Ku Tshemba Yehova Swi Yisa Eku Tinyiketeni Ni Nkhuvulo

“Ṭhemba Yehova, u endla leŝo lulama, u aka e tikweni, u šura v̌unene.”—PSALMA 37:3.

1. I vumbhoni byihi bya vanhu lava tlhariheke va misava lebyi kombaka leswaku i vuhunguki ku tshemba varhangeri va vanhu?

XANA i mani loyi hi nga n’wi tshembaka? I varhangeri va vanhu ke? Rhekhodo ya vona yi komba leswaku i vuhunguki ku tshemba vanhu lava nga hetisekangiki. Kunene, hambi va ri vanhu va misava lava tlhariheke va yi vona mhaka yoleyo! Xisweswo, magazini wa le Yuropa wa mabindzu lowu nge Vision wu tshama wu vula leswaku leswi “nyanyisaka ehenhleni ka xiyimo xa sweswinyana hi leswaku ku hava ni un’we loyi a nga vonaka ndlela yo huma hi yona.” Kutani Robert Heilbroner n’wamatimu wa ikhonomi u xiyile: “Ku na nchumu wun’wana lowu hi hlaselaka. I ku ehleketela ka leswaku ku hava loyi a nga ni vutihlamuleri, leswaku ku hava loyi a tihlomiseleke ku lwisana ni swiphiqo leswi tsutsumelaka eka hina.”

2. Ku nga vuriwa yini ehenhleni ka mimpfuno ya sayense ya manguva lawa?

² I ntiyiso, vanhu va endle nhluvuko lowukulu eswivandleni swo hambana-hambana swa sayense. Kambe xana leswi hinkwaswo swi ve leswi pfunaka? Doo, a swi pfunanga. Hi laha swi kombisiweke ha kona hi mutsari Lewis Mumford: “Mianakanyo ya leswaku nhluvuko wa swiendliwa ni wa sayense wu tiyise mimpfuno leyi ringanaka ya vanhu . . . sweswi yi ve leyi nga seketelekiki hi laha ku heleleke.” Mhaka leyi twisisekaka i ya mpfula ya asidi, leyi thyakisaka mativa ni milambu naswona yi pfuneta ku herisa mirhi hi timiliyoni. Ku tlula kwalaho, xiyimo lexi xumbadzaka xa misava—ku andza ka vugevenga, vukarhi ni vutherorisi, eku godzomberiweni hi swidzidzirisi ni xihoko, ni le ka vuvabyi byo tluletana hi rimbewu ni xiyimo lexi nga ni khombo xa ikhonomi—hinkwaswo swi veka vumbhoni bya leswaku a swi pfuni nchumu ku tshemba varhangeri va vanhu.

3. Rito ra Xikwembu ri nyika xitsundzuxo xihi malunghana ni laha hi faneleke ku veka ntshembo wa hina kona?

³ Rito ra Xikwembu ri hi tsundzuxa hi laha ku fanelaka: “Mi nga tiṭhembeleni tihosi, hambi v̌a ri v̌ana v̌a v̌anhu lav̌a hlulekaka ku ponisa, ku hefemula ka v̌ona loko ku hela, v̌a tlhelela e nṭhurini; kutani hi siku rolero makungu ya v̌ona ma ta hela.” (Psalma 146:3, 4) Loko ku nga ri eka vanhu, kona hi le ka mani laha hi faneleke ku veka ku tshemba ka hina kona? Hi nga veka ku tshemba ka hina eka Muvumbi wa tilo ni misava, hi laha hi hlayaka ha kona: “Ku katekile munhu la tiṭhembelaka Yehova, loyi ku ṭhemba ka yena ku nga ka Yehova!”—Yeremia 17:7.

Ha Yini Hi Tshemba Yehova?

4. Hi tihi timfanelo-nkulu ta Yehova, naswona ti hi nyika swivangelo leswinene swo veka ku tshemba ka hina eka yena hi ndlela yihi?

