“Timbilu Ta N’wina Ti Nga Karhateki”
“Timbilu ta n’wina ti nga karhateki; pfumelani ka Xikwembu, ni le ka mina mi pfumela.”—YOHANE 14:1.
1. Ha yini marito ya Yesu eka Yohane 14:1 a ma ri enkarhini swinene?
A KU ri Nisan 14 hi lembe ra 33 C.E. Ntlawa lowuntsongo wa vavanuna a wu hlanganile ekamareni ra le henhla eYerusalema endzhaku ka ku pela ka dyambu. Murhangeri wa vona a a va nyika xitsundzuxo ni xikhutazo xa ku va lela. Hi ku komisa u te: “Timbilu ta n’wina ti nga karhateki.” (Yohane 14:1) Marito ya yena a ma ri enkarhini swinene, hikuva swiendlakalo leswi chavisaka a swi ta humelela ku nga ri khale. Vusiku byebyo u khomiwile, a xanisiwa naswona a tshembisiwa ku dlayiwa.
2. Hikwalaho ka yini siku rero a ri hlawulekile swinene, naswona i yini lexi pfuneke vadyondzisiwa xana?
2 U na xivangelo lexinene xa ku languta siku rero tanihi lerikulu swinene evurungurwini, leri khumbaka vumundzuku hinkwabyo bya vanhu. Rifu ra gandzelo ra Murhangeri, Yesu, ri hetisise vuprofeta byo tala bya khale kutani ri nyikela xisekelo xa vutomi lebyi nga heriki eka lava va pfumelaka eka yena. (Esaya 53:5-7; Yohane 3:16) Kambe vaapostola, hi ku hlamarisiwa ni ku tshukisiwa hi swiendlakalo swa mpfilumpfilu swa vusiku byebyo, va pfilunganyiwile ni ku chava hi nkarhinyana. Petro u landzule na Yesu. (Matewu 26:69-75) Hambi swi ri tano, endzhaku ka loko vaapostola lavo tshembeka va amukele mupfuni loyi a tshembisiweke, moya lowo kwetsima, va ve ni xivindzi kutani va nga karhateki. (Yohane 14:16, 17) Xisweswo, loko Petro na Yohane va tokote ku kanetiwa lokukulu naswona va pfaleriwe ekhotsweni, va khongele eka Xikwembu ku kuma mpfuno wo vula rito ra xona “va tiyile.” Xikhongelo xa vona xi hlamuriwile.—Mintirho 4:1-3, 29-31.
3. Ha yini vanhu vo tala va karhateka swinene namuntlha?
3 Namuntlha, hi hanya emisaveni leyi karhatekaka swinene. Makumu ya mafambiselo lawa ya khale ya swilo ma tshinela hi ku hatlisa. (2 Timotiya 3:1-5) Timiliyoni ta khumbeka hi xiviri kumbe ti kavanyetiwa swinene hi ku hohloka lokukulu ka vutomi bya ndyangu ni mimpimanyeto ya mahanyelo lamanene, ku andza loku chavisaka ka vuvabyi lebyintshwa, ku nga tshembeki ka swa politiki, ku pfumaleka ka mintirho, ndlala, vutherorisi ni nxungeto wa nyimpi ya nyutliya. Timbilu to tala ta karhateka hi ku chava loku hetaka matimba ka vumundzuku. Hi laha Yesu a vhumbeke ha kona, “matiko ma ta hela ntamu . . . vanhu va ta titivala hi ku chava ni ku ehleketa leswi nga ta humelela la misaveni.”—Luka 21:25, 26.
