Minyikelo Leyi Tsakisaka Mbilu
EKA bokisi leri nga laha hansi ku na mapapila mambirhi lama tlakusaka mali lama rhumeriweke hi vukhongeri eVujaganini. Xana u kuma ya tsakisa? Nikantsongo! Kambe, timali ti laveka hi tindlela to tala namuntlha ku pfuna ku seketela vugandzeri lebyi Xikwembu xi byi amukelaka. Kutani nhlengeletano ya Vukriste yi kuma timali leti lavekaka leswaku yi endla ku rhandza ka Xikwembu hi ndlela yihi?
Nhlamulo yi nga kumeka hi ku kambela mikhuva ya bandlha ra Vukriste ra lembe xidzana ro sungula ni marito ya Musunguli wa rona, Yesu Kriste. “Nyikani, mi ta nyikiwa,” Yesu wa tsundzuxa eka Luka 6:38. “Endzeni ka nkhancu lowu mi wu hakarhaka exifuveni, ku ta cheriwa mpimo lowu tivikanaka, lowu gandliweke, lowu hlunguhliweke, lowu khapaka; hikuva mpimo lowu mi pimelaka van’wana ha wona, mi ta pimeriwa ha wona na n’wina.” Xifaniso xolexo a xi fanela swonghasi loko xi twakala etindleveni ta vayingiseri va Yesu enkarhini wolowo. Tinguvu ta vona ta lë Vuxeni a ti ri na xikhwama xo rhwala kumbe ku hlayisa swilo. Rito “nkhancu” kumbe ‘xifuva’ lexi tolovelekeke (Xigriki, kolʹpos) ri vula bako leri vumbiweke hi mpetso wa nkhancu lowu debyeke ekusuhi ni nkhamu, naswona endzeni ka nkwama lowu vaxavisi a va chela nhundzu leyi pimiweke leyi xaviweke.
I vaxavisi vangani a va ta gandla ku sungula ivi va hlunguhla nhundzu ku nghenisa yo tala hi laha swi nga kotekaka ha kona endzeni ka bako ra nguvu ya khasimendhe, hambi ku fikela eka yinhla yo khapa? I vantsongo, loko va ri kona! Vakriste hambi swi ri tano, hi ku endla swiendlo swa ntwelo-vusiwana hi ku ntshunxeka eka lava pfumalaka kahle-kahle a va ta hakeriwa hi musa. Mpimo lowu hi khomaka van’wana ha wona, hambi i wa ku hanana kumbe wa ku tsonana, wu tirhisiwa ku pima leswi hi nga ta tshovela swona endzhaku, hayi swi huma eka vanhu ntsena, kambe xa nkoka ngopfu, swi huma eka Yehova Xikwembu.—Ringanisa 2 Vakorinto 9:6; Vagalatiya 6:7.
Yesu, hi ku tinyikela hi ku ntshunxeka ni hi vukosi byakwe, u tokote ku tirha loku hlamarisaka ka nawu lowu. A a ri xikombiso xa ku hanana. Hi ku hiseka na hi ku pfumala vutianakanyi u chumayele mahungu lamanene ya Mfumo wa Xikwembu eka swisiwana. A nga kalanga a hakerisa hikwalaho ka mintirho yakwe kumbe ku rindzela leswaku a hakeriwa muholo wo karhi. Kambe a nga lavanga ku hakeriwa eka hinkwaswo. Vanhu hi ku hanana, hi ku tirhandzela va n’wi seketerile entirhweni wakwe.—Luka 7:22; 8:1-3.
Ku nyika ka Yesu ku susumete van’wana—Simoni Petro, Yakobo, Yohane ni lavan’wana eka lava va 12—ku komba ku hanana loku fanaka eku tshikeni ka swilo hinkwaswo va hlanganyela evutirhelini. (Luka 5:10, 11; 9:1-6) Muxaka wolowo wa ku nyikela wu na mimbuyelo leyi fanaka namuntlha. Timbhoni ta Yehova ti nyikela nkarhi wa tona, ntamu ni leswi ti nga na swona ku endla leswaku van’wana va twa mahungu lamanene ya Mfumo wa Xikwembu. Nakambe, tanihi leswi va kombisaka ku hanana hi ku chumayela, van’wana va ha susumeteleka ku kombisa ku hanana hi ku hlanganyela na vona eku hangalaseni ka mahungu lamanene.—Swivuriso 11:25.
