wena hayona yi ta ya yi kula naswona u ta hanya hilaha ku nga heriki ku fana na yena. Loko u tinyiketela ni ku khuvuriwa, u kota ku nyika Tata wa wena nchumu wa nkoka swinene. U ku nyike swilo hinkwaswo leswinene, swo tsakisa ni leswi u tiphineke ha swona. U nga nyika N’wini wa tilo ni misava nchumu lowu a nga riki na wona, ku nga ku n’wi gandzela hi ku swi rhandza. (Yobo 1:8; 41:11; Swiv. 27:11) Leyi i ndlela leyinene yo tirhisa vutomi bya wena. w23.03 6 ¶16-17

Loko wa ha ri muntshwa ku navela ku endla timhaka ta masangu ku nga ha va ni matimba naswona van’wana va nga ha ku kucetela leswaku u tikhoma ku biha hi swa masangu. Sathana u lava leswaku u endla tano. I yini leswi nga ku pfunaka leswaku u nga phasiwi hi xidyoho? (1 Tes. 4:​3, 4) Loko u khongela, byela Yehovha ndlela leyi u titwaka hayona naswona n’wi kombele leswaku a ku nyika matimba. (Mat. 6:13) Tsundzuka leswaku Yehovha u lava ku ku pfuna ku nga ri ku ku xopaxopa. (Ps. 103:​13, 14) Papalata ku titlhantlhela swiphiqo swa wena hi wexe. Byela vatswari va wena leswi ku karhataka. I ntiyiso leswaku a swi olovi ku va byela swiphiqo swa wena kambe i swa nkoka leswaku u endla tano. Loko u hlaya Bibele ni ku anakanyisisa hi milawu ya yona leyi kongomisaka, swi ta ku olovela ku endla swiboho leswi tsakisaka Yehovha. U ta swi xiya leswaku a wu lavi nawu eka nchumu wun’wana ni wun’wana hikuva u ta va u twisisa ndlela leyi Yehovha a langutaka swilo hayona. w22.08 5 ¶10-12

Nhloko ya ndyangu leyi nga Mukreste yi teka vutihlamuleri bya yona byo hlayisa ndyangu byi ri bya nkoka swinene. Loko u ri nhloko ya ndyangu, kumbexana wa vilela hi ku kumela ndyangu wa wena xo yisa enon’wini kumbe mali yo hakela ndhawu leyi mi tshamaka eka yona. Nakambe swi nga ha endleka leswaku wa chava leswaku loko wo heleriwa hi ntirho, a wu nge he swi koti ku kuma wun’wana. Kumbe u ehlekete leswaku a wu nge swi koti ku hanya hi swimalana. Sathana u swi kotile ku tirhisa ku chava loku leswaku a tshikisa vanhu vo tala ku tirhela Yehovha. Sathana u lava hi tshemba leswaku Yehovha a nga na mhaka na hina nileswaku hi ta ti vona leswaku hi yi huma njhani loko swi ta eka ku hlayisa mindyangu ya hina. Hikwalaho ka sweswo, hi nga ha tibyela leswaku hi fanele hi endla xin’wana ni xin’wana leswaku hi nga heleriwi hi mitirho ya hina hambiloko sweswo swi vula leswaku hi tlula milawu ya Matsalwa. w22.06 15 ¶5-6

Ha swi tiva leswaku Yehovha Xikwembu xa hina u ni “tintswalo ni ntwelavusiwana, loyi a hlwelaka ku hlundzuka naswona a nga ni rirhandzu ni ntiyiso.” (Eks. 34:6) Yehovha u rhandza vululami. (Esa. 61:8) U twa ku vava loko a vona hi xaniseka naswona u lunghekele ku herisa ku xaniseka hinkwako hi nkarhi lowu a wu vekeke. (Yer. 29:11) Hi wu langutele hi mahlongati nkarhi wolowo. Lexi i xin’wana xa swivangelo lexi endlaka hi rhandza Yehovha swinene! Hi xihi xivangelo xin’wana lexi endlaka hi rhandza ntiyiso? Ntiyiso wa hi vuyerisa hi ndlela leyikulu. Xiya xikombiso lexi landzelaka. Ntiyiso wa le Bibeleni wu katsa ntshembo lowu hi nga na wona wa leswi nga ta endleka enkarhini lowu taka. Ku fana ni leswi nsoma wu endlaka leswaku xikepe xi nga ndlengandlengisiwi, ntshembo wa hina wa le Bibeleni wu nga endla leswaku hi yima hi tiyile loko hi ri emiringweni. Eka ndzimana ya namuntlha , muapostola Pawulo a a vulavula hi ntshembo lowu Vakreste lava hlawuriweke va nga na wona wo ya etilweni. Kambe marito lawa ma tirha ni le ka Vakreste lava swi languteleke emahlweni ku hanya hilaha ku nga heriki emisaveni leyi nga paradeyisi. (Yoh. 3:16) A swi kanakanisi leswaku ku dyondza hi ntshembo wo hanya hilaha ku nga heriki swi endla hi tiva leswaku hi hanyela yini. w22.08 14-15 ¶3-5