4. I timhaka tihi leti nga vangelaka Vakriste ku karhateka hi ntshikilelo?
4 Hambi va ri Vakriste va nga khumbeka swinene hi swilo swo tano leswi hetaka matimba. Na vona va nga ha kongomana ni ntshikilelo hikwalaho ka xihlawu-hlawu xa vukhongeri kumbe ku kanetiwa loku humaka emaxakeni, vaakelani, vatirhi-kulobye, vanghana va xikolo ni vatirhela-mfumo va tihulumendhe. (Matewu 24:9) Kutani hi nga tshama njhani hi ri na ku rhula, hi nga karhateki, eminkarhini leyi yo nonon’hwa? Hi nga hlayisa ku rhula ka miehleketo loko xiyimo xi ya xi nonon’hwa hi ndlela yihi? Hi nga kongomana njhani na vumundzuku hi ku tiyiseka? I yini lexi nga hi pfunaka ku hlula ku vilela lokukulu loku ku andzaka? Hi le ka nguva leyi Yesu a nyikeleke xitsundzuxo lexi nga eka Yohane 14:1, kutani a hi xi kambisiseni.
Hi Nga Ku Hlula Njhani Ku Vilela?
5. Hi swihi switsundzuxo leswi khutazaka leswi Matsalwa ma hi nyikaka swona?
5 Loko a nyikele xikhutazo xa rirhandzu xa leswaku ‘timbilu ta vona ti nga karhateki,’ Yesu u byele vaapostola va yena a ku: “Pfumelani ka Xikwembu, ni le ka mina mi pfumela.” (Yohane 14:1) Matsalwa lama huhuteriweke ma hi nyika swikhongotelo swo tala leswi fanaka: “Nyiketa Yehova e timhaka ta wena, o ta ku seketela.” “Ṭhikela Yehova e ndlela ya wena, u ṅwi ṭhemba, kutani yena o ta tira.” (Psalma 55:22; 37:5) Pawulo u nyike Vafilipiya xitsundzuxo lexi xa nkoka: “Mi nga vileli ha nchumu, kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina.”—Vafilipiya 4:6, 7.
6, 7. (a) Hi yihi ndlela yin’wana ya ku hunguta ku tshikileleka? (b) Hi nga hlakulela xiboho lexikulu na Yehova hi ndlela yihi?
6 Ku vilela ni ku karhateka loku vangiweke hi swirhalanganya ni vutihlamuleri lebyikulu minkarhi yin’wana swi nga khumba rihanyo ra hina kun’we ni moya wa hina. Hambi swi ri tano, mutivi wa vutshunguri, ebukwini leyi nge Don’t Panic, u ri: “Loko vanhu va swi kota ku vulavula hi swiphiqo swa vona ni un’wana loyi va n’wi xiximaka . . . , mpimo wa ku karhateka hakanyingi wa hunguteka swinene.” Loko sweswo swi ri tano malunghana ni ku vulavula ni munhu un’wana, mpfuno wu ta va lowukulu swonghasi hi ku vulavula ni Xikwembu. I mani loyi hi nga n’wi xiximaka swinene ku tlula Yehova?
7 Hi yona mhaka leyi vuxaka lebyikulu bya munhu hi xiyexe na yena byi nga bya nkoka swinene eka Vakriste namuntlha. Malandza ya Yehova lama vupfeke ma swi tiva kahle leswi, kutani va ni vukheta leswaku va papalata muxaka wa xinakulobye ni vanhu va misava kumbe muxaka wa leswi hundzeke leswi nga tsanisaka vuxaka byebyo. (1 Vakorinto 15:33) Nakambe va tlangela ndlela leyi swi nga swa nkoka ha yona ku vulavula na Yehova hi xikhongelo, ku nga ri kan’we kumbe kambirhi hi siku, kambe nkarhi na nkarhi. Vakriste lavantsongo kumbe lavantshwa ngopfu-ngopfu va fanele ku hlakulela xiboho lexi xikulu na Yehova hi dyondzo ya nkarhi na nkarhi ni ku ehleketisisa hi Rito ra yena na hi xinakulobye ni ntirho wa Vukriste. Ha khutaziwa: “Tshinelani kusuhi ni Xikwembu kutani xi ta tshinela kusuhi na n’wina.”—Yakobo 4:8.
