Ku Akela Vumundzuku Lebyi Nga Heriki
‘Yindlu yin’wana ni yin’wana yi na muaki, Muaki wa swilo hinkwaswo i Xikwembu.’—VAHEVERU 3:4, Weymouth.
1, 2. (a) I mani loyi a pulaneke ngalava, naswona swiletelo leswi nyikeriweke a swi ri na vuxokoxoko byo tanihi kwihi? (b) Hikwalaho ka yini swi ri swa nkoka leswaku hi yingisa, tanihi leswi Nowa a endliseke swona?
MALEMBE lama nga vaka 4 400 ku sukela loko Yehova a lerise Nowa ku aka ngalava yo hlayisa vutomi. Kambe Xikwembu a xi swi tshikelanga Nowa ku aka muxaka wihi na wihi wa muako lowu a wu ta phaphamala. Ku ri na sweswo, xi nyike swiletelo swo karhi swa nhundzu yo aka, pulani, ku leha, ku anama, ku tlakuka, mafasitere, ni leswi faneleke ku totiwa endzeni ni le handle. “Kutani Noa a endlisa ŝeŝo; a endla hikwaŝo hi laha Šikwembu ši ṅwi leriseke ha kona.”—Genesa 6:13-16, 22.
2 Mawaku xikombiso lexinene xa timbhoni ta Yehova ta manguva lawa! Tanihi Nowa, hi rhwexiwile ntirho lowu ponisaka, kambe sweswi hi langutele ku hlayiseka ka ‘timiliyoni leti hanyaka sweswi leti nga ta ka ti nga fi.’ I swa nkoka muni swonghasi leswaku hi yingisa, tanihi Nowa! I swa xihatla swonghasi leswaku hi landza ntila wa loyi a tlulaka Nowa, Yesu Kriste, eku tirheni tanihi ‘vatwarisi va leswo lulama’!—2 Petro 2:5.
Ntirho Wo Aka Wa Moya
3. (a) Ku ta va ni vuyelo byihi ku aka ehenhla ka marito ya Yesu? (b) Hikwalaho ka yini ku dyondzisa ka Yesu a ku aka ripfumelo?
3 Sweswi i malembe ya 1 956 ku sukela loko Yesu a tshukise tiko ra Galeliya hi ku huwelela ka yena a ku: “Hundzukani, hikuva Mfumo wa matilo wu le kusuhi.” U fanise un’wana ni un’wana la yingisaka marito yakwe a va a aka ehenhla ka wona ni “wanuna lowo tlhariha la akeke yindlu ya yena eribyeni.” Ripfumelo ra wanuna yoloye ri tiyile, a ri ninginiki, a ri suki. A ri nge borokeli (hohloki) ehansi ka ku tshikileriwa. Ku chumayela ka Yesu a ku aka ripfumelo. Ku fikele timbilu ta vanhu, ku ri loku hambaneke ni swivulavulo swo kwetsima swa varhangeri va vukhongeri bya Vayuda. Vanhu lava tolovelekeke va hlamarise hi ndlela ya Yesu yo dyondzisa. Hambi ma ri masocha lama a ma rhumiwe ku n’wi khoma ya tlhele ya nga ri na yena, ya ku: “A ku si va na munhu ni siku ni rin’we la vulavulaka ku fana ni munhu loyi.”—Matewu 4:17; 7:24, 25, 28; Yohane 7:46.
4. (a) Yesu u akele vumundzuku hi ndlela yihi? (b) I ku aka kwihi lokukulu ku endlekeke hi Pentekosta ya 33 C.E.?
4 Yesu a a akela vumundzuku. U hlengeleta vatirhi-kulobye, tanihi Petro, loyi nakambe a a vuriwa Kefasi, leswi vulaka “ribye.” Eka mudyondzisiwa loyi, Yesu u te: “U Petro, kutani ehenhla ka ribye reri, ndzi ta aka kereke ya mina.” Hi ku famba ki nkarhi Petro u vile un’wana wa “maribye lama hanyaka” lama akiweke ehenhla ka Yesu, “ribye ra yinhla” ra bandlha. Kereke yoleyo yi sunguriwe hi Pentekosta ya 33 C.E. Yesu la pfuxiweke, evokweni ra xinene ra Xikwembu etilweni, a chela moya lowo kwetsima ehenhla ka vadyondzisiwa lava a va rindzile.—Matewu 16:18; 1 Petro 2:4-6; Mintirho 2:2-4, 32, 33.
