Masiku Ya Makumu—Nkarhi Wa Ku Tshovela
“Ndzi languta kutani ndzi vona papa lero basa, na swona ku tshamile un’wana la fanaka ni N’wana-wa-Munhu ehenhla ka rona, a ri ni harhi ya nsuku enhlokweni ya yena ni rihwevo lero kariha evokweni ra yena.”—NHLAVUTELO 14:14.
1. I swilo swihi swin’wana leswi endleke leswaku lembe xidzana leri ri hlawuleka?
OHO nkarhi wa mpfilumpfilu lowu lembe xidzana leri ra vu-20 ri veke wona! Vanhu a va fanele ku tiyisela tinyimpi timbirhi ta tihanyi. Matiko hi ku landzelelana ya onhiwile hi ndzhundzuluko. Ndlala yi vange ku xaniseka loku nga si tshamaka ku va kona eka matimu ya munhu. Ku kanakana ka swa ikhonomi, vugevenga, nthyakiso ni vuvabyi lebyi chavisaka swi xungeta ku rhula ka un’wana ni un’wana. Hi nkarhi lowu fanaka, munhu u endle minhluvuko leyikulu ya swa sayense. U tirhise matimba ya athomo hambi ku ri ku famba en’wetini. Entiyisweni, rixaka ra hina ri hlawuleke hi tindlela to tala. Hambi swi ri tano, xilo xin’we xi xiyeka tanihi xiendlakalo xa nkoka swinene xa nkarhi wa hina, naswona handle ka xona swilo leswin’wana hinkwaswo swi heleriwa hi nkoka.
2. Hi xihi xiendlakalo lexi profetiweke hi Daniyele lexi a xi ta humelela enkarhini wa hina?
2 Xiendlakalo lexi hakunene xi funghaka nguva xi vhumbiwe kahle hi lembe xidzana ra vutsevu B.C.E hi muprofeta Daniyele. Yingisela xiviko xa yena lexi huhuteriweke hi Xikwembu: “Nḍi ku nḍi languta e ŝiv̌onweni ŝa v̌usiku, kutani v̌onani, uṅwana l’a fanaka ni ṅwana wa munhu a humelela hi mapapa ya le henhla, a fika e ka Nkulukumba wa masiku, a tisiwa e mahlweni ka yena. Kutani a nyikiwa ku fuma, ni ku kwetsima, ni v̌uhosi leŝaku v̌a tinšaka hikwato, ni v̌a matiko hikwawo, ni v̌a tinḍimi hikwato v̌a ta ṅwi tirela.”—Daniel 7:13, 14.
3. (a) “Nkulukumba wa masiku” i mani xana, naswona i yini lexi a nga xi nyika “uṅwana l’a fanaka ni ṅwana wa munhu”? (b) “Uṅwana l’a fanaka ni ṅwana wa munhu” i mani xana, naswona varhangeri va vukhongeri bya Vayuda va endle yini loko a endla ku titivisa loku?
3 “Nkulukumba wa masiku” i Yehova Xikwembu. Daniyele u n’wi vona ‘emapapeni ya le henhla,’ hi leswaku, exivandleni xa moya lexi nga vonakiki, a nyika vuhosi eka “uṅwana l’a fanaka ni ṅwana wa munhu.” “Uṅwana” loyi i mani ke? Yesu u hlamule xivutiso xexo endzhaku hi 33 C.E. loko a tengisiwa emahlweni ka Sanedri. Muprista lonkulu wa Muyuda u n’wi sindzise ku hlambanya loko a a ri Kriste kumbe a nga ri yena. Loko a hlamula, Yesu hi vurhena u tirhise vuprofeta bya Daniyele eka yena, a ku: “Ku sukela sweswi, mi ta vona N’wana-wa-Munhu a tshamile evokweni ra xinene ra Lowa matimba hinkwawo, mi n’wi vona a ta hi mapapa ya le tilweni.” Ematshan’wini yo nkhinsamela Hosi leyi hlawuleke hi Yehova, muprista lonkulu u n’wi vone nandzu wa ku sandza. Endzhaku ka sweswo, varhangeri va vukhongeri bya Vayuda va hlohlotele Pontiyo Pilato ku avanyisela Yesu rifu.—Matewu 26:63-65; 27:1, 2, 11-26.