Hambi swi ri tano, ku na nchumu lowu engetelaka eku nyikeleni ka hina hi ku chumayela loku tsakisaka mbilu. Ku nyikela timali hi kungu lerinene na hi swivangelo leswinene naswona i xiphemu xa vugandzeri bya ntiyiso. (2 Vakorinto 9:9-14) Xana leswi swi endliwe njhani hi Vakriste va lembe xidzana ro sungula?
Leswi Vakriste Vo Sungula Va Endliseke Swona
Hi siku ro sungula ra ku velekiwa ka bandlha ra Vukriste hi lembe ra 33 C.E., ‘ku avelana, ku dya swakudya, ni ku khongela’ swi endliwile hi vapfumeri lava ha ku khuvuriwaka va 3 000. Hi xivangelo xihi lexinene? Ku va olovisela ku seketela ripfumelo ra vona lerintshwa hi ku ‘chivirikela dyondzo ya vaapostola.’—Mintirho 2:41, 42.
Vayuda ni Vamatiko lava amukeriweke eXiyudeni a va ta eYerusalema ku ta pulana ku tshama ntsena hi nkarhi wa Nkhuvo wa Pentekosta. Kambe lava veke Vakriste a va navela ku tshama nkarhi wo lehanyana ivi va dyondza swo tala ku tiyisa ripfumelo ra vona lerintshwa. Leswi swi tswale xiphiqo xa swakudya ni tindlu to tshama. Van’wana va vapfhumba a va nga ri na timali leti ringaneke, loko van’wana yi tlhela yi sala. Kutani a ku ri na ku hlengeletana ka xinkarhana ni ku nyikiwa ka swilaveko swa nyama eka lava va pfumalaka.—Mintirho 2:43-47.
A va swi kotisa ku yini ku kuma swakudya ni tindlu to tshama? Vaapostola, lava tirhaka tanihi huvo leyi fumaka, va lunghiselele ku hlengeleta ni ku nyikiwa ka nhundzu leyi nyikeriweke. Xisweswo, swifaniso swo sungula swa bandlha ra Vukriste swi komba swirho swa rona swi ri leswi tekaka rifuwo ra swona hayi tanihi ra swona vini kambe tanihi nchumu lowu nga ta tirhisiwa ku pfuna bandlha hinkwaro. (Mintirho 2:44; 4:32) Ku engetela kwalaho, “hinkwavo lava a va ri ni masimu, kumbe tindlu, a va swi xavisa, kutani va tisa leswi va swi kumeke hi ku xavisa, va swi veka emilengeni ya vaapostola; kutani va pambulela un’wana ni un’wana hi ku ya hi ku pfumala ka yena.”—Mintirho 4:34, 35.
Ku xavisiwa ka ndzhaka ya xiviri ni ku avela loku tolovelekeke ka swilo hinkwaswo a ku ri ka ku tirhandzela loku heleleke. Ku hava loyi a a fanele ku xavisa ni ku hlenga; naswona leswi a ku nga ri ku engetela nhundzu. Mianakanyo leyi kombisiwaka a hi leswaku swirho leswi fumeke a swi fanele ku xavisa nhundzu ya swona hinkwayo ivi xisweswo swi va swisiwana. Ku ri na sweswo, hikwalaho ka ntwelo-vusiwana wa vapfumeri-kulobye ehansi ka swiyimo enkarhini wolowo, va xavise nhundzu kutani va nyikela hinkwaswo leswi va swi kumeke leswaku ku kumeka leswi a swi laveka ku yisa emahlweni timhaka ta Mfumo.—Ringanisa 2 Vakorinto 8:12-15.