5. I swiendlo swihi swa manguva lawa leswi katsaka bandlha ra Vukriste hi ku enta?
5 Namuntlha, bandlha ra Vukriste ri katsekile hi ku enta eku hetisekeni ka swikongomelo swa Yehova. I nkarhi wa “apocalipsi,” kumbe “nhlavutelo,” loko “swilo leswi fanelaka ku humelela ku nga ri khale” swi hlavuteriwa eka “malandza” ya Xikwembu emisaveni. (Nhlavutelo 1:1-3, nhlamuselo ya Ref. Bi.) I nkarhi lowu malandza lawa ya faneleke ku ‘chumayela mahungu lamanene ya Mfumo wa Xikwembu emisaveni hinkwayo leswaku ya va vumbhoni,’ xi nga si tisa ku avanyisa eka mafambiselo yo biha ya Sathana. I nkarhi wa leswaku Hosi, Yesu Kriste, loyi sweswi a vekiweke exiluvelweni ematiIweni, a hambanisa lava titsongahataka, vanhu lava fanaka ni tinyimpfu eka vatiarisi, vanhu lava fanaka ni timbuti lava nga laveki Mfumo wolowo, ni ku hlengeleta “tinyimpfu” leti eka bandlha rakwe ra ‘vamakwavo’ wa moya “nhlomulo lowukulu” wu nga si ta.—Matewu 24:14, 21; 25:31-40.
6. Namuntlha “ngalava” i yini, naswona hi nga pona hi ndlela yihi?
6 I yini ngalava ya manguva lawa ya ku pona? I xiyimo xa moya lexi Timbhoni ta Yehova ti tikumeke ti ri ka xona ku sukela hi 1919, paradeyisi ya moya. Ku fana ni swirho swa ndyangu wa Nowa, masalela ya Vakriste lava totiweke ni vanghana va vona va fanele ku tshama va pfaleriwe eka xona, va tirha hi ku yingisela, hi mbilu hinkwayo, eku hetiseni ka ntirho lowukulu wa moya lowu Yehova a wu kunguhateke. Ntirho lowu i ku “hlanganisa swivumbiwa hinkwaswo, swa le matiIweni [ku sukela hi 33 C.E. hi vatotiwa lava yaka etilweni] ni swa la misaveni [kahle-kahle ku sungula hi 1935 hi “ntshungu lowukulu” wa matiko hinkwawo lowu yimeriweke hi vutomi lebyi nga heriki emisaveni] nhloko ya swona a va Kriste.”—Vaefesa 1:10; Nhlavutelo 7:9, 14.
‘Ku Aka Ni Ku Simeka’
7. I ntirho wihi lowu nga hi matlhelo mambirhi lowu yaka emahlweni, naswona hi nga hlanganyela entsakweni tanihi leswi Nowa na Yeremiya va swi endleke hi ndlela yihi?
7 Yehova u lerise masalela ya vatotiwa va Vakriste lava ha riki emisaveni, tanihi loko a lerise muprofeta Yeremiya, “ku lerisa matiko ni v̌uhosi eku ṭuv̌ula ni ku hlanhla, ni ku onha ni ku herisa, ni ku aka ni ku simeka.” Kutani ntirho lowu nga hi matlhelo mambirhi wu ya emahlweni: (1) eku huweleleni ka ku avanyisa ka Yehova ka mafambiselo ya misava yo biha ya Sathana ni le (2) ku akeni na ku vumba vandla ra vanhu va Xikwembu lava nga ta pona. (Yeremia 1:10; 24:6, 7; Esaya 26:20, 21) I ntsako muni wonghasi wa masalela ya lava totiweke ni ntshungu lowu kulaka wa vanghana va vona loko va hlanganyela entirhweni lowu namuntlha! I muxaka wa ntsako lowu Nowa la chivirikaka ni ndyangu wakwe va wu tokoteke esikwini ra vona.
8. (a) I ku andza kwihi ka vahuweleri ka malembe ya 22 lama hundzeke ku faneleke ku xiyiwa? (b) Hi ku ya hi matluka 20-23, i matiko wahi man’wana lama tsakeleke ku engeteleka loku xiyekaka hi 1985?