Xitsundzuxo Lexi Yesu A Xi Nyikeke
8, 9. Hi xihi xitsundzuxo lexinene lexi hi nga xi tirhisaka mayelana ni swiphiqo swa ikhonomi?
8 Ematikweni yo tala, ku pfumaleka ka mintirho ni ku tsana ka ikhonomi i swivangelo-nkulu swa ku vilela. Yesu u nyikele xitsundzuxo lexi kongomeke swinene mayelana ni timhaka leti a ku: “Mi nga tshuki mi vilela hi swa vutomi bya n’wina leswaku mi ta dya yini kumbe mi ta nwa yini, hambi ku ri ku vilela hi swa miri wa n’wina leswaku mi ta ambala yini. Xana vutomi a byi tluri swakudya? Na wona miri a wu tluri tinguvu ke?” (Matewu 6:25) Ee, moya ni miri, kumbe munhu a helerile, i swa nkoka ngopfu swinene ku tlula swakudya ni swo ambala. Malandza ya Xikwembu ma nga tiyiseka leswaku xi ta ma pfuna leswaku ma kuma swilaveko swa wona swa xisekelo. Yesu u nyikele xikombiso lexi: “Langutani tinyanyana leti hahaka empfhukeni: a ti byari, a ti tshoveri, a ti hlengeleti nchumu eswitlatini; kasi Tata wa n’wina wa le tilweni wa ti fihluta; xana n’wina a mi ti tluri ngopfu ke?” (Matewu 6:26) A swi twali leswaku Xikwembu a xi ta wundla swivumbiwa leswi nga na tinsiva kambe xi tshika malandza ya xona ya vanhu, lava nga ni risima swinene eka xona ni lava Kriste a va feleke.
9 Manuku Yesu u tiyise leswi hi ku kombetela eka swiluva swa nhova leswi swi nga tirhiki kumbe ku swula, kasi “hambi a ri Solomoni evukosini bya yena hinkwabyo, a nga ambalanga tani hi xin’wana xa swona.” Ku fuma ka Hosi Solomoni a ku tiveka hi ku saseka ka kona. Kutani Yesu hi ku khongotela u vutisile a ku: “Xana [Xikwembu] ngopfu-ngopfu a xi nga mi ambexi?”—Matewu 6:28-32; Risimu ra Tinsimu 3:9, 10.
10. (a) Marito lama chavelelaka ya Yesu ma kongomisiwe eka vamani? (b) I xitsundzuxo xihi lexi a xi nyikeleke hi vumundzuku?
10 Hambi swi ri tano, Yesu u ya emahlweni a kombisa leswaku leswi i swa lava va ‘tilavelaka Mfumo ni ku lulama ka yena ku sungula ntsena.’ Emisaveni hinkwayo, Vakriste vo tano va ntiyiso va tiva leswi Mfumo wa Xikwembu wu nga swona hi xiviri naswona va wu rhangisa evuton’wini bya vona. Eka vona, xitsundzuxo xa Yesu xa tirha: “Mi nga tshuki mi vilela hi swa mundzuku, hikuva mundzuku wu ta tikarhatela swa wona. Ku karhateka ka siku rin’wana ni rin’wana, ku ringene rona.” (Matewu 6:33, 34) Hi marito man’wana, tlhantlha xiphiqo xin’wana ni xin’wana loko xi humelela, naswona u nga karhateki ngopfu hi vumundzuku.
11, 12. Vakriste van’wana va swi vone njhani leswaku Yehova u va pfunile hi ku hlamula swikhongelo swa vona?