Hi ku fanana namuntlha, vanhu va hundzisele nhundzu eka Sosayiti ya Watch Tower kumbe va hoxa nhlengeletano leyi eka swiboho swa vona, hi mukhuva wolowo va nyika Huvo leyi Fumaka ya Timbhoni ta Yehova timali leti nga ta tirhisiwa laha xilaveko xa Mfumo xi kuleke ngopfu. Ku nyikela ko tano hinkwako ku pfuna ku hangalasa ku voningela ka moya tanihi le ka Pentekosta. Ku hava loku ku tshameke ku va xiboho.
Ku Swi Endla Nkarhi Na Nkarhi I Murhi Wa Kona
Malembe ya 20 endzhaku ka Pentekosta ya 33 C.E., muapostola Pawulo u tsundzuxa bandlha ra Korinto hi xilaveko xa munyikelo wo karhi. “Loko wu ri nhlengo lowu humeseriwaka vahlawuriwa va Xikwembu, na n’wina mi ta endla hi laha ndzi leriseke tikereke ta Galatiya ha kona,” wa tsala. Ivi a engetela xiphemu xa xitsundzuxo: “Hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke, leswaku nhlengo wu nga ha endliwi siku ndzi taka. Hlawulani van’wana exikarhi ka n’wina, kutani loko ndzi fika, ndzi ta va nyika mapapila, ndzi va rhuma leswaku va heleketa nyiko ya n’wina eYerusalema.” Ku kanela ka leswaku ku nga nyikeriwa ku fikela kwihi ku vonaka ku katsa ndyangu hinkwawo, hambi i van’wankumi kumbe i swisiwana, hikuva a swi ta humelela ‘etindlwini ta vona vini.’—1 Vakorinto 16:1-3.
Mpimanyeto wa Pawulo emhakeni ya ku nyikela wu nga tirhisiwa hi swirho swa bandlha namuntlha. Njhani? Ku swi endla nkarhi na nkarhi i murhi wa kona. Loko bandlha ra ka n’wina ri fanele ku hakela rhente ya n’hweti na n’hweti ni leswi lavekaka swa ndhawu ya n’wina yo hlanganyela kumbe Holo ya Mfumo, swi ta lava ku “nyikela hayi ntsengo wo tala, kambe ku swi endla nkarhi na nkarhi ku vekela swin’wana etlhelo vhiki na vhiki kumbe n’hweti na n’hweti ku khathalela timhaka ta Mfumo,” ku tsala hofisi ya rhavi ePeru. Xana mianakanyo leyi ya ku tsakisa? Hambi va ri vana va nga dyondzisiwa ku tlangela hi laha ku nyikela nkarhi na nkarhi ku nga xiphemu xa vugandzeri bya vona ha kona.
Hikwalaho ke, loko minyikelo yi endliwile hi kungu lerinene naswona hi xivangelo lexinene, swi tsakisa mbilu ya Xikwembu kun’we ni munhu. 2 Vakorinto 9:7 yi ri: “Un’wana ni un’wana a a nyike hi laha a pimaniseke ha kona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.”
[Bokisi eka tluka 28]
Mikhuva Leyi Tirhisiwaka Hi Vujagana
“Hosi yi vulavule na mina ku mi tsalela papila leri. . . . A ndzi nga ta mi tsalela papila ro fana ni leri hikwalaho ka nchumu wo karhi emisaveni loko Xikwembu a xi nga ndzi byelanga ku mi tsalela papila leri ndzi mi byela leswaku loko mo ndzi rhumela $20.00 [R50] ku ndzi pfuna sweswi yi ta mi katekisa hi ndlela leyi mi nga si tshamaka mi katekisiwa ha yona.”—Papila ra vunyingi leri humaka eka mufundhisi wa Canada, leri sayiniweke ku “mufundhisi ni Munghana wa n’wina.”