8 Xana timiliyoni ti ta pona esikwini ra vukari bya Yehova? Ku na ku langutela lokunene ka sweswo, tanihi laha Xiviko xa Lembe xa Ntirho wa Timbhoni ta Yehova xa 1985 xi kombaka ha kona. Vuxokoxoko bya leswi byi humelela kwala eka matluka 20-3. Hi leswi tsakisaka ngopfu ku vona ku andza loku hlamarisaka ka nhlohlori ya vatirhi va nsimu. Leswi se swi tlakukele eka ntsengo wa 3 024 131 wa vahuweleri va Mfumo. Maraka ya 1 000 000 yi fikeleriwe ro sungula hi 1963, 2 000 000 hi 1974, kutani sweswi yi hundza 3 000 000 hi 1985. Emalembeni wolawo ya 22, a ku ri na ku andza ka tiphesente ta 200. I ku tlangela muni konghasi hi nga na kona eka Yehova loyi, hi moya wakwe, a endlaka leswaku swilo swi kula!—Zakaria 4:6; 1 Vakorinto 3:6.
9. (a) Hikwalaho ka yini ku andza ka maphayona ku ri loku hlamarisaka? (b) I yini lexi bumabumeriwaka eka hinkwavo lava nga byi nghenelaka, futhi hikwalaho ka yini?
9 Xin’wana lexi xiyekeke ngopfu emalembeni wolawo a ku ri ku andza ka vahuweleri va nkarhi hinkwawo va Mfumo. Hambi swiyimo swa ikhonomi swi nyanya emisaveni hinkwayo, nhlayo ya ntlawa lowu wa vurhena wa “maphayona” yi tlakuke hi avhareji ya n’hweti ya 38 573 hi 1963 ku ya ka 322 821 hi 1985—ku andza ka 737 wa tiphesente! Leswi swi komba yini ke? Swi komba leswaku moya lowunene wa ku tinyikela wa vonaka exikarhi ka vanhu va Xikwembu, ku pfumelelana ni marito ya Yesu eka Luka 9:23. Hakanyingi, ku pulana ka vukheta ni ku titshika swa laveka ku endla ku humelela eka ntirho wa vuphayona. Kambe hakelo i yikulu.—Varhoma 12:1, 2; Malakia 3:10.
10. (a) Vahuweleri va bandlha va fanele ku bumabumeriwa hi mhaka yihi? (b) I tinhlohlori tihi tinharhu letintshwa ta ntirho ti xiyiwaka laha, naswona ti komba yini?
10 Timiliyoni ta vahuweleri va bandlha nakambe ti fanele ku Iwa ni mintshikilelo leyi tisiwaka eka vona hi Sathana ni misava yakwe. Kambe na vona va nyikela ‘magandzelo ya vona ya ku vonga’ eka Xikwembu. (Vaheveru 13:15; Varhoma 10:9, 10) Tiawara teto, hambi ti tele kumbe i tintsongo, leti n’wina vahuweleri lava tshembekaka mi ti vikeke n’hweti yin’wana ni yin’wana ti ve xiphemu xa nhlohlori leyintshwa ya 590 540 05 wa maawara ya ntirho wa nsimu wa 1985. Leswi i ku andza ka 16,8 wa tiphesente eka leta 1984! Tinhlohlori letintshwa ta 224 725 918 wa maendzo yo vuyela ni ta 2 379 146 wa tidyondzo ta Bibele ta le makaya ni vanhu lava tsakelaka ti komba leswaku vahuweleri va Mfumo hinkwako-nkwako va Iwela ku va vadyondzisi lavanene kun’we ni vachumayeri lava chivirikaka.—Matewu 28:19, 20.