Rirhandzu ri endla hi kota ku tshemba van’wana. Vakorinto vo Sungula ndzima 13 yi hlamusela swilo swo tala leswi rirhandzu ri nga hi pfunaka leswaku hi tshemba vamakwerhu kumbe hi tlhela hi va tshemba loko va hi twise ku vava. (1 Kor. 13:​4-8) Hi xikombiso, ndzimana 4 yi vula leswaku “rirhandzu ri lehisa mbilu naswona ri ni musa.” Yehovha u hi lehisela mbilu hambiloko hi n’wi dyohela. Kutani hi fanele hi va lehisela mbilu vamakwerhu loko va vula kumbe ku endla swilo leswi hi siringaka kumbe leswi hi vavisaka. Ndzimana 5 yi ri: “[Rirhandzu] a ri hlundzuki. A ri na xikhomela.” A hi nge lavi ku swi veka etimbilwini leswi vamakwerhu va swi endleke leswaku hi swi tirhisa enkarhini lowu taka. Eklesiasta 7:9 yi ri: “U nga hatliseli ku hlundzuka.” Ringeta ku languta vamakwerhu hilaha Yehovha a va langutaka ha kona. Yehovha wa va rhandza naswona a nga va hlayeleli loko va n’wi dyohela. Na hina hi fanele hi endla tano. (Ps. 130:3) Ematshan’weni yo languta swihoxo swa vona, languta swilo leswinene leswi va nga swi endlaka.—Mat. 7:​1-5. w22.09 3-4 ¶6-7

Buku ya Daniyele yi vulavula hi swilo swo tsakisa leswi a swi ta endleka hi ku landzelelana enkarhini wa makumu. Hi xikombiso, Daniyele 12:1 yi kombisa leswaku Mikayele, loyi ku nga Yesu Kreste u ‘yimela vanhu va Xikwembu.’ Xiphemu xexo xa vuprofeta xi sungule ku hetiseka hi 1914 loko Yesu a hlawuriwa ku va Hosi ya Mfumo wa Xikwembu wa le tilweni. Hambiswiritano, Daniyele u tlhele a byeriwa leswaku Yesu a a ta “teka goza” hi “nkarhi wa maxangu lama nga si tshamaka ma va kona ku sukela loko matiko ma ve kona ku fika enkarhini wolowo.” “Nkarhi [lowu] wa maxangu” i “nhlomulo lowukulu” lowu boxiweke eka Matewu 24:21. Yesu u ta teka goza ro lwela vanhu va Xikwembu loko ku hela nkarhi wa maxangu, ku nga Armagedoni. Buku ya Nhlavutelo na yona yi hlamusela vanhu volavo tanihi ‘ntshungu lowukulu lowu humaka enhlomulweni lowukulu.’—Nhlav. 7:​9, 14. w22.09 21 ¶4-5