4. Yesu u yi amukele rini harhi ya vuhosi, naswona ku nga khathariseki ku kanetiwa kwihi?
4 Xiendlo lexi xo hlangula marito ya Yesu xi tsandzekile loko a pfuxiwa eku feni ivi a tlhandlukela etilweni ku yimela nkarhi lowu faneleke wa Yehova wa leswaku a n’wi nyika Mfumo. (Mintirho 2:24, 33, 34; Psalma 110:1, 2) Nkarhi wolowo wu fike hi 1914. Hi ku landza vumbhoni hinkwabyo, eka xiphemu xa le ndzhakunyana xa lembe rero, Yesu u amukele harhi ya vuhosi eka “Nkulukumba wa masiku” kutani a sungula ku fuma. (Matewu 24:3-42) Mfumo lowu wuntshwa wu langutane ni ku kanetiwa lokukulu. Kambe varhangeri va vukhongeri bya Vayuda va lembe xidzana ro sungula, mfumo lowu hlanganeke wa matiko, na Sathana ni mademona ya yena ku hava loyi a swi koteke ku sivela leswaku ku rhandza ka Xikwembu ku hetisisiwa. (Psalma 2:2, 4-6; Nhlavutelo 12:1-12) Hi 1914 risimu ra le tilweni ri twarile hi nkarhi lowu faneleke: “Matimba ya ku fuma misava, sweswi ma nyikiwile Hosi ya hina ni Mesiya wa yona, kutani u ta fuma hi laha ku nga heriki.” (Nhlavutelo 11:15) Ku sukela hi siku rero, a hi hanya “emasikwini ya makumu” ya mafambiselo lawa ya swilo.—2 Timotiya 3:1.
Nkarhi Wa Ku Tshovela
5. (a) Hi ku ya hi vuprofeta bya Daniyele, i vamani lava a va ta tirhela Hosi leyi ya ha ku vekiwaka? (b) I xivono xihi lexi Yohane a xi voneke lexi na xona xi katsaka Yesu tanihi Hosi leyi ya ha ku vekiwaka?
5 Hi ku ya hi vuprofeta bya Daniyele, loko Yesu a amukela harhi ya yena “v̌a tinšaka hikwato, ni v̌a matiko hikwawo, ni v̌a tinḍimi hikwato v̌a ta ṅwi tirela.” Manuku leswi swi ta endlekisa ku yini loko vanhu hinkwavo va ala leswaku i Hosi? Xivono lexi nga rivalekiki lexi paluxiweke eka muapostola Yohane xi komba nhlamulo. Yohane u hi byela leswi a swi voneke: “Ndzi languta kutani ndzi vona papa lero basa, na swona ku tshamile un’wana la fanaka ni N’wana-wa-Munhu ehenhla ka rona, a ri ni harhi ya nsuku enhlokweni ya yena ni rihwevo lero kariha evokweni ra yena.” (Nhlavutelo 14:14) Ku fana ni xivono xa Daniyele, Yesu laha u voniwa a ri ehenhla ka papa naswona u tiviwa tanihi “uṅwana l’a fanaka ni ṅwana wa munhu.” U ambala harhi ya vuhosi, kambe evokweni ra yena a nga na nhonga ya vuhosi kambe u na rihwevo ra mutshoveri. Ha yini?