Ku Akela Ku Rhula Ka Ntiyiso Ni Nsirhelelo
11. Ntshembo wa ntiyiso wa ku rhula ni nsirhelelo wu twarisiwa hi ndlela yihi, naswona ku fikela kwihi?
11 Endzhaku hi 1985, Nhlangano wa Matiko wu tivise 1986 tanihi Lembe ra ku Rhula ra Misava hinkwayo. Eminkarhini ya sweswinyana, UN a yi vula swo tala hi ku rhula ni nsirhelelo. Kambe xitiviso xa risima ku tlurisisa, xa ntshembo wa Matsalwa xa ku rhula ni nsirhelelo, xi kume matimba lamakulu hi 1985 tanihi leswi Timbhoni ta Yehova ensin’wini ya misava ti fambiseke 38 805 561 wa Tibibele, tibuku ni swibukwana, kun’we ni 300 545 609 wa timagazini, kutani va kuma 1 719 930 wa swikhokhelo swa Xihondzo xo Rindza ni Awake! Hi tluka leri tsariweke na hi nomu, Mfumo lowu tlhomiweke ematilweni wa “Hosana ya ku Rhula” ya xiviri wu kume vumbhoni bya wona lebyinene ku ta fika namuntlha. Kunene, “ku andza ka hulumendhe ya yena ni ku rhula a swi nga heli.”—Esaya 9:6, 7, King James Version.
12. Ku andza ku vange xilaveko xihi xikulukumba, naswona vanhu va Yehova va ni vun’we eku ringeteni ko fikelela xilaveko xolexo hi ndlela yihi?
12 Ku kula loku hlamarisaka ensin’wini ku va ni ku engeteleka ka ku seketeriwa ka nhlengeletano. Hi 1985 nhlayo ya mabandlha ya Timbhoni ta Yehova emisaveni hinkwayo yi kule ku suka eka 47 869 ku ya eka 49 716. Leswi swi lave madzana ya tindhawu letintshwa to hlangana eka tona. I swinene swonghasi leswi, ematikweni yo tala, Timbhoni ti katekisiweke eka matshalatshala ya tona yo aka Tiholo ta Mfumo! Laha ku nga va ni xilaveko, vanhu ni mabandlha handle ka vuciva va seketele minongonoko yo aka ya van’wana ni van’wana lerova ku “ringana” ku va kona exikarhi ka vamakwerhu va misava hinkwayo.—2 Vakorinto 8:14, 15.
13. Vanhu va nga nyikela hi ndlela yihi emintirhweni yo aka Tiholo ta Mfumo?
13 Ematikweni lawa swiyimo swi nga swinene, tihofisi ta rhavi ta Sosayiti ya Watch Tower na tona ti seketele mintirho ya Tiholo ta Mfumo. EUnited States ni le Canada, vanhu vo tala va nyikela Munyikelo lowu hlawulekeke wa Holo ya Mfumo, lowu endleke leswaku ku va ni timali to lombisa leswaku ku va ni ku akiwa loku engetelekeke ka Tiholo ta Mfumo. Van’wana va nyikele matimba ni vutshila bya vona, leswaku Holo ya Mfumo yi akiwa ntsena hi mahelo-vhiki man’we. Hi ku tirha mintirho yo tano ‘hi mbilu hinkwayo eka Yehova,’ Timbhoni takwe ta swi kota ku endla leswi vanhu va misava va vonaka swi nga olovi.—Vakolosa 3:23.
14. Swilaveko swa Tiholo ta Nhlengeletano swi fikeleriwe hi ndlela yihi?
14 Eka matiko yo tala, ku pfumaleka ka miako leyi ringaneke ya tinhlengeletano ta xifundza ta Timbhoni ta Yehova ku vange xiphiqo lexikulu. Nakambe, Timbhoni hi ku tsaka ti hlangavetane ni mphika-makaneta leyi hi minongonoko ya vuaki, hi moya wun’we lowu kombiweke hi malandza ya Xikwembu eminkarhini ya khale. Hi xikombiso, loko ku laveka ku kuma switirho swo aka swa tabernakele, nhlengeletano ya Israyele hi vun’we yi hlayise xileriso xa Xikwembu: “Humesani ŝilo ŝa ṅwina leŝi mi ŝi nyikaka Yehova. E munhu uṅwana ni uṅwana l’a ŝi rhanḍaka hi mbilu, o ta tisela Yehova e ku nyika ka yena.” Nhlengeletano yoleyo yi nyikele swo tala ku tlula leswi lavekaka, futhi ntirho wu hetiwe hi xihatla.—Eksoda 35:5-19; 36:7.