Mavito lama nga kona sweswi ebukwini ya vutomi ma nga ha suriwa onge hiloko Yehovha a rhange hi ku ma tsala hi pensele. (Nhlav. 3:5) Hi fanele hi tikarhatela leswaku mavito ya hina ma nga suriwi ebukwini yoleyo kukondza ma tsariwa hi inki hi ndlela yo fanekisela. Ntlawa wun’wana lowu tsariweke ebukwini ya vutomi wu katsa lava hlawuriweke leswaku va fuma na Yesu etilweni. Hi ku ya hileswi muapostola Pawulo a swi byeleke “vatirhikulorhi” va le Filipiya, mavito ya vahlawuriwa lava rhambiweke ku fuma na Yesu se ma tsariwile ebukwini ya vutomi. (Filp. 4:3) Kambe leswaku mavito ya vona ma nga suriwi ebukwini yoleyo yo fanekisela, va fanele va tshama va tshembekile. Mavito ya vona ma ta tsariwa hi inki leswaku ma nga ha suriwi ebukwini leyi loko va funghiwa, ku nga ha va loko va ri ekusuhi ni ku fa kumbe loko nhlomulo lowukulu wu nga si sungula.—Nhlav. 7:3. w22.09 14 ¶3; 15 ¶5-6

Xana swi tshame swi ku endlekela leswi? Un’wana u sweke swakudya leswi u swi rhandzaka kambe a wu koti ku tiphina hi swona hileswi u jaheke kumbe hi leswi miehleketo ya wena yi nga kun’wana. Kambe loko u heta ku dya, wa swi xiya leswaku a wu tiphinanga hi swona hileswi a wu jahile. Xana u tshama u hlaya Bibele u jahile lerova u tsandzeka ku tiphina hi rungula ra yona? Tinyike nkarhi wo tiphina hi ku hlaya Rito ra Xikwembu; swi vone hi mahlo ya mianakanyo leswi u swi hlayaka. Twana mimpfumawulo ya marito ya vanhu lava u hlayaka ha vona ni ku anakanyisisa hileswi u swi hlayeke. Loko u endla sweswo u ta tsaka. Yesu u hlawule “nandza wo tshembeka ni wo tlhariha” leswaku a hi nyika swakudya leswi hi tiyisaka ripfumelo hi nkarhi lowu faneleke naswona a hi pfumali nchumu. (Mat. 24:45) Nandza wo tshembeka u hi phamela swakudya leswi humaka eMatsalweni.—1 Tes. 2:13. w22.10 7-8 ¶6-8

Bibele yi hi lemukisile leswaku emasikwini yo hetelela vahlekuri va ta va va lo vuya! (2 Pet. 3:​3, 4) Va endla leswi hileswi va kuceteriwaka hi “ku navela ka vona.” (Yuda 7, 17, 18) Hi nga endla njhani leswaku hi nga fani ni vahlekuri? Ndlela yin’wana i ku papalata ku ti toloveta ni vanhu lava rhandzaka ku solasola swilo. (Ps. 1:1) Leswi swi vula leswaku a hi yingisi kumbe hi hlaya swilo swa vagwinehi. Ha swi xiya leswaku loko hi nga tivoneli, swi nga hi olovela ku va ni moya wo solasola ni ku sungula ku ka hi nga ha n’wi tshembi Yehovha ku katsa ni nkongomiso lowu a hi nyikaka wona hi ku tirhisa nhlangano wakwe. Leswaku hi papalata moya wo tano, hi nga ha tivutisa leswi: ‘Xana ndzi tshamela ku solasola loko hi kuma nkongomiso kumbe nhlamuselo leyintshwa? Xana ndzi ni ntolovelo wo xopaxopa swihoxo swa lava rhangelaka?’ Loko hi hatla hi ku yi thyaa, mikhuva yo tano, Yehovha u ta tsaka ha hina.—Swiv. 3:​34, 35. w22.10 20 ¶9-10

Moya wa Xikwembu wu tiyise Ezekiyele leswaku a chumayela vanhu lava a va ‘ome tinhloko naswona timbilu ta vona a ti nonon’hwa.’ Yehovha u byele Ezekiyele a ku: “Ndzi endle xikandza xa wena xi tiya ku fana ni swikandza swa vona ni mombo wa wena ndzi wu endle wu nonon’hwa ku fana ni mimombo ya vona. Ndzi endle mombo wa wena wu fana ni dayimani, wu tiya ku tlula ribye ro tiya. U nga va chavi kumbe u chavisiwa hi swikandza swa vona.” (Ezek. 3:​8, 9) Sweswo a swi fana niloko Yehovha a byela Ezekiyele a ku: ‘Vanhu lava omeke tinhloko va nga ku heti matimba. Mina ndzi ta ku tiyisa.’ Endzhaku ka sweswo, moya wa Xikwembu wu pfune Ezekiyele loko a endla ntirho wakwe wo chumayela. Ezekiyele u tsale a ku: “Matimba ya Yehovha ma sungula ku tirha swinene eka mina.” Swi n’wi tekele vhiki ku dyondza ni ku ri twisisa hi vuenti rungula leri a a fanele a ri chumayela. (Ezek. 3:​14, 15) Hikwalaho, Yehovha u n’wi kongomise endhawini leyi nga rivala laha ‘moya wu ngheneke eka yena.’ (Ezek. 3:​23, 24) Ezekiyele se a a lunghekele ku sungula ntirho wakwe wo chumayela. w22.11 4-5 ¶8-9