6. Hi wihi ntirho lowu Yehova a lerisaka Yesu loyi a ha ku vekiwaka ku nghena eka wona?
6 Yohane u ya emahlweni: “Kutani ntsumi yin’wana yi huma hi le tempeleni, yi huwelela hi rito leri tlakukeke, yi ku ka loyi a tshameke ehenhla ka papa: ‘Nghenisa rihwevo ra wena u tshovela, hikuva nkarhi wa ku tshovela wu fikile, na swona misava yi vupfile swinene yi vupfele ku tshoveriwa.’” Yesu, hambi loko a ri Hosi, wa ha yingisa swiletelo leswi humaka eka Yehova “exivandleni lexo hlawuleka.” Hikwalaho loko Yehova a n’wi lerisa ku nghena entirhweni wo tshovela hi masiku ya makumu, wa yingisa. Yesu u “ndziwitela rihwevo ra yena emisaveni, kutani misava yi tshoveriwa.”—Nhlavutelo 14:15, 16; Vaheveru 9:24; 1 Vakorinto 11:3.
7. (a) ‘Ntshovelo wa misava’ i yini xana? (b) Ku sungula ka “ntshovelo” lowu a ku ri yini?
7 ‘Ntshovelo wa misava’ i yini? I vanhu lava humaka eka mafambiselo lawa ya swilo ya vusathana ku tirhela Yehova ni Hosi ya Yena leyi hlawuriweke. Ntshovelo wu sungula hi ku hlengeletiwa ka lava saleke va 144 000 lava nga ta fuma na Yesu emfun’weni wa yena wa matilo. (Matewu 13:37-43) Lava i “Israel wa Šikwembu,” (Bibele ya Xitsonga) “mihandzu yo sungula leyi humeseriwaka Xikwembu ni Xinyimpfana.” Va xaviwile va huma hi le “tinxakeni hinkwato, va ri va tindzimi hinkwato, ni va swivongo hinkwaswo, ni va matiko hinkwawo.” (Vagalatiya 6:16; Nhlavutelo 14:4; 5:9, 10) Hi ndlela leyi, vanhu vo huma hi le “tinxakeni hinkwato, va ri va swivongo hinkwaswo ni tindzimi hinkwato” va sungula ku tirhela Yesu la vekiweke exiluvelweni.
8. (a) Ku hlengeletiwa ka lavo hetelela va lava totiweke etiyisweni ku fike emakun’wini ya kona hi lembe rihi? (b) Hi ku ya hi xivono xin’wana xa Yohane, ntirho wa ku tshovela wu ye emahlweni hi ndlela yihi?
8 Hambi swi ri tano, a va voxe. Yohane, eka xivono xin’wana, u vona ku funghiwa ka lavo hetelela va 144 000. (Nhlavutelo 7:1-8) Entiyisweni, ku hlengeletiwa ka lava ku vonake ku herile hi 1935. Kambe hi nkarhi wolowo, Yohane wa vika, u vona “ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. A va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ne mahlweni ka Xinyimpfana.” (Nhlavutelo 7:9-17) Kutani ntirho wo tshovela wu ya emahlweni tanihi leswi vo tala va humaka hi le “tinxakeni hinkwato, va ri va swivongo hinkwaswo ni va tindzimi hinkwato” va sungulaka ku tirhela Yesu tanihi Hosi.
9. Xana vahlapfa lava i vamani, naswona i vuprofeta byihi byin’wana lebyi vuleke ku humelela ka vona “e mikarini ya makumu”?
9 Vahlapfa lava va langutele ku tsakela vutomi emisaveni ya paradeyisi ehansi ka Hosi leyi hlawuleke hi Yehova. (Psalma 37:11, 29; 72:7-9) Ku hlengeletiwa ka vona a ku vhumbiwile eka vuprofeta byin’wana byo hlayanyana. Hi xikombiso, Esaya, u vhumbe leswaku “e mikarini ya makumu” matiko a ma ta ya endlwini ya Yehova. (Esaya 2:2, 3) Hagai u profete hi ta ku ninginisiwa ka matiko hi nkarhi lowu ‘leswi rhandzekaka swa matiko hinkwawo a swi ta ta.’ (Hagai 2:7) Zakariya u vulavule hi “v̌av̌anuna v̌a khume v̌a tinḍimi hikwato ta matiko” lava a va ta tihlanganisa ni vanhu va Xikwembu. (Zakaria 8:23) Ku tlula kwalaho, Yesu hi yexe u profetile mayelana ni ‘ntshungu lowu wukulu.’ U te: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi.”—Matewu 25:31-33.
