“Tinyimpfu Tin’wana” Ni Xilalelo Xa Hosi”

“[Yesu] hi yena mhamba ya swidyoho swa hina, na swona ku nga ri ya swidyoho swa hina ntsena, kambe ni swa misava hinkwayo.”—1 YOHANE 2:2.

1. I vuyelo byihi lebyinene lebyi vangiweke hi ‘ku chumayeriwa ka mahungu lamanene ya mfumo’ xana?

YESU u te: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Van’wana va rixaka ra 1914 va ha hanya leswaku va ta tiyisa leswaku Timbhoni ta Yehova hi ku tshembeka ti hetisisile xileriso lexi. Hikwalaho ka sweswo, madzana ya magidi ya vanhu va timbilu letinene, hi ku hetiwa matimba hi ku hluleka ka misava leyi, va amukerile mahungu lamanene. Va tinyiketile eka Yehova Xikwembu ivi va tikarhatela Mfumo wa yena, va kombisa ku tinyiketa loku hi nkhuvulo wa mati. A ku ri na 179 421 wa lava va tekeke ndlela yo tano ya vutlhari hi 1984. Hi ndlela yoleyo, va byele vanhu va vito ra Xikwembu va ku: “Hi ta ya na n’wina, hikuva hi twile leŝaku Yehova o na n’wina.”—Zakaria 8:23.

2. I mhaka yihi leyi lawuleke nkarhi wa leswaku Yesu a hlengeleta “tinyimpfu tin’wana” ta yena?

² “Ntshungu lowukulu” lowu tshamelaka ku kula wa vagandzeri i xiphemu xa lava va hlamuseriwaka hi Yesu tanihi “tinyimpfu tin’wana” ta yena. (Nhlavutelo 7:9, 15; Yohane 10:16) Va ni ntshembo lowunene wa ku hanya hi masiku eparadeyisini ya la misaveni. (Psalma 37:29) Yesu u vhumbe leswaku a a ta hlengeleta valandzeri lava vo tshembeka va yena loko a sungule a yisa miehleketo yakwe ya vurisi leyi nga avanangiki eku hlengeleteni ka “ntlhambinyana” wa lava fanaka ni tinyimpfu lava a hlanganisaka ntwanano lowuntshwa hikwalaho ka vona. (Luka 12:32; Vaheveru 9:15) Hi ku anakanya hi ta ku hlengeletiwa ka mintlawa leyi mimbirhi ya vanhu lava fanaka ni tinyimpfu va va “ntlhambi wun’we,” hi nga twisisa leswaku hikwalaho ka yini muapostola Yohane a vule leswaku Yesu Kriste i “mhamba ya swidyoho swa hina, na swona ku nga ri ya swidyoho swa hina ntsena, kambe ni swa misava hinkwayo.”—1 Yohane 2:1, 2.

Ku Cinca Ka Malangutelo

3, 4. (a) I malangutelo wahi lama hundzukeke lawa vo tala va veke na wona malunghana ni ku tlangeriwa ka Xilalelo xa Hosi? (b) Xana Pawulo a vula yini loko a ku, “Hikuva minkarhi hinkwayo loko mi dya . . . ni loko mi nwela exinwelweni lexi”?

