Vutomi Ni Vutirheli Bya Yesu

Ku Vitaniwa Ka Matewu

Hl KU hatlisa endzhaku ka ku hanyisa munhu la khwanyaleke swirho, Yesu u suka eKapernawume a ya elwandle ra Galeliya. Nakambe mintshungu ya vanhu yi ta eka yena kwalaho, kutani u sungula ku yi dyondzisa. Loko a ri karhi a famba, u vona Matewu, loyi nakambe a vuriwaka Levhi, a tshame ehofisini ya ndzuvo. “Ndzi landze,” i xirhambo xa Yesu.

Hi ku fanana, Matewu ana se u tolovelane ni tidyondzo ta Yesu, hi laha Petro, Andriya, Yakobo na Yohane a va ri ha kona loko va vitaniwa. Naswona hi ku fana na vona, Matewu hi ku hatlisa u amukela xirhambo lexi. Wa yima, a tshika mindzhwalo ya yena tanihi muluvisi, ivi a landzela Yesu.

Endzhakunyana, kumbexana a a tlangela ku amukela ka yena xirhambo, Matewu u endla nkhuvo lowukulu ekaya ka yena. Ku tlhandlekela eka Yesu ni vadyondzisiwa va Yena, khale ka vanghana va Matewu va kona. Vavanuna lava hi ntolovelo a va sandziwa hi Vayuda-kulobye hikwalaho ka ku hlengeleta mindzuvo ya mfumo wa Rhoma lowu vengiwaka. Ku tlula kwalaho, hakanyingi hi ku ka va nga tshembeki va lava mali yo tala eka vanhu ku tlula mpimo wa ndzuvo lowu tolovelekeke.

Loko va vona Yesu enkhubyeni ni vanhu vo tano, Vafarisi va vutisa vadyondzisiwa va yena va ku: “Xana Mudyondzisi wa n’wina u dyela yini ni valuvisi ni vadyohi ke?” Loko a twa xivutiso, Yesu a hlamula: “Lava hanyaka a va lavi n’anga, kambe yi laviwa hi lava vabyaka. Yanani, mi ya dyondza rito leri nge: ‘Ndzi tsakela tintswalo, ku nga ri gandzelo,’ hikuva a ndzi tanga ku ta vitana lava lulameke, kambe vadyohi.”

Entiyisweni, Matewu u rhambe valuvisi lava ekaya kakwe leswaku va ta yingisela Yesu ivi va kuma murhi wa moya. Kutani Yesu u dya na vona leswaku a ta va pfuna ku kuma xinakulobye lexinene ni Xikwembu. Yesu a nga va sandzi vanhu vo tano, hi laha Vafarisi lava tivulaka lavanene va endlaka ha kona. Kambe, hi ku susumetiwa hi tintswalo, u tirha tanihi n’anga ya moya leyi tirhaka eka vona.

Xisweswo ku kombisa ka Yesu musa eka vadyohi a hi ku amukela swidyoho swa vona kambe i xikombiso xa mintlhaveko leyi fanaka ya musa leyi a yi kombiseke lava vabyaka enyameni. Hi xikombiso, tsundzuka, loko hi musa a tshambuluta voko ivi a khumba munhu wa nhlokonho, a ku: “Ndza swi rhandza, hlantsweka u basa!” Onge na hina hi ku fanana hi nga kombisa musa hi ku pfuna vanhu lava pfumalaka, ngopfu-ngopfu hi va pfuna hi ndlela ya moya. Matewu 8:3; 9:9-13; Marka 2:13-17; Luka 5:27-32.

◆ Hi kwihi laha Yesu a nga kona loko a vona Matewu?

◆ Ntirho wa Matewu i yini, naswona hikwalaho ka yini vanhu vo tano va sandziwa hi Vayuda van’wana?

◆ I ku vilela kwihi loku endleriwaka ku Iwisana na Yesu, naswona u hlamula njhani?

◆ Hikwalaho ka yini Yesu a dya ni vadyohi ke?

[Xifaniso lexi heleleke eka tluka 9]