Titolovete Ku Va Mukhongeri

“Titolovete ku va mukhongeri.”—1 TIMOTIYA 4:7.

1. Hikwalaho ka yini xitsutsumi xin’wana lexinene xi tsandzekile ku hlula?

A RI xitsutsumi xo antswa xa ntlawa eka xiendlakalo xakwe. Ku hlula ko sungula ku n’wi endle nghwazi ya tiko. Hikwalaho a ku languteriwe leswaku a a ta hlula eka mphikizano lowu wo hlawuleka wo tsutsuma. Kambe ke, ku nyumisa muleteri wa yena, switsutsumi-kulobye, na yena n’wini, u tsutsume hi ndlela leyi tluriwaka hi mimphikizano hinkwayo ya vutomi byakwe. Ha yini xana? “Ndzi lolohe ku titoloveta naswona ndzi tshike ku titoloveta hi matimba,” ku vula wansati lontshwa, a khomiwe hi tingana swinene. “Muleteri wa mina u ringete ku ndzi susumetela ku endla hi matimba ivi a ndzi tsundzuxa, kambe a ndzi yingisanga.” Ku hluleka ka yena ku titoloveta khwatsi swi n’wi tekele ku hlula loku a a tiyimisele kona.

2. Vakriste va fanele ku titoloveta hi ndlela yihi, naswona hikwalaho ka yini hinkwavo va fanele ku lava ku tiva leswaku hi ndlela yihi?

² Tanihi Mukriste, ngopfu-ngopfu loko wa ha ri lontshwa, na wena u ni ku titoloveta ka nkoka. “Titolovete ku va mukhongeri.” (1 Timotiya 4:7) Rito ra Xigriki ra ku “titoloveta” (gy·mnaʹzo) ri hlamusele matimba lamakulu ni ku titoloveta loku hakanyingi switsutsumi swi ku endleke erivaleni ro tsutsumela eka rona. Hikwalaho ke, malunghana ni vukhongeri ni vuyelo bya kona, muapostola Pawulo u engeterile a ku: “Hi tirha swinene ni ku tikarhatela swona leswi.” (1 Timotiya 4:10) Mfanelo leyi ya nkoka a hi nchumu lowu wu ngo titela hi ntumbuluko kumbe lowu humaka eka vatswari lava chavaka Xikwembu. Kambe hi wahi magoza lawa u faneleke ku ma teka ke? Vakriste va malembe hinkwawo va fanele ku lava ku tiva.

Vuxaka Lebyinene Ni Xikwembu

3. (a) Hikwalaho ka yini dyondzo ya munhu hi xiyexe yi ri ya nkoka swinene? (b) Hi tihi timfanelo ta Xikwembu leti ku tshinetaka ekusuhi na xona?

³ Leswi vukhongeri byi katsaka ku tlangela loku humaka embilwini ka timfanelo ta Yehova, u fanele ku tiva leswi a nga xiswona hakunene. Yehova u hlamusela leswi eBibeleni. Kambe u fanele ku dyondza Rito ra yena hi vukheta ni tibuku leti seketeriweke eBibeleni, kwalaho u va “la undliweke emaritweni ya vupfumeri ni ya tidyondzo letinene.” (1 Timotiya 4:6) Dyondzo yo tano yi ta ku pfuna leswaku u vona “ku kwetsima ka Yehova.”—Psalma 27:4.

4. I mintokoto yihi leyi kombaka ntikelo wa dyondzo ya munhu hi xiyexe, kutani i swivutiso swihi leswi u faneleke ku swi xiyisisa hi vundzeni?

