Masiku Lama Fanaka Ni ‘Masiku Ya Nowa’
“Misava a yi tele mona . . . a yi onhakile, hikuv̌a nyama yiṅ’wana ni yiṅwana a yi onhile ndlela ya yona e misav̌eni.”—GENESA 6:11, 12
1, 2. (a) Xana i vuhomboloki bya muxaka muni lebyi Timbhoni ta Yehova ti faneleke ku lwisana na byona namuntlha? (b) Hi le ka swiyimo swihi laha vanhu va Yehova va chaveleriweke hi ntshembo wa ku pfuka ka vafi?
VUHOMBOLOKI! Ku fana ni le sikwini ra Nowa, ni namuntlha, vuhomboloki ri ve rito leri tolovelekeke. Hambi va ri lava fambaka ni Xikwembu xa ntiyiso, hi laha Nowa a endleke ha kona, a va sawutisiwanga eka vuhomboloki. Leswi swi tisiwe emianakanyweni ya misava hi matimba loko, hi July 21 ya n’waxemu, Holo ya Mfumo ya Timbhoni ta Yehova le Sydney, eAustralia, yi hlanhliwe hi bomo enkarhini wa nkulumo ya le rivaleni ya Bibele leyi nge Vutshembeki eka Xikwembu ni ndyangu. Ku dlayiwe mbhoni yin’we. Lava tlulaka 40 va yisiwe exibedlhele. Hinkwavo ka vona va horile, hambi leswi van’wana va nga ni swivati leswi chavisaka hikwalaho ka nhlaselo lowu wa vugevenga. Phorisa ra fokisi ri te: “A ku ri ni vanhu va 110 endzeni naswona i hlori ntsena leswi hi nga riki na 110 wa lava feke.”
2 Eswiphen’wini swin’wana swa misava—leswi fanaka ni le N’walungwini wa Ireland, Lebanon na E1 Salvador—Timbhoni ta Yehova ti huwelela “mahungu lamanene” ematshamelweni lama yaka emahlweni ya vuhomboloki. Va nga ri vangani va dlayiwile, van’wana loko va ri karhi va hlanganyela eVutirhelini. Ematikweni yo tala, “xiendlakalo lexi nga vonekiki,” ku fana ni makhombo ni ku tsekatseka ka misava, swi koxe vutomi lebyi vangamaka, swiendlakalo leswi eka swona vanhu va Yehova va chaveleriweke hi ntshembo wa ku pfuka ka vafi.—Eklesiasta 9:11; 1 Vatesalonika 4:13, 14.
3. (a) I yini leswi nga humelelaka eka van’wana va vanhu va Yehova, tanihi loko swi kombiwile hi swiendlakalo swa sweswinyana na Luka 21:16? (b) I ntshembo wihi hi nga na wona hi nsirhelelo wa Xikwembu enharhini wa ‘nhlomulo lowukulu’
3 Sweswinyana eMexico, hinkwato Timbhoni ta 23 ni vanghana va kona a va ri exikarhi ka lava hundzaka 5 000 lava dlayiweke hi mhangu ya ku tsekatseka ka misava. EPuerto Rico, van’wana va nkombo va hlayiwile exikarhi ka 300 wa lava lahlekeriweke hi vutomi bya vona eka tindhambi na ku bodlhomela ka matiko. Xana leswi swi vula leswaku Yehova u hlulekile ku lunghiselela nsirhelelo eka van’wana va malandza yakwe? A swi tano. A hi sawutanga eka tinghozi na timhangu. Naswona loko yi ri mhaka ya ku xanisiwa, Yesu u tsundzuxe vadyondzisiwa vakwe, a ku: “Va ta dlaya van’wana va n’wina.” Madzana ya vamakwerhu ya file emavokweni yo kariha ya Hitler wa Munazi. Yehova u ta tsundzuka vo tano hinkwavo eku pfukeni. Hambi swi ri tano, loko ‘nhlomulo lowukulu’ lowu vhumbiweke wu kukula misava, Yehova u ta komba leswaku wa swi kota ku ponisa lava vitanaka vito ra yena, tanihi leswi a swi endleke emasikwini ya Nowa.—Luka 21:16-19: Matewu 24:14, 21, 22, 37-39; Esaya 26:20, 21; Yoel 2:32; Varhoma 10:13.