³ Vunyingi bya lava va ha ku hlengeletiwaka va “tinyimpfu tin’wana” a va tolovele ku endla nkhuvo wa Xilalelo, lowu mpimo ni maendlelo ya wona a swi lawuriwa hi leswi pfumeriwaka hi nhlengeletano ya vukhongeri byo karhi lebyi a va ri eka byona. Hambi swi ri tano, sweswi va swi xiya leswaku Xilalelo xa Hosi xi fanele ku tlangeriwa kan’we ntsena hi lembe. Hikwalaho ka yini swi ri tano? Kavula, Paseka ya Vayuda a yi tlangeriwa kan’we ntsena hi lembe, naswona Yesu u sungule Xitsundzuxo hi vusiku byebyo bya Paseka, hi Nisan 14. Manuku u byele vadyondzisiwa vakwe a ku: “Endlani sweswo hi ku ndzi anakanya.” Pawulo wa engetela: “Hikuva minkarhi hinkwayo loko mi dya xinkwa lexi, ni loko mi nwela exinwelweni lexi, mi vula rifu ra Hosi, yi kondza yi fika.” (1 Vakorinto 11:24-26) Kahlekahle Yesu a a vula leswaku vadyondzisiwa va yena va fanele ku tshama va ri karhi va tlangela rifu rakwe hi Siku ra Paseka, leri a ri ta kan’we hi lembe. Hikwalaho ke, ri tshame ri ri karhi ri tlangeriwa “minkarhi hinkwayo” eka matimu hinkwawo ya bandlha ra Vukriste. Entiyisweni, Xilalelo xi se xi tlangeriwe ka 1 952.

⁴ Ku ni ku hambana kun’wana ka nkoka ka malangutelo loku ntlawa wa “tinyimpfu tin’wana” wu sunguleke ku ku twisisa. Ematshan’weni ya ku dya xinkwa ni ku nwa vhinyo hi laha vanyingi va swi endleke eku sunguleni ekerekeni, sweswi va kuma leswaku xiyimo xa vona xi ‘lulamisiwile’ va va vahlaleri. Ha yini swi ri tano, naswona hi ni vuseketeri bya Matsalwa bya endlelo leri pfumelelaka vahlaleri kun’we ni lava dyaka xana?—2 Vakorinto 13:11; 2 Timotiya 3:16, 17.

5. (a) Hlamusela magoza yo sungula lawa munhu a faneleke ku ma teka leswaku a pfuneka hi gandzelo ra Yesu. (b) Hikwalaho ka yini Xikwembu xi endle hi ndlela leyi hlawulekeke hikwalaho ka valandzeri va Kriste Yesu va 144 000?

⁵ Leswaku munhu a pfuneka hi “mhamba” ya Kriste Yesu, ku ni magoza yo karhi lama faneleke ku tekiwa, ku nga khathariseki leswaku munhu yoloye u ni ntshembo wa vutomi etilweni kumbe u ni ntshembo wa vutomi eParadeyisini ya la misaveni. Magoza lawa ya masungulo ya yimise xileswi: (1) ku kuma vutivi lebyinene bya Rito ra Xikwembu (Varhoma 10:13-15); (2) ku tirhisa ripfumelo (Vaheveru 11:6); (3) ku tisola (Matewu 4:17, NW); (4) ku hundzuka (Mintirho 3:19); (5) ku tinyiketa (Luka 9:23); ni (6) nkhuvulo (Matewu 28:19). Endzhaku ka magoza lawa hi kona Xikwembu xi endlaka hi ndlela leyi hlawulekeke eka munhu loyi xi n’wi hlawulelaka ku va un’wana wa lava va 144 000, kumbe “ntlhambinyana.” Hikwalaho ka xikongomelo xihi ke? Leswaku munhu wa kona a va n’wana wa Xikwembu wa moya la rindzeleke ku va muprista ni ku va hosi kun’we na Kriste Yesu. (Nhlavutelo 20:4, 6) Ku na masalela ntsena ya vana vo tano va moya lawa ya hanyaka sweswi, futhi vona lava hi vona lava dyaka swifanekiselo hi mukhuva lowunene. Kutani leswi swi vangela leswaku vunyingi lebyikulu bya Timbhoni ta Yehova byi va vahlaleri hayi lava dyaka.

Paseka Ni Xitsundzuxo

6. Hikwalaho ka yini van’wana va sindzisele leswaku “tinyimpfu tin’wana” ti fanele ku dya swifanekiselo, kutani i xivutiso xihi lexi leswi swi xi pfuxaka?