Muprofeta Habakuku u langutane ni swiphiqo swo tala. Swi tikomba onge nkarhi wun’wana a a kanakana loko Yehovha a khathala ha yena. U byele Yehovha ndlela leyi a a titwa hayona hi xikhongelo. Yehovha u xi hlamurile xikhongelo xa nandza wakwe wo tshembeka lexi humaka embilwini. (Hab. 2:​2, 3) Endzhaku ko anakanyisisa hi ndlela leyi Yehovha a poniseke vanhu vakwe hayona, Habakuku u tlhele a va ni ntsako. A a tiyiseka leswaku Yehovha wa khathala hi yena nileswaku a a ta n’wi pfuna a tiyisela ndzingo wihi ni wihi. (Hab. 3:​17-19.) Hi dyondza yini? Loko ku ri ni leswi ku karhataka, khongela eka Yehovha u n’wi byela ndlela leyi u titwaka hayona. Kombela leswaku a ku pfuna. Loko u endla tano, u nga tiyiseka leswaku Yehovha u ta ku nyika matimba lama u ma lavaka yo tiyisela. Loko u xiya ndlela leyi Yehovha a ku seketelaka hayona, ripfumelo ra wena eka yena ri ta ya ri tiya swinene. Loko u tshama u ri karhi u endla leswi tiyisaka vuxaka bya wena na Yehovha, a wu nge pfumeleli swiphiqo kumbe ku kanakana ku ku hambanisa na Yehovha.—1 Tim. 6:​6-8. w22.11 15 ¶6-7

Yesu ni swigevenga swimbirhi a va twa ku vava loko va ri karhi va fa. (Luka 23:​32, 33) Swigevenga leswi a swi rhukana Yesu. (Mat. 27:44; Mar. 15:32) Kambe xigevenga xin’we xi cince langutelo ra xona. Xi te: “Yesu, u ndzi tsundzuka loko u nghena eMfun’weni wa wena.” Yesu u xi hlamule hi ku vula marito ya ndzimana ya namuntlha. (Luka 23:​39-42) Marito lama Yesu a ma byeleke xigevenga xin’wana ma fanele ma endla hi ehleketa hi ndlela leyi vutomi byi nga ta va hayona eParadeyisini. Kahlekahle, hi nga dyondza swo karhi hi Paradeyisi eka ku rhula loku veke kona loko Hosi Solomoni a fuma. Hi nga langutela leswaku Yesu munhu wa nkoka ku tlula Solomoni, u ta tirha swin’we ni vafumikulobye ku endla leswaku misava yi va eka xiyimo lexinene. (Mat. 12:42) Swi le rivaleni leswaku lava “tinyimpfu tin’wana” swi lava leswaku va swi tekela enhlokweni leswi va faneleke va swi endla leswaku va kota ku fanelekela ku hanya hilaha ku nga heriki eParadeyisini.—Yoh. 10:16. w22.12 8 ¶1; 9 ¶4

