Hatlisa U Endla Hi Ku Pfumelelana Ni “Xikombiso”!

“Hitekani ke, hikuva siku a mi ritivi na wona nkarhi a mi wu tivi.”—MATEWU 25:13 Byington.

1. Hikwalaho ka yini a ku ta va vuhunguki ku fana ni vanhwanyana lavo rivala va xikombiso xa Yesu?

HIKWALAHO ka nguva leyi vangamaka leyi taka ya misava leyi kutsuriweke ya vanhu, i vuhunguki swonghasi ku fana ni vanhwanyana va ntlhanu lavo rivala va xifaniso xa Yesu! Va teke goza nkarhi se wu hundzile naswona a va swi kotanga ku nghena “emfun’weni wa matilo.” (Matewu 25:1-12) Swihunguki swoleswo a swi endlanga tanihi timboni enkarhini lowu a wu laveka. Loko “Evhangeli leyi ya Mfumo” yi ta va yi chumayeriwile “emisaveni hinkwayo leswaku byi va vumbhoni” naswona “makumu” ya fikile, va ta va va lahlekeriwe hi nkarhi wa vona wo hlanganyela eka lunghelo rero ra ntirho leri nga taka ri nga ha phindhiwi.—Matewu 24:14.

2, 3. (a) I xikhutazo xihi lexi Yesu a heteleleke xifaniso xa vanhwanyana va khume ha xona? (b) Hikwalaho ka yini xikhutazo xexo xa ha fanela, naswona hikwalaho ntlawa wa ‘vanhwanyana lavo tlhariha’ wu lava ku hambeta wu phameriwa yini?

² Hi yona mhaka leyi Yesu Kriste a heteleleke xifaniso xakwe hi xikhutazo lexi: “Hitekani ke, hikuva siku a mi ri tivi na wona nkarhi a mi wu tivi.”—Matewu 25:1-13.

³ Marito wolawo ya Muteki Yesu Kriste hi lama fanelaka swinene, ngopfu-ngopfu sweswi, 71 wa malembe eka ‘makumu ya mafambiselo lawa ya swilo.’ Hambi ku ri enkarhini lowu wo hetelela masalela ya ntlawa wa ‘vanhwanyana lavo tlhariha’ a ma ri tivi siku kumbe nkarhi lowu ku nga ta pfariwa ha wona “nyangwa” ya leswaku ku amukeriwa van’wana eMfun’weni wa le tilweni va va kun’we ni muteki loyi va nga nsati wakwe. Swi fanela lava va lavaka ku tikomba tanihi vanhwanyana vo “tlhariha” ku hambeta va nyikiwa mafurha ya moya nkarhi na nkarhi. Hi ku endla tano va endla leswaku ku vonakala ku voninga hi ku hangalasa “Evhangeli leyi ya Mfumo” leswaku byi va vumbhoni bya misava hinkwayo, bya matiko hinkwawo ku fikela loko “makumu” ya fika.—Matewu 24:14; Marka 13:10; Nhlavutelo 14:6, 7.

“Tinyimpfu” Ni “Timbuti” Sweswi Ta Hambanisiwa

4. Hi ku ya hi mhaka ya Matewu, i xifaniso xihi xo hetelela xa Yesu lexi faneleke ku hetiseka tanihi xiphemu xa “xikombiso” xa “vukona” Byakwe?

⁴ Loko “makumu” ya nga si fika ‘eku heleni ka mafambiselo ya swilo’ ntirho wun’wana wo hambanisa vanhu wu fanele ku humelela kutani wu tirha tanihi xiphemu xa “xikombiso” lexi tiyisaka leswaku hi le ‘nkarhini wa makumu.’ (Daniel 12:4) Loku i ku hetiseka ka xifaniso xa Yesu xa tinyimpfu na timbuti, lexi ha xona Matewu a hetelelaka mhaka ya yena ya vuprofeta lebyikulu bya Kriste ehenhleni ka “xikombiso” xa “vukona” Byakwe lebyi nga vonekiki ni xa ‘ku hela ka mafambiselo ya swilo.’