⁶ Van’wana va anakanye leswaku nhlayo leyi kulaka ya “tinyimpfu tin’wana” a yi fanele yi dya swifanekiselo. Va ri: Leswi “nawu wu nga ndzhuti ntsena wa leswo saseka leswi nga ta humelela,” ni leswi xin’wana xa swilaveko swa Nawu a ku ri ku hlayisa Paseka hi Vaisrayele kun’we ni valuveri lava yimbeke, leswi swi vula leswaku mintlawa ha mimbirhi ya lava fanaka ni tinyimpfu ya “ntlhambi wun’we” ehansi ka “murisi un’we” a yi fanele ku hlanganyela eswifanekiselweni swa Xitsundzuxo. (Vaheveru 10:1; Yohane 10:16; Tinhlayo 9:14) Leswi swi pfuxa xivutiso xa nkoka: Xana Paseka a yi fana ni Xitsundzuxo ke?

7. Hi le timhakeni tihi laha Paseka a yi ri “ndzhuti ntsena wa leswo saseka leswi nga ta humelela” ke?

⁷ I ntiyiso leswaku timhaka tin’wana ta ku tlangeriwa ka Paseka aEgipta handle ko tipfinyinga ti hetisekile eka Yesu. Pawulo u fanisa Yesu ni xinyimpfana xa Paseka, a ku, “Kriste, la nga xinyimpfana xa hina xa Paseka, u tlhaviwile.” (1 Vakorinto 5:7)

Ku haxiwa ka ngati ya xinyimpfana xa Paseka emarimbeni ya timbanti ku tiyise ku ponisiwa ka mativula emutini wun’wana ni wun’wana wa Vaisrayele. Hi ku fanana, ku ve hi ku haxiwa ka ngati ya Kriste laha ‘nhlengeletano ya va mativula lava tsariweke etilweni’ va kumaka ku ponisiwa, kumbe ku “kutsuriwa.” (Vaheveru 12:23, 24; Vaefesa 1:3, 7) Nakambe, a ku nga ri na rhambu ra xinyimpfana xa Paseka leri a ri fanele ku tshoviwa, naswona leswi swi tlhele swi hetiseka eka Kriste Yesu. (Eksoda 12:46; Psalma 34:20; Yohane 19:36) Hikwalaho ke, i ntiyiso ku vula leswaku Paseka, etimhakeni tin’wana, a yi ri yin’wana ya timhaka to tala ta Nawu leti endlaka “ndzhuti ntsena wa leswo saseka leswi nga ta humelela.” Timhaka leti hinkwato a a ti kombetela eka Kriste Yesu, “Xinyimpfana xa Xikwembu.”—Yohane 1:29.

8-10. (a) Hi le mhakeni yihi ya nkoka malunghana ni ngati laha Paseka yi hambanaka ni Xitsundzuxo xana? (b) Xana mintwanano leyi yelanaka ni Xitsundzuxo yi humesa ku hambana kun’wana hi ndlela yihi? (c) Leswi swi hi yisa eka makumu wahi-ke?

⁸ Hambi swi ri tano, Paseka a yi nga fani swinene-nene ni Xilalelo xa Hosi. Ha yini swi nga ri tano xana? Loko Paseka yi sunguriwa aEgipta, a ku dyiwa nyama ya xinyimpfana lexi oxiweke, kambe ku hava ngati ya xinyimpfana xa Paseka leyi a yi dyiwa. Kambe hi laha ku hambanaka, loko Yesu a sungurile Xitsundzuxo xa rifu rakwe hi ku hlawuleka u lerisile lava a va ri kona kwalaho ku dya nyama ya yena ni ku nwa ngati yakwe, leswi fanekiseriweke hi xinkwa ni vhinyo. (Eksoda 12:7, 8; Matewu 26:27, 28) Emhakeni leyi ya nkoka ni ntikelo—ya ngati—Paseka a yi nga fani na Xilalelo xa Hosi.