⁴ Hi nga tshemba Yehova hikwalaho ka swivangelo leswinene. Xo sungula, hi nga veka ku tshemba ka hina eka yena hikwalaho ka timfanelo takwe letikulu—rirhandzu, vutlhari, ku lulama ni matimba—ni timfanelo tin’wana leti hlamarisaka. Rito rakwe ri hi tiyisekisa leswaku hi loyi a tlakukeke, loyi rin’wana ra mavito yakwe ku nga “Šikwembu leši nga ni matimba.” (Genesa 28:3) Mayana xisekelo xa ntshembo swonghasi lexi sweswo swi nga xona! Ku hava loyi a nga lwisanaka na Yehova hi laha ku humelelaka, naswona ku hava munhu loyi a nga herisaka swikongomelo swakwe. Nakambe U hava Makumu. A nga tivi makumu ni masungulo ntsena, vumundzuku byi ri buku leyi pfuriweke eka yena, kambe eka yena ku tlhela ku va ni vutivi ni vutlhari hinkwabyo, hi laha swi voniwaka ha kona hi mintirho leyi hlamarisaka ya ku tumbuluxa. Ku hava ni kun’we eka mintirhisano yakwe laha a endleke xihoxo. (Esaya 46:10; Varhoma 11:33-35) Ku tlula kwalaho, Yehova wa tshembeka hi laha ku hetisekeke, Xikwembu xa ku lulama ni ku tshembeka. A swi koteki eka xona ku hemba. (Deuteronoma 32:4; Tito 1:2; Vaheveru 6:18) Ehenhla ka hinkwaswo, leswi rirhandzu leri nga hava vutitivi ku nga mfanelo yakwe leyikulu, swi vuriwe kahle ku: “Xikwembu i rirhandzu.”—1 Yohane 4:8, 16.

5. Hi yihi rhekhodo leyi Rito ra Xikwembu ri nga na yona, leyi tiyisaka ku tshembeka ka xona?

⁵ Ku tirhisana ka Yehova ni vanhu ku veka vumbhoni byin’wana bya ku va a ri Xikwembu lexi tshembekaka xa matimba hinkwawo, vutlhari, ku lulama ni rirhandzu. Muxe u tiyisekise Vaisrayele leswaku Yehova u hlayisa ntwanano ni tintswalo ni lava va n’wi rhandzaka ni ku hlayisa milawu yakwe. (Deuteronoma 7:9) Eku sunguleni, Yehova u hlayise Nowa la chavaka Xikwembu ni ndyangu wakwe va hundza eka Ndhambi leyikulu. Xikwembu xi ponise Lota la lulameke ni vanhwana vakwe vambirhi eku loviseni ka Sodoma na Gomora hi ndzilo. Endzhakunyana, Xikwembu xi humese Vaisrayele aEgipta ivi xi va nyika tiko ra Kanana ku pfumelelana ni xitshembiso xa xona eka Abrahama. (Genesa 7:23; 17:8; 19:15-26) Naswona xana Yehova a nga va kutsulanga Vaheveru vanharhu lava nghenisiweke endzilweni lowo leva, kun’we na Daniyele ekheleni ra tinghala?—Daniel 3:27; 6:23.

6. Hi byihi vumbhoni bya manguva lawa lebyi hi nga na byona bya leswaku ku tshemba Yehova a hi ku hoxisa?

⁶ Leswaku Yehova hi yena loyi hi nga vekaka ku tshemba ka hina eka yena swi tlhele swi tiyisiwa hi mintokoto ya Timbhoni takwe ta manguva lawa. Hi xikombiso, Adolf Hitler u tinyungubyisile a ku a a ta herisa “ntlawa” wa Timbhoni ta Yehova eJarimani. Kambe ematshan’wini ya sweswo Hitler ni ntlawa wakwe wa Vunazi va herisiwile, naswona namuntlha ntlawa lowuya wa Timbhoni wu andzile minkarhi yo tala wu va ehenhla ka 119 000. Ku tlula kwalaho, madzana ya xiviri ya timhaka ta vutomi ta Timbhoni ta Yehova leti humesiweke eka magazini wa Xihondzo xo Rindza ni munghana wa xona wa Awake! ti veka vumbhoni lebyinene emhakeni ya leswaku Yehova hakunene i Xikwembu lexi hi nga xi tshembaka.