⁴ “Yi ku endla leswaku u titwa u ri kusuhi na Yehova loko u hambeta u dyondza ha yena,” ku vula muvuri wa rito wa nkarhi hinkwawo (phayona), wa malembe ya 22 hi vukhale. “Loko ndzi hlaya vuprofeta ivi ndzi vona ndlela leyi byi hetisekeke ha yona, swi endla leswaku ndzi n’wi chava. Dyondzo ya munhu hi xiyexe hakunene hi yona yi ndzi pfunaka.” Loyi a nga ni malembe ya 16 hi vukhale, loyi a a ri egomeni lerikulu, u tsarile malunghana ni xin’wana xa swihloko leswi nga eka nxaxamelo lowu nge “Vantshwa Va Vutisa” lowu humelelaka nkarhi na nkarhi eka magazini wa Awake! a ku: “Kute loko ndzi heleriwe hi ntshembo hinkwawo, xihloko lexi xi humelerile. A ndzi nyanyuleke ngopfu lerova ndzi hluleka no xi veka ehansi! Xi endle leswaku ndzi titwa ndzi ri ekusuhi na Yehova swinene, kutani ndzi xiye leswaku wa twisisa naswona wa khathalela swinene. Se ndzi vona ndzi ta swi kota.”a Xana u tiyimisela ku hlaya nkandziyiso wun’wana ni wun’wana wa timagazini ta hina ke? Hambi leswi swi lavaka ku tinyikela, xana u lunghiselela nkarhi wo wundla mianakanyo ni mbilu ya wena hi dyondzo ya Bibele ya munhu hi xiyexe ke? Hi ku endla ndzavisiso wa wena n’wini, hakunene u nga tikomba leswaku u na ntiyiso. Loko vutivi byo tano byi fikelela mbilu, hakunene byi ta ku susumeta, hikuva i “dyondzo leyi fambelanaka ni vukhongeri.”—1 Timotiya 6:3; Varhoma 12:2.

5, 6. I swikhongelo swa njhani leswi ku tshinetaka kusuhi ni Xikwembu? Kombisa.

⁵ Vuxaka lebyinene ni Xikwembu byi tlhela byi katsa swikhongelo leswi humaka embilwini na leswi kongomeke. Leswi swi pfuna ku aka xinakulobye xa munhu hi xiyexe na Yehova. Loko u endla swihoxo, tiyimisele ku tisola hi laha Davhida a endleke ha kona: “U nga anakanyi ŝidyoho ŝa v̌untŝhwa bya mina, ni ku tlula ka mina.” (Psalma 25:7, 11) Naswona tiva leswaku u ta ku rivalela loko u hundzukile. Dyondza ku namarhela xikhongelo, u pfula mbilu ya wena. Muntshwa un’wana, hambi leswi a kuriseriweke endyangwini lowu chavaka Xikwembu, a a pfumelele ku vulavula loku tsanisaka ku n’wi sivela ku nghenela vukhongeri bya ntiyiso. “Manuku hi vusiku byin’wana,” ku boxe loyi a nga ni malembe ya 22 hi vukhale, “Ndzi kombele Yehova ndzi ku, ‘Ndzi pfune leswaku ndzi lava ku ku tirhela, naswona hayi hi mhaka ya leswi vakulu ni vatswari va mina va swi lavisaka sweswo.’ ” Mawaku ku hundzuka loku vutomi bya yena byi sunguleke ku va na kona! Hambi leswi a a ri na manghanghamele, u sungule ku hlanganyela hi xitalo evutirhelini. Hi ntsako, u ri “Ndzi tshemba Yehova swinene sweswi hikuva ndza swi tiva leswaku minkarhi hinkwayo wa pfuna.”—Psalma 62:8.

⁶ Muntshwa un’wana wa Mukriste u khongele hi ku kongoma malunghana ni makungu ya yena yo va phayona. Loko swikhongelo swakwe swi hlamuriwile, u te: “Ndzi swi tivile leswaku Yehova a a ri wa xiviri ni leswaku wa hi khathalela! Emahlweni ka leswi ndzi ehlekete leswaku a ndzi ri na xinakulorhi na yena, kambe sweswi u fana ni munghana—wa mina la antswaka.” Yehova a nge hlamuli hi ndlela leyi kongomeke minkarhi hinkwayo, kambe loko u tikarhata naswona u tirha hi ku pfumelelana ni swikhongelo swa wena, u ta tlangela vukongomisi byakwe bya rirhandzu.—Psalma 145:18.