4. Swiyimo swa namuntlha swi fana njhani ni leswi nhlamuseriweke eka Genesa 6:11, 12?
4 Ku sukela hi 1914 vuhomboloki byi funengete misava hinkwayo. Vanhu lava tlulaka dzana ra timiliyoni va dlayiwile etinyimpini ni le ka mindzoviso ya lembe xidzana leri. Vanhu va hlaseriwe hi vatlhakisi va le mpfhukeni na va le Iwandle, ku bulusiwa ka tibomo hi vahehli, ku dlayiwa ka vunyingi bya vanhu ni rivengo ra tinxaka hinkwato ni ku xungetiwa hi ku andzisiwa ka matlhari ya nyutliya. Hakunene, leyi i “minkarhi yo nonon’hwa” ni ‘matiko lama helaka ntamu.’ (2 Timotiya 3:1-5, 13; Luka 21:25) Hambi swi ri tano, vanhu va Yehova namuntlha va hanya exikarhi ka nhlaselo lowu tisaka khombo lerikulu ku tlula vuhomboloki, hambi leswi hakanyingi wu fanisiwaka ni vuhomboloki. Swi hi tlherisela endzhaku emalembeni lama tlulaka 4 300 esikwini ra Nowa. I yini sweswo xana?
Ripfumelo Ra Nowa eXikarhi Ka Mikhuva Leyo Biha
5, 6. (a) Sathana u hambetile a thyakisa vanhu hi ndlela yihi? (b) Xana i tindlela tihi leti Nowa ni ndyangu wakwe va tikombeke va nga ri va misava yoleyo ha tona?
5 Ku sukela eku xandzukeni a Edeni ku ya emahlweni, Sathana Diyavulosi a a voyamele eku ‘kanganyiseni ka misava hinkwayo.’ (Nhlavutelo 12:9) Yehova u lerise wanuna ni wansati ku tirhisa matimba ya vona ya rimbewu lama va ya nyikiweke hi Xikwembu hi ku xiximeka elunghiselelweni ra vukati, leswaku va “tata misav̌a” hi rixaka ra vona. (Genesa 1:28; Vaheveru 13:4) Kambe Diyavulosi u hundzukele eku thyakiseni ka vanhu hi rimbewu leri nga riki ra ntumbuluko. Hi mukhuva wihi xana? Vana va Xikwembu va moya va tihlanganise na Sathana eku xandzukeni ka yena. Lava va vile “mademona,” kun’we na Sathana tanihi “hosi” ya wona. (Luka 11:15) Naswona xana ntirho wa mademona a wu vumbiwe hi yini enkarhini wolowo? Ya tile emisaveni, ya ambala mimiri ya vanhu, kutani ya tekana ni vanhwanyana lavo saseka va vanhu. Vuyelo bya kona a byi chavisa!
6 Xisweswo ku tswariwe vana lava nga ni matimba, vanhu va swihontlovila lava hafu a ku ri demona, hafu ku va munhu. Lava a va ri Tinefelim, “vadlayi” va vanhu, hi laha rhekhodo yi kombaka ha kona: “Misav̌a a yi onhakile e mahlweni ka Šikwembu, a yi tele mona. Šikwembu ši languta misav̌a, kutani misav̌a a yi onhakile; hikuv̌a nyama yiṅwana ni yiṅwana a yi onhile ndlela ya yona e misav̌eni.” Vuhomboloki ni rimbewu leri thyakeke swi ve leswi hangalakeke lerova ha swona ku nga vuriwaka ntsena leswaku: “A a ri munhu l’a lulameke ni l’a sasekeke enkarini wa yena; Noa a ṭshama a famba ni Šikwembu.” Nsati wa yena, vana vakwe va xinuna, ni vasati va vona—vona ntsena eka vanhu hinkwavo—va kombise ripfumelo ni ku chava Xikwembu. Hikwalaho, rixaka ra ndyangu wa Nowa a ri thyakisiwanga hi rimbewu lero biha ra siku ra yena.—Genesa 6:4, 9-12, nhlamuselo ya Ref. Bi.
