Xiviko Xa Vahuweleri Va Mfumo
“V̌a Nga Ka V̌a Nga Ku Hluri”
ETIKWENI ra Amerika-Xikarhi, vavanuna va 15 lava hlomeke va teke Timbhoni ta Yehova timbirhi emakaya ya tona hi nsindziso ivi va ti yisa eka ntlawa wa vavanuna va 75 lava hlomeke hi swigiya ni mabanga. Va rhukane Timbhoni hi tinhlamba ivi va ti hundzisela eka ntlawa wun’wana wa kwalomu ka vavanuna va 350 lava na vona va hlomeke. A va rindzele leswaku vamakwerhu lava vambirhi a va ta va chava naswona a va ta landzula vukala-tlhelo bya vona bya Vukriste hi ku tihlanganisa ni vurindzi bya vona. (Esaya 2:4) Kambe Timbhoni ti yime ti tiyile kutani ti ala ku tihlanganisa ni tirhelo ra nyimpi. Kutani va nghenisiwe ekhotsweni, loko swirho swa vunyingi bya tikereke swi landzula ivi swi ya etintshaveni ni varindzi.
Siku leri tlhandlamaka vamakwerhu va yisiwe edoroba-nkulu leswaku va ya tlhela va yingisiwa. Loko va ri karhi va famba na vona, varindzi va va byele leswaku a va hundzuriwile. Vamakwerhu va hlamurile va ku: “Hakunene i ntiyiso leswaku hi hundzuriwile! Sweswi a ha ha vavisi munhu; a hi makhamba, swidakwa, vaoswi.’’ Loko mutirhela-mfumo a va yingisile, u va kombe musa kutani a va hoyozela, a ku: “Loko un’wana ni un’wana a a fana na n’wina, swilo a swi ta hundzuka . . . naswona onge Yehova Xikwembu xa n’wina a nga mi hlayisa.’’ Kutani va ntshunxiwlle.
Hikwalaho ka yini Vakriste lava vo rhula lava nga karhatiki munhu, lava hlayisaka milawu ya Xikwembu leyo lulama va xanisiwa ke? I mhaka ya leswi va nga riki “va misava” leyi ni mintirho ya yona ya politiki. (Yohane 17:16) I ku chaveleriwa muni konghasi ku tiva leswaku hambi leswi Sathana ni misava ya yena va nga ta lwisana ni malandza ya Yehova, va nga ka va nga hluli! (Yeremia 1:19) Leswi swi kombisiwe swi ri ntiyiso etikweni leri, naswona mutirhela-mfumo loyi a nga ni vutihlamuleri u fanele ku bumabumeriwa hikwalaho ka ku twisisa ka yena xiyimo xa vukala-tlhelo bya Timbhoni ta Yehova.
◻ Marito ya Yeremiya ya tikombe ya ri ntiyiso eka ntokoto lowu humaka etikweni ra Afrika laha ntirho wa Timbhoni ta Yehova wu yirisiweke kona. Endzhaku ko hlamusela ku nonon’hwa loku vamakwerhu va hlangavetanaka na kona loko va ringeta ku pfuna vanhu ku dyondza leswi engetelekeke hi swikongomelo leswi hlamarisaka swa Yehova, xiviko xi ri: “Hikwalaho ka xiyimo xa vukalatlhelo xa vanhu va Yehova, vamakwerhu vo tala va khotsiwa nkarhi na nkarhi, hikwalaho ka timhaka leti landzelelanaka. Va biwa hi ndlela yo vavisa, va rhukaniwa, naswona va tshikileriwa hi tindlela hinkwato leswaku va onha mapfalo ya vona ya Vukriste. Eka mhaka yin’wana, endzhaku ka loko ku himetela loku tsemaka nhlana ku tsandzeke ku tshova vutshembeki bya makwerhu, masocha man’wana ma kunguhate ku n’wi dlaya. Loko ndhuna-nkulu yi vone kungu ra vona, yi nghenelerile hi yoxe kutani yi endla leswaku a rhurhiseriwa eka doroba rin’wana swi nga tiviwi, xisweswo yi ponisa vutomi bya yena.’’
Ku xanisiwa loku a ku ti sivelanga Timbhoni ta Yehova ku chumayela mahungu lamanene hi laha Xikwembu xi leriseke ha kona. (Matewu 24:14) Yehova wa va tiyisa hi moya wa yena naswona u katekisa ku yima ka vona va tshembekile. Xiviko lexi humaka eka tiko leri nakambe xi ri: “Ku nga khathariseki ku karhateka lokukulu emirini, ndlala, vuvabyi, nyimpi ya matimba ya xin’wanamanana, ni nxaniso, ku vile ni ku engeteleka ka tiphesente ta 17 eka avhareji ya nhlayo ya vahuweleri.’’ Lava veke kona eka Xitsundzuxo va engeteleke hi 21 wa tiphesente, naswona tiphesente ta 21 ta vahuweleri hinkwavo ti tirhe tanihi maphayona hi April ya 1984.
Kutani vamakwerhu va tsakile hambi leswi va xanisiwaka. Va tshembela eka Yehova naswona va tsundzuxiwa marito ya Yeremiya lama nge: “V̌a ta lwa na wena, kambe v̌a nga ka v̌a nga ku hluri, hikuv̌a nḍi na wena e ku ku lwela, ku v̌ula Yehova.”—Yeremia 1:19.
[Xifaniso eka tluka 27]
Yehova u tiyisa Timbhoni ta yena leti xanisiwaka