Hlayisa Ripfalo Lerinene

7. Ripfalo i yini, naswona hikwalaho ka yini u fanele ku va ni lerinene?

⁷ Loko Pawulo a khutaze Timotiya ku hambeta a ‘hlayisa . . . ripfalo lerinene,’ muapostola u swi tivile leswaku a swi ta lava matshalatshala lama tiyeke. (1 Timotiya 1:19) Ha yini swi ri tano? Ripfalo ra hina i xivandla xa hina lexi hi xi nyikiweke hi Xikwembu xo tikambela ivi hi avanyisa leswi hi swi endleke kumbe hi kunguhataka ku swi endla. Ri nga hi ‘avanyisa kumbe ri sola ndlela ya hina hi laha ku vavisaka, kumbe ri hi ‘rivalela ri amukela leswi hi swi endlaka tanihi leswinene. (Varhoma 2:15) Kambe loko ri onhiwa, ri nga humesa marungula lama hoxeke. Van’wana lava nga ni mapfalo lama onhiweke va tikhoma ku fana ni swiharhi leswi nga hava musa, kambe ‘rito ra le ndzeni’ a ri va ‘avanyisi.’ Va nga ha ‘vula erivaleni leswaku va tiva Xikwembu’ kambe va ‘xi landzula hi mintirho ya vona.’ U nga tisirheleta njhani leswaku u nga vi na ripfalo leri onhiweke?—Tito 1:10-16.

8. Van’wana eka lembe xidzana ro sungula va ‘dlaye’ ripfalo lerinene hi ndlela yihi?

⁸ Pawulo a a byele Timotiya leswaku Vakriste van’wana a va ‘dlaye’ mapfalo ya vona hi ku ‘khathalela mintsheketo yo hemba’ ni “ku vula swa hava leswi nga riki na vukhongeri.” (1 Timotiya 1:4, 19, 20; 6:20; 2 Timotiya 2:16-18) Hikwalaho ka leswi va yingiseke swilo leswi, ripfumelo ra vona ri onhiwile, naswona leswi swi endle leswaku va fa emoyeni. Hambi swi ri tano, Pawulo, u kombe leswaku swilo swin’wana handle ka tidyondzo ta vugwinehi a swi ‘Iwisana ni dyondzo leyi nga yona ya xiviri.’ Eka 1 Timotiya 1:9, 10 u xaxameta swilo swo tanihi ku dlaya, vuoswi, ni vusodoma.

9, 10. (a) I yini lexi nga dyondziwaka eka xikombiso xa mpatswa wa Vukriste lowu hlulekeke ku va ni ripfalo lerinene? (b) Hi nga ri sivela njhani ripfalo ra hina leswaku ri nga tlanyatiwi xana?

⁹ Namuntlha vuhomboloki ni rigangugangu swi thyakisa tibayisikopo ni minongonoko ya TV kun’we ni tibuku. Loko hi wundla miehleketo ya hina hi sweswo, ripfalo ra hina ri nga onhiwa hakatsongo-ntsongo. Leswi swi humelerile eka mpatswa wuntshwa wa Vukriste lowu endleke vuoswi emahlweninyana ka siku ra mucato wa wona. “Ndzi anakanya leswaku i mhaka ya leswi a hi swi languta eka TV,” ku vula wansati lontshwa. “Nkarhi hinkwawo u vona vanhu va khoma-khomana ni ku ntswontswana, hikwalaho a swi vonaki swi ri na khombo. U sungula ku swi tolovela. Kutani hi sungurile ku swi endla. Loko a ndzi lo ehleketa swinene-nene hi ndlela leyi a swi bihe ha yona!” Loko a nga si swi xiya, u lahlekeriwe hi ripfalo ra yena lerinene. Jaha ra kona ri tlhandlekerile ri ku: “Na mina ndzi vile ni xirhalanganya xo tlanga hi swirho swa mbeleko, naswona leswi swi tlanyata ripfalo ra wena, hikwalaho a swi nonon’hwi ku sungula ku khoma-khomana ni ku ntswontswana kutani eku heteleleni ku va vuoswi.” Hambi leswi va vonakeke va vekela van’wana xikombiso lexinene, leswi va swi hlaleleke leswaku swi va hungata, kun’we ni mukhuva lowu nga basangiki wa xihundla, swi tlanyatile ripfalo ku fana ni nyama yi tlanyatiwaka hi ku hisa-hisiwa hi nsimbhi leyi hisaka swinene.—1 Timotiya 4:2.