⁹ Ku na swin’wana leswi nga fanelangiki ku honisiwa. Yesu u vulavule ni vadyondzisiwa va yena hi mintwanano mimbirhi leyi fambisanaka, “ntwanano lowuntshwa” ni ‘ntwanano wa mfumo.’ (Luka 22:20, 28-30) Ha mimbirhi ka yona mintwanano leyi yi komba leswaku lava dyaka va ta va vaprista ni tihosi kun’we na Kriste Yesu. Kambe alsrayele ku hava muluveri la yimbisiweke loyi a ta pfuka a vile muprista kumbe hosi. Ni le mhakeni leyi, hi vona ku hambana ka nkhuvo wa Paseka alsrayele ni Xilalelo xa Hosi.

¹⁰ Hikwalaho leswi swi hi yisa eka makumu wahi ke? Mhaka ya leswaku muluveri la yimbisiweke u dyile xinkwa lexi nga hava comela, timitsu to hava, ni xinyimpfana xa Paseka a yi tiyisi leswaku lava va “tinyimpfu tin’wana” ta Hosi namuntlha lava va nga kona eXitsundzuxweni va fanele ku hlanganyela eka xinkwa ni le ka vhinyo.

Nkoka Wa Ku Va Kona eXitsundzuxweni

11. Ku hikwalaho ka swivangelo swihi swa nkoka “tinyimpfu tin’wana” ti faneleke ku va kona eXitsundzuxweni?

¹¹ Hambi swi ri tano, xana leswi swi komba leswaku a hi swa nkoka eka lava va ntlawa wa “tinyimpfu tin’wana” ku va kona eku tlangeriweni ka Xitsundzuxo ke? A swi tano! Lexi i xiendlo xa valandzeri va Yesu lava fanaka ni tinyimpfu ku tsundzuka Yesu hi ndlela yo hlawuleka. “Tinyimpfu tin’wana” eka xiendlo xexo ta tsundzuka leswaku ana se ti vuyeriwile hikwalaho ka ripfumelo ra tona engatini leyi halatiweke ya Kriste lerova va kala va langutiwa hi Yehova tanihi lava ‘hlantsweke tinguvu ta vona ni ku ti basisa hi ngati ya Xinyimpfana.’ Leswi hi swona swi endlaka leswaku va swi kota ku nyikela ‘vutirheli lebyi hlawulekeke vusiku ni nhlikanhi etempeleni [ya Xikwembu].’ (Nhlavutelo 7:14, 15) Nakambe va tsundzuka leswaku va fanele ku tshama va ri karhi va ‘lava Yehova, ku lulama, ni ku titsongahata’ va ri ni ntshembo wo hlayisiwa “e sikwini ra v̌ukari bya Yehova,” kutani endzhaku ka sweswo va va ni ntsako wa ku kuma ku hetiseka ka vumunhu. Xo hetelela va nga swi kota ku vuriwa lava lulameke hakunene hi Yehova, leswi nga ta endleka endzhaku ka loko Yesu a tlherisele Mfumo eka Tata wa yena.—Sofonia 2:2, 3; 1 Vakorinto 15:24; Nhlavutelo 20:5.