10. (a) ‘Ntshovelo wa misava’ wu tshoveriwa hi ku tirhisa yini? (b) I vamani ntsena lava khomisanaka ni tintsumi entirhweni lowu ke?
10 Ina, vanhu hinkwavo va karhi va kambisisiwa ku vona lava nga “tinyimpfu” ni lava nga “timbuti.” Ntirho lowu wa ku kambisisa wu hetisisiwa hi ndlela yihi? Exivonweni xa Yohane, ‘ntshovelo wa misava’ wu tshoveriwa xikan’we na mahungu ya matimba swinene lama twarisiwaka hi tintsumi. Ntsumi yin’wana yi twarisa mahungu ya “Evangeli leyi nga heriki.” Yin’wana yi tivisa ku wa ka “Babilona Lonkulu.” Naswona ya vunharhu yi hi tsundzuxa ku ka hi nga gandzeli “xivandzana,” mafambiselo ya swilo ya politiki ya Sathana. (Nhlavutelo 14:6-10) I ntiyiso, ku hava loyi a tweke marito ya xiviri ya tintsumi leti. Kambe va ma twile mahungu lama fanaka ma vuriwa hi vanhu lava tshembekeke. (Matewu 24:14; Esaya 48:20; Zakaria 2:7; Yakobo 1:27; 1 Yohane 2:15-17) Kutani entiyisweni, mahungu ma haxiwa hi milomu ya vanhu ehansi ka nkongomiso wa tintsumi. Munhu u vonaka ku va ‘nyimpfu’ kumbe ‘mbuti’ hi ndlela leyi a ma tekaka ha yona mahungu ya tintsumi. Exikarhi ka lembe leri ra vu-20, i Timbhoni ta Yehova ntsena ti khomisaneke ni tintsumi entirhweni lowu wa nkoka.
11. I ka nkoka ku fikela kwihi ku hangalasiwa ka mahungu lawa ya tintsumi?
11 Ku hangalasiwa ka mahungu lawa i ntirho wo tika swinene ku tlula xihi na xihi lexi endliwaka namuntlha. A ku na ku hluvuka ka swa politiki kumbe ku tshubula ka swa sayense loku tshinelaka hi nkoka. Mahungu lama ya kombetela ndlela leyi yaka eka murhi wa swiphiqo hinkwaswo swa vanhu naswona ma vulavula hi ku hlayiseka loku nga heriki ka vanhu lava tshembekaka. Naswona xa nkoka swinene, va fanele ku swi endlela ku kwetsimisa vito ra Yehova.
Xiviko Xa Lembe Na Lembe
12, 13. Nyika vuxokoxoko lebyi humaka eka xiviko xa lembe na lembe lebyi kombaka leswaku “ntshovelo” lowukulu ana se wu hlengeletiwile.
12 Hi yona mhaka leyi Timbhoni ta Yehova lembe rin’wana ni rin’wana ti langutelaka ku hlayiwa ka ntirho wa nhlengeletano ya Yehova wa lembe na lembe. Ta nyanyuka ku vona vumbhoni lebyi yaka emahlweni bya mikateko ya yena entirhweni wa tona. Loko u kambisisa xiviko xa 1987, lexi humesiweke eka matluka 12 ku ya eka 15 ya magazini lowu, u ta vona leswaku tintsumi ni vatirhi-kulobye va vanhu a va gingiriteka swinene elembeni leri hundzeke.
