Mintsombano Ya Muganga Ya “Ku Rhula Ka Xikwembu” Ya 1986

SWA fanela swonghasi leswaku xihloko xa mintsombano ya hina ya muganga ya 1986 xi ku “Ku Rhula Ka Xikwembu”! Ina, Yehova Xikwembu xa hina “a hi Xikwembu xa mpfilu-mpfilu, kambe i xa ku rhula.” U hambana swinene ni “xikwembu xa misava leyi,” Sathana Diyavulosi, la nga xikwembu xa mpfilu-mpfilu, dzolonga ni mphensamphensa.—1 Vakorinto 14:33; 2 Vakorinto 4:4.

Hi laha ku fanelaka swinene, eRitweni rakwe Yehova u hlamuseriwa hi ku phindha-phindha tanihi “Xikwembu xa ku rhula.” (Vafilipiya 4:9; 1 Vatesalonika 5:23; Vaheveru 13:20) ERitweni rakwe, ku tshembisiwa ku rhula, ku khutaziwa leswaku ku va kona, ni ku kandziyisiwa ku sukela eku sunguleni ku ya fika emakumu, ku vuriwa minkarhi leyi nga vaka 250. Kunene, Yehova i “Xikwembu lexi nyikaka ku rhula” eka vanhu va xona.—Varhoma 15:33; 16:20.

Hikwalaho ke, i swa nkoka swonghasi leswaku mani na mani wa malandza ya yena, ina, un’wana ni un’wana wa Timbhoni ta Yehova, a va munhu wa ku rhula! Leswi a swi vuli munhu wa ku rhula ntsena, kambe ‘ku lava ku rhula ni ku va hi ku landzelela,’ tanihi leswi muapostola Petro a hi lerisaka ku swi endla. (1 Petro 3:10, 11) Sweswo swi vula leswaku hi fanele ku va “vaendli va ku rhula,” tanihi laha Kingdom Interlinear ya hina yi andlalaka Matewu 5:9 ha kona.

A swi olovi ku va vaendli va ku rhula, ku kondletela ku rhula, ku ringeta ku hlayisa ku rhula. Ku na ku tsana ka xiyimo xa vumunhu lebyi nga hetisekangiki lebyi vangaka nkitsikitsi wa vumunhu. Tanihi laha risimu ra hina ra Mfumo (No. 213) ri swi vekaka ha kona ri ku: “Ku hambana minkarhi yin’wana ka humelela; a hi hetisekanga, ha swi xiya.” Risimu leri ri ya emahlweni ri laya ri ku: “Ku ku lulamisa hi xihatla i rifuwo lerikulu. Vun’we hi ta hlayisa.” Nakambe ku na mintshikilelo ya misava ya Sathana, kun’we ni mintlhamu hinkwayo ya yona, leswi swi hi sivelaka ku va na “ku rhula ka Xikwembu loku tlulaka ku twisisa hinkwako.” (Vafilipiya 4:7) Naswona, kavula, ku na Sathana ni mademona yakwe, lava endlaka leswi va nga swi kotaka ku kavanyeta ku rhula ka hina; hi fanele ku Iwisana na vona.—Vaefesa 6:12.

Eminkarhini ya khale, Xikwembu xi lunghiselele leswaku vanhu va xona va hlengeletanela swiendlo leswi hlawulekeke leswaku va akiwa emoyeni ni ku tiyisiwa eku tiyimiseleni ka vona ko yingisa swileriso swa Yehova. Hi ku fanana namuntlha, exikarhi ka swipfuneto swo tala leswi xi swi lunghiseleleke ku hi pfuna ku va vaendli va ku rhula ku na mintsombano ya muganga ya lembe na lembe. Hi twa Rito ra Xikwembu ri hlamuseriwa eka minhlangano leyi. Hi masiku ya mune hi dyondzisiwa hi Tata wa hina wa le matilweni hi ku tirhisa tinkulumo, ku vulavurisana, swikombiso na tidrama. Ee, ni tinsimu ta hina hi ku kongoma kumbe hi ku ceceleta ti hi khongotela ku va ni ku rhula.

Lembe leri eka Ntsombano wa hina wa Muganga wa “Ku Rhula Ka Xikwembu” hi ta vona moya wa vuxaka loko hi ri karhi hi amukelana. Ku vona hi laha tindzawulo hinkwato ta ntsombano ti tirhaka hi ku twanana ha kona, kunene hi ta kuma moya wa ntsombano.

Kutani a hi teni hi ri lava hakunene hi khathalelaka xilaveko xa hina xa moya naswona hi tilunghiselele ku tirhisa nongonoko hinkwawo hi xitalo, hi fika hi nkarhi leswaku hi kuma xiyenge xo sungula-sungula xa Ravumune nindzhenga ni ku tshama ku kondza ku fika risimu ro hetelela ni xikhongelo hi Sonto nindzhenga.

Nakambe, xana a hi fanelanga ku tlhela hi lwela ku yima hi tiyile ke? Hi tindlela tihi? Hi ku va lava hakunene hi tlangelaka swakudya swa moya leswi phameriwaka. Vo tala va hina hi ta va hi lahlekeriwe hi nkarhi ni mali yo tala. Kutani a hi voneni leswaku hi fika hi nkarhi naswona hi ri eka xiyimo lexinene emirini. Sweswo swi vula leswaku a hi fanelanga ku tinyiketela swakudya kumbe swakunwa kumbe ku xuxa ngopfu. Kambe, a hi tiyisekeni leswaku hi tirhisa ku ringanisela naswona hi etlela hi nkarhi leswaku hi va lava phyuphyeke ni lava faneriwaka hi ku amukela swakudya hinkwaswo swa moya leswi phameriwaka. Loko nongonoko wu ri karhi wu ya emahlweni, a hi tshamisekeni hi yingisela, hayi ku tsendzeleka ni rivala, kumbe ku khoma bulu ni munghana un’wana la rhandzekaka loyi hi nga vaka hi nga si n’wi vona hi nkarhi wo leha. Nkarhi wo vulavula ni vanakulorhi wu le mahlweni ni le ndzhaku ka minongonoko. Ina, a hi teni hi ri lava hi xitalo hi tiyimiseleke ku akiwa hakunene emoyeni.

Eminkarhini ya khale Xikwembu xi lunghiselele leswaku vanhu va xona nkarhi na nkarhi va hlanganela swiendlo swo hlawuleka leswaku va akiwa emoyeni. Kutani hi ntiyiso, mintsombano ya lembe ya muganga yi le xikarhi ka swipfuneto swo tala namuntlha leswi Yehova a swi lunghiseleleke ku hi pfuna ku va vaendli va ku rhula.