¹⁰ Xana ripfalo ra wena ri nga tlanyatisisiwa sweswo hi leswi u hungataka hi ku swi languta kumbe ku swi hlaya ke? Xana hakunene u tirha hi matimba leswaku u hlula mukhuva wihi na wihi wo biha lowu nga thyakisaka ripfalo ra wena ke? Leswaku u tisirheleta, u nga teka goza leri kongomeke hi ku hlaya—ni ku tlhela u hlayisisa—tibuku leti sekeriweke eBibeleni leti ngopfu-ngopfu ti vulavulaka hi xirhalanganya xa wena kumbe hi ku burisana ni nkulu hi xiphiqo. Ripfalo lerinene, leri baseke i nyiko leyi vangamaka leyi humaka eka Xikwembu leyi nga ta ku pfuna ku va mukhongeri. U nga pfumeleli nchumu hambi wu ri wihi wu ku endla leswaku u lahlekeriwa hi rona!

Hlawula Vanghana Lava Faneleke

11, 12. (a) Hi xihi xitsundzuxo lexi nyikeriweke eka 2 Timotiya 2:20, 21 ke? (b) U nga xi khathalela njhani xitsundzuxo xexo?

¹¹ Muapostola Pawulo wa tsala: “Endlwini leyikulu [bandlha], a ku na swibya swa nsuku ni swa silivere ntsena, kambe ni swo vatliwa hi mintsandza ni swa vumba swi kona, kutani swin’wana swi na ntirho lowukulu, swin’wana lowutsongo. Hikokwalaho, loko munhu a tibasisa eka swilo leswintsongo, u ta va xibya xo tirha leswikulu, lexi hlawulekeke ni ku pfuna n’wini wa yindlu, xi yimela ku tirha ntirho wihi na wihi lowunene.” (2 Timotiya 2:20, 21) Minsusumeto ni mahanyelo ya hina swi khumbiwa swinene hi lava hi va hlawulaka tanihi vanghana. Swi le rivaleni leswaku lava nga pfumeriki a hi vanghana lava antswaka. Kambe Pawulo laha u komba hi ku tiyiseka leswaku hambi ku ri exikarhi ka bandlha ku nga va ni vanhu lava va nga vanghana lava nga tsakisiki. I ntiyiso, u nga ha kuma ku va ni vanhu vo tano swi tsakisa, kambe nkucetelo wa vona wu nga ka wu nga ku pfuni ku “chava ku hluriwa hi ku navela loku telaka lavantshwa” kumbe ku va mukhongeri. Kuma vanghana lava akaka exikarhi ka bandlha. Pawulo u ya emahlweni eka ndzimana2Ti 2 ya 22 a ku: “Kongoma ku lulama, ni ku pfumela, ni rirhandzu, ni ku rhula, swin’we ni lava khongelaka Hosi hi timbilu leti tengeke.”—Ringanisa Vafilipiya 4:8, 9.

¹² Teka mhaka ya muntshwa un’wana wa Mukriste, loyi minkarhi hinkwayo a a wela ekhombyeni hambi loko a titoloveta vukhongeri. U te: “Ngopfu-ngopfu a ku ri hikwalaho ka vanhu lava a ndzi dzumba na vona.” Loko a vone vutomi byakwe byi onhaka, u cincile vanghana. U hetelela hi ku: “Loko u ri ni vanghana lava rhandzaka Yehova ekusuhi na wena, swi ku pfuna ku hlayisa ripfalo leri tirhaka kutani u papalata khombo. Loko va phofula manyala ya leswo biha, na wena u titwisa sweswo.” Hikwalaho ko hambana ni vanghana lava kanakanisaka, u vile xibya xo “pfuna n’wini wa yindlu, xi yimela ku tirha ntirho wihi na wihi lowunene.” Endzhaku ko tirha khume ra malembe tanihi phayona, wa engetela: “Ndzi kuma leswaku sweswi Yehova u ndzi tirhisile ku pfuna van’wana.”—2 Timotiya 2:21; Swivuriso 15:31.

