Varhumiwa Va Gilead—Va Tinyiketele Xikongomelo Xin’we

“VHIKI leri hundzeke a mi ri swichudeni, vhiki leri taka mi ta va varhumiwa!” Marito wolawo ya yi funghe khwatsi mintlhaveko ya swichudeni leswi thwaseke swa 23 swa ntlawa wa vu-81 wa Xikolo xa Bibele xa Gilead xa Watch Tower. Eka vona, kun’we ni le ka van’wana lava nga kona va 4 262, tinkulumo to thwasisa leti khomeriweke eHolweni ya Nhlengeletano ya Timbhoni ta Yehova ya Muti wa Jersey, September 7, 1986, a ri ta va siku leri tsundzukekaka nkarhi wo leha.

Martin Poetzinger u pfule hi xikhongelo ivi endzhaku Carey Barber, mutshama-xitulu wa tinkulumo to thwasisa, a sungula nongonoko hi ku xiya leswaku hi malembe yo tala magidi ya vavuri lava va rito ya hundze hi le ka vuleteri bya wona bya Gilead ya tinyiketele xikongomelo xin’we: ku rhumeriwa emakun’wini ya misava tanihi varhumiwa va ntiyiso lava chumayelaka ntshembo wa Mfumo. Ha tsaka swonghasi leswi varhumiwa lava vantshwa, hi moya wa rito leri nge “Gilead,” va nga ta va xiyenge xa ‘nhulu ya vumbhoni’!

Loko a rhangela nongonoko, Milton Henschel u hlamusele leswaku mathwasani lawa, ku fana ni vaapostola va le sikwini ra Yesu, va tilunghiselele ntirho lowukulu. Pawulo mutirhi wa murhumiwa u phofule mintlhaveko yakwe khwatsi ehenhleni ka ntirho lowu loko a te: “Hambi loko ndzi nga ri hlonga ra munhu ni un’we, ndzi tiendlile hlonga ra hinkwavo, leswaku ndzi ta kota ku koka lavo tala va vona.”—1 Vakorinto 9:19.

Marito lawa ya Pawulo ya komba yini? Leswaku varhumiwa lava vantshwa va fanele ku tsakela vanhu. Ku fanele ku va ku navela ka vona ku pfuna vanhu va tinxaka hinkwato hi rungula leri ponisaka vutomi ra ntiyiso—hambi va ri lava va nga ha vaka va hlanganyela swinene ni nhlengeletano yin’wana ya vukhongeri.

Xivulavuri lexi landzelaka, Theodore Jaracz, u tsundzuxe varhumiwa lavantshwa leswaku, hi laha ku hambaneke ni vapfhumba lava va yaka etindhawini ku ya vona, a va rhumeriwe ematikweni yo tala lama hambaneke ya misava ku ya chumayela mahungu lamanene. U va khutaze ku tsundzuka xikombiso xa Yesu ni vadyondzisiwa vo sungula kun’we na lexiya xa varhumiwa va manguva lawa, lava vo tala va vona va hambetaka va tirha hi ku tshembeka eswiavelweni swa vona leswi hambaneke. U hlamuserile a ku: “Vanani ni ku anakanya kun’we. Mi nga pfumeleri timhaka ta rifuwo ti mi hambukisa. Loko u ri ni ‘tihlo’ lerinene, kona u ni ku anakanya kun’we.” (Luka 11:34) U tlhandlekerile a ku: “Tanihi varhumiwa va Gilead, mi tinyiketele xikongomelo xin’we—ku lava lava fanelekaka kutani mi chumayela mahungu lamanene.”

Ndzayo leyi nga enkarhini yi nyikeriwe hi Max Larson wa Komiti ya Fektri ehenhleni ka magoza lama faneleke ku tekiwa loko swiphiqo swi tlhekeka exiavelweni xa munhu xa vurhumiwa. U hlamuserile a ku: “U nga heli mbilu kutani u tshika. Lulamisa swiphiqo swa wena.” Njhani? “Hi ku kuma mianakanyo ya Xikwembu etimhakeni.” (1 Vakorinto 2:11-16) Larson u kandziyise ntikelo wa ku khongelela mpfuno eka Yehova kutani a kandziyisa xilaveko xa leswaku varhumiwa va kurisa vuxaka bya vona na Xikwembu nkarhi na nkarhi.