7. Hi laha swi kombisiweke ha kona esikwini ra Nowa, Yehova u va avanyisa njhani lavo biha ni lavo lulama? (Ringanisa Matewu 25:40, 45, 46.)
7 Yehova u herise misava yoleyo ya vuhomboloki, leyi hlanyisiwaka hi rimbewu, ya vudemona. Hi ku rhumela Ndhambi leyikulu, u hlantswe hinkwaswo leswo biha. Tinefelim letikulu ni ta matimba ni vanhu lava thyakisiweke va kukuleriwe eku lovisiweni, loko khale ka vana va Xikwembu lava nga ni mademona va tlhelela exivandleni xa moya—leswaku va ya rindzela ku avanyisiwa ka vona hi Xikwembu kona. Kambe a ku ri ni vaponi! Nowa ni ndyangu wakwe va tsetseleriwile. Naswona hikwalaho ka yini? Hikwalaho ka ripfumelo ra vona, leri seketeriwaka hi mintirho eku akeni ka ngalava ni ku chumayela ku lulama eka misava yoleyo yi avanyisiweke.—2 Petro 2:4, 5.
N’wina Va Manguva Lawa, Tivoneleni!
8. Hi le timhakeni tihi laha siku ra Nowa ri faniseleke siku ra hina?
8 Siku ra Nowa ri fanisela siku ra hina. Hi swi tivisa ku yini leswi? Phela, Yesu u vhumbe nkarhi lowu fanaka wa vuhomboloki, vubihi, ni ku pfumala rirhandzu tanihi xiphemu xa “xikombiso” xa leswaku hi yime eribuweni ra ‘nhlomulo lowukulu lowu kalaka wu nga si tshama wu va kona hi mpfhuka misava yi tumbuluka ku fikela namuntlha, naswona a wu nga ha vi kona ni siku ni rin’we.’ Nakambe u te, “Loko ri ri siku ra kona ni nkarhi wa kona, a ku na loyi a swi tivaka, . . . swi tiviwa hi Tatana ntsena.” Manuku u engeterile a ku: “Ku vuya ka N’wana-wa-Munhu ku ta fana ni leswi humeleleke emasikwini ya Nowa. Hikuva emasikwini wolawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le ku vuyeni ka N’wana-wa-Munhu.”—Matewu 24:3-21, 36-39.
9. Hi nga ri papalata njhani khombo ra lava ‘va nga anakanyiki nchumu’ xana?
9 Ina, “a va nga anakanyi nchumu.” Kambe a wu fanelanga ku fana na vona. U nga pona loko Hosi Yesu a ta a huma hi le tilweni, a tisa ku avanyisa ka Xikwembu hi ku herisa lava nga tiviki Xikwembu, ni lava nga yingisiki Evangeli ya Hosi ya hina Yesu’ hi laha ku nga heriki. (2 Vatesalonika 1:7, 8) A wu fanelanga ku fana ni vanhu va misava lava mhaka-nkulu ya vona evuton’wini ku nga ku titsakisa, ni ku phikelela ntirho wa vutomi lowu tlakukeke kumbe rifuwo ra swilo leswi vonekaka, va nga anakanyi hi Xikwembu. Hakunene, “Xikwembu xa vona i khwiri ra vona.”—Vafilipiya 3:19
“Vengani Leswo Biha”
10, 11. (a) Ku kuma ku amukeriwa hi Xikwembu, xana i marhengu wahi lama faneleke ku papalatiwa? (b) I matlhari wahi lawa hi faneleke ku ma hakarha, naswona hikwalaho ka yini?
10 Emasikwini lawa ya makumu, vutomi bya vanhu vo tala byi tiseketele hi rimbewu, byi ri ni mpfuno wa vukati kumbe byi nga ri na wona. Naswona eka vo tala lava ngheneleke vukati, ku dlaya vukati kumbe ku tsana ka byona ku ve loku amukelekaka. Hi ku honisa switsundzuxo leswi twalaka swa vadyondzisiwa va Yesu, vo tala evujaganini va tinyiketela vusodoma. Ana se, van’wana va vona va ‘tikumela hakelo leyikulu’ hi xivumbeko xa AIDS ni mavabyi man’wana yo tluletana hi rimbewu. Hambi swi ri tano, ku nga va ni ntshembo wo ponisiwa ni le ka vanhu vo tano. Tsundzuka, Yesu u bumabumerile tinghwavava leti hlantsweke vutomi bya tona ivi ti pfumela eka yena, ku hambana ni varhangeri va vukhongeri lava tikukumuxaka, lava nga hundzukiki va siku ra yena.—Varhoma 1:26, 27; 2 Petro 2:9, 10; Yuda 6, 7; Matewu 21:31, 32.