13 Mahungu lamanene ma twiwile ematikweni ya 210—entiyisweni ku nga ‘va tinxaka hinkwato ni va swivongo hinkwaswo ni va tindzimi hinkwato’ lava sweswi va fikelelekaka. (Marka 13:10) Ku tlula kwalaho, tanihi nhlohlorhi, 3 395 612 va tirhe swin’we ku hetisisa sweswo—ku tlula hambi ku ri rini evurungurwini bya Vukriste. Tinhlayo hi leti tsakisaka hambi ku ri ematikweni man’wana ha rin’we-rin’we. EUnited States, nhlohlorhi leyintshwa ya 773 219 yi fikeleriwile. Matiko man’wana mambirhi, Brazil na Mexico, ya vone nhlohlorhi ya 216 216 ni ya 222 168 hi ku landzelelana; ni man’wana ya tsevu, Britain, Germany, Italy, Japan, Nigeria na Philippines, ya vike tinhlohlorhi leti tlulaka 100 000. Hi tlhelo rin’wana, ku na matiko lama nga ni nhlayo leyikulu ya vanhu naswona ku ri na magidi ma nga ri mangani ya vahuweleri kumbe ehansinyana. Ntirho wa vanhu lava vo tshembeka i wa nkoka swinene na wona tanihi leswi va tikarhataka ku hlayisa ku vonakala ka ntiyiso ku vangama ehansi ka swiyimo swo nonon’hwa.—Matewu 5:14-16.
14. Xana i vanhu va njhani lava hlengeletiwaka enhlengeletanweni ya Yehova?
14 Kavula, vanhu va Xikwembu a va tsakeli ku engeteleka ntsena leswaku ku va kona. Hambi swi ri tano, va swi tiva leswaku lavantshwa hinkwavo lava nghenaka enhlengeletanweni ya Yehova hi “le’ŝi ranḍekaka” ematihlweni ya Yehova. Vo tala a va ‘hlunamile ni ku rila hikwalaho ka manyala hinkwawo’ lawa va ya voneke eka Vujagana. (Ezekiel 9:4) Hinkwavo va ya “e nṭhav̌eni ya Yehova” hikuva va lava ku dyondzisiwa etindleleni ta Xikwembu. (Esaya 2:2, 3) Mayana vumbhoni bya matimba bya mikateko ya Yehova—leswi emafambiselweni lawa ya swilo lama hombolokeke ni ya swilo leswi vonakaka, madzana ya magidi ya lavantshwa lembe rin’wana ni rin’wana ya tikombisa ya ri “leŝi ranḍekaka” swa Yehova!
Minkarhi Ya Xihatla
15. (a) Yi kurise ku yini nsimu leyi faneleke ku hlanganisiwa hi ntirho wo chumayela? (b) Hi ku ya hi xivono xa Yohane, “ntshungu lowukulu” wu gingiritekisa ku yini naswona ntirho wa tinyimpfu tin’wana wu njhani namuntlha, kun’we ni vatotiwa, ku pfumelelana ni xivono xexo?
15 Ntirho wo chumayela wa Timbhoni ta Yehova i wa xihatla. Ha yini? Hi leswaku, nsimu i yikulu. “Mahungu lamanene” ma fanele ku tivisiwa “eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.” (Nhlavutelo 14:6) Eka xifaniso xa Yesu, vanhu va “matiko hinkwawo” va karhi va hambanisiwa ku va “tinyimpfu” no va “timbuti.” Ku na ntirho wo tala lowu faneleke ku endliwa. Manuku, swa faneleka swonghasi leswi “ntshungu lowukulu” lowu voniweke hi Yohane wu dzunisaka Xikwembu “vusiku ni nhlekanhi etempeleni ya xona.” (Nhlavutelo 7:15) Eku hetisekeni ka xivono lexi, ‘ntshungu lowu wukulu,’ lowu tirhisanaka ni vamakwavo lava totiweke, va vike leswaku va tirhise ntsengo wa 739 019 286 wa tiawara entirhweni wo chumayela n’waxemu—nhlayo leyi lavaka ku va leyikulu ngopfu ku yi twisisa. Emisaveni hinkwayo, leswi swi yimele avhareji ya tiawara to tlula 18 hi n’hweti hi muhuweleri ha un’we. Ringanisa leswi ni avhareji ya 12 wa tiawara hi n’hweti emalembeni ya khume lama hundzeke, naswona u nga vona leswaku rivilo ra ntirho wo chumayela ra tlakuka. Xana avhareji ya wena hi wexe yi njhani loko u yi pimanisa ni avhareji ya misava?