11 Hambi swi ri tano, vanhu vanyingi va tala ku vilela hi vumundzuku, ngopfu-ngopfu loko swilo swi nga fambi kahle. Kambe Vakriste va nga swi kota naswona va fanele ku hundzukela eka Yehova hi ripfumelo. Xiya mhaka ya Eleanor. Nuna wa yena a a vabya swinene, naswona lembe hinkwaro a a nga swi koti ku tirha. A a ri na vana vambirhi lavantsongo ni tatana la dyuhaleke ku va hlayisa, hikwalaho a a nga ta swi kota ku va ni ntirho wa nkarhi lowu teleke. Va kombele mpfuno eka Yehova. Mixo wun’wana, endzhakunyana ka leswi, va kume vhilopo ehansi ka rivanti. A yi ri na mali yo tala swinene—leyi aneleke ku va hlayisa va hanya ku fikela loko nuna wa yena a ta swi kota ku tirha nakambe. Va titwe va wu tlangela swinene mpfuno lowu wu nga enkarhini. A ku na xisekelo xa Bibele xa ku langutela leswaku xilo lexi fanaka xi ta humelela Mukriste un’wana ni un’wana la pfumalaka, kambe hi nga tiyiseka leswaku Yehova u ta swi twa swirilo swa hina ni leswaku u na vuswikoti bya ku hi pfuna hi tindlela to hambana-hambana.
12 Noni ya Mukriste edzongeni wa Afrika yi boheke ku lava ntirho leswaku yi ta wundla vana va yona vambirhi lavantsongo. Kambe a yi navela swinene ku tirha hafu ya siku ntsena leswaku yi heta nkarhi yi ri na vona. Endzhaku ka loko yi kume ntirho, a yi sindziseka ku wu tshika loko mininjhere a bohe leswaku a a lava matsalani wa nkarhi lowu teleke. A ri hava ntirho nakambe, makwerhu wa xisati u khongelele mpfuno eka Yehova hi ku hiteka. Mavhiki manharhu endzhaku, khale ka mininjhere wa yena u n’wi kombele ku tlhela a vuya ku ta tirha hafu ya siku. A a tsakile swonghasi! U swi vonile leswaku Yehova u swi hlamurile swikhongelo swa yena.
Kombela Yehova
13. (a) “Ku kombela” swi vula yini xana? (b) Hi swihi swikombiso swa Matsalwa swa ku kombela leswi hi nga na swona?
13 Xiya leswaku endzhaku ka ku tsundzuxa a ku, “Mi nga vileri ha nchumu,” Pawulo wa engetela, “kambe e timhakeni hikwato, tiv̌isani ku pfumala ka ṅwina e ka Šikwembu hi ku khongela, ni ku kombela, mi v̌a mi nkhensa.” (Vafilipiya 4:6, Bibele ya Xitsonga.) Ha yini ku vulavuriwa hi “ku kombela?” Rito leri ri vula “xikombelo lexi tiyeke” kumbe ‘xikhongelo xo kombela.’ Ri katsa ku kombela Xikwembu hi ku hiteka swinene, tanihi le nkarhini wa ntshikilelo lowukulu kumbe khombo. Loko a ri mukhotsiwa, Pawulo u kombele Vakriste-kulobye leswaku va n’wi khongelela leswaku a chumayela ‘Evhangeli handle ko chava . . . tanihi muyimeri la bohiweke.’ (Vaefesa 6:18-20) Korneliyo ndhuna ya masocha ya Rhoma na yena a a “nga rhuteli ku khongela Xikwembu.” U fanele a nyanyuleke swonghasi loko ntsumi yi te: “Mikhongelo ya wena ni swihanano swa wena swi amukeriwile eka Xikwembu, kutani xi ku anakanyile.” Naswona i lunghelo muni ronghasi leri a veke na rona ku va exikarhi ka Vamatiko vo sungula lava totiweke hi moya lowo kwetsima!—Mintirho 10:1-4, 24, 44-48.