Mhaka Leyi Ha Yona Van’wana Va Nga N’wi Tshembiki Yehova

7. Ha yini munhu un’wana a vule leswaku a a ri “Museketeri wa Yehova?”

⁷ Kambe, i vantsongo swonghasi namuntlha lava tshembaka Yehova! Hambi va ri vo tala lava dyondzeke hi ta timfanelo ni mintirho yakwe va hluleka ku veka ku tshemba ka vona eka yena. Xihloko lexi humelelaka eka magazini wa U.S. Catholic (January 1979) xi vulavula hi munhu un’wana wo tano xi ku: “Loko mukonanisi a vutise wanuna vukhongeri lebyi a byi tsakelaka, u hlamurile a ku, ‘Ndzi ehleketa leswaku ndzi Museketeri wa Yehova.’ Loko a rhamberiwe ku nyika vuxokoxoko u hlamuserile a ku, ‘Ndzi pfumela swinene leswi Timbhoni ta Yehova ti swi pfumelaka—kambe a ndzi lavi ku katseka.’” Magazini wu hlamuserile wu ku: “Mbhoni leyi tinyiketeke ya Yehova a yi tihlawuleri kambe yi katseka hi xitalo.”

8. Hi swihi swiyimo swa xisekelo leswi endlaka leswaku munhu a lava ku katseka eku tirheleni ka Yehova?

⁸ Hikwalaho ka yini van’wana va nga lavi ku katseka? Hikuva va hava xiyimo lexinene xa mbilu. Munhu u fanele ku ‘hlawuleriwa vutomi lebyi nga heriki kahle.’ (Mintirho 13:48) Hi laha Yesu a xiyeke ha kona exifanisweni xakwe xa mubyari, lava va vekaka mihandzu va amukela rito ra ntiyiso ‘etimbilwini letinene ni leti nga kahle.’ (Luka 8:15) Ina, ntiyiso a wu tsakisi eka lava va nga hava ntshembo. Xilaveko xa xisekelo i mbilu leyinene. Ntiyiso wa Rito ra Xikwembu na wona a wu tsakisi eka lava va tinyungubyisaka. Langutelo ra ku titsongahata ra laveka. (Yakobo 4:6) Ku tlula kwalaho, ntiyiso a wu tsakisi eka lava va anerisekeke hi voxe, lava tivonaka vululami. Kambe wa tsakisa eka lava va khathalelaka xilaveko xa vona xa moya, lava nga ni ndlala ni torha ra leswo lulama, lava rilaka ni ku vaviseka hikwalaho ka swilo leswi nyenyetsaka leswi va swi vonaka swi humelela emisaveni namuntlha.—Matewu 5:3, 6; Ezekiel 9:4.

Ku Tshemba Yehova Swi Yisa Eku Tinyiketeni

9, 10. (a) Ku laveka yini loko munhu a nga si veka ntshembo eka Yehova, naswona lava va nga ni xiyimo lexinene xa mbilu va swi amukerisa ku yini? (b) Vanhu vo tano va kombisa ripfumelo eka mani?

⁹ Loko munhu a nga si tshemba Yehova, u fanele ku twa hi ta Yena. Kambe “va ta khongerisa ku yini eka loyi va nga pfumelangiki eka yena xana? Va ta pfumerisa ku yini eka loyi va nga twangiki hi ta yena? Va ta ti twisa ku yini, loko va nga ri na mudyondzisi xana?” (Varhoma 10:14) Loko malandza ya Yehova ya ri karhi ya chumayela, lava va nga ni xiyimo lexinene xa mbilu va swi amukela, hi laha vo tala va endleke ha kona eTesalonika ya khale. Malunghana na vona, Pawulo u tsarile a ku: “Hi leswaku loko hi mi tisele rito ra Xikwembu, mi ri yingisile ni ku ri amukela, ku nga ri kukota mahungu yo huma eka vanhu, kambe tanihi mahungu yo huma eka Xikwembu, hi laha kunene ma nga wona, hikuva Xikwembu xi tirha hi matimba exikarhi ka n’wina lava pfumeleke.”—1 Vatesalonika 2:13.