16. (a) Ndlela leyinene ya ku “twarisa rito . . . hi nkarhi” hi yihi? (b) I vangani lava hlanganyeleke entirhweni lowu n’waxemu?
16 Nakambe, xiya nhlohlorhi leyintshwa ya maphayona ya nkarhinyana ni ya nkarhi hinkwawo: 650 095. Leswi swi vula leswaku a ku ri na maphayona yo tala ensin’wini n’waxemu ku tlula vahuweleri lava a va ri kona hi 1955. Xana a wu ri un’wana wa maphayona lawa? Loko swi ri tano, u kume ndlela yo antswa swinene yo tirhisa ndzayo ya Pawulo hi wexe loko a ku: “Twarisa Rito, u hiseka hi nkarhi.” (2 Timotiya 4:2) Ha yini u nga lunghiseleli ku hlanganyela entirhweni wa vuphayona hambi ko va n’hweti yin’we eka lembe ra ntirho ra 1988?
Ku Langutela Ka Ku Kula Loku Engetelekeke
17. I tinhlayo tihi leti kombaka leswaku ku langutela ka ku engeteleka ka nkarhi lowu taka hi lokunene?
17 Ku langutela ka ku kula ka nkarhi lowu taka ka tsakisa hakunene. Nhlayo ya tidyondzo ta le kaya ta Bibele a yi ri 3 005 048—naswona mudyondzi un’wana ni un’wana wa Bibele i xilo ‘lexi rhandzekaka’ lexi pfunaka! Ku tlula kwalaho, 8 965 221 va ve kona eku tlangeleni ka Xilalelo xa Hosi n’waxemu hi April. Vo tala va lava veke kona a va nga ri Timbhoni ta Yehova. Van’wana a ku ri vanhu lava tsakelaka. Va amukeriwe hi malwandla naswona va khutaziwa ku ya emahlweni va endla nhluvuko lowunene. Van’wana va nga ha va va vile kona eka swiendlakalo swo tano hi minkarhi yo hlayanyana emahlweni. Va swi tsakerile swinene ku va na Timbhoni kambe a va si xi vona xilaveko xo endla swo tlula sweswo.
18. Hi ku ya hi vuprofeta bya Yesu ni bya Zakariya, munhu u fanele ku endla yini leswaku a vuriwa un’wana wa “tinyimpfu” ta Yehova?
18 Vo tano va fanele ku nkhensiwa hikwalaho ko tsakela ka vona ntiyiso wa Bibele. Kambe tsundzuka, eka xifaniso xa Yesu “tinyimpfu” leti yaka evuton’wini lebyi nga heriki hi lava va kombisaka mpfuno eka vamakwavo va Yesu lava totiweke ni ku tirhisana na vona. (Matewu 25:34-40, 46) Eka vuprofeta bya Zakariya, nhlayo leyi heleleke ya “v̌av̌anuna va khume” yi vula handle ko kanakana yi ku: “Hi ta ya na ṅwina, hikuv̌a hi twile leŝaku Yehova o na ṅwina.” (Zakaria 8:23) A vo va na langutelo ra xinakulobye ntsena. Va “khomelela” vanhu va Xikwembu ivi va famba na vona, va tinyiketela ku tirhela Xikwembu xa vanhu volavo. Esikwini ra hina, leswi swi vula ku katseka hi ku helela enhlengeletanweni ya Yehova.
Ku Sele Nkarhinyana
19, 20. (a) Hi ku ya hi xivono xa Yohane, i yini lexi nga ta humelela loko ku hlengeletiwa ka ‘ntshovelo wa misava’ ku herile? (b) Leswi swi ta vula yini eka lava va nga titsongahatiki eka Yesu tanihi Hosi?