15. (a) I ku kula kwihi loku endlekaka eka marhavi ya Sosayiti ya Watch Tower? (b) Ntirho lowu wu hetisisiwe hi ndlela yihi?
15 Loko xilaveko xa Tibibele ni tibuku leti sekeriweke eBibeleni xi andza, yo tala ya marhavi ya 94 ya Watch Tower emisaveni hinkwayo ya boheke ku kurisa miako ya wona. Ntirho wo gandlisa wa le Brooklyn ni le Mapurasini ya Watchtower wa ha ri wona lowukulu swinene, kambe marhavi ya 36 ya Sosayiti sweswi ya tigandlisela timagazini ta wona, kutani marhavi ya 6 ma tlhela ma tilunghisela ku gandlisa ni ku boha tibuku. Eka wona, Jarimani, Italy na Japani ma endla Tibibele. Feme leyintshwa aSelters, eJarimani, yi tirha hi xitalo. Le Ebina, eJapani, vuaki bya xiengetelo xa feme ya swithezi swa tsevu ni xiengetelo xa swithezi swa nhungu xa Muti wa Bethele lexi nga ta tamela vatirhi van’wana va 280 byi karhi byi ya emahlweni. Tanihi leswi vanhu va Yehova va seketeleke ku akiwa ka tempele ya Solomon “hi timbilu hinkwato,” kutani namuntlha vanhu va Xikwembu ematikweni yo hambana va endla ‘minhlengo ya ku tirhandzela eka Yehova,’ nakona u engetela minkateko yakwe leswaku ntirho lowu wu hetisisiwa.—1 Tikronika 22:14, 15; 29:7, 9, vona tinhlamuselo ta Ref. Bi.
16. Hikwalaho ka yini muako lowu wun’wana ni ku lunghiselela a swi laveka?
16 Xana ku aka loku hinkwako ni ku lunghiselela hakunene swa fanela? Swi tano, loko “nandza lowo tshembeka, lowa vutlhari” a ta hambeta a nyikela ‘swakudya swa moya hi nkarhi lowu faneleke.’ Swakudya swo tano i swa risima eku kuleni ka ‘ndyangu wa Xikwembu’ ni le ku chumayeleni ka misava hinkwayo hi tindzimi leti íikaka eka 200. (Matewu 24:45; Vaefesa 2:19; 4:15, 16) Vanhu va Yehova hi voxe va nyikele vutshila bya vona eku tshuleni ka muchini wa tielektroni wo thayipa tindzimi to tala (MEPS), lowu sweswi wu yisiweke eka marhavi ya 26 ya Watch Tower. Leswi swi endle leswaku ku va ni ntirho lowu nga ni vun’we wa ku gandlisa emisaveni hinkwayo kutani wu pfune ku hangalasa mahungu ya Mfumo xikan’we eka swiphemu swo tala swa misava.—Ringanisa Esaya 52:7-9.
17. I xilaveko xihi xi nga kona eka yindlu-nkulu ya Brooklyn, kutani leswi swi khomiwa hi ndlela yihi?
17 Ku vonakala ku nga ri na ku hela eku andzisiweni ka manguva lawa ka nhlengeletano ya Yehova. Hambi sweswi, ndyangu wa Bethele eBrooklyn, New York, eyindlu-nkulu ya Sosayiti wu kule lero kala wu tata tindlu hinkwato leti kumekaka. Loko ku ri ku rhandza ka Yehova, muako wo tlakuka swinene lowu nga tamelaka dzana ra vatirhi van’wana va Bethele wu nga akiwa eka miako ya Sosayiti eColumbia Heights. Kambe loko leswi swo ka swi nga humeleli, hi ta lava nkongomiso wun’wana wa Yehova emhakeni leyi. Swikhongelo ni ku seketela loku tshembekaka ka vamakwerhu emisaveni hinkwayo ehenhleni ka ku engeteriwa loku hinkwako hakunene swa nkhenseka.—Ringanisa Mintirho 21:14; 2 Vatesalonika 3:1.
