Xiviko Xa Vahuweleri Va Mfumo

Mikateko Ya Xikwembu Ya Vonaka eVenezuela

NTIRHO wa Timbhoni ta Yehova eVenezuela hakunene wu katekisiwile. (Psalma 3:8) Hi 1985 nhlayo ya vahuweleri yi andze hi tiphesente ta 16 ku tlula lembe leri tlhandlamiweke naswona hi February 1986 yi fikelela nhlohlorhi ya nkarhi hinkwawo ya 31 247 wa vatwarisi va mahungu lamanene. Maphayona ya nkarhi hinkwawo ya tlulele eka 2 291 hi February, nhlohlorhi ya vu-38 enxaxamelweni! Ntsengo wa tidyondzo ta Bibele ta 50 659 ti endliwile ni vanhu lava tsakelaka. Van’wana va vanhu lava va kume ntiyiso ehansi ka swiyimo swo nonon’hwa.

◻ Jaha leri tekeke ri tiveke swinene tanihi leri hlongorisaka vavasati. Swilo a swi nga ri fambeli kahle. A ri tshemba leswaku nsati wa rona u ye eka xingoma-ntanda naswona ri boheriwe fundzu hikwalaho ka vunghwavava bya rona. Kutani ri lavile xingoma-ntanda xo ntshunxa fundzu ivi a rhumeriwa eka nsati un’wana. Hambi swi ri tano, a a dyondzile Bibele ni Timbhoni ta Yehova naswona a a tshikile vun’anga. U n’wi byele leswaku a nga ka a nga n’wi pfuni, kambe u ta n’wi nyika adirese ya laha a nga yaka kona a ya kuma mpfuno. A ku ri adirese ya Holo ya Mfumo. A ri ri na—misisi yo leha, ri ri na malebvu naswona ri ambale hi ndlela yo biha. Ri tsakele nhlangano swinene laha ri tlheleleke vhiki leri landzelaka, kun’we ni vana va rona lavantsongo vanharhu. Sweswi a ri tsemile misisi, naswona a ri ambale kahle ni ku susa malebvu. Namuntlha, i muhuweleri wa mahungu lamanene. Xana nsati wa rona a a tsakile leswi a ri tshike ku hlongorisa vavasati van’wana? Ee, ku ri na sweswo a a kaneta swinene! Kambe ku hundzuka loku ri ku endleke evuton’wini bya rona ku hlamarise swinene eka van’wana vo tala lava a ri va tiva, ivi ri va pfulela ndlela yo twa mahungu ya ntiyiso.

◻ Edorobeni ra le kusuhi ni ndzilakani wa Columbia, muprista wa kwalaho u hume tsima ro lwisana ni Timbhoni. U veke vito ra “Timbhoni ta Yehova” hi maletere lamakulu yo tshwuka eka bodo yakwe ya mahungu ya kereke ivi ehansi ka rona a tsala mavunwa ehenhleni ka vona. Xirho xa kereke xi vone vito leri vekiweke ri vonaka ivi, handle ko hlaya mahungu lama landzelaka, xi ehleketa leswaku kereke yi amukerile Timbhoni ta Yehova. Kutani xi yile enhlanganweni wa Timbhoni ivi xi rhandza leswi xi swi voneke ni ku swi twa. “Kahle-kahle,” ku vula xiviko, “tsima ra muprista ri vangele ku tsakela swinene ematshan’wini ya swin’wana.” Sweswi vo tala va rhandza ku dyondza naswona va tshinelela Timbhoni eswitarateni ivi va vutisa leswaku va ta va endzela rini nakambe.

◻ A ku ri nkulumo yo koma ya rifu esirheni ra makwerhu wa xisati loyi a ha ku khuvuriwa leyi endleke leswaku ndyangu wun’wana eVenezuela wu kuma ntiyiso. Ndhuna ya nyimpi ni ndyangu wa yona, maxaka ya mufi, va rhiye ndleve va yingisela nkulumo ya Matsalwa ivi endzhaku va rhambela xivulavuri ekaya ra vona ku kambisisa matsalwa ya Bibele lama hlamuseriweke hi vuxoko-xoko lebyikulu. Vuyelo ku ve byihi? Ndhuna a yi hlamule:

“Mina na nsati wa mina hinkwerhu hi lave ku kambisisa Bibele. Eku sunguleni ku navela ka mina a ku ri ku kombisa leswaku a ndzi ri entiyisweni hi ku va xirho xa vukhongeri bya Khatoliki. Kambe, nkarhi na nkarhi loko ndzi kaneta yinhla, makwerhu loyi a ndzi dyondzelaka a a ta ni tinhla letinene ta Bibele. Hi ku titsongahata, ndzi xiye leswaku ntiyiso a wu ri na Timbhoni ta Yehova. Namuntlha, mina ni nsati wa mina hi Timbhoni ta Yehova, naswona vana va mina va dyondza Bibele. Ndzi nkhensa Xikwembu xa ntiyiso ntsena, Yehova, loyi ndzi tsakeke ku n’wi tirhela tanihi socha, hayi hi matlhari ya nyama, kambe hi matlhari lawa moya wa Xikwembu wu ma nyikaka, ku ya hi 2 Vakorinto 10:4, 5.”

Ina, Yehova u katekise malandza yakwe hi laha ku fuweke eVenezuela. Hi nhlayo leyi hlamarisaka ya Xitsundzuxo leyi andzeke ka mune ku tlula ya vahuweleri, ku na ntshembo lowukulu wo andza ku ya emahlweni emalembeni lama taka.

[Chati eka tluka 21]

Tinhlohlorhi tin’wana ta Venezuela leti sekeriweke eka swiviko swa February 1986:

31 247 wa vahuweleri

2 291 wa maphayona

50 659 wa tidyondzo ta Bibele

“Ku kateka ka wena a ku v̌e henhla ka tiko ra wena.”—Psalma 3:8