19 Ntirho wo tshovela i wa xihatla hikwalaho ka xivangelo xa vumbirhi. Ku nga ri khale wu ta hela. (Matewu 24:32-34) Manuku ku humelela yini? Hlaya leswi endzhaku swi endlekaka exivonweni xa Yohane: “Kutani ntsumi yin’wana yi ta yi huma hi le tempeleni ya le tilweni, na yona yi ri ni rihwevo lero kariha. Hi loko ntsumi yin’wanyana yi huma hi le alitarini, yi nga leyi tirhaka swa ndzilo, kutani yi huwelela hi rito leri tlakukeke, yi byela loyi a tameleke rihwevo lero kariha yi ku: ‘Nghenisa rihwevo ra wena leri, u hlengeleta swichocho swa mirhi ya vhinya ya laha misaveni, hikuva mihandzu ya kona yi vupfile!’ Hi loko ntsumi yi ndziwitela rihwevo ra yona emisaveni yi hlengeleta mihandzu ya vhinya ya laha misaveni, yi [yi] hoxa exikamelweni xa vhinya xa vukarhi lebyikulu bya Xikwembu.”—Nhlavutelo 14:17-19.
20 Endzhaku ka loko ntshovelo wa “le’ŝi ranḍekaka” wu hlengeletiwile, a ku nga ha vi na xivangelo xa leswaku misava leyi yo homboloka yi tama ya ha ri kona. “Vhinya ya laha misaveni,” hinkwawo mafambiselo lawa ya swilo ya misava ya sathana, ya ta wisiwa kutani ya herisiwa. Hi nkarhi wolowo, hambi va ri vakaneti va ta boheka ku vona Hosi leyi Yehova a yi hlawuleke. Yohane u tsale a ku: “Vonani, wa [Yesu] ta hi mapapa! Un’wana na un’wana ú ta n’wi vona, ku katsa ni lava va n’wi tlhaveke. Tinxaka hinkwato ta vanhu va misava ti ta ba nkosi ti rila hikwalaho ka yena.” (Nhlavutelo 1:7; Matewu 24:30) Manuku, marito ya Yesu eka varhangeri va vukhongeri bya Vayuda, lava a va ri emahlweni exikarhi ka “lava va n’wi tlhaveke,” ya ta hetiseka. (Matewu 26:64) Kavula, vakanganyisi lavaya va vukhongeri va nga ka va nga pfuxeriwi ku “vona” Yesu hi nyama. (Matewu 23:33) Kambe hinkwavo lava kombisaka moya wolowo naswona va ala ku amukela Hosi leyi hlawuleke hi Yehova va ta boheka ku n’wi vona loko a ta ku ta herisa matiko eArmagedoni.—Nhlavutelo 19:11-16, 19-21.
21. Ha yini vanhu va Xikwembu va fanele ku tikarhata eku tirhisaneni na tintsumi ta le tilweni?
21 Hakunene, ku pona ka vanhu ha un’we-un’we ku le khombyeni. Hi na vutihlamuleri byo tika ku va hi ri vatirhi-kulobye na tintsumi. Kambe i lunghelo lerikulu swonghasi! Onge hi nga ya emahlweni hi tikarhata hi tirhisana ni tintsumi ta le tilweni tanihi leswi hi lwelaka ku lava hinkwavo lava fanaka na tinyimpfu, “le’ŝi ranḍekaka” swa Yehova ntirho wa ku tshovela wu nga si hetiwa.
U Nga Hlamusela Xana?
◻ Hi xihi xiendlakalo lexikulu eka lembe xidzana leri ra vu-20?
◻ Xana ‘ntshovelo wa misava’ i yini, naswona wu karhi wu endliwa hi ndlela yihi?
◻ Timfanelo ta “tinyimpfu” ta Yehova hi tihi?
◻ Xiviko xa lembe na lembe xi kombisa mikateko ya Yehova entirhweni wo tshovela hi ndlela yihi?
◻ Ha yini ntirho wo chumayela wu ri wa xihatla?
[Chati leyi nga eka tluka 12-15]
XIVIKO XA NTIRHO WA LEMBE RA 1987 WA TIMBHONI TA YEHOVA EMISAVENI HINKWAYO
(See bound volume)