12. I vuyelo byihi byi vangiwaka hi ku yingisa nkulumo ya Xitsundzuxo xana?

¹² Xivangelo xin’wana xa nkoka xa ku va kona hi leswi mintiyiso leyi hlamuseriwaka enkarhini wa nkulumo ya Xitsundzuxo yi nga exikarhi ka “swihundla leswi enteke swa Xikwembu,” ‘swakudya leswi tiyeke leswi nga swa lava kuleke,’ hayi ntswamba wa “tidyondzo leto sungula.” (1 Vakorinto 2:10; Vaheveru 5:13-6:1) Nkulumo ya Matsalwa yi ta entisa ku tlangeriwa ka rirhandzu ra Yehova leri kombisiweke eku yimisiweni ka lunghiselelo ro tano ro hlamarisa ra Mfumo ro katekisa ndyangu wa vanhu. Nakambe i nkarhi wo ‘languta swinene-nene eka Yesu, Musunguri ni Muhetisisi wa ku pfumela ka hina.’ Rirhandzu leri Yesu a ri kombiseke hikwalaho ka hina, kumbe ku xaniseka loku a ku tweke, a swi fanelanga ni kan’we swi tekeriwa ehansi. (Vaheveru 12:2, 3) Ku ya emahlweni, hinkwerhu hi nga pfumela leswaku timhaka to tala leti vangamaka leti Yesu a vulavuleke ha tona ni vaapostola vakwe loko a simeka Xitsundzuxo—timhaka leti yelanaka ni vun’we, rirhandzu, ni ku kwetsimisiwa ka vito ra Yehova—ti nga averiwa van’wana hi “tinyimpfu tin’wana” kun’we ni “ntlhambinyana.”

Ku Kombisa Ku Khathalela Ka Rirhandzu Eka Hinkwavo

13. Hikwalaho ka yini swi ri swa ntikelo ku va swifanekiselo swi yisiwa eka hinkwavo lava nga kona?

¹³ I swa nkoka leswaku un’wana ni un’wana la nga kona eka Xilalelo xa Hosi a tsundzuxiwa hi ta endlelo leri simekiweke hi Yesu. Ku fambisiwa kunene ka xinkwa ni vhinyo hi munhu ni munhu swi pfuna ku entisa ku tlangeriwa ka swilo leswo kwetsima leswi swa ha ku hlamuseriwaka madyambu wolawo. Nakambe swi endla leswaku un’wana ni un’wana a ya emahlweni a swi teka tanihi leswi kombisaka leswi ku langutela ka yena ka vutomi ku nga swona—ka le tilweni kumbe ka la misaveni.a Ku landzela endlelo lerinene swi endla leswaku bandlha ri pfumelelana ni leswi endliwaka emisaveni hinkwayo emadyambyini wolawo.—1 Vakorinto 14:40.

14. Xana vakulu va nga kombisa ku khathalela ka rirhandzu eka un’wana wa vatotiwa la vabyaka hi madyambu wolawo ya Xitsundzuxo hi ndlela yihi?

¹⁴ A hi nge un’wana wa vatotiwa ebandlheni wa vabya kutani a nga swi koti ku va kona eXitsundzuxweni. Ku endliwa yini manuku xana? Matshalatshala hinkwawo ma fanele ku endliwa ku vona leswaku un’wana wa vakulu u yisa swifanekiselo eka Mukriste yoloye a vabyaka nakona, loko swi fanela, nkulu loyi a nga nyikela tinhlamuselo ti nga ri tingani leti fanelaka emahlweni ko nyikela swifanekiselo ivi a pfala hi xikhongelo lexi fanelaka. Munhu la vabyaka u ta titwa a khutazekile swinene! Swiendlo swo tano swa ku khathalela ka rirhandzu swi kurisa moya wa rirhandzu ebandlheni. (Nakambe vona tluka 31.)—Psalma 133:1.

15. Hlamusela tindlela tin’wana leti ha tona xichavo xi nga kombisiwaka eka Xilalelo xa Hosi.

¹⁵ Swivutiso swin’wana leswi tsakisaka swi vutisiwile ehenhleni ka maendlelo ni muxaka wa swifanekiselo leswi faneleke ku tirhisiwa eXitsundzuxweni. Tinhlamulo ta swivutiso leswi ti ta kumeka eka tluka 29 emhakeni leyi nge “Ku Kombisa Xichavo Eka Xilalelo Xa Hosi.” Vakulu lava nga ni vutihlamuleri va ta endla swinene ku landzela leswi xaxametiweke kwalaho hi vukheta.

