Ku Sandza Vito Ra Xikwembu—Hi Ku Ka U Nga Ri Tirhisi
YEHOVA U tirhisane hi tintswalo ni vanhu va Israyele hikwalaho ka vito rakwe, leswaku ri nga tshuki ri sandziwa exikarhi ka matiko. (Ezekiel 20:9, 13, 14, 22) Hambi swi ri tano, hi nkarhi lowu faneleke, Vaisrayele va tshike ku tirhisa vito ra Xikwembu, leswi endleke leswaku eku heteleleni mavulele ya rona ma lahleka. Ku nga tirhisiwi loku ka vito ra Xikwembu a ku ringana ni ku ri sandza.
Malunghana ni leswi, R. Laird Harris u xiyile a ku: “I mhaka leyi lavaka ku tiviwa leswi mavulele ya khale ya vito ra Xikwembu xa Israyele ya lahlekeke hi laha ku heleleke. Ripfumelo ra Israyele a ku ri rona ntsena ripfumelo leri faneleke ra khale. A ku ri dyondzo yo sungula ya ku pfumela eka Xikwembu xin’we naswona hi rona ripfumelo ra khale ntsena ra ku va ni vukhongeri bya misava hakunene. A ri hlawulekile hi ku va ri ri ra moya hinkwawo naswona ri ri hava muyimeri wa Xikwembu lexi vonekaka. Khombo ra kona, nakambe a ri hlawulekile, eku lahlekeriweni ka rona ka mavulele ya vito ra Xikwembu. Xiyimo xa chavisa hakunene naswona a xi nga ta voniwa ni kantsongo hi vanhu volavo lava tiyimiseleke lava a va vona onge a va fanelanga ku vitana vito leri nga vulekiki leswaku va nga ri thyakisi. Vuyelo byi vonaka byi ve xisandzu xa muxaka lowu hambaneke hakunene. Ku ka u nga tirhisi vito ra Xikwembu swi tikomba swi ri ku ri sandza tanihi leswi ku tirhisa Vito hi ku ringanyeta a ku ta va ku endliwile. Kambe timhaka ti le rivaleni. Vaheveru va khale, hi ntumbuluko, va vitanile ni ku tsala vito ra Xikwembu.”—The Law and the Prophets, leyi hleriweke hi John H. Skilton, Nutley, New Jersey, 1974, tluka 215.
Vaisrayele a va swi tiva leswaku loko vo rivala vito ra Yehova, Xikwembu hi xoxe a xi ta ‘swi tiva.’ (Psalma 44:20, 21) Eku heteleleni, loko leswi swi humelerile, xi “tilavela, exikarhi ka vamatiko, vanhu lava va nga ta vuriwa va xona hakunene.” (Mintirho 15:14) Hambi leswi hina namuntlha hi nga swi tiviki ku vitana vito ra Xikwembu hi ku kongoma hi Xiheveru, ku hundzuluxeriwa lokunene ni loku faneleke ka Tetragrammaton (switatisi swa mune swa Xiheveru leswi yimelaka vito) hi Xitsonga i Yehova. Namuntlha, vanhu lava tlulaka timiliyoni tinharhu va tiviwa tanihi Timbhoni ta Yehova, naswona va tsakela ku byarha vito ra Xikwembu xa vona ni ku va etlhelweni ra xona.