Esaya u hi tiyisekisa leswaku Yehovha, u ta hi yingisa hi vurhon’wana loko hi kombela mpfuno eka Yena naswona u ta swi hlamula hi ku hatlisa swikombelo swa hina. Esaya u engeta a ku: “U ta mi hlamula hi ku hatlisa.” Marito lawa ma hi tiyisekisa leswaku Tata wa hina u tiyimiserile naswona wa swi lava ku hi pfuna loko hi kombela mpfuno eka yena. Ku tiva leswi swi hi pfuna hi tiyisela hi tsakile. Yehovha u yingisa xikhongelo xa un’wana ni un’wana wa hina. Hikwalahokayini hi vula sweswo? Eka xiphemu xo sungula xa Esaya ndzima 30, risivi “n’wina” ri komba vunyingi hikuva Yehovha u vulavula ni vanhu vakwe tanihi ntlawa. Hambiswiritano, eka ndzimana 19 rito “wena” ri kombetela eka munhu ha un’we ku nga ri ntlawa. Esaya u tsale ku: “A wu nge rili nikatsongo; kunene u ta ku komba tintswalo; u ta ku hlamula.” (bi-12-TS) Tanihi hileswi Yehovha a nga Tatana la nga ni rirhandzu, wa khathala naswona u yingisa swikhongelo swa hina hi vukheta.—Ps. 116:1; Esa. 57:15. w22.11 9 ¶5-6

Loko hi chumayela ni ku dyondzisa hambiloko hi kanetiwa ha tsaka naswona hi ni ku rhula. Emikarhini ya ku tsariwa ka Bibele loko valawuri va Vayuda va lerisa vaapostola leswaku va tshika ku chumayela, vavanuna volavo vo tshembeka va hlawule ku yingisa Xikwembu. Va ye emahlweni va chumayela naswona ntirho wolowo a wu va endla va tsaka. (Mit. 5:​27-29, 41, 42) I ntiyiso leswaku loko ntirho wa hina wu yirisiwile, hi fanele hi va ni vuxiyaxiya loko hi ri karhi hi chumayela. Kambe loko hi endla leswi hi nga swi kotaka, hi ta va ni ku rhula hileswi hi tsakisaka Yehovha ni ku chumayela rungula leri ponisaka vutomi. Tiyiseka leswaku hambiloko hi ri eka swiyimo swo tika swinene, hi nga va ni ku rhula. Hi mikarhi yoleyo, hi fanele hi tsundzuka leswaku ku rhula loku hi ku lavaka i ka Yehovha ntsena. Titshege hi Yehovha loko u langutane ni ntungu, mhangu ya ntumbuluko kumbe ku xanisiwa. Namarhela nhlangano wakwe. Byi langutele emahlweni vumundzuku byo tsakisa. Loko u endla tano, “Xikwembu xa ku rhula xi ta va na [wena].”—Filp. 4:9. w22.12 21 ¶17-18

Hi fanele hi tirha hi matimba. Eka swilo leswi hi faneleke hi swi tshika, hi fanele hi kulula hi n’watseka leswaku hi tshika ku va ni xikhomela, ku hlundzuka ni vukarhi. (Efe. 4:​31, 32) Hikwalahokayini ku endla leswi swi nga ha tikaka? Hikuva swi nga ha va swi dzime timitsu etimbilwini ta hina. Hi xikombiso, Bibele yi vula leswaku vanhu van’wana va “[tala] ku hlundzuka” ni ku ‘hatla va kariha.’ (Swiv. 29:22) Swi nga ha lava hi tshamela ku endla swo karhi leswaku hi kota ku lawula mikhuva leyi dzimeke timitsu hambiloko se hi khuvuriwile. (Rhom. 7:​21-23) Khongela eka Yehovha u n’wi byela hi mukhuva wo biha lowu ku karhataka, u tiyiseka leswaku u ta ku twa ni ku tlhela a ku pfuna. (1 Yoh. 5:​14, 15) Hambileswi Yehovha a nga taka a nga wu susi mukhuva wolowo hi singita, u ta ku nyika matimba leswaku wu nga ku hluli. (1 Pet. 5:10) Kambe sweswi, endla swilo hi ku pfumelelana ni swikhongelo swa wena hi ku nga endli swilo leswi nga ta endla swi ku tikela ku tshika vumunhu bya khale. Papalata ku ehleketa hi ku navela ko biha.—Filp. 4:8; Kol. 3:2. w23.01 10 ¶7, 9-10