Xilaveko Xo Tikambela

16, 17. (a) I xivutiso xihi lexi van’wana va xi vutiseke ehenhleni ka ku hlanganyela eXitsundzuxweni, naswona i mani loyi ntsena a nga hlamulaka? (b) Xana Xikwembu xi byi nyikerisa ku yini vumbhoni lebyi khorwisaka eka lava va tswariweke hi moya wa xona?

¹⁶ Ku ni van’wana lava kingindziwaka hi mapfalo hi leswi va kanakanaka loko ku ri leswaku swa fanela ku va va dya swifanekiselo. Xivutiso lexi minkarhi yin’wana xi humelela ku lo sala mavhikinyana ku nga si endliwa nkhuvo wun’wana wa Xilalelo xa Hosi. Nkarhi na nkarhi swivutiso swo tano swi vutisiwa hi van’wana lava va ha ku sungulaka ku hlanganyela ni Timbhoni ta Yehova. Xana u wun’wana loyi ku kanakana ka muxaka lowu ku fikeke emianakanyweni ya yena? U nga yi vonisa ku yini ndlela leyinene yo yi landzela xana?

¹⁷ Mayelana ni Xilalelo xa Hosi Pawulo u tsundzuxile a ku: “Munhu u fanele ku rhanga hi ku tikambela, ku va kona a nga ta dya xinkwa lexi ni ku nwela exinwelweni lexi.” (1 Vakorinto 11:28, 29) Xana u swi xiyile leswaku Pawulo u vula leswaku hi wena loyi a faneleke ‘ku tikambela’ xana? Kavula, a swi hoxanga ku vulavula hi mhaka leyi yikulu ni Mukriste la vupfeke, kambe wena u ri wexe u fanele ku kumisisa vuxaka bya wena bya xiviri na Yehova ni N’wana wakwe. A nga kona munhu wa lava va 144 000 loyi Xikwembu xi n’wi tshikaka a ri eku kanakaneni. Ha tiyisekisiwa: “Moya lowu wu yima ni mimoya ya hina ku tiyisa leswaku hi vana va Xikwembu.” I moya wa Xikwembu lowu tirhaka embilwini ya xirho xin’wana ni xin’wana xa miri wa Kriste leswaku xi ta va un’wana wa vana va Xikwembu va moya. La hlawuriweke wa swi tiva leswi futhi a nga fanelanga ku vutisa un’wana ebandlheni leswaku a va yena a tiyisaka.—Varhoma 8:15, 16.

18. I mintiyiso yihi ya matimu malunghana ni “tinyimpfu tin’wana” yi nga leyi tsakisaka eka hina xana?

¹⁸ Matimu ya manguva lawa ya Timbhoni ta Yehova ya komba leswaku ku sukela hi 1931 miehleketo yo tala yi sungule ku yisiwa eka “tinyimpfu tin’wana” hi mahungu ya Mfumo. Kutani hi May 31, 1935, hi ku nyikeriwa ka nkulumo leyi nge “Vunyingi Lebyikulu,”b “ntshungu lowukulu” lowu muapostola Yohane a wu voneke exivonweni wu hlamuseriwe kahle tanihi “tinyimpfu tin’wana.” Xana ku kandziyisiwa loku kuntshwa ku kombise yini ke? Hi leswaku kunene ku hlengeletiwa ka “ntlhambinyana” a ku ya eku heleni naswona nkarhi a wu fikile wa leswaku Yesu, hi vulawuri byakwe bya “nandza lowo tshembeka, lowa vutlhari,” a hundzuluxela miehleketo yakwe eku hlengeletiweni ka “tinyimpfu tin’wana.”—Matewu 24:45-47.