13. U nga swi tiva njhani leswaku vanghana lavanene i vamani, naswona va nga ku kuceterisa ku yini?

¹³ Kutani ke, xiyisisa vanghana va wena hi vukheta. Xana va phikelela ku lulama, ku pfumela, rirhandzu, ni ku rhula ke? Xana va tale hi ku hiseka ka Vukriste? Hi ku endla vanhu vo tano vanghana va wena lavakulu, wena hi wexe u nga ha va xikombiso eku vulavuleni, emahanyelweni, erirhandzwini, eku pfumeleni, eku tengeni, hi laha Timotiya, munghana lonkulu wa Pawulo a endleke ha kona. Leswi a swi vuli swona leswaku u fanele ku tsan’wa kumbe ku nga vi ni vuxaka ni vanhu lava nga riki swikombiso leswi xiyekaka. Ku veka ka wena xikombiso hi ku tsaka swi nga ha va khutaza na vona, leswaku va lulamisa tindlela ta milenge ya vona.—1 Timotiya 4:12; Vaheveru 12:12-15.

Endlela Xikwembu Minyikelo

14, 15. (a) A ku laveka yini eka switsutsumi swa khale loko swi titoloveta? (b) I ntirho wihi lowu lavaka ku nyikela, naswona i swikombiso swihi leswinene leswi hi nga na swona ke?

¹⁴ Esikwini ra Timotiya, switsutsumi loko swi ri karhi swi titoloveta a swi kombisa “ku tikhoma hi matlhelo hinkwawo,” swi titsona mintsako yo tala leyi amukelekaka. (1 Vakorinto 9:25) Va landzerile madyelo yo nonon’hwa. Hi ku ya hi Horace, muphati wa lembe xidzana ro sungula B.C.E., va “papalate ni vavasati ni vhinya” leswaku va “fikelela pakani leyi va yi naveleke.” Hi ku fanana, ku titoloveta ku va mukhongeri swi lava ku tinyikela. Pawulo u vulavule hi Timotiya a ku: “Ndzi hava un’wana loyi a fanaka na yena . . . Lavan’wana hinkwavo va chivirikela ntsena leswi nga swa vona, ku nga ri swa Yesu Kriste. Kambe . . . hi laha a nga tirhisana na mina ha kona entirhweni wa Evangeli.”—VafUipiya 2:19-22.

¹⁵ Timotiya a a lerisiwile: “Tirha ntirho wa muvuri wa Rito, hetisa timfanelo ta ntirho wa wena.” (2 Timotiya 4:5) Ku nga khathariseki ndlela leyi timhaka tin’wana ta yena ta munhu hi xiyexe ti nga vaka ti tsakise ha yona, u ti tshikile leswaku a ta heta ntirho wa Xikwembu. Xana na wena u tsakela ku endla sweswo? Namuntlha vantshwa van’wana va Vukriste lava ntshunxekeke eka mindzhwalo ya Matsalwa va phikelele dyondzo leyi tlakukeke kumbe mintirho ya nkarhi hinkwawo leyi hakelaka ngopfu ku tlula ku endla vutirheli bya Vukriste ntirho wa vona wa vutomi. Un’wana wa vona a a rindzele ntirho wo tano hi mahlongati. Hambi swi ri tano, loko a nga si sungula ku tirha, u amukele xirhambo xo tirha ni mpatswa wa maphayona entirhweni wa nsimu ximumu hinkwaxo. U wu rhandzile. Hikwalaho u tshikile ntirho wolowo wa nkarhi hinkwawo lowu a a wu navela kutani a teka ntirho wa nkarhinyana lowu tsakisaka switsongo leswaku a va phayona. A ri ni moya lowu wu fanaka ni wa Timotiya, sweswi u tirha eyindlu-nkulu ya misava hinkwayo ya Timbhoni ta Yehova. Ku tsakela ku nyikela i vumbhoni bya rirhandzu ra ntiyiso, naswona minyikelo yi entisa rirhandzu rolero, hi laha a swi twisiseke ha kona.