¹⁰ Loko va dyondza hi ta Yehova, vanhu vo tano va timbilu letinene va kombisa ripfumelo eka yena. Leswi i swa nkoka, hikuva “ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu u fanele ku pfumela leswaku xi kona, ni leswaku xi hakela lava xi lavaka.” (Vaheveru 11:6) Xin’wana xa nkoka i ku kombisa ripfumelo eka N’wana wa Xikwembu. “Kutani ku ponisiwa a ku kumeki eka munhu un’wana, ni swintsanana, hikuva a ku na vito rimbe ehansi ka matilo leri nyikiweke vanhu, leri hi fanelaka ku ponisiwa ha rona”—ina, ku hava vito rin’wana handle ka leriya ra Yesu Kriste.—Mintirho 4:12.

11. Ku tshemba Yehova swi ta vangela munhu ku landzela xitsundzuxo xihi lexi nyikeriweke hi muapostola Petro?

¹¹ Ku tshemba Rito ra Xikwembu, Yehova ni N’wana wakwe Yesu Kriste swi ta susumetela munhu ku hlayisa xitsundzuxo xa muapostola Petro eka Vayuda va siku rakwe lexi nge: “Loko swi ri tano, hundzukani, mi tlhelela eka Xikwembu, leswaku swidyoho swa n’wina swi hlanguriwa, ni leswaku minkarhi yo phyuphya leyi humaka [eka Yehova] yi sungula.” (Mintirho 3:19, 20) Hi ku kuma vutivi bya Yehova ni swilaveko Swakwe, munhu u dyondza leswaku ku rhandza ka Xikwembu hi leswaku a va mulandzeri wa Yesu Kriste. Hi laha Petro a swi phofuleke ha kona u te: “Mi vitaneriwe swona, hikuva Kriste na yena u twile ku vaviseka hikwalaho ka n’wina, a mi boxela ntila leswaku mi ta n’wi landza hi le ndzhaku.” (1 Petro 2:21) Yesu u swi veke erivaleni leswi a swi katseka loko a te: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso], kutani a ndzi landza.” (Matewu 16:24) Sweswo swi vula ku tinyiketela ka munhu eka Yehova Xikwembu leswaku a endla ku rhandza ka yena ni ku landzelela mikondzo ya Yesu Kriste.

Ku Tinyiketela A Hi Ku Tiboha Kun’wana Ntsena

12. Rito leri nge “ku tiboha” hakanyingi ri tirhisisiwa ku yini eVujaganini?

¹² EVujaganini rito leri nge “ku tiboha” ri tirhisiwa hi ku phindha-phindha malunghana ni ku va Mukriste. Xisweswo hi byeriwa leswaku Vaevhangeli va le United States “va kandziyisa ku tiboha ka munhu hi xiyexe eka Yesu.” Mufundhisi wa Rhoma Khatoliki u vulavule hi “ku tiboha ka Khatoliki ka vukhongeri.” Loko a lwela ku katseka kakwe eka politiki, muprista wa Khatoliki u tshama a ku: “Ku nghena eka tipolitiki a ku ri ku kurisiwa ka ku tiboha ka mina (ka vuprista).” Naswona tifeme ta mabindzu ti twarisa “Ku Tiboha Ka Hina Eka Vaxavi Verhu.” Manuku ke, entiyisweni, munhu a nga va ni ku tiboha ko tala swinene hi nkarhi lowu fanaka: ku tiboha ka bindzu, ku tiboha ka ntirhisano, ku tiboha ka politiki ni ku tiboha ka vukhongeri.