14. Hi nga swi tivisa ku yini loko ku kombela Yehova hi ku hiteka swi fanele ku endliwa kan’we ntsena?
14 Swi fanele ku xiyiwa leswaku ku kombela ko tano hi ku hiteka eka Yehova hi ntolovelo a ku endliwi kan’we ntsena. Eka dyondzo ya yena leyi dumeke ya le Ntshaveni Yesu u dyondzisile: “Kombelani, mi ta nyikiwa; lavani, mi ta swi kuma; gongondzani, mi ta pfuleriwa.” (Matewu 7:7) Ku hundzuluxela ko tala ka Bibele ku vula leswi: “Kombela . . . lava . . . gongondza.” Kambe Xigriki xo sungula xi nyikela mianakanyo ya xiendlo lexi yaka emahlweni.a
15. (a) Ha yini Nehemiya a a nga tsakangi loko a ri karhi a chelela Hosi Artakserkes vhinyo? (b) Nehemiya u endle leswi tlulaka ku nyikela xikhongelo hi ndlela yihi?
15 Loko Nehemiya a ha tirhela Artakserkes hosi ya Persia tanihi mucheri wa vhinyo, hosi yi vutise leswaku ha yini a a languteka a nga tsakangi. Nehemiya u vule leswaku i mhaka ya leswi a voneke leswaku Yerusalema a wu ri eka xiyimo lexi onhakeke. Kutani hosi yi vutisa yi ku: “U kombela yini ka mina ke?” Kwalaho Nehemiya a kombela mpfuno eka Yehova, handle ko kanakana hi ku komisa, a miyerile. Kutani u kombele mpfumelelo wo tlhelela eYerusalema ku ya tlhela a aka tiko-xikaya ra ka vona leri rhandzekaka. Xikombelo xa yena xi amukeriwile. (Nehemia 2:1-6) Hambi swi ri tano, emahlweni ka mbulavurisano wolowo wo hlawuleka, Nehemiya a heta masiku a kombela, a khongelela mpfuno eka Yehova. (Nehemia 1:4-11) Xana ku na leswi u swi dyondzaka eka leswi?
Yehova Wa Hlamula
16. (a) I lunghelo rihi ro hlawuleka leri Abrahama a ri tsakeleke? (b) I mimpfuno yihi ya matimba leyi hi nga na yona leyi nga katsekaka eka tinhlamulo ta swikhongelo swa hina?
16 Hi nkarhi wun’wana, Abrahama u tsakele lunghelo ra ku vulavula na Yehova hi ku tirhisa tintsumi. (Genesa 22:11-18; 18:1-33) Hambi leswi sweswo swi nga endlekiki namuntlha, hi katekisiwe hi mimpfuno ya matimba leyi Abrahama a a yi pfumala. Wun’wana i Bibele leyi heleleke—xihlovo lexi nga phyiki xa nkongomiso ni ku chavelela. (Psalma 119:105; Varhoma 15:4) Hakanyingi, Bibele yi nga hi nyika nkongomiso kumbe xikhutazo lexi hi xi lavaka, Yehova u hi pfuna leswaku hi tsundzuka tindzima leti hi ti lavaka. Hakanyingi, nxaxamelo wa swihloko kumbe yin’wana ya tibuku to tala ta Bibele leti Xikwembu xi hi nyikeke tona hi ku tirhisa nhlengeletano ya xona ti nga hi nyika nhlamulo. Xikombo lexi nga ni vuxokoxoko ni vuswikoti eka tibuku leti nakambe i mpfuno wun’wana wa nkoka wo kuma mhaka leyi u yi lavaka.
17. Hi tihi tindlela tin’wana leti Yehova a nga hlamulaka swikhongelo swa hina ha tona, naswona Vakriste va musa, va ntwelo-vusiwana va nga pfuna hi ndlela yihi?