16. Hi yihi minyikelo yin’wana leyi vanhu lavantshwa va nga ha fanelaka ku yi endla?

¹⁶ Tanihi “mutwarisi wa Rito ni muapostola,” Pawulo u kandziyise ku naveleka ko ambala hi ku ringanisela. Xana u nga tsakela ku tshika xitayele xo karhi xa maambalele kumbe xa ku lunghisa misisi lexi nga tsanisaka van’wana kumbe xi hinganyeta matimba ya wena tanihi muchumayeri? (1 Timotiya 2:7-10) Loko a ya emahlweni, Pawulo u tsarile a ku: “Hinkwavo lava navelaka ku hanya vutomi bya vukhongeri . . . va ta xanisiwa.” (2 Timotiya 3:12) Xana u tsakela ku yimela ntiyiso loko wu vula ku sandziwa, ku tshika xikhundla lexi rhandziwaka hi vanghana va wena va xikolo? Minyikelo yo tano hinkwayo leyi endliweke hi nsusumeto lowunene yi ta ku pfuna ku va mukhongeri naswona hi nkarhi lowu fanaka yi ku dyondzisa ku tiseketela hi Yehova ni ku xiya mintlhaveko yakwe ehenhla ka xin’wana ni xin’wana.

Hambeta U Endla Nhluvuko

17. Eku endleni ka nhluvuko, Timotiya a a ri xikombiso eka vatirheli lavantshwa namuntlha hi ndlela yihi?

¹⁷ Ku hlakulela vukhongeri i mukhuva lowu yaka emahlweni. Pawulo u byele Timotiya a ku: “Endla timfanelo leti, tinyiketele eka tona, leswaku vanhu hinkwavo va ta vona hi laha u yaka emahlweni ha kona.” (1 Timotiya 4:15) Van’wana, hikwalaho ka ku va va ri vatsongo ngopfu leswaku va nga va malandza ya vutirheli kumbe vakulu, va nga ha vona va hluleka ku ya emahlweni, va anakanya leswaku nhluvuko wu pimiwa ntsena hi vutihlamuleri ni malunghelo ya bandlha. I ntiyiso, Timotiya a a faneleka, hayi hi ku kula ka moya ntsena kambe na hi malembe leswaku a tirha tanihi nkulu. Kambe Timotiya a a fanele ku hambeta a tikarhata, naswona emhakeni leyi u vekele vatirheli hinkwavo lavantshwa xikombiso lexinene leswaku va xi landzela eka xikhundla xihi na xihi lexi nga ha va pfulekelaka.—1 Timotiya 4:12, 13.

18. Hi tihi tindlela leti Vakriste lavantshwa va nga endlaka nhluvuko ha tona?

¹⁸ Hikwalaho ke, ku fana na Timotiya, wena nandza la vupfeke wa Yehova u nga va ‘xikombiso eka vanhu lava tshembekaka’ hi ku endla leswaku ntiyiso wu kucetela ndlela leyi u hanyaka ha yona swinene na hi ku antswisa vutirheli bya wena. Sweswi u nga tikarhatela ku endla nhluvuko hi ku dyondza ku hlakulela timfanelo to tanihi ku va la ringaniselaka emahanyelweni, la hleriweke, la nga ni malwandla, ni la tekaka swilo hi matimba. Hi ku tiendla la kumekaka eka vakulu ni ku teka ntirho wun’wana ni wun’wana lowu va ku kombelaka ku wu endla hi matimba, u nga tirhela ku kombisa ku ‘faneleka ka wena ehansi ka ku kamberiwa.’ (1 Timotiya 3:1, 2, 8-10) Hambi loko nhluvuko wa wena wu nga hatli wu xiyiwa hi van’wana, tiyiseka leswaku Yehova wa wu vona. Hi nkarhi lowu faneleke, van’wana na vona va ta wu vona.—1 Timotiya 5:25.