“Pfula Oyili leyi yo Kwetsima yo Tola, (u nga cukumeti hambi yi ri yintsongo). Yesu u le ka oyili leyi ya ripfumelo. Endla xihambano ha yona emombyeni wa wena, kutani hi ripfumelo nghena ekamareni u ri wexe ivi u humesa mali yihi na yihi leyi u nga na yona kutani u endla xihambano eka mali yin’wana ni yin’wana ya maphepha ya Xikwembu ku susa swiphiqo swa wena swa mali,ni ku andzisa mali ya wena ku fana ni le ka Luka 6:38 . . . Loko u tota mali leyi u nga na yona hi oyili leyi yo kwetsima yo tola, tota mali yin’wana ni yin’wana ya maphepha leyi u nga na yona.Endla xihambano eka mali yin’wana ni yin’wana ya maphepha,kutani, mali leyikulu ya maphepha leyi u nga na yona, loko ku ri $20.00, $10.00 kumbe $5.00, endla xihambano xa oyili ya ku tola ivi u yi rhumela eka ntirho wa Xikwembu.”—Papila ra vunyingi leri humaka eka “muchaviseki” eUnited States leri sayiniweke ku “Muprofeta wa Xikwembu hi malembe ya 30.”
[Bokisi eka tluka 30]
Mukhuva Lowu Van’wana va nyikelaka Ha Wona eNtirhweni wa Mfumo
◆ TINYIKO: Minyikelo ya mali yi nga ha rhumeriwa hi ku kongoma eka Watch Tower Bible and Tract Society, Private Bag 2067, Krugersdorp, 1740. Nhundzu na yona yi nga nyikeriwa. Papila ro koma leri vulaka leswaku wolowo i nhlengo wo tirhandzela ri fanele ku fambisana ni minyikelo leyi.
◆ LUNGHISELELO RA MUNYIKELO WO TISEKETELA HI SWIYIMO: Mali, timpahla, swiboho ni nhundzu swi nga ha nyikiwa Sosayiti ya Watch Tower hi lunghiselelo ra leswaku, loko ku va ni xilaveko xa munhu hi xiyexe, munyikeri a tlheriseriwa. Endlelo leri ri papalata ku karhateka ni ku nga tiyiseki ka ku tiya ka xiboho, loko u tiyisa leswaku Sosayiti yi kuma nhundzu emhakeni ya rifu.
◆ NDZINDZA-KHOMBO: Sosayiti ya Watch Tower yi nga thyiwa tanihi mudyandzhaka wa nawu wa ndzindza-khombo wa vutomi. Mali leyi nga ebankini yi nga ha nyikiwa Sosayiti. Etimhakeni hatimbirhi Sosayiti yi fanela ku tivisiwa.
◆ SWIBOHO: Nhundzu kumbe mali swi nga ha nyikiwa Sosayiti ya Watch Tower hi xiboho lexi endliweke hi nawu. Kopi yi fanele ku rhumeriwa eka Sosayiti.
Vuxokoxoko lebyi engetelekeke kumbe xitsundzuxo malunghana ni timhaka to tano byi nga kumeka hi ku tsalela eka Watch Tower Bible and Tract Society, Private Bag 2067, Krugersdorp, 1740.
[Swifaniso eka tluka 31]
Tindlela leti Huvo leyi Fumaka ya Timbhoni ta Yehova yi hangalaseke minyikelo ya n’wina ha tona ku yisa timhaka ta Mfumo emahlweni hi malembe mambirhi lama hundzeke:
Ku pfuna varhumiwa ni maphayona yo hlawuleka yo tlula 12 700 hi timali
Ku aka kumbe ku kurisa miako ya rhavi ya 40
Ku pfuna valanguteri lava famba-fambaka vo tlula 5 000 ni vasati va vona
Ku xaviwa ka michini leyintshwa ya nhungu yo gandlisa ya rivilo lerikulu
Ku hlayisa vaaki va Bethele vo tlula 8 400
Ku pfuna lava hlaseriweke hi makhombo