Vutomi Ni Vutirheli Bya Yesu

Ku Dyondzisiwa Ka Wansati Wa Musamariya

LOKO va ri karhi va vuya hi le Yudiya va ya eGaleliya, Yesu ni vadyondzisiwa vakwe va famba hi le tikweni ra Samariya. Hi ku karhatiwa hi rendzo, ni nhlikanhi va yima va wisa exihlobyeni kusuhi na muti wa Sikari. Xihlovo lexi a xi ceriwile malembe xidzana lama hundzeke hi Yakobo, kutani xi tshamile ku fikela ni namuntlha, kusuhi na muti wa manguva lawa wa Nablus.

Loko Yesu a ha wisa laha, vadyondzisiwa vakwe va nghena emutini ku ya xava swakudya. Loko wansati wa Musamariya a ta eku keni ka mati, wa kombela: “Ndzi he mati ndzi nwa.”

Vayuda ni Vasamariya hi ntolovelo a va tirhisani hikwalaho ka xihlawuhlawu lexikulu. Kutani ke, hi ku hlamala, wansati wa vutisa: “Leswi wena u nga Muyuda, u komberisa ku yini mati eka mina ndzi nga wansati wa Musamariya xana?”

Yesu a hlamula leswaku loko a a tiva leswaku i mani, a a ta kombela eka yena “mati lama hanyaka.” Mati lawa, u ri, ma ta va “xihlovo xa mati lama pfelelaka, ku yisa evutomini lebyi nga heriki.”

“Hosi, ndzi he mati wolawo,” ku hlamula wansati.

Yesu kutani a ku: “Famba, u ya vitana nuna wa wena.”

Yena a hlamula a ku: “A ndzi na nuna.”

Yesu a kambisisa nhlamulo yakwe. “Wa vurisa, loko u ku, ‘a ndzi na nuna.’ Hikuva u vile ni vavanuna va ntlhanu, kutani loyi u nga na yena sweswi, a hi nuna wa wena.”

“Hosi, ndza swi vona leswaku u muprofeta,” ku vula wansati hi ku hlamala. Loko a hlavutela timhaka takwe ta swa moya, u hlamusela leswaku Vasamariya va gandzela eNtshaveni ya Gerizim, kambe Vayuda eYerusalema.

Kambe ndhawu yo gandzela a hi nchumu wa risima, ku kombisa Yesu. “Xikwembu i moya,” wa hlamusela, “kutani lava xi gandzelaka, va fanele ku xi gandzela hi moya ni ntiyiso.”

Wansati swi n’wi tsakisa swinene. A ku: “Ndza Swi tiva leswaku Mesiya, loyi a vuriwaka Kriste, wa ta.” “Siku a taka, ú ta hi tivisa swilo hinkwaswo.”

“Ndzi yena, mina ndzi vulavulaka na wena,” ku vula Yesu. Ehleketa hi swona! Wansati loyi a taka ninhlekanhi ku ta ka mati, leswaku a ta kota ku papalata ku hlangana ni vavasati va muti lava a va n’wi sandza hi mhaka ya ndlela yakwe ya vutomi, u tsetseleriwile hi ndlela leyi hlamarisaka hi Yesu. Hi ku kongoma u n’wi byela leswaku a a nga si tshama a swi paluxa eka un’wana munhu. Ku va ni vuyelo byihi xana? Nhloko leyi nga enkandziyisweni wa hina lowu landzelaka yi ta hlamusela. Yohane 4:3-26.

◆ Hikwalaho ka yini wansati wa Musamariya a hlamarile loko Yesu a vulavula na yena?

◆ Yesu u n’wi dyondzise yini hi ta mati lama hanyaka ni laha a a ta gandzela kona ke?

◆ Yesu u tihlavutele hi ndlela yihi leswaku hi yena mani, naswona hikwalaho ka yini ku hlavutela loku ku hlamarisa?

[Xifaniso lexi heleleke eka tluka 9]