Nkambisiso Wa Mahungu
“Tata wa Hina . . . ”
“Vavasati etikweni hinkwaro a va ri karhi va byela vagandzeri-kulobye leswaku swa va karhata ku tirhisa ririmi ra xinuna hi laha ku heleleke (‘Tata wa hina la nge Matilweni’) emintirhweni ya vugandzeri,” ku vika Minneapolis Star and Tribune. “Swi va endla leswaku va titwa va fana ni vaaki va ntlawa lowu nga nyawuriki, ku vula vavasati, naswona va nga ka va nga vulavuli ni Xikwembu xa xinuna.” Loko yi seketela mphikamakaneta, huvo ya vulawuri ya United Methodist Church eMinneapolis, Minnesota, U.S.A., yi hlawule hi ku twanana ni nxaxamelo lowuntshwa wa swiga leswi nga ta tirhisiwa hi swirho swa kereke loko swi vulavula ni Xikwembu enkarhini wa xikhongelo, mintirho ya vugandzeri ni mintirho yin’wana ya kereke.
Swiga swin’wana leswi nga riki swa rimbewu leswi lunghiseleriweke hi huvo ya tikereke hi leswi nge “xihlovo xa ku rhula, xihlovo xa tintswalo, la tiyeke ni la nga ni rirhandzu, ntamu wa vutomi bya hina, . . . mianakanyo ya hinkwako-nkwako, . . . la tlakukeke ni la kwetsimaka.” Ku tirhisiwa ka swiga leswi ku ta khutaziwa tanihi ndlela yin’wana eka masivi ya xinuna kun’we ni marito yo fana na Hosi na Tatana, lama yisaka vununa eka Xikwembu.
Hambi swi ri tano, ku tshika ku tirhisa ka Bibele ka tinhlamuselo ta xinuna eka Xikwembu ku hava xikombiso. Emahlweninyana ka rifu rakwe, Yesu, N’wana la tswariweke a ri swakwe wa Xikwembu, hi ku kongoma u tirhise rito ra Xiarama leri nge Abba, leri vulaka “Tatana,” loko a khongela eka Yehova Xikwembu. (Marka 14:36) Hi ku fanana, muapostola Pawulo u tirhise rito leri ku hundzisela vuxaka lebyikulu exikarhi ka Vakriste lava totiweke hi moya ni Tata wa vona wa le tilweni, Yehova. (Varhoma 8:15; Vagalatiya 4:6) Hikwalaho ke, loko Yesu a dyondzise vadyondzisiwa vakwe ku khongela va ku, “Tata wa hina la nge matilweni,” xana Vakriste hinkwavo namuntlha a va fanelanga ku endla leswi fanaka?—Matewu 6:9.
Tikereke eXikweletini
Endzhaku ka nhlangano wa huvo ya Dutch Reformed Church en’walungu wa Transvaal, Afrika Dzonga, ku vikiwe leswaku mabandlha ya 134 ya kereke a ya ri exikweletini xa ntsengo wa R13 890 000. Loko a hlamusela hi ta xiphiqo, muhleri wa nyuziphepha ya Xibunu leyi nge Beeld u vutisile a ku: “Hambi swi ri tano, xana xihoxo minkarhi yin’wana a xi le ka mufundhisi kumbe huvo ya kereke ke?” Nyuziphepha ya hlamusela: “Hakanyingi swa endleka leswaku mudiyakoni a ta nkarhi na nkarhi endlwini n’hweti yin’wana ni yin’wana ku ta hlengeleta mali, kasi mufundhisi a nga swi voni hikwalaho ka ku va a nga ri kona ni nkulu a ri muluveri endhawini yakwe. Xana swirho swa kereke, eka swikombiso swo tano, swi fanele ku soleriwa ku kuma langutelo ra leswaku kereke yi tsakela mali ya swona ntsena, hayi vuhlayiseki bya swona bya moya ke?”
Hi laha ku hambaneke, vutirheli bya Yesu ni vadyondzisiwa vakwe byi kandziyise ku nyika ka moya. (Matewu 10:8) Loko vayingiseri lava tlangelaka hakanyingi va va pfunile hi ku va nyika swilaveko swa xisekelo hi ku tirhandzela swo fana ni swakudya ni byetlelo, Yesu kumbe vadyondzisiwa vakwe a va yi lavanga mimpfuno ya nyama. (Luka 10:5-9) Hi laha muapostola Pawulo a vuleke ha kona u te: “A ndzi lavanga mali ya silvere kumbe ya nsuku, hambi yi ri nguvu, eka munhu ni un’we.” Ematshan’wini ya sweswo, u tsundzuxe vatirheli va ntiyiso va Xikwembu ku ka va nga “fumiwi hi mali eku hanyeni ka vona.” Maendzo yakwe hi yindlu na yindlu a ya endleriwa leswaku a ta kota ku ‘veka vumbhoni ehenhleni ka ku hundzukela eka Xikwembu ni ripfumelo eka Hosi ya hina Yesu.’ (Mintirho 20:20, 21, 33; Vaheveru 13:5) A ku ri varhangeri va vukhongeri va siku rero lava hlamuseriweke hi Luka mutsari wa Bibele tanihi ‘varhandzi va mali.’—Luka 16:9-15.
Ku Tirivatisa Loku Hoxeke
Ku endlela ku titsakisa ntsena, vanhu va Jarimani eLahnstein va sungule ku nghenisa mimoya ya vungoma leswaku va vulavula hi ku tirhisa nghilazi yo nwa hi yona yi fambisa tinhlanga leti landzelanaka, “yi tsala” rungula. Vuyelo byi ve byihi?
“Lava nga ni malembe ya khume ntlhanu hi vukhale, hi ku chava ku famba va ri voxe endlwini yo hlambela, va vulavula hi ku hatlisa va pfilunganyekile ehenhleni ka mademona. Nivusiku, vana va lava ku etlela ni vatswari va vona,” ku vika nyuziphepha ya Jarimani leyi nge Rhein-Zeitung. Ku chava ku tlhekekile exikarhi ka vo tala va lava va “fihlaka minhlangano leyi rhambelaka mimoya naswona eku heteleleni yi rhambela ‘Lucifer.’” Loko a hlamusela hi xiendlo xa vana “loko ‘Lucifer’ a hlangana na vona,” mudyondzisi un’wana u te: “Hambi va ri vana lava nga ni vukarhi swinene hi ku hatlisa va va lava holeke swinene. A va hlaseriwe hi ku chava.” Endzhaku ka ntokoto, xivandla xa vantshwa xa muti xi sivele “mintlangu” yo tano, naswona vatswari va komberiwe ku ka va nga tshiki vana va vona lava chavisiweke va ri voxe.
Hi ku ya hi phepha leri, “gandlati ra vungoma ri funengeta tibayiskopo, TV na tirhekhodi.” Kambe ke, ku hlanganyela eka vungoma bya ku tirivatisa a ku va nyikanga ntsako lowu languteriweke vanhu va le Jarimani va Lahnstein. Ha yini swi nga ri tano? Hikuva Bibele yi hi tivisa leswaku Diyavulosi u ni mano naswona i “Mukanganyisi wa misava hinkwayo.” Yi hlanganisa ku humelela ka Diyavulosi emisaveni ni “khombo.” Sathana ni ‘mavuthu yakwe ya mimoya leyo biha’ (mademona) va fanele ku langutiwa swinene tanihi khombo ra xiviri ra moya, naswona va papalatiwa.—Nhlavutelo 12:9, 12; Vaefesa 6:11, 12; ringanisa Mintirho 19:19.