18. Hikwalaho ka yini namuntlha ku ri na mintirho yo tala yo aka, ku nga khathariseki leswi Armagedoni yi nga kusuhi?
18 Un’wana a nga ha ku, ‘Kambe hikwalaho ka yini ku ri na mintirho yo tala yo kurisa hi ndlela leyi kuve hi langutane ni Armagedoni?’ Nhlamulo hi leswaku nhlengeletano ya Yehova a yi ‘tshiki ku tirha’ leswi Armagedoni yi tshinelaka. Wolowo i ‘nkarhi wo yima’ wa nhlengeletano ya Sathana ntsena. Nhlengeletano ya Yehova yi akela vumundzuku lebyi nga heriki. Hambi loko miako leyi endliweke hi vanhu yi pona bubutsa ra Armagedoni kumbe e-e, ha swi tiva leswaku nhlengeletano ya Xikwembu yi ta pona yi tama ya ha ya emahlweni naswona Yehova u ta yi tirhisa ni lava hi vutshembeki va yi seketelaka, a tlhoma ku rhula loku nga heriki na nsirhelelo eParadeyisini leyi vangamaka ya la misaveni ya xitshembiso xa Xikwembu.—Nhlavutelo 7:9, 14-17; 21:1, 4, 5.
Ku Aka Hi Xikongomelo
19. I mphika-makaneta yihi yi faneleke ku voniwa eka xiviko xa Xitsundzuxo xa 1985?
19 Nowa u ake a ri na xikongomelo, kutani na hina hi fanele ku va tano. Mhaka yin’wana ya Xiviko xa Ntirho wa Lembe ra 1985 yi tlhontlha mianakanyo. I ntsengo wolowo wu hlamarisaka wa lava a va ri kona eXitsundzuxweni xa rifu ra Yesu hi April 4, 1985 va 7 792 109—ku andza ka 375 135 ku tlula ntsengo wa 1984. Swa hlamarisa hakunene! Kambe nhlayo yoleyo yi na mphika-makaneta. Hi nhlohlori ya 3 024 131 wa vahuweleri lava hlanganyelaka entirhweni wa Mfumo, ku na van’wana va 4 000 000 lava hlanganyelaka na hina, hi xiringaniso xo karhi, lava ha faneleke ku akela vumundzuku hi ku hlanganyela evutirhelini bya Vukriste. Hi nga va pfuna hi ndlela yihi?
20. I xilaveko xihi xa xihatla xi nga kona xo hlangavetana ni mphika-makaneta leyi, naswona hi nga hlangavetana na xona hi ndlela yihi yo olova?
20 Vo tala va vanhu lava vo tsakela ha va tiva hina hi hexe. Va nga ha va va ri swirho swa ndyangu, vanhu lava hi fambisaka tidyondzo ta Bibele na vona, lava endlaka swikhokhelo swa timagazini ta hina, kumbe van’wana. Van’wana va nga ha va va sungule ku tsakela endzhaku ka Xitsundzuxo lexi hundzeke. Xana sweswi hi nga endla matshalatshala yo hlawuleka yo va wundla, hi va aka hi dyondzo ya Bibele, leswaku va ta kuma nsirhelelo elunghiselelweni ra Yehova “e ku fika nkari lowu makhombo ma nga ta va ma hundile”? (Psalma 57:1) “Nhlomulo lowukulu” wu ta va xiendlo xa Yehova xa ku Iwela, lexi nga ni nkoka ni lexi lovisaka ku tlula ni lexiya xa Ndhambi ya Nowa. Hi lava ku aka lava tsakelaka hi ntiyiso lowu hanyisaka, leswaku va ta ‘vitana hinkwavo evito ra Yehova’ kutani va nga kukuriwi. (Matewu 24:21, 22, 39; Sofonia 2:3; 3:8, 9) A hi dyondzeni Rito ra Xikwembu na vona, hi tirhisa buku ya U Nga Hanya Hi Masiku aParadeyisini eMisaveni kumbe buku yin’wana ya Bibele leyi akaka ripfumelo.