5. Ku hambanisiwa ka vanhu ku fana ni tinyimpfu ni timbuti a ku ta humelela rini xana?

⁵ Se xiya leswi Yesu a swi vhumbeke malunghana ni leswi, hi laha swi rhekhodiweke ha kona eka Matewu 25:31-46. U sungule xifaniso hi ku: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, u ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena, u ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi.” I yini lexi landzelaka? Yesu u ye emahlweni a ku:

6. Xana Hosi ni Murisi u ri yini eka vanhu lava nga etlhelweni ra yena ra xinene?

⁶ “Hi laha Hosi yi nga ta byela lava nge vokweni ra yona ra xinene yi ku: ‘Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka; hikuva a ndzi ri ni ndlala, kutani mi ndzi fihlutile; a ndzi ri ni tora mi ndzi siyele ndzi nwa; a ndzi ri muendzi, mi ndzi rhurhele; a ndzi swerile, mi ndzi ambexile; a ndzi vabya, mi ndzi ongorile; a ndzi ri khotsweni, mi tile mi ta ndzi kamba.’

7. I ku vilela kwihi loku vanhu lavo lulama, lava fanaka ni tinyimpfu va nga ta ku endla, naswona Hosi yi ta hlamula hi ndlela yihi?

⁷ “Hi kona lava lulameke va nga ta hlamula, va ku: ‘Hosi, hi rini hi tshamaka hi ku vona u ri ni ndlala, kutani hi ku fihluta, kumbe u ri ni tora, hi ku siyela u nwa ke? Hi rini hi nga ku vona u ri muendzi, hi va hi ku rhurhela, kumbe u swerile, hi ku ambexa ke? Hi rini hi nga ku vona u vabya, kumbe u ri khotsweni, kutani hi ta hi ta ku kamba ke?’ Hosi yi ta va hlamula, yi ku: ‘Ndzi tiyisile ndzi ri ka n’wina, loko mi tshame mi endla swilo leswi eka un’wana wa vamakwerhu lavatsongo lava, mi swi endlele mina.’”

8. (a) Vanhu lava fanaka ni timbuti a va ri tekanga hi xihatla goza ro endla yini ke? (b) Hikwalaho hi kwihi laha Hosi yi nga ta va rhumela kona ku hambana ni vanhu lavo lulama, lava fanaka ni tinyimpfu?

⁸ “Timbuti” a ti endli hi xihatla ehenhleni ka “xikombiso.” A ti swi endli swilo leswi endliweke hi ntlawa wa “tinyimpfu.” Xisweswo ha hlaya: “Kutani Hosi yi ta byela lava nga evokweni ra yona ra ximatsi yi ku: ‘Sukani ka mina, n’wina lava rhukaniweke hi Xikwembu; yanani endzilweni lowu nga timekiki, lowu lunghiseriweke Diyavulosi ni tintsumi ta yena; hikuva a ndzi ri ni ndlala, a mi ndzi fihlutanga; a ndzi ri ni tora, a mi ndzi siyelanga ndzi nwa; a ndzi ri muendzi, a mi ndzi rhurhelanga; a ndzi swerile, a mi ndzi ambexanga; a ndzi ri eku vabyeni ni le khotsweni, a mi tanga mi ta ndzi ongola.’ Hi laha na vona va nga ta hlamula, va ku: ‘Hosi, hi rini hi tshamaka hi ku vona u ri ni ndlala, kumbe u vabya, kumbe u ri ni tora, kumbe u ri muendzi, kumbe u swerile, kumbe u ri ekhotsweni, kutani hi nga ku pfunanga xana? Hi laha Hosi yi nga ta va hlamula, yi ku: ‘Ndzi tiyisile ndzi ri ka n’wina, loko mi nga endlelanga un’wana wa lavatsongo lava, na mina a mi ndzi endlelanga.’ Kutani volavo va ta ya eku biweni loku nga heriki, kambe lavo lulama va ta ya evuton’wini lebyi nga heriki.”