Ndlela yin’wana yo kombisa rirhandzu rero hayona i ku chumayela hi ku hiseka. Hi chumayela hinkwavo lava hi hlanganaka na vona. A hi hlawuli munhu hi ku ya hi rixaka, ndhavuko, ku enta ka xikhwama xakwe kumbe ndlela leyi a kurisiweke hayona. Hi ndlela leyi, hi va hi endla swilo hi ku pfumelelana ni xikongomelo xa Yehovha xa leswaku “vanhu hinkwavo va ponisiwa kutani va wu tiva kahle ntiyiso.” (1 Tim. 2:4) Hi tlhela hi kombisa leswaku hi rhandza Xikwembu na Kreste hi ku va hi rhandza vamakwerhu. Ha khathala ha vona naswona ha va seketela loko va langutane ni miringo. Ha va chavelela loko va feriwile, hi va vhakela loko va vabya naswona hi endla leswi hi nga swi kotaka leswaku hi va khutaza loko va hele matimba. (2 Kor. 1:​3-7; 1 Tes. 5:​11, 14) Ha va khongelela hikuva ha swi tiva leswaku “xikhongelo xa munhu la lulameke xi ni matimba.”—Yak. 5:16. w23.01 28-29 ¶7-8

Hi ku famba ka nkarhi muaki u antswisa vuswikoti byakwe byo aka, hilaha ku fanaka hi nga antswisa ndlela leyi hi khutazaka vamakwerhu hayona. Hi nga pfuna van’wana leswaku va tiyisela miringo hi ku va byela swikombiso swa lava tiyiseleke enkarhini lowu nga hundza. (Hev. 11:​32-35; 12:1) Hi nga endla leswaku ku va ni ku rhula loko hi nga voni swilo hi tihlo rin’we ni ku vula swilo leswinene leswi hi swi vonaka eka van’wana. (Efe. 4:3) Nakambe hi nga ya emahlweni hi tiyisa ripfumelo ra vamakwerhu hi ku va byela ntiyiso lowu nga eBibeleni, ku va pfuna hi tindlela to karhi ni ku seketela lava ripfumelo ra vona ri tsaneke. Hi nga kuma ntsako ni ku eneriseka loko hi pfuna vamakwerhu evandlheni va tiyisa ripfumelo ra vona. Ku hambana ni miako leyi nga ta hlakala hi ku famba ka nkarhi, vuyelo bya ku tikarhata ka hina byi nga tshama hilaha ku nga heriki! w22.08 22 ¶6; 25 ¶17-18

Nchumu wa nkoka lowu Yesu a vuleke leswaku hi fanele hi va na wona leswaku hi vuyeriwa eka leswi hi swi hlayaka eRitweni ra Xikwembu, i ku twisisa. (Mat. 24:15) Swi vula yini ku twisisa? I vuswikoti byo vona ndlela leyi mhaka yo karhi yi fambisanaka hayona ni yin’wana ni ndlela leyi yi hambanaka ni yin’wana hayona ni ku vona swilo leswi tumbeleke. Ku engetela kwalaho, hilaha Yesu a swi kombiseke hakona, swi lava leswaku hi twisisa swiendlakalo leswi kombisaka ku hetiseka ka vuprofeta bya Bibele. Nakambe swi lava hi twisisa leswaku hi kota ku vuyeriwa hi xitalo eka hinkwaswo leswi hi swi hlayaka eBibeleni. Yehovha u nyika malandza yakwe ku twisisa. Kutani khongela eka yena u n’wi kombela a ku pfuna u twisisa. U nga swi kombisa njhani leswaku leswi u swi endlaka swi fambisana ni leswi u swi khongeleleke? Kambisisa leswi u swi hlayaka ni ku xiya ndlela leyi swi fambisanaka hayona ni swin’wana leswi u swi tivaka. Lava leswi ndzimana yo karhi eBibeleni yi vulaka swona ni ku vona tindlela leti u nga swi tirhisaka hayona evuton’wini. (Hev. 5:14) Loko u endla tano, ndlela leyi u ma twisisaka hayona Matsalwa yi ta kula. w23.02 10 ¶7-8

