Swivutiso Swa Vahlayi

◼ Loko Mukriste a nga swikoti ku va enkhubyeni wa Xilalelo xa Hosi u fanele ku endla yini xana?

I swa ntikelo leswaku Vakriste va va kona enkhubyeni wa lembe na lembe wa Xilalelo xa Hosi, hikuva Yesu loko a xi sungula u te: “Endlani leswi hi ku ndzi anakanya.” (Luka 22:19) Vakriste vo sungula va endle tano. Muapostola Pawulo xisweswo u swi kotile ku tsala hi ta vamakwerhu va le Korinto lava lembe na lembe ‘a va hlangana tanihi bandiha,’ kumbe ‘lava hlengeletaneke,’ hikwalaho ka Xitsundzuxo xa rifu ra gandzelo ra Yesu. (1 Vakorinto 11:20, The New English Bible; NW) Kambe xana a a va ta endla yini hi Xitsundzuxo eka swiyimo swo nonon’hwa ke? Hi xikombiso, Pawulo hi yexe u endle yini eka malembe lawa a khotsiwile (a rindziwile kumbexana ku bohiwa hi tinketani) eKhezariya?—Mintirho 23:35; 24:26, 27.

Hikwalaho ka xileriso lexi twalaka xa Yesu, hambi loko Pawulo a ri swakwe hi nkarhi wa Xilalelo xa Hosi, kunene ú fanele a pfuxetile timhaka ta Matsalwa ta xiendlakalo lexi. Hi ku va a ri Mukriste la totiweke hi moya, u fanele a endle matshalatshala wahi ni wahi leswaku a dya swilo leswi fanelaka, leswi a ta swi tirhisa ku va swifanekiselo. Vhinyo a a xi ri xakunwa lexi tolovelekeke enkarhini wolowo, hikwalaho ku nga khathariseki ku va a ri mubohiwa, Pawulo u fanele a vile ni vhinyo ni muxaka wa xinkwa lexi a xi fanele ku tirhisiwa. Sweswo swi vonaka swi kotekile ni loko endzhakunyana a pfaleriwile eRhoma, laha a pfumeleriweke ku va ni vaendzi. Kumbexana vamakwerhu van’wana va Rhoma va ringetile ku “hlengeletana’’ na yena hi ntlawa wuntsongo va tlangela Xilalelo xa Hosi.—Mintirho 28:30.

Emisaveni hinkwayo namuntlha, mabandlha ya Timbhoni ta Yehova ya hlengeletana hi siku leri yelanaka na Nisan 14 ya tlangela Xitsundzuxo xa rifu ra Kriste. Kambe minkarhi yin’wana swihinga leswi nga tolovelekangiki swa humelela. Nkarhi wun’wana, mabubutsa ya vukarhi kumbe tindhambi swi siverile bandiha, kumbe swin’wana swa swirho swa rona, ku hlangana kun’we hi laha ku lunghiseleriweke. Hi swin’welo, hi ku tirhisa masocha, nawu wa nyimpi wu siverile vaaki-ndhawu ku humela ehandle endzhaku ka ku pela ka dyambu. Vakriste van’wana a va swi kotanga ku va enkhubyeni wa bandlha hi ku va va ri exibedlhele kumbe va vabya swinene. Xana etimhakeni to tano ku nga endliwa yini?

Hambi loko swi fanela ku va bandlha hinkwaro ri hlangana eka xiendlo lexi xa nkoka, swiyimo swo tanihi leswi swi boxiweke laha henhla swi nga ha endla leswaku sweswo swi nga koteki. Loko maxele layo biha, khombo ra ntumbuluko, kumbe swo fana ni sweswo, hi ku helela swi siyela ndyangu kumbe xiyenge xa bandlha ku hlangana ni bandlha, lava va nga voxe va nga ha hlangana kun’we ivi va vulavula hi timhaka ta Matsalwa to tanihi leti ti kumekaka eka Luka 22:7-23, 28-30 ni le ka 1 Vakorinto 11:20-31, kun’we ni ku vulavula hi nhlamuselo ya xiendlakalo lexi. Hi mukhuva lowu fanaka, loko nkarhi lowu vekiweke wo sivela ku famba-famba wu endla swi nga koteki leswaku bandlha ri hlangana hi vusiku lebyi fanelaka, ku hlangana eka mintlawa ya Dyondzo ya Buku ya Bandlha kumbe mintlawa leyi nga kusuhi swi nga ha va leswi fanelaka, nhlayo ya lava va nga kona yi tirha tanihi lava va veke kona va bandlha. Nkulumo yo koma yi nga ha nyikeriwa loko ku ri na makwerhu wa xinuna la tinyiketeke eka ntlawa wolowo. A ku fanelanga ku va ni ku vaviseka hi mhaka ya leswi swifanekiselo leswi faneleke swi nga riki kona ntsendze loko exivandleni xexo ku ri hava loyi eku sunguleni a dyeke xinkwa ni ku nwa vhinyo tanihi Mukriste la totiweke. Nawu wa Xikwembu eka Israyele a wu ri na lunghiselelo leri hlawulekeke ra munhu loya a nga swi koti ku hlanganyela eka swakudya swa Paseka ya nkarhi na nkarhi; munhu wa kona a a swi kota ku endla tano ku hundzile n’hweti (masiku ya 30). (Tinhlayo 9:10, 11; 2 Tikronika 30:1-3, 15) Hi xiringaniso, eka xiyimo lexo biha laha Muisrayele wa moya loyi hi ku helela a nga swi kotiki ku va kona kumbe ku nyikiwa swifanekiselo hi Nisan 14, a a ta swi dya ku hundzile masiku ya 30. Leswi a swi ta tirha ntsena emhakeni ya Mukriste la totiweke la lerisiwaka ku dya xinkwa ni ku nwa vhinyo.—Vagalatiya 6:16.

Hi April 4, 1985, loko ri perile, mabandlha ya Vakriste va ntiyiso emisaveni hinkwayo ma ta hlengeletana ku hlayisa xileriso xa Yesu lexi nge: “Swi endleni hi ku ndzi anakanya.” Hi ku rhambela ku hlengeletana na vona.—1 Vakorinto 11:25.