9. Hi loko u endle yini eku hetisekeni ka manguva lawa ka xifaniso xa Yesu xa “tinyimpfu” na “timbuti” laha u nga ha katekaka?

⁹ Kumbexana, u ni xiphemu eku hetisekeni ka xifaniso lexi xa vuprofeta. Xana u swi xiyile swilo leswinene leswi Yesu a swi vuleke? Xana u swi endlile swilo swo tano eka “vamakwavo” ke? U nga va la katekeke loko u endle tanihi “nyimpfu” eka vona!

10. Yesu u kombe ku hambana exikarhi ka ‘vamakwavo’ ni lava va faniseriweke hi “tinyimpfu” na “timbuti” hi ndlela yihi, naswona i xisekelo xihi xa Bibele lexi nga kona xa leswi?

¹⁰ Yesu u kombe ku hambana exikarhi ka “vamakwavo” va moya ni lava va tikombaka va fana ni tinyimpfu kumbe timbuti. Enkarhini wa ku hetiseka ka xifaniso lexi, ‘vamakwavo’ hi lava va n’wi tekeleleke hi ku tinyikela eka Xikwembu handle ko ba mariri. Ku fana na Yesu, va nyikele vumbhoni bya le rivaleni bya leswi hi ku khuvuriwa ematini. Ku tlula kwalaho, Yehova, Tata wa Hosi Yesu Kriste, u vile Tata wa vona wa le tilweni hi ku va tswala hi moya Wakwe lowo kwetsima kutani xisweswo a va endla ‘vamakwavo’ va moya va N’wana wa yena. Leswi swi va veka enxaxamelweni wa ku va ni xivandla eMfun’weni wa le tilweni ni Makwavo Lonkulu, Yesu Kriste, “Mufumi wa vafumi ni Hosi ya tihosi.” (Nhlavutelo 19:16) Emhakeni leyi a ku tsariwe leswi malunghana na yena: “Hambi a ri Yesu loyi a basisaka vanhu eswidyohweni, hambi va ri lava basisiwaka, hinkwavo va huma eka Tatana un’we. Hi yona mhaka leyi endlaka leswaku Yesu a nga khomiwi hi tingana ku va vula vamakwavo, a ku ka Xikwembu: ‘Ndzi ta twarisa vito ra wena eka vamakwerhu, ndzi ta ku dzunisa hi tinsimu exikarhi ka nhlengeletano.’” (Vaheveru 2:11, 12) Laha Psalma 22:22 yi tirhisiwe eka N’wana la kwetsimisiweke wa Xikwembu, Yesu Kriste.

11. Xana ku na ‘vamakwavo’ va Yesu va moya lavo tala sweswi emisaveni, naswona i ntlawa kumbe ‘nhlengeletano’ yihi leyi va yi vumbaka ke?

¹¹ Emisaveni ka ha ri ni masalela ya ‘vamakwavo’ volavo va moya va Yesu Kriste Hosi leyi fumaka. Tanihi ntlawa, kumbe “nhlengeletano,” va vumba “nandza lowo tshembeka, Iowa vutlhari” loyi Yesu a n’wi vhumbeke eka vuprofeta byakwe ehenhleni ka ‘makumu ya mafambiselo ya swilo.’ U te: “Xana nandza lowo tshembeka, Iowa vutlhari, i mani xana? Xana a hi yena loyi n’wini wa yena a nga ta n’wi veka ku va mulanguteri wa malandza man’wana la mutini, leswaku ma nyikiwa swakudya hi nkarhi wa kona xana? Ku katekile nandza loyi, ku nga ta ku loko n’wini wa yena a fika, a nga ta n’wi kuma a endlisa sweswo. Ndzi tiyisile ndzi ri ka n’wina, u ta n’wi veka ku va mulanguteri wa hinkwaswo leswi a swi fuweke.”—Matewu 24:45-47.

12. (a) Ku sukela hi 1919, ntlawa wa “nandza” wu ve lowu hlawulekeke eku endleni ka yini? (b) “Nandza” u vekiwe ehenhla ka ‘swilo’ swihi? (c) “Nandza” loyi a tirhaka sweswi i xiphemu xa yini?