17 Loko hi karhatiwa hi xiphiqo kumbe hi titwa hi ri ni gome kumbe hi hela matimba, tinhlamulo ta swikhongelo swa hina ti nga ha ta na hi tindlela tin’wana. Hi xikombiso, nkulumo ya Bibele ebandlheni kumbe entsombanweni wa Timbhoni ta Yehova yi nga va ni “murhi” lowu hi wu lavaka. Eka minkarhi yin’wana, ku bula ni Mukriste un’wana swi ta hi nyika leswi hi swi lavaka. Hi minkarhi yo tala vakulu va bandlha va nga nyikela xikhutazo kumbe xitsundzuxo. Hambi ku ri ku phofula leswi nga etimbilwini ta hina eka Mukriste la vupfeke, wa musa ni ntwelo-vusiwana loyi a nga muyingiseri lonene hakanyingi swi nga endla leswaku hi titwa hi antswa swinene. Sweswo swi tano ngopfu-ngopfu loko munghana loyi a hi pfuna ku ehleketa hi mianakanyo ya Bibele. Ku vulavurisana ko tano ku nga hi rhula ndzhwalo lowo tika emianakanyweni ni le timbilwini ta hina.—Swivuriso 12:25; 1 Vatesalonika 5:14.
18. I ntirho wihi wo hlawuleka lowu nga pfunaka Vakriste leswaku va hlula minkarhi ya ku tsana, naswona leswi swi ri pfune njhani phayona lerintsongo?
18 Swivumbeko swo hambana-hambana swa mintlhaveko ya ku tsana swi tolovelekile ‘eminkarhini leyi yo nonon’hwa.’ (2 Timotiya 3:1) Vanhu va hela matimba hi ku tsana hikwalaho ka swivangelo swo hambana-hambana. Leswi swi nga ha humelela ni le ka Vakriste, naswona ku nga ha va ntokoto lowu nga tsakisiki hakunene. Hambi swi ri tano, vo tala va kume leswaku ku chumayela mahungu lamanene ku va pfunile ku herisa nhlaselo wa xinkarhana wa ku tsana.b U swi ringetile sweswo ke? Loko u titwa u ri na ku tsana ko karhi, ringeta ku hlanganyela eka xivumbeko xa ntirho wa Mfumo. Ku vulavula ni van’wana hi Mfumo wa Xikwembu hakanyingi swi ta ku pfuna ku cinca xivumbeko xa wena xa mianakanyo xi suka eka lexo biha xi ya eka lexinene. Ku vulavula hi Yehova ni ku tirhisa Rito ra yena swi nga ku nyika ntsako—muhandzu wa moya wa yena—kutani ku ku endla u titwa u hambanile. (Vagalatiya 5:22) Phayona lerintsongo na rona ri kume leswaku ku gingiriteka entirhweni wa Mfumo swi ri endle ri vona leswaku “loko swi ringanisiwa na swiphiqo swa van’wana, [swa rona] a swi ri swintsongo swinene naswona a swi ri swa xinkarhana.”
19. Mukriste loyi a nga xihotha u yi hlule njhani mianakanyo leyo biha?
19 Minkarhi yin’wana, xiyimo xa ku tsana ka miri, kumbexana lexi vangiwaka hi mivilelo kumbe swiphiqo, xi nga vanga nsusumeto wa gome. Leswi swi nga endla leswaku munhu a pfuka nivusiku a karhatekile, hi laha swi humeleleke ha kona eminkarhini yin’wana eka Mukriste wa malembe ya le xikarhi loyi a a ri xihotha. Kambe u kume leswaku xikhongelo lexi humaka embilwini a ku ri mpfuno wa xiviri. Nkarhi na nkarhi loko a pfuka a titwa a tsanile, hi ku titsongahata a a khongela eka Yehova. Leswi swi n’wi endle a titwa a antswa hi xihatla. Nakambe u swi kume swi fanela ku phindha tindzimana ta Bibele leti chavelelaka hi nhloko, to tanihi Psalma 23. Hi laha ku tiyeke, moya wa Yehova, lowu tirhaka hi ku pfumelelana ni xikhongelo kumbe hi Rito ra yena wu ta pfuna ku pfala xiyimo xa miehleketo lexi nga ni gome hi lexi tsakeke. Endzhakunyana, wanuna a a ta swi kota ku ehleketa hi swiphiqo swa yena hi ku ringanisela na hi ku rhula, a vona ndlela yo swi hlula kumbe a titwa a tiyisiwile leswaku a swi tiyiselela.