11 Un’wana ni un’wana wa vanhu va Yehova loyi a nga ha vaka a tsanisiwile, kumbe a ringiwile leswaku a nghenela, mikhuva ya vunghwavava u fanele ku hiteka kutani a hakarha matlhari hinkwawo lawa Xikwembu xi ma nyikelaka! (Vaefesa 6:11-18) Masiku lawa hakunene ya ‘fana ni leswi masiku ya Nowa a ya ri xiswona.’ “Nghala leyi bongaka,” ku nga Diyavulosi, ni mademona yakwe lama thyakeke va tirha vusiku ni nhlekanhi leswaku va phasa malandza ya Xikwembu. Hi fanele ku lwisana ni valala lava, hi tiya eku pfumeleni.—1 Petro 5:8, 9.
12. Hikwalaho ka yini swi ri swa nkoka ku landzela ndzayo ya Psalma 97:10?
12 Lexi khomisaka gome, hambi va ri van’wana lava tivekaka swinene enhlengeletanweni ya Yehova va hluriwe hi mikhuva leyi ya vunghwavava ku katsa ni vusodoma, ku cincana vavasati ni ku pfinyiwa ka swihlangi. Nakambe, swi fanele ku xiyiwa leswaku eka lembe leri hundzeke, 36 638 wa vanhu va susiwile ebandlheni ra Vukriste, nhlayo leyikulu ya vona yi suseriwa vunghwavava. Nhlengeletano ya Yehova yi fanele ku tshama yi basile! (1 Vakorinto 5:9-13) Lowu hakunene i nkarhi wa leswaku vakulu va bandlha, malandza ya vutirheli, ni vamakwerhu hinkwavo va xinuna ni va xisati va papalata swiyimo swihi na swihi leswi nga yisaka evunghwavaveni. Vutshembeki eka milawu ya Yehova byi ta hakeriwa, tanihi leswi Psalma 97:10 yi nge: “N’wina la’mi ranḍaka Yehova, v̌engani le’ŝo biha! O hlayisa mimoya ya v̌akwetsimi v̌a yena, o v̌a kuṭula e mav̌okweni ya la’vo biha.”
13. Xana i xitsundzuxo xihi lexinene lexi nyikeriweke hi muapostola Pawulo na Petro?
13 Emakumu, “nhlomulo lowukulu” wu ta herisa hinkwavo lava nga “manyala.” I ku khathalela muni konghasi loku hi faneleke ku va na kona ka ku venga, ina, ku nyenya, ni ku papalata mikhuva leyo biha ya misava! Hi fanele ku ‘chava vuoswi!’ (Nhlavutelo 21:8; 1 Vakorinto 6:9, 10, 18) Muapostola Petro, endzhaku ka ku tsundzuxa hi ta vagwinehi lava byalaka ku kanakana ni ku tiyiseka ka “siku ra Yehova,” u hi khutaza “ku hanya vutomi lebyo hlawuleka, bya vukhongeri.” Wa engetela: “Kambe, hi ku ya hi ku tshembisa ka Hosi, hi langutela matilo lamantshwa ni misava leyintshwa, laha ku lulama ku tshameke kona. Hikokwalaho, varhandziwa, leswi mi languteleke swilo leswi, chivirikani leswaku Xikwembu xi mi kuma mi nga ri na xivati kumbe xisandzu, na swona mi ri ni ku rhula.” Xisweswo mawaku ntsako wo fika eka “misava leyintshwa,” laha Xikwembu xi nga ta ‘endla swilo hinkwaswo swi va leswintshwa,’ ni leswi baseke!—2 Petro 3:3-7, 10-14; Nhlavutelo 21:1, 4, 5.