21. Hi nga aka ripfumelo ro fana ni ra Nowa hi ndlela yihi eka hina ni le ka van’wana?
21 Yehova Xikwembu i Muaki Lonkulu ni Muhlayisi lonene wa vanhu. (Psalma 127:1; 145:16; Eklesiasta 3:10-13) Hi yena loyi a kongomiseke Nowa eku pulaneni na ku aka ngalava. Hi ntirhisano wo swi rhandza wa Nowa Lonkulu, Yesu Kriste, u lunghiselele ku kutsula vanhu lava yingisaka eka xidyoho ni rifu. Hi N’wana loyi nakambe u ake “ngalava” ya manguva lawa, paradeyisi ya moya leyi hanyaka laha vavanuna ni vavasati va ripfumelo va nga kumaka ku hlayiseka, va ri ni ku langutela ka vutomi lebyi nga heriki. (Matewu 20:26-28; Yohane 3:16; 17:3) Onge hi nga pfuna van’wana vo tala ku aka ripfumelo kutani va vumba xiboho xa vuxaka na Yehova ni N’wana wakwe. Onge hi nga va pfuna ku rhandza ku lulama ni ku venga swo biha. (Vaheveru 1:9) Xisweswo ke, hi ripfumelo ro fana ni ra Nowa, hi nga ya emahlweni hi akela vumundzuku lebyi nga heriki swin’we.—1 Timotiya 4:15, 16.
SWIVUTISO SWA MPFUXETO—
◻ Yesu u akele vumundzuku hi ndlela yihi?
◻ I yini lexi u kumeke xi hlamarisa eka xiviko xa 1985?
◻ Hikwalaho ka yini minongonoko ya vuaki bya le henhla yi laveka?
◻ Xana hinkwerhu ka hina hi nga aka hi xikongomelo hi ndlela yihi?
[Bokisi eka tluka 24]
Bandlha etikweni ra Vantima laha ntirho wa Yehova wu yirisiweke ri na vahuweleri va 95, lava hinkwavo ka vona va hlanganyelaka entirhweni n’hweti na n’hweti. Va endla avhareji ya 130 etinhlengeletanweni ta vona kambe 160 eka tinkulumo ta vona ta le rivaleni. Va na maphayona manharhu ya nkarhi hinkwawo naswona va ha ku va ni maphayona yo pfuneta ya nhungu. Hi tin’hweti ta ntsevu ntsena, vahuweleri lavantshwa va 21 va sungule ntirho wa nsimu
[Bokisi/Swifaniso eka tluka 16, 17]
KU AKA KA MISAVA HINKWAYO HI TIMBHONI TA YEHOVA
Emisaveni hinkwayo, maphayona ya misava hinkwayo ya 322 821 n’hweti na n’hweti a ma vika (ku andza ka 24,7 wa tiphesente)
Vahuweleri emisaveni hinkwayo va kule ku fika eka 3 024 131(ku andza ka 6,4 wa tiphesente)
Maendzo yo vuyela eka lava tsakelaka, 224 725 918 (ku andza ka 14,8 wa tiphesente)
Tidyondzo ta le makaya ta Bibele leti fambisiweke, 2 379 146 (ku andza ka 16,2 wa tiphesente)
[Swifaniso]
Maphayona ya hangalakela vutirheli bya yindlu na yindlu, Brooklyn, New York
Nhlengeletano ya tindzimi ta khume mune Montreal, Quebec, eCanada
Ku veka Vumbhoni, Castle Comb, Wiltshire, England
Ntlawa wa dyondzo eYap, Micronesia
Miako yin’wana leyi tirhisiwaka eku seketeleni ka ntirho wa moya wa ku aka emisaveni hinkwayo:
Brooklyn, ku rhumeriwa Tibibele ni tibuku ta Bibele ku endliwa eka muako lowu wa 1 000 000 wa swikere-fidi e360 Furman Street
Holo leyi ya Mfumo (Downpatric, Northern Ireland) yi akiwile hi tiawara ta 31
Holo leyi ya Nhlengeletano eRoma hi yin’wana ya makumekume ya tiholo to tano leti tirhisiwaka emisaveni
Xiengetelo lexi xa Muti wa Bethele ya le Japani sweswi xa karhi xa akiwa
[Chati eka tluka 20-23]
XIVIKO XA NTIRHO WA LEMBE RA 1985 WA TIMBHONI TA YEHOVA EMISAVENI HINKWAYO
(Vona vholomo leyi heleleke)
[Chati eka tluka 25]
Matiko ya nhungu ya vike nhlohlori yo hundza 100 000 wa vahuweleri hi 1985
U.S.A. 723 220
Brazil 177 904
Mexico 173 037
Italy 127 526
Nigeria 121 729
Germany 115 604
Britain 103 522
Japan 103 117