19. I ku tikambela kwihi ka munhu hi xiyexe ku nga vaka lokunene eka lavantshwa lava va vulaka leswaku i vatotiwa?

¹⁹ Hi ku anakanya leswi hi hundzeke eka swona, hi byela hinkwavo lava va ha ku hlanganyelaka ni vanhu va Yehova sweswinyana ni lava va nga ha vaka va tivule ku va van’wana va ntlawa wa vatotiwa hi ri: Kambisisa vuxaka bya wena na Yehova hi vukheta. Tivutise, Xana ntshembo wa le tilweni lowu ndzi nge ndzi na wona hi ndlela yo karhi i xikhomela-ndzhawu xa dyondzo ya kereke leyi a ndzi ri na yona ya leswaku swirho hinkwaswo swa kereke swi ya etilweni-ke? Xana ntshembo wa mina hi ndlela yo karhi wu hlangana ni ku navela ka vutianakanyi kumbe nyanyuko? Pawulo u te: “A swi endleki leswaku Xikwembu xi hemba.” (Vaheveru 6:18, NW) Hambi wu ri moya lowo kwetsima lowu wu hi yimelelaka a wu hembi. Hikwalaho ke, mani na mani loyi hakunene a tswariweke hi moya wa Xikwembu a nga tshameli ku kavanyetiwa hi mikanakano kambe wa swi kota ku tiyisa hi ripfalo hinkwaro lerinene leswaku hi un’wana wa vana va Xikwembu.

Ku Tlangela Hi 1985

20. Xana Xitsundzuxo i xa nkoka wo tanihi kwihi eka Timbhoni ta Yehova?

²⁰ Xilalelo xa Hosi, handle ko tilumaluma, i nkhuvo lowukulu wa lembe eka Vakriste hinkwavo va ntiyiso. Ku hava xiendlo xin’wana lexi nga ni nkoka, xikongomelo kumbe maendlelo yo fana na xona. Hikwalaho ke, loko misava yi ri karhi yi rhendzeleka eka asi ya yona, yi endla leswaku dyambu ri ya ri nyokovela evugima-musi bya misava, bandlha rin’wana ni rin’wana ra Timbhoni ta Yehova, lerikulu ni lerintsongo hi ku fanana, ni ntlawa wun’wana ni wun’wana lowu nga ekule wu ta hlengeletana hi ku xixima xileriso xa N’wini wa vona.

21. I malangutelo ni ku rindzela kwihi leswi Xitsundzuxo xa 1985 xi faneleke ku swi pfuxa etimbilwini ta vanhu va Xikwembu?

²¹ Vadyondzisiwa hinkwavo lava fanaka ni tinyimpfu hikwalaho va tsakisisa hi ku langutela ka ku hlanganyela kun’we eka nkhuvo wun’wana wa Xitsundzuxo. Onge xiendlakalo xa lembe leri xi nga tikombisa wu ri nkarhi wa xikhutazo lexi akaka malandza hinkwawo ya Yehova. Onge xi nga nghenisa ni le ka vona emoya wa ntshembo lowu fanaka ni lowuya wa Ntila wa vona, Yesu Kriste, la nga te: “Tiyani timbilu, ndzi hlurile misava!”—Yohane 16:33

[Minhlayo ya lehansi]

Xana Wa Tsundzuka—

◻ Hikwalaho ka yini Paseka yi nga fani na Xitsundzuxo?

◻ I magoza wahi ya ntsevu ma faneleke ku tekiwa emahlweni ka ku pfuneka hi gandzelo ra Yesu xana?

◻ Hikwalaho ka yini vukona bya wena eXitsundzuxweni byi ri bya nkoka?

◻ Hikwalaho ka yini ku tikambela emahlweni ka Xitsundzuxo swi ri leswi pfunaka?