Khathalela ‘Swikombiso Swin’wana Leswi Tsundzuxaka’
14. Hikwalaho ka yini ku basisa loku endliweke hi Ndhambi a ku ri ka xinkarhana?
14 Endzhaku ka loko Ndhambi leyikulu yibasise misava eka thyaka hinkwaro ra vudemona ni ra vanhu lavo biha, Yehova u phindhe xileriso lexi eku sunguleni a xi nyikiwe Adamu, hi ku byela Nowa ni vana va yena a ku: “Tšalanani mi anḍa, mi tata misav̌a.” (Genesa 9:1) Hi ndlela yo fanekisela va swi endlile leswi, “mindyangu” ya 70—nhlayo leyi hetisekeke yo fanekisela—leyi xaxametiweke eka Genesa ndzima ya 10. Kambe vanhu a va ha xanisiwa hi vuyelo bya xidyoho xa ndzhaka lexi humaka eka Adamu. Naswona handle ko kanakana nkucetelo wa vudemona wu tlhele wu endla leswaku vanhu va mbombomela emikhuveni leyo biha ya rimbewu.
15. Hi dyondza yini hi ku avanyisiwa ka Sodoma hi Xikwembu xana?
15 Hi nkarhi lowu faneleke, Abrahama, “munghana” wa Yehova, na Lota n’wana wa xinuna wa makwavo wa Abrahama va rhurhele etikweni ra Kanana. Lota u hlawule ku rhurhela eXifundzeni xa Yordani, leri a “ri fana ni ntanga wa Yehova.” Kambe xana a ri ri tano emahanyelweni? Nikantsongo! Muti wa Sodoma, laha Lota a akeke kona, ni lowu nga kusuhi na wona wa Gomora a yi tele hi vusodoma. Hambi va ri vanhu va khume lavo lulama a va nga ta kumeka kwalaho. Hikwalaho ke, Yehova u tisele miti yoleyo “ku biwa yi hisiwa hi ndzilo lowu nga heriki.” Miti yoleyo yi thyakeke yi nga ka yi nga ha pfuxetiwi! Yesu u tshahe ku avanyisa ka Xikwembu ehenhla ka Sodoma, ni leswi swi endlekeke “emasikwini ya Nowa,” loko a kandziyisa xilaveko xa hina xo tshama hi languterile!—Genesa 13:10; 18:32; Yuda 7; Luka 17:26-30.
16. I ntirho wihi wa mademona lowu lavaka leswaku hi lwela ku pfumela swinene ke?
16 U nga xisiwi! Sathana ni mademona ya yena va ha ri enyimpini! Hambi leswi va cukumeteriweke “emakheleni ya munyama” yo fanekisela ni ku siveriwa ku ambala mimiri ya nyama, mimoya yoleyo yi thyakeke yi tiyimisele ku thyakisa vanhu, naswona ngopfu-ngopfu malandza ya Yehova. (2 Petro 2:4-6) A swi kanakanisi leswaku mademona ya kucetele Kanana ku endla xiendlo lexo biha eka Nowa kokwa wakwe wa xinuna. (Genesa 9:22-25) Hakunene ku fanele ku ve wona lama andziseke ku hunguka loku ku veke ‘hanyelo ra tiko ra Kanana,’ leswaku emakumu ri hlanta vaaki va rona. (Levetika 18:3-25) Hi ku fanana, mademona ya byala mikhuva ya rimbewu leyi nga riki ya ntumbuluko leyi yingayingisaka vanhu vo tala namuntlha. Loko hi lwela ripfumelo swinene, hi fanele ku alela minhlaselo yihi na yihi ya tintsumi teto to biha leti ti sindzisaka vanhu leswaku ‘va hanya hi vuoswi lebyi tlulaka mpimo ni ku tinyiketa eku naveleni ka swa manyala.’—Yuda 3, 6, 7.