¹² Timhaka ta matimu ti hlamula xivutiso xa Yesu ehenhleni ka xikombiso xa “nandza” loyi. “Nhlengeletano” leyi tirhaka tanihi “nandza” yi vumbiwa hi ‘vamakwavo’ lava a va nyikiweke hi Xikwembu lava ha riki emisaveni. Swa ha fana ni ntlawa wa ‘vanhwanyana lavo tlhariha.’ Ku sukela hi 1919 “nandza” loyi u ve loyi a hlawulekeke eku phameleni ka swakudya leswinene swa moya leswi humaka eBibeleni eka “malandza laman’wana” ya N’wini wa muti, a endla tano hi nkarhi lowu ‘faneleke.’ Kutani ke, N’wini wa muti loyi a nga vonekiki u vekile ntlawa wa “nandza” loyi a tshembekaka ehenhla ka “hinkwaswo leswi a swi fuweke” swa moya. Ngopfu-ngopfu leswi swi tano mayelana ni ku chumayeriwa ka “Evhangeli leyi ya Mfumo” emisaveni hinkwayo, leyi a fumaka ehenhla ka yona. Ku fikela sweswi vumbhoni lebyi bya Mfumo byi engetelekile! “Nandza lowo tshembeka, Iowa vutlhari” loyi u tirha tanihi xiphemu lexikulu xa “xikombiso” lexi kombaka nkarhi lowu nga wona.

13. I ku sukela rini laha “matiko hinkwawo” ya hlengeletiweke emahlweni ka Hosi, naswona hi rini laha “nandza” a sunguleke ku hlengeleta “tinyimpfu” etlhelweni ra yona ra xinene?

¹³ Hi le ka swirho swa ntlawa wa “nandza” laha “tinyimpfu” leto lulama ti endleke swilo leswinene. Tinyimpfu ni timbuti to fanekisela i vanhu va matiko hinkwawo lava vumbhoni bya Mfumo sweswi byi nyikeriweke eka vona. Hikwalaho ke, hi laha swi kombisiweke hi tinyimpfu ni timbuti to tano, “matiko hinkwawo” ya hlengeletiwile emahlweni ka Hosi leyi tshameke exiluvelweni xa yona xa le tilweni ku sukela eku heleni ka Minkarhi ya Vamatiko hi 1914. Ku pfumelelana ni ku hlengeleta koloko ku vhumbiweke, ku xiyeka lembe ra 1935. Watch Tower Bible and Tract Society, leyi tirhisiwaka hi ntlawa wa “nandza,” hi nkarhi wolowo a yi ri ni tihofisi ta marhavi ta 49 emisaveni hinkwayo. Elembeni rolero mianakanyo ya “nandza” yi kongomisiwe eka vanhu lava fanaka ni tinyimpfu emisaveni, hi langutelo ro va hlengeleta etlhelweni ra xinene ra Hosi leyi fumaka, Yesu Kriste. Xisweswo, vanhu lava humaka ematikweni hinkwawo va nghene evuxakeni lebyikulu ni ntlawa wa “nandza.”

14. Hi ku ya hi Yohane 10:16, hi rihi langutelo lerintshwa leri tekiweke hi vanhu lavo lulama lava fanaka ni tinyimpfu, naswona i tihofisi tingani ta marhavi ya Sosayiti ya Watch Tower leti sweswi ti va tirhelaka?

¹⁴ Vanhu volavo vo lulama, lava fanaka ni tinyimpfu a va nga ha ta nyikiwa ku hambanisiwa lokukulu loku tolovelekeke tanihi “vanhu lava xi va tsakelaka.” (Luka 2:14) Kavula, a va nga ha ta langutiwa tanihi ntlawa lowu nga heriki, lowu nga hlelekangiki wa vanhu lava chavaka Xikwembu ematikweni hinkwawo—tinyimpfu leti lahlekeke. Yesu u vule leswaku a a ta hlengeleta “tinyimpfu tin’wana” kutani a ti endla “ntlhambi wun’we” ni masalela ya ntlawa wa “nandza.” (Yohane 10:16) Ku hlengeletiwa ka ‘tinyimpfu teto tin’wana’ ku sukela enkarhini wolowo ku ya emahlweni i xiphemu lexi hlawulekeke xa “xikombiso” lexi funghaka ‘makumu ya mafambiselo ya swilo.’ Naswona ku tirhela tona Sosayiti ya Watch Tower sweswi yi na tihofisi ta marhavi ta 95.