Lon Schilling wa Komiti ya Mapurasi ya Watchtower u kandziyise nkoka wo kurisa ni ku hlayisa langutelo lerinene ra mianakanyo. U vutisile a ku: “Mianakanyo ya n’wina yi ta tirhisa ku yini loko yi kongomane ni mphikamakaneta kumbe xiyimo lexi lavaka ku lulamisiwa? Tanihi vayimeri lava ntshunxekeke va mahanyelo lamanene, hi na vutihlamuleri ha un’we-un’we bya ndlela leyi swilo swi onhakaka ha yona.’ U xiye leswaku Xikwembu “a xi hi lawuli hi mafambiselo yo lawula lama nga ekule ya le tilweni.” Xisweswo, varhumiwa a va fanelanga ku langutela leswi engetelekeke eka Xikwembu ku tlula leswi twisisekaka. Lava va kombisaka ku rhandza ku kongomisiwa hi Yehova Xikwembu hi ku tirhisa Rito yena, moya wa yena ni nhlengeletano yakwe va ta swi kota ku hlayisa langutelo lerinene ra mianakanyo.

“Ku twisisa ka wena timhaka i ka ntikelo wo tanihi kwihi?” Xivutiso xexo xi vutisiwe hi Ulysses Glass, un’wana wa valeteri va Xikolo xa Gilead. Hi ku tirhisa minxaxamelo ya swikombiso, muleteri loyi wa nkarhi wo leha u kombe leswaku “langutelo leri ringaniseriweke, ra vutlhari, leri nga tsekatsekiki ra timhaka minkarhi hinkwayo ri ta pfuna [varhumiwa] leswaku va rhangisa timhaka ta Mfumo.” Loko a khome xitempe xa papila leswaku hinkwavo va xi vona, u vule leswaku, hambi leswi xi nga ni ntikelo wuntsongo, ku tirha ka xitempe xa papila ku vumbiwa hi vuswikoti bya xona byo namarhela eka nchumu wun’we ku kondza loko wu fika laha wu yaka kona. U te: “Tiendleni lava fanaka ni xitempe xexo xa papila, kutani mi namarhela nchumu wun’we—xileriso xa n’wina xa ku chumayela—ku kondza loko mi fikelela ku tiyimisela ka n’wina mi hlayisekile, eka tlhelo lerin’wana ra nhlomulo lowukulu.”

Jack Redford, muleteri wa Xikolo xa Gilead naswona yena hi byakwe ku nga khale ka murhumiwa, eka nkulumo ya yena yo hetelela u kanele hi yin’wana ya mintlhontlho leyi varhumiwa lavantshwa a va ta kongomana na yona. U kandziyise leswaku hi ku tshemba Yehova hi laha ku heleleke va nga swi kota ku hlula xihinga xihi na xihi, hambi ku ri ku dyondza ririmi lerintshwa, ku navela ekaya, ku hanya ni vanhu van’wana, ku tolovela mahanyelo lama hambaneke, kumbe ku hlula madzolonga ya vumunhu. Yinhla leyi a yi endleke hi leyi: “U nga ringeti ku swi endla hi matimba ya wena n’wini. 1 Vakorinto 3:9 yi ri, ‘Hi vatirhi-kulobye na Xikwembu.’” U va tiyisekisile a ku: “Endlani xiyenge xa n’wina naswona mi nga ha tiyiseka leswaku Yehova u ta endla xiyenge xakwe.”

“Xikolo xa Bibele xa Gilead xa Watch Tower i nyiko ya Xikwembu!” Hi marito wolawo Frederick W. Franz, muungameri wa Sosayiti, u sungule nkulumo yo hetelela ya nimixo. U te Xikolo xa Gilead, “xi endleriwe ku humesa vanhu lava a va ta tirha tanihi timbhoni, ku nga mapapila lama hanyaka ya mhaka ya leswaku Mfumo wa Xikwembu ha Yesu Kriste se a wu tirha.” Endzhaku u tsundzuxe ntlawa wa vu-81 leswaku ku tinyiketela ka vona eka xikongomelo xin’we ku va rhwexa vutihlamuleri lebyikulu ‘hikuva va ya ensin’wini yo veka vumbhoni enkarhini wo nonon’hwa ngopfu evurungurwini bya vanhu. Hikwalaho Yehova u veke vutihlamuleri byo twarisa mahungu lamanene ya Mfumo wolowo eka hina ni ku komba vanhu hinkwavo etikhonweni ta le kule ta misava ndlela ya Xikwembu yo pona ha yona.”