19. Hambi loko swi nonoha, hikwalaho ka yini u fanele ku titoloveta ku va mukhongeri ke?

¹⁹ U nga tshuki u rivala leswaku i ku va mukhongeri leswi nga endlaka leswaku u va ni vuxaka lebyi amukeriwaka bya munhu hi xiyexe na Yehova. Ku kayivela ka ku titoloveta ka moya ku vanga ku lahlekeriwa loku tlulaka lokuya ka xitsutsumi lexi khomisiweke tingana lexi boxiweke eku sunguleni ka xihloko lexi. Ku va mukhongeri i ntirho lowukulu. Kambe emisaveni hinkwayo, vunyingi bya marito lama tsakeke ya lavantshwa ya huwelela: SWA PFUNA! Ku kuma mfanelo leyi swi yisa endleleni leyi anerisaka ya vutomi sweswi, leyi nga hava ku tisola, naswona yi pfula ntshembo wa ntsako lowu nga heriki. Hikwalaho hambeta u titoloveta. Yana emahlweni u endla leswi u nga swi kotaka, hambi loko swi nonon’hwa. Tiyiseka leswaku “Xikwembu xa tintswalo hinkwato . . . xona hi xiviri xa xona xi ta mi pfuxeta, xi mi aka ni ku mi tiyisa, mi nga tsekatseki. Matimba a ma ve eka xona hi masiku ni masiku. Amen.”—1 Petro 5:10, 11.

[Nhlamuselo ya le hansi]

U Nga Hlamula Xana?

◻ I matshalatshala wahi lama lavekaka ku hlayisa vuxaka lebyinene ni Xikwembu?

◻ I yini lexi katsekaka emhakeni yo kuma ripfalo lerinene?

◻ 2 Timotiya 2:20-22 yi nga ha tirhisiwa njhani eku hlakuleleni ka vukhongeri?

◻ Vakriste lavantshwa va nga endla nhluvuko hi ndlela yihi?

[Bokisi eka tluka 22]

Timfanelo Tin’wana Ta Xikwembu Xerhu Xa Ntwelo-vusiwana

■ Xi ni mintlhaveko. Hikwalaho ke, swiendlo swa hina swi nga xi “karihisa” kumbe swi xi tsakisa.—Psalma 78:40; Swivuriso 27:11.

■ Loko vanhu hakanyingi va languta nghohe ya van’wana, xona xi “languta mbilu.”—1 Samuel 16:7.

■ Xa hi khathalela naswona xi hi rhambela ku yisa mivilelo ya hina eka xona, naswona i “šitšhav̌elo e sikwini ra khombo.”—Nahum 1:7; 1 Petro 5:7.

■ Xi vuriwa ‘‘Xikwembu lexi tsakeke,” lexi “tsakelaka” malandza ya xona.—1 Timotiya 1:11; Psalma 35:27, NW.

■ Xi nga ka xi nga endli swo biha kumbe ku ya hi nghohe.—Yobo 34:10; Mintirho 10:34, 35.

■ Hambi leswi xi nga tsetseleriki swihoxo, loko hi hundzuka eka xihoxo kumbe ku tsana, xi ‘tiyimisele ku rivalela,’ xi nga hi endli “hi mpimo wa ku dyoha ka hina” kumbe ku hi nyika ‘leswi hi fanelaka.’—Psalma 86:5; 103:8-14.

■ Xa tshineleleka, naswona xi khutaza swivumbiwa swa xona leswi tshembekaka ku tirhisa vuswikoti bya swona. Hambi leswi xi nga ni vutlhari lebyi nga heriki, xa swi yingisa switsundzuxo. “V̌unene bya wena byi nḍi kurisile,” ku tsale Hosi Davhida.—Psalma 18:35; 1 Tihosi 22:19-22.

[Xifaniso eka tluka 24]

Vakriste vo tala va kuma ntsako lowu enteke evutirhelini ku tlula emintirhweni leyi hakelaka ngopfu