Xiendlo Lexi Faneleke Ehenhleni Ka “Xikombiso” Xi Hakeriwile

15. Leswaku ti ‘amukela Mfumo,’ i swilaveko swihi leswi “tinyimpfu” ti faneleke ku va na swona?

¹⁵ Hi ku ya hi xifaniso xa Yesu, “tinyimpfu” leto lulama ti fanele ku va ni swilaveko swo karhi enkarhini wa ‘makumu ya mafambiselo ya swilo.’ Ti fanele ku xiya ni ku tlangela ‘vamakwavo’ va Kriste va moya lava vumbaka ntlawa wa “nandza lowo tshembeka, Iowa vutlhari.” Nakambe “tinyimpfu” ti fanele ku endla swilo leswinene eka ntlawa wa “nandza,” hambi ku ri ku va endzela loko va khotsiwe hi tihanyi ekhotsweni. Leswi “tinyimpfu” ti fanele ku swi endla leswaku ti tiphina hi nkateko wa Tatana wa le tilweni ni leswaku Hosi Yesu Kriste a ti rhamba leswaku ti ‘amukela Mfumo lowu nga lunghiseriwa tona hi mpfhuka misava yi tumbuluka.’—Matewu 25:34.

16. Hi marito lama nge “amukelani Mfumo,” Hosi yi rhamba “tinyimpfu” ku nghenela yini, ti pona “nyimpi” yihi xana?

¹⁶ Leswi “tinyimpfu” leti ti nga riki vona ‘vamakwavo’ va Hosi va moya, a yi ti rhambi leswaku ti tshama eswiluvelweni swa le tilweni kutani ti fuma na yona eka malembe lama hlawulekeke ya gidi ya ku fuma ka yona. Hi marito yakwe lama nge “amukelani Mfumo,” u va rhamba ku nghena enguveni ya Mfumo endzhaku ka loko a herisile mimfumo hinkwayo ya vanhu lava nga chaviki Xikwembu va misava leyi eka ‘nyimpi ya siku lerikulu ra Xikwembu xa Matimba hinkwawo’ eHar-Magedon. (Nhlavutelo 16:13-16) Vo tala va vanhu lava fanaka ni tinyimpfu lava hanyaka sweswi va ta pona nyimpi yoleyo ya tinyimpi hinkwato kutani va nghena eMfun’weni wa Kriste wa Gidi ra Malembe handle ko fa.

17. Hosi yi vulavurisa ku yini ni “tinyimpfu,” naswona yi kume nchumu wo ti avela wona hi ndlela yihi?

¹⁷ Hikwalaho Hosi Yesu Kriste u vulavula hi “tinyimpfu” leti tanihi vana va yena lava nkarhi wa yena wu fikeke wa leswaku va nghena endzhakeni leyi humaka eka yena. Hi rifu rakwe tanihi munhu la hetisekeke ro nyikela gandzelo ra nkutsulo eka vanhu hinkwavo, u nyikele malangutelo hinkwawo yo tiphina hi Paradeyisi ya laha misaveni hi xiviri. (Luka 23:39-43) Emhakeni leyi Yesu, “Adamu lowo hetelela,” a nga fani na “munhu lowo rhanga Adamu” loyi a dyoheke kutani a lahlela rixaka ra yena hinkwaro Paradeyisi ya la misaveni. Xisweswo Yesu Kriste la pfuxiweke, loyi a vaka “Tatana la nga riki na ku Hela” wa misava hinkwayo leyi kutsuriweke ya vanhu, a a ri ni nchumu wo wu avela vanhu lava va fanaka ni tinyimpfu emisaveni. (1 Vakorinto 15:45; Esaya 9:6, 7) Ndyangu wa vanhu a wu seketeriwe eka “munhu lowo rhanga Adamu,” hi malangutelo ni minkarhi hinkwayo ya Paradeyisi ya yena. Kambe Paradeyisi yoleyo yi lahlekeke yi ta pfuxetiwa hi Mfumo wa Xikwembu emavokweni ya “Adamu lowo hetelela,” Yesu Kriste.