A hi nge munghana wa wena u ku nyike xifaniso xa khale swinene lexi dirohiweke kambe lexi durhaka mali yo tala naswona xi endliweke hi munhu la nga ni vuswikoti. Kun’wana xi hume muhlovo, xi dzhonile naswona xi handzulelekile. Hambileswi xi nga tano, xifaniso lexi xi durha timiliyoni to tala ta tirhandi. A swi kanakanisi leswaku a wu ta xi tlangela ni ku xi hlayisa. Hilaha ku fanaka, Yehovha u hi nyike nyiko ya nkoka ku nga vutomi. Entiyisweni, Yehovha u kombisa ndlela leyi a byi tekaka byi ri bya nkoka hayona vutomi bya hina hi ku nyikela hi N’wana wakwe leswaku a va nkutsulo. (Yoh. 3:16) Yehovha i Xihlovo xa vutomi. (Ps. 36:9) Muapostola Pawulo u wu xiyile ntiyiso lowu hi ku tsala a ku: “Ha xona hi ni vutomi, ha famba hi tlhela hi hanya.” (Mit. 17:​25, 28) Hikwalaho hi nga vula leswaku vutomi bya hina i nyiko leyi humaka eka Xikwembu. Hi ku swi rhandza xi hi nyike leswi hi swi lavaka leswaku hi kota ku hanya. (Mit. 14:​15-17) Kambe Yehovha a nga hi sirheleli hi singita. Ematshan’weni ya sweswo, u langutele leswaku hi khathalela rihanyo ra hina ni vuxaka bya hina na yena hilaha hi nga kotaka hakona.—2 Kor. 7:1. w23.02 20 ¶1-2

Ha khensa leswi Yehovha Xikwembu a hi nyikeke Bibele! Eka yona, u hi nyika switsundzuxo leswi nga hi pfunaka hi tiyisela swiphiqo leswi hi langutanaka na swona namuntlha. U tlhela a hi nyika ntshembo lowu hi nga ta tiphina ha wona enkarhini lowu taka. Xa nkoka swinene, Yehovha u tirhise Bibele ku hi kombisa vumunhu byakwe. Loko hi anakanyisisa hi vumunhu byakwe lebyinene, ha tsaka swinene naswona hi ya hi tshinela eka yena ni ku tlhela hi va ni vuxaka lebyikulu na yena. (Ps. 25:14) Yehovha u lava leswaku vanhu va n’wi tiva. Enkarhini lowu hundzeke, Yehovha u titivise hi ku tirhisa swivono, milorho hambi ku ri tintsumi. (Tinhl. 12:6; Mit. 10:​3, 4) Xana a hi ta yi dyondza njhani milorho, swivono kumbe marungula lama humaka eka tintsumi loko a ma nga tsariwanga? Swa twala leswi Yehovha a leriseke vavanuna leswaku va “tsala . . . ebukwini” leswi a a lava hi swi tiva. Leswi “ndlela ya Xikwembu xa ntiyiso yi [hetisekeke],” hi nga tiyiseka leswaku ndlela leyi xi tirhisaka ku vulavula na hina i yinene naswona ya hi vuyerisa.—Ps. 18:30. w23.02 2 ¶1-2

Tiyimisele ku fikelela swilo swa nkoka. Hlawula ku endla swilo leswi nga ta tiyisa ripfumelo ra wena ni ku ku pfuna leswaku u va Mukreste la wupfeke. (Efe. 3:16) Hi xikombiso, u nga ha hlawula ku antswisa ndlela leyi u hlayaka Bibele hayona ni ku endla dyondzo ya munhu hi yexe. (Ps. 1:​2, 3) Kumbe u nga ha vona swi fanerile ku antswisa ndlela leyi u khongelaka hayona ni leswaku u khongela kangani. Kumbexana u fanele u tikhoma loko swi ta emhakeni yo hlawula vuhungasi ni ndlela leyi u wu tirhisaka hayona nkarhi wa wena. (Efe. 5:​15, 16) U ta ya emahlweni u va Mukreste la wupfeke loko u pfuna vanhu van’wana. Hi xikombiso, u nga ha tiyimisela ku pfuna lava dyuhaleke evandlheni ra ka n’wina. Kumbexana u nga ha va yela eswitolo kumbe u va dyondzisa ku tirhisa swilo swo fana ni tifoni ta manguva lawa. U nga tlhela u kombisa van’wana rirhandzu hi ku va chumayela mahungu lamanene ya Mfumo. (Mat. 9:​36, 37) Loko swi koteka, ku nghenela ntirho wa nkarhi hinkwawo a ku ve leswi u lavaka ku swi fikelela. w22.08 6 ¶16-17