Xiviko Xa Vahuweleri Va Mfumo

Rirhandzu, ‘Xiboho Lexi Hetisekeke Xa Vun’we’

Rirhandzu exikarhi ka Vakriste i “xiboho lexi hetisekeke xa vun’we,” loko ri tirhisiwa, ri vumba xinakulorhi xa misava hinkwayo. (Vakolosa 3:14) ‘Xiboho lexi xo hetiseka xa vun’we’ xi kombisiwa hi vamakwerhu eAfrika loko va ri karhi va rhandzana ni ku rhandza Yehova, Munyiki ni Muhlayisi wa Vutomi.—Psalma 36:9; Mintirho 17:28.

◻ Hikwalaho ka dyandza ra malembe manharhu lera ha ku hundzaka eZimbabwe, tindhawu to tala a ti ri exiyin’weni lexi biheke. Leswi, kavula, swi khumbe vamakwerhu lava tshamaka etindhawini teto. Hambi swi ri tano, Timbhoni kulorhi ti endle hi laha ku hlamarisaka eka xirhambo xo lava mpfuno. Entiyisweni, timpahla to tala ti nyikeriwile lero kala swi fanela ku tivisa vamakwerhu leswaku va nga ha nyikeli ku kondza va tivisiwa nakambe. Leswi, xikan’we ni mpfuno lowu lunghiseleriweke hi hulumendhe, swi endle leswaku vamakwerhu vo tala va kuma mpfuno lowu a va wu lava. “Lava va ha pfumalaka na vona va khathaleriwa,” ku vika hofisi ya rhavi ya Sosayiti.

Mpfuno lowu wa rirhandzu wa vamakwerhu a hi lowu nga voniwangiki. Wanuna un’wana la nga pfumeriki u byele nsati wakwe, loyi a nga Mbhoni a ku: “Hambi loko van’wana va hetela vanhu swilo leswi va nga na swona hinkwaswo, n’wina [Timbhoni] mi va nyika swakudya ni swiambalo.” Marito lama tsakisaka ma vuriwile na le ka hina van’wana.

Rirhandzu exikarhi ka Timbhoni ta Yehova ri tirha tanihi “xiboho lexi hetisekeke xa vun’we,” kutani ri va fungha tanihi Vakriste va ntiyiso.—Yohane 13:35.

◻ Xikombiso xin’wana xa rirhandzu ni vun’we exikarhi ka vanhu va Yehova xi voniwile eNhlengeletanweni ya Muganga ya “Vun’we bya Mfumo” leyi veke kona eFreetown, aSierra Leone. Varhumiwa va tile enhlengeletanweni leyi va huma eGuinea ni le Liberia, kun’we ni le tindhawini leti hambaneke ta Sierra Leone. Swiyenge swimbirhi swi khomiwe hi nkarhi wun’we: Xin’wana hi Xinghezi na Xikrio, lexin’wana hi Xikisi na Xifurwa. Xiviko xa rhavi xi hlamusela rirhandzu ni vun’we lebyi tikombeke eka xiendlakalo lexi. Xi ri:

“A wu ri nkarhi wo tsakisa loko vamakwerhu va Vakisi ni Mafurwa va tatisa xiyenge xa Xinghezi eka risimu ni xikhongelo xo hetelela. Vo tala va khavaxele mihloti ya ntsako loko va vone varhumiwa lava tlulaka 400 va tsemakanya rivala ku ta va tatisa eku gandzeleni ka Yehova hi vun’we hi risimu ni xikhongelo.” Xi tshahe muhlaleri un’wana tanihi la nge: “Yehova u tiva ku hlengeleta vanhu vakwe. Mawaku xikombiso lexi nga erivaleni xa vun’we!”

Vun’we lebyi bya tiyisiwa loko hi xiya leswaku lava va hlengeletiweke a va huma eka tinxaka to hambana, kambe va hlengeletane swin’we hi ku rhula. Swi lava moya wa Yehova ku hetisisa leswi. Vun’we lebyi byi vhumbiwile eka Nhlavutelo 7:9: “Endzhaku ka swona, ndzi languta, kutani ndzi vona ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. A va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tlndzimi hinkwato. A va yimile emahlweni ka xiluvelo ne mahlweni ka Xinyimpfana va ambale tinguvu to leha leto basa, va tamele micindzu emavokweni ya vona.” Ndzimana 10 ya ndzima yoleyi yi komba xihundla xa vun’we lebyi: “A va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelwenl, ni le ka Xinyimpfana.’”