[Bokisi eka tluka 29]

Ku Kombisa Xichavo Eka Xilalelo Xa Hosi

Swifanekiselo leswi faneleke ku Tirhisiwa

Xnkwa lexi pfumalaka comela: Xinkwa, lexi fanaka ni xinkwa xa Vayuda lexi nga lungiwangiki xa Paseka (matzoth) lexi endliweke ntsens hi mapa ya Koroni na mati xi nga tirhisiwa. Mi nga tirhisi xinkwa lexi cheriweke swichelachelani swo tani hi munyu, chukela, swivirisi, matandza kumbe tinyala. Mi nga tiendlela xikwa xa n’wina lexi nga hava comela hi ku tirhisa maendlelo lama landzelaka: Hlanganisa khapi yin’we na hafu ya mapa ya koroni (loko ya pfumaleka, tirhisa mapa ya rheyisi kumbe ya tindzoho tin’wana ni tin’wana) ni khapi yin’we ya mati, u endla mbila leyi tiyeke. Kutani u andlala mbila leyi yi va xiphepherhele xo lala. Yi veki epanini yo bakela eka yona ivi hi ku ntshuxeka u yi boxetela swi mbovani. U yi veka eka ovheni leyi hisaka ku kondza yi va khekherhele.

Vhinyo: Tirhisa vhinyo yo tshwuka ya madirivhe leyi nga hlanganisiwangiki na nchumu yo tanihi Chianti, Burgundy, kumbe leyi vitaniwaka claret. Papalatani tivhinyo ta le makwandzasini leti nandzihisiweke kumbe ku hlanganisiwa ni brandi, to tanihi sherry, port kumbe mascatel. Mi nga tirhisi vhinyo leyi nga na swichelachelani kumbe leyi hlanganisiweke ni timitsu, tanihi Dubonnet ni tivhinyo tin’wana leti nwiwaka emahlweni ka swakudya. Vhinyo leyi endliwaka ekaya na yona yi nga tirhisiwa loko yi cheriwanga chukele, ku lungiwa kumbe ku nandzihisiwa.

Ku Lunghiselela Holo Ya Mfumo

Tafula ra swifanekiselo: Funengetani tafula hi nceka wa tafula lowu baseke, miva ni tipuleti ni tinghilazi leti ringaneke ta vhinyo to ringana leswaku tita tirha kahle. Xinkwa xi nga ha tshoviwa ni vhinyo yi cheleteriwa etinghilazini nhlangano lowu wu nga si sunguriwa. Yesu a nga simekanga mukhuva wokarhi ehenhleni ka mhaka leyi.Loko swi laveka, funengetani swifanekiselo hi lapi leri baseke ku sivela swimbvenene.

Vatirhi: Va lerisiwa ka hari nkarhi ehenhleni ka maendlelo lama fanelaka ku landzeleriwa ku papalata ku hlwela kumbe mpfilumpfilu eku nyikeleni ka swifanekiselo eka hinkwavo lava nga kona, ku katsa ni swivulavuri na vatirhi.

Valanguteri: Ku fanele ku va ni valanguteri lava ringaneke kahle ku nga si sunguriwa nhlangano lowu leswaku hinkwavo va ta amukeriwa hi malwandla loko va fika ni kuva komba ndhawu yo tshama.

Nkhaviso wa swiluva: Leswi swi nga endliwa, kambe swi va leswi olovaka swi tlhela swi saseka.

Maendlelo ya Nhlangano Lowu

Nkarhi wa nkhuvo: Hambileswi nkulumo yi nga ha sunguriwaka hi xihatla, swifanekiselo a swifanelanga swi fambisiwa ku kondza loko dyambu riperile. Swi ta voniwa endhawini yoleyo leswaku hi April 4 dyambu riva riperile hi nkarhi muni.

Nkulumo ya Xitsundzuxo: Xivulavuri xi fanele xi lunghiselela kahle leswaku xi ta kota ku nyikela mhaka leyi ya xona hi nkarhi lowu vekiweke. Yi fanele yi nyikeriwa hi ku twakala yi tlhela yi khutaza eka hinkwavo lava nga kona.

[Xifaniso eka tluka 27]

Xitsundzuxo xi entisa rirhandzu ra Yehova ni N’wana wakwe