Akela Ku Hlayiseka
17. Ku fana na Nowa ni ndyangu wa yena, xana hi nga tikombisa ku yini hi nga ri va misava ke?
17 Hikwalaho ka ku nonon’hwa ka minkarhi ya hina, xana hi nga yi kumisa ku yini ndlela yo kutsuriwa? Kavula, xana Nowa ni ndyangu wa yena va ponise ku yini? “Hi ku pfumela, Nowa . . . ú avanyisile misava.” (Vaheveru 11:7) Hi ku fanana namuntlha, Timbhoni ta Yehova “a hi va” misava leyi yo biha. Ku tlula kwalaho, hi kombise ripfumelo ra hina hi ku nyikela vutomi bya hina eka Yehova ni ku khuvuriwa ematini leswaku hi va vadyondzisiwa va Yesu Kriste.—Yohane 17:14, 16; Matewu 28:19.
18. I yini lexi faniseriweke hi ku akiwa ka ngalava ke?
18 Nakambe, hi hlanganyela entirhweni wa Yehova wa namuntlha, ntirho wa ku aka wa moya lowu fambisiwaka hi Yesu Kriste, Nowa Lonkulu. Tanihi xivandla xa nsirhelelo ni ku ponisiwa, ngalava yi fanekisela paradeyisi ya moya leyi Yehova a a ri karhi a yi aka exikarhi ka vagandzeri va yena ku sukela hi 1919. I xiyimo xa vuxaka bya ku rhula lebyi pfuxetiweke na Xikwembu. I lunghiselelo ra Xona ro hlayisa ndyangu wo fanekisela wa Nowa Lonkulu wu hundza eka “nhlomulo lowukulu.”—Matewu 24:21; 1 Vakorinto 3:9, 11; 2 Vakorinto 12:3, 4; Nhlavutelo 7:13, 14.
19. Xana Nowa, swirho swa ndyangu wa yena, ni ntirho wa vona a a swi fanisela yini?
19 “Nowa u kume tintŝalo e mahlweni ka Yehova.” U n’wi fanekisela kahle swonghasi Yesu Kriste, loyi a fambeke ni Xikwembu hi ku titsongahata laha misaveni, a nga endli nchumu hi ku tirhandzela ka yena! (Genesa 6:8; Matewu 17:1, 5; Yohane 8:28) Hinkwavo a va ri vachumayeri va ku lulama—xikombiso lexinene eka Timbhoni ta Yehova hinkwato. Naswona hi nga tiyiseka leswaku nsati wa Nowa, loyi a fanekiselaka vatotiwa lava ha riki kona emisaveni namuntlha,a a ri xikombiso xa vutitsongahati. (2 Petro 2:5; Luka 4:14-19; Vaefesa 5:21-24) Loko hi kambisisa leswi ntirho wa ku aka ngalava ya ku hlayiseka a wu kurise swona, hi nga vona ndlela leyi mukhalabye Nowa a a tsake ha yona ku kuma majaha manharhu lama nga ni matimba ni vasati va wona tanihi vapfuni va yena! Leswi swi fanekisela “ntshungu lowukulu” wa namuntlha lowu rhwalaka ndzhwalo lowukulu wa ntirho wa ku aka wa moya enkarhini wa makumu wo hlayela endzhaku ku ya eka Ndhambi yo fanekisela.—Nhlavutelo 7:9, 15.
20, 21. (a) I mintshembo yihi leyi vangamaka leyi rindzeleke vagandzeri va Yehova emisaveni leyi hlantswiweke? (b) I ntsako wihi lowu nga kumiwaka hambi ku ri sweswi?
20 Loko misava leyi yi ta va yi hlantswiwile, yi lunghela ku hundzuriwa paradeyisi ya xiviri, lava va fanekiseriweke hi vana va Nowa ni vingi va yena va nga ha veleka vana eku lulameni nkarhi wo karhi. Endzhaku hlori ra ku pfuka ka vafi ri ta hetisisa ku tata misava hi vanhu. Hinkwavo lava amukelaka lunghelo ra ku va “tinyimpfu tin’wana” ta Yesu va ta tlheriseriwa eku hetisekeni, naswona loko va pona ndzingo wo hetelela endzhaku ka loko Kriste a tlherisele ku Fuma eka Tata wa yena, lava va ta hlayiwa lava lulamelaka vutomi lebyi nga heriki.—Yohane 5:28, 29; 10:16; 1 Vakorinto 15:24-26; Psalma 37:29; Nhlavutelo 20:7, 8.