18. I langutelo rihi leri rifuwo ra Mfumo ri ‘lunghiseriweke [tinyimpfu] hi mpfhuka misava yi tumbuluka’ ha rona ke?

¹⁸ Hi le ndzhaku ka loko va humesiwile eParadeyisini yo sungula ntsena laha Adamu na Evha va sunguleke ku va ni vana. Jaha ra vona ra vumbirhi, Avele lowo lulama, u dlayiwe hi Kayini, jaha ra vona ro sungula. Hikwalaho Seta jaha ra vona a ri langutiwa tanihi leri tekaka xikhundla xa Avele. Eku tswariweni ka rixaka ro tano, misava ya vanhu yi endleriwe masungulo. Kambe emahlweni ka leswi, loko vatswari va misava ya vanhu va humesiwile eParadeyisini, Yehova Xikwembu u endle xitshembiso xakwe xa musa ehenhleni ka “rixaka” leri a ri ta phyandlasa, kumbe ku faya nhloko ya Nyoka yo fanekisela, Sathana Diyavulosi. “Rišaka” rolero a ku fanele ku va Rixaka ra le vuhosini, naswona leswi swi katsile Mfumo, hi ku ya hi xikongomelo ni xivono xo sungula xa Xikwembu. (Genesa 3:15) Hikwalaho ke, loko Sathana Nyoka ni rixaka ra yena va tshikisiwe ku tirha, vanhu lava kutsuriweke a va ta nghena eka rifuwo ra Mfumo emisaveni, ehansi ka hulumendhe ya le tilweni ya Rixaka leri hlulaka leri herisaka Nyoka ni rixaka ra yona. Hi ndlela leyi, “mfumo” lowu vanhu lava fanaka ni tinyimpfu va wu ‘amukelaka’ eka Tata wa vona la nga riki na ku Hela, Yesu Kriste, i rifuwo ra Mfumo leri ‘lunghiseriweke vona hi mpfhuka misava yi tumbuluka.’

19. I masungulo ya muxaka muni lawa mafambiselo ya swilo lama landzelaka Armagedoni ya nga ta va na wona emisaveni?

¹⁹ Leswi timbuti to fanekisela ti nga ta herisiwa hi ku lovisiwa eArmagedoni, “tinyimpfu” leti ponaka ti ta va ni masungulo layo lulama eka mafambiselo ya swilo lama landzelaka Armagedoni emisaveni ya Paradeyisi. Malunghana ni leswi Yesu u te: “Volavo [lava fanaka ni timbuti] va ta ya eku biweni loku nga heriki, kambe lavo lulama va ta ya evutomini lebyi nga heriki.”—Matewu 25:46.

20. Hi nga ku papalatisa ku yini ku hlamusela timhaka ta “xikombiso” hi ndlela leyi hoxeke?

²⁰ Enkarhini wa ‘makumu ya mafambiselo lawa ya swilo’ ku sukela eku heleni ka Minkarhi ya Vamatiko hi 1914, “tinyimpfu” ni “timbuti” ti hambana hi ndlela leyi ti hlamuselaka “xikombiso” xa “vukona” bya Yesu. Leswi handle ko kanakana hi nga enkarhini wa ku avanyisa, xivutiso lexi i xa nkoka lowukulu: “Xikombiso” xi vula yini eka hina? Loko xi tshikeriwe ku avanyisa ka hina vini, hi nga ha hlamusela timhaka ta “xikombiso” xexo hi ndlela leyi hoxeke. Hikwalaho hi endla khwatsi ku vutisa hi ku: Xana Yesu Kriste u vula yini lexi “xikombiso” lexi xa nhlengelo xi faneleke ku xi komba eka hina? Hi ku ya hi yena, xi fanele ku komba leswaku mafambiselo ya sweswi ya swilo ya ta hela ku nga ri khale eka ‘nhlomulo lowukulu’ lowu lovisaka swinene ku tlula Ndhambi ya misava hinkwayo ya siku ra Nowa.—Matewu 24:21.