Ntsako ni ku tlangela lunghelo ro va la veke kona eXikolweni xa Gilead a swi ri erivaleni loko swichudeni leswi thwaseke swi amukela tidiploma ta swona. Hi ku twisisa xikongomelo xa vona tanihi varhumiwa, ntlawa wa vu-81 wa Gilead, eka papila leri yaka eka Huvo leyi Fumaka ni ndyangu wa Bethele, wu tiyimisele ku tirhela timhaka ta Yehova Xikwembu hi ku tshembeka ni ‘ku dzunisa vito ra yena’ exikarhi ka matiko. (2 Samuel 22:50) Hi ndzhenga, endzhaku ka ku kombisiwa ka swivono swo veka vumbhoni eka swiavelo leswi hundzeke, eNew York ni le xivandleni xa vurhumiwa, kun’we ni drama leyi nyanyulaka ya manguva lawa, nongonoko wa Gilead wu pfariwe hi xikhongelo hi Lyman Swingle.

Swichudeni leswi thwaseke swa 23 swi langutele ntsako lowukulu wa ntirho wa vurhumiwa hi mahlo-ngati. Ha yini? Hi laha thwasani rin’wana ri hlamuseleke ha kona ri te: “Yesu u te, ‘Xavisani swilo swa n’wina, mi ndzi landzela, . . . kutani mi twarisa Mfumo wa Xikwembu [Matewu 19:21; Luka 9:60] Pakani ya ntirho wa vurhumiwa yi vangiwe hi ku navela ka hina ku pfuna vo tala hilaha hi nga kotaka ha kona emoyeni, kwihi na kwihi laha a hi laveka kona ni laha a hi ta tirhisiwa ngopfu kona.”—Fredrick Steiner, loyi a averiweke eGuatemala.

Xana u nga andzisa ntirho wa wena eka Xikwembu kutani u wu endla lowu nga ni mihandzu ngopfu? Loko swi ri tano, kona tikarhate, hi laha swichudeni leswi swi thwaseke swi endleke tano leswaku swi ta fanelekela xikhundla xa vurhumiwa. Ntsako wa vona lowukulu, ni wa wena, wu ta kumiwa eka vutomi lebyi heleleke bya ntirho wa ku tinyiketela eka Yehova.—Malakia 3:10.

[Bokisi eka tluka 22]

“Nkulumo ya Makwerhu Larson hakunene yi kandziyise xilaveko xo rhandza ku endla mindzulamiso eka mina. Leswaku ndzi hetisisa ntirho wa mina tanihi murhumiwa, ndzi fanele ku papalata ‘xivumbeko xa mianakanyo ya nyama’ kutani ematshan’wini ya sweswo, ndzi lava mianakanyo ya Yehova na liya ya Yesu, N’wana wakwe.’—Alain Saint-Jean, loyi a averiweke eNew Caledonia.

[Bokisi eka tluka 23]

“Nkulumo ya Makwerhu Glass yi ndzi pfune ku vona ntikelo wo va ni langutelo lerinene ra timhaka. A hi fanelanga ku hambukisiwa hi swilo leswi nga riki swa ntikelo. Hi fanele ku va lava ringaniselaka.”—Humphrey Hermanus, loyi a averiweke eSuriname.

[Bokisi eka tluka 24]

“Loko ndzi yingisela Makwerhu Redford, ndzi vone ku titwa ka nsirhelelo hi ku tiva leswaku swirhalanganya leswi hi nga ta hlangavetana na swona a hi swintshwa. Van’wana va swi kotile ku swi hlula, naswona na hina hi nga swi kota loko hi tiseketela hi matimba ya Yehova naswona hayi ya hina vini.”—Veronica Lipham, loyi a averiweke ePapua New Guinea.

[Bokisi eka tluka 24]

TINHLAYO TA NTLAWA:

Nhlayo ya matiko lama yimeriweke: 7

Nhlayo ya matiko lawa va averiweke eka wona: 12

Avhareji ya malembe: 30,3

Avhareji ya malembe entiyisweni: 13,4

Avhareji ya malembe evutirhelini bya nkarhi hinkwawo: 9,3

[Swifaniso eka tluka 23]

COSTA, Alan na Betty United States

GANSLMEIER, Anton na Rita Jarimani

GONZALES, John na Cyntkia United States

GRAULICH, Uwe na Katherine Jarimani

HERMANUS, Humphrey na Ludmila Netherlands Antilles

JOHANSEN, Bard ns Ester Norway

KLOOSTERMAN, Otto na Yvonne Netherlands

LARSON, Gary na Annette Canada

LIPHAM, Mark na G. Veronica United States

SAINT-JEAN, Alain Furwa

STEINER, Frederick na Helen United States

SZYMANSKI, Cynthia United States

WILKE, David United States