21 Mawaku ntsako lowu nga emahlweni ka vagandzeri lava tshembekaka va Yehova! Kambe ntsako lowukulu wu nga kumeka hambi ku ri sweswi hi ku hlanganyela hi mbilu hinkwayo eku akeni ka ngalava ya manguva lawa yo ponisa. Xana ntirho wolowo wu famba njhani? Dyondzo ya hina leyi landzelaka yi ta nyika nhlamulo.
U NGA HLAMULA NJHANI?
◻ Xana swiendlakalo swa le mahlweni ka Ndhambi swi fanele ku hi tsundzuxa ka ha ri emahlweni hi ndlela yihi?
◻ Xana i tidyondzo tihi leti hi faneleke ku ti kuma eka Matewu 24:37-39 ke?
◻ Hikwalaho ka yini swi ri swa nkoka ku “venga leswo biha”?
◻ Hi nga hlanganyela njhani eku akeni ka ngalava yo fanekisela?
[Bokisi eka tluka 11]
KU FANA Nl ‘MASIKU YA NOWA’—
“I 40 wa tiphesente ta vafundhisi va kholichi ya vukhongeri ntsena . . . lava pfumelaka leswaku vuxaka bya rimbewu bya wanuna ni wansati lava nga tekanangiki byi blhile.”—Saturday Oklahoman & Times, December 29, 1984
[Bokisi eka tluka 12]
Xana Milawu Ya Bibele Yi Na Mhaka?
Muprista wa kereke ya Episcopal u yingisele nkulumo ya rifu leyi nyikeriweke hi un’wana wa Timbhoni ta Yehova. Endzhaku, hi ku rhambiwa hi muprista, vatirheli vambirhi va Watch Tower va ve kona eka nhlengeletano yo vulavurisana ni vafundhisi vo hambana-hambana eBrooklyn Heights, eNew York City.
Xivutiso xa vusodoma xi vutisiwile. Timbhoni ti swi veke erivaleni leswaku Bibele yi lwisana na byona ni leswaku Timbhoni ti susa vanhu lava endlaka vunghwavava byihi na byihi. (Varhoma 1:24-27; 1 Vakorinto 6:9, 10; Yuda 7) Timbhoni ti vutise vafundhisi hi xiyimo xa vona emhakeni leyi kutani ti amukele tinhlamuselo leti landzelaka:
Mufundhisi wa Bandlha: “Ndzi ehleketa leswaku hi na wona nawu wo hlongola kun’wana eka milawu ya kereke ya hina, kambe evuton’wini bya mina, a ndzi tsundzuki laha hi tirhiseke nawu wolowo!”
Muprista wa Episcopal: “Loko a hi lo tirhisa nawu wolowo, a hi nga ha ta va na tikereke [leti nga kona].
Murhangeri lonkulu wa Khatoliki: “Loko a hi lo tirhisa nawu wolowo, a hi nga ha ta va ni Vaprista lava [saleke].”
Hambi leswi tinhlamuselo ta vafundhisi lava ti nga ha hundzeletaka timhaka, Timbhoni ta Yehova ta tsaka hikwalaho ka xiyimo xa tona lexi tiyeke eku hlayiseni ka bandlha ri basile. A “hi va misava.”—Yohane 15:19.
[Bokisi eka tluka 13]
KU FANA Nl ‘MASIKU YA NOWA’—
“Xikolo xa vanhu hinkwavo xa New York City xa swichudeni swa xikolo xa le henhla xa vasodoma xi pfuriwile eManhattan.” Thicara wa xona u te: “Hi lave matshamelo lawa eka wona vana va vasodoma va xinuna ni va xisati va nga ta ka va nga hlaseriwi hi vana va kondlo-andzi-dyi lava nga vupfangiki.”—The New York Times, June 6, 1985
[Bokisi eka tluka 14]
KU FANA Nl ‘MASIKU YA NOWA’—
“Swirho swa Kereke ya Riverside tolo swi amukele nawu wa vusodoma lowu pfumelelaka vuxaka bya vusodoma tanihi xiphemu xa masungulo ya vutomi bya ndyangu wa Vukriste.”—New York Post, June 3, 1985