21. (a) Hambi leswi ‘nhlomulo lowukulu’ wu nga emahlweni, hikwalaho ka yini hi fanele ku tsaka? (b) I nkarhi ni nkateko wihi lowu nga kona eka ntlawa wa “tinyimpfu” ta namuntlha?

²¹ Kambe ke, tsakani, hikuva “xikombiso” lexi xi tlhela xi komba leswaku ku Fuma ka Yesu Kriste ka Gidi ra malembe ku kusuhi, ku tiyimisele ku sungula endzhaku ka ku lovisiwa ka mafambiselo ya swilo ya Sathana emisaveni. (Luka 21:28) Hikwalaho ke, ehansi ka nsirhelelo wa le henhla u ni nkarhi lowu nga xaviwiki wo pona ‘nhlomulo wolowo lowukulu’ u nghena emafambiselweni lamantshwa ya swilo, laha ku lulama ku nga ta tshama kona hi masiku. Hakunene, nkateko wa ku nga fi ni kan’we kambe u hanya hi laha ku nga heriki kutani u katekisiwa eparadeyisini ya le misaveni ehansi ka vuhosi bya hinkwako-nkwako bya Yehova Xikwembu wu vekiwe emahlweni ka wena!

22. (a) Loko hi endla hi xihatla ni hi laha ku fanelaka ehenhleni ka “xikombiso,” hi ta endla yini xana? (b) Mayelana ni “xikombiso,” Yesu Kriste u ta kurisiwa hi ndlela yihi?

²² Manuku ke, hambi hi ‘vamakwavo’ va Kriste va moya kumbe “tinyimpfu” leto lulama, a hi endleni hi xihatla ni hi laha ku faneleke ehenhleni ka “xikombiso.” A hi veni ni xiphemu lexi engetelekeke eku hetisekeni ka mhaka ya xona leyikulu leyi nge: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.” Manuku hi nga ka hi nga chavi nchumu loko “makumu” ya fika. Ematshan’wini ya sweswo, ntsako wa hina wu ta pupuma! Kutani ke, Yesu Kriste u ta tlakusiwa tanihi muvhumbi la tshembekaka wa timhaka to tala ta ‘xikombiso . . . xa ku hela ka mafambiselo ya swilo.’—Matewu 24:3-25:46.

U Nga Hlamula Xana?

◻ Hi rini laha vanhu a va fanele ku hambanisiwa ku fana ni tinyimpfu na timbuti?

◻ U nga tsaka hi ku endla yini eku hetisekeni ka xifaniso xa Yesu xa tinyimpfu na timbuti?

◻ I vamani lava vumbaka ‘vamakwavo’ va Hosi ni “nandza lowo tshembeka, lowa vutihari” ke?

◻ Leswaku va ‘amukela Mfumo,’ vanhu lava fanaka ni tinyimpfu va fanele ku va ni swilaveko swihi?

◻ Xana hi ta endla yini loko hi endla hi xihatla ni hi laha ku fanelaka ehenhleni ka “xikombiso” xa “vukona” bya Yesu ke?

[Rito leri tshahiweke eka tluka 18]

Hatlisa u endla hi ku pfumelelana ni “xikombiso” xa “vukona” bya Yesu. Ku endla tano swi nga vula vutomi lebyi nga heriki eParadeyisini

[Xifaniso eka tluka 15]

Tanihi murisi loko a hambanisa tinyimpfu exikarhi ka timbuti hikwalaho Yesu Kriste u hambanisa vanhu namuntlha. Xana u munhu la fanaka ni nyimpfu ke?