20. Ha yini nhlamulo ya xikhongelo minkarhi yin’wana yi nga ha vonakaka yi hlwela?
20 Lexi i xikombiso xa ndlela leyi xikhongelo xi nga tisaka nhlamulo ha yona. Kambe minkarhi yin’wana swi vonaka ku ri na ku hlwela eku kumeni ka ntlhantlho. Ha yini? Kumbexana nhlamulo yi fanele ku rindzela nkarhi lowu faneleke wa Xikwembu. Swa endleka leswaku etimhakeni tin’wana Xikwembu xi pfumelela leswaku lava xi kombelaka va kombisa ku enta ka ku karhateka ka vona, vukulu bya ku navela ka vona, ntiyiso wa ku tinyiketela ka vona. Un’wana wa vapisalema u ve ni ntokoto wolowo!—Psalma 88:13, 14; ringanisa 2 Vakorinto 12:7-10.
21. Hikwalaho ka yini ku ri lunghelo lerikulu ku va un’wana wa Timbhoni ta Yehova namuntlha, naswona hi nga kombisa ku tlangela hi ndlela yihi?
21 Eka xiendlakalo xihi na xihi, ku vulavula na Xikwembu xa Matimba Hinkwawo hi xikhongelo i ntokoto lowu tiyisaka ripfumelo lowu wu nga hi susaka egomeni wu hi yisa eku tiyisekeni. Swi khongotela swonghasi ku tiva leswaku xa twa ivi xi hlamula! Hi laha Pawulo a tsaleleke bandlha ra le Filipiya ha kona, hi fanele ku nyikela swikhongelo ni swikombelo swa hina ‘hi ri karhi hi nkhensa.’ (Vafilipiya 4:6) Ina, siku rin’wana ni rin’wana hi fanele ku pfulela Yehova timbilu ta hina hi ku nkhensa naswona ‘eka hinkwaswo hi tlangela.’ (1 Vatesalonika 5:18) Leswi swi ta vumba xiboho lexikulu, lexi kufumelaka naswona swi ta hi tisela ku rhula. Xihloko lexi landzelaka xi kombisa ndlela leyi leswi swi nga swa nkoka ha yona eka malandza ya Yehova eminkarhini leyi ya ku karhateka, ya khombo.
[Tinhlamuselo ta le hansi]
a Hi ku pfumelelana ni mavekelo ya New World Translation of the Holy Scriptures, Charles B. Williams u hundzuluxela ndzimana leyi a ku: “Hambetani mi kombela . . . hambetani mi lava . . . hambetani mi gogondza, kutani nyangwa wu ta mi pfulekela.”—The New Testament: A Translation in the Language of the People.
b Nsusumeto wa xinkarhana wa ku tsana wu hambanile ni gome leri vavaka, ra nkarhi wo leha, leri nga ni khombo swinene ni ntlhaveko lowu rharhanganeke kumbe xiyimo xa miehleketo. Vona Awake! ya October 22, 1987, matluka 3-16.
U Nga Hlamula Njhani?
◻ Hi tihi timhaka leti nga ha endlaka Vakriste va karhateka?
◻ I yini lexi nga hi pfunaka ku hlula ku vilela?
◻ Ha yini Vakriste va nga tiyisekaka leswaku Xikwembu xi ta va pfuna hi swilaveko swa vona swa xisekelo?
◻ “Ku kombela” swi vula yini, naswona swikombiso leswi hundzeke swi hi kombisa njhani ndlela leyi Yehova a hlamulaka ha yona?
◻ I tindlela tihi to hambana-hambana leti Yehova a nga hlamulaka swikhongelo swa hina ha tona?
[Xifaniso lexi nga eka tluka 12]
‘Tata wa n’wina wa le tilweni u fihluta tinyanyana. Xana a mi ti tluri hi nkoka ke?’