13. I yini leswi katsekaka eku tinyiketeleni eka Yehova?

¹³ Hambi swi ri tano, ku tinyiketa eka Yehova Xikwembu a ko va ku tiboha kun’wana ntsena. Ku tiboha i “ku pfumelelana ntsena kumbe xitshembiso xo endla xanchumu enkarhini lowu taka.” Kambe ku tinyiketa swi vula ‘ku tinyiketela ka munhu hi laha ku heleleke entirhweni kumbe evugandzerini bya Xikwembu lexi tlakukeke kumbe eka mintirho leyo hlawuleka.’ Vanhu vo tala va aneriseka hi ku endla xiboho ematshan’wini yo tinyiketa. Leswi handle ko kanakana swi endla leswaku vukhongeri bya vona byi fana ni mpfumawulo lowu nga endzhaku ntsena wa vuyimbeleri. Swa tsakisa ku byi yingisela kambe a byi kavanyetani na nchumu leswi munhu a lavaka ku swi endla hakunene.

14. Ha yini ku tiboha ntsena ku nga amukeleki eka Yehova Xikwembu?

¹⁴ Ku tinyiketa eka Xikwembu swi endla leswaku ku endla ku rhandza ka xona ku va nchumu wa ntikelo swinene evuton’wini. Swi lava leswaku munhu a xiya nawu wo sungula ni lowukulu, lowu tshahiweke hi Yesu loko a te: “Rhandza [Yehova] Xikwembu xa wena hi mbilu ya wena hinkwayo ni moya wa wena hinkwawo, ni ku anakanya ka wena hinkwako, ni matimba ya wena hinkwawo.” Yesu u kandziyise muxaka lowu heleleke wo tirhela Xikwembu loko a te: “A ku na munhu loyi a nga kotaka ku tirhela tihosi timbirhi; hikuva u ta venga yin’wana, a rhandza yin’wana, kumbe u ta namarhela yin’wana, a sandza yin’wana. Mi nge koti ku tirhela Xikwembu ni rifuwo ra misava.” (Marka 12:30; Matewu 6:24) Manuku ke, swi le rivaleni, ku tiboha ntsena a swi amukeleki eka Yehova.

Ha Yini Va Nghenisiwa eMatini?

15. Hi xihi xikombiso lexi Yesu a xi vekeke malunghana ni ku endla xikombiso xa le rivaleni xa ripfumelo eka Xikwembu?

¹⁵ Ha yini va kombisa ku tinyiketa eka Xikwembu hi ku khuvuriwa? Loko munhu a lava ku va un’wana wa Timbhoni ta Yehova, a nga na ndlela yin’wana. Sweswo i ntiyiso loko a navela ku tiviwa tanihi Mukriste, mulandzeri wa Yesu Kriste. “Mbhoni leyi Tshembekaka” ya Yehova, Yesu, yi veke xikombiso eka leswi, hikuva u khuvuriwile eNambyeni wa Yordani. Tanihi leswi Yohane a a khuvula vadyohi lava hundzukeke, a nga swi twisisanga leswaku ha yini Yesu a lave ku khuvuriwa, kambe Yesu u n’wi byerile a ku: “Ndzi pfumelele sweswi, hikuva swa fanela leswaku hi hetisisa leswo lulama hinkwaswo hi ndlela leyi.” (Nhlavutelo 1:5; Matewu 3:13-17) Xisweswo N’wana wa Xikwembu u endle xikombiso xa le rivaleni xa ripfumelo rakwe hi ku titisa eka Yehova, a veka xikombiso eka hinkwavo lava navelaka ku endla ku rhandza ka Xikwembu.

16. Hi xihi xileriso lexi Yesu a xi nyikeke valandzeri vakwe malunghana ni nkhuvulo, naswona i yini leswi kombaka leswaku vadyondzisiwa vakwe va hlayise xileriso xexo?

¹⁶ Ku tlula sweswo, hi ku hatlisa a nga si tlhelela eka Tata wakwe ematilweni, Yesu u lerise vadyondzisiwa vakwe a ku: “Yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20) Rhekhodo leyi nga ebukwini ya Mintirho yi komba leswaku vadyondzisiwa va Yesu va hlayise xileriso xexo hi ku chivirika.—Mintirho 2:40, 41; 8:12; 9:17, 18; 19:5.

17. Ha yini ku phuphutela mati ntsena ku nga ri nkhuvulo lowu tiyeke?

¹⁷ Lava a va khuvurisiwa ku yini? Hi ku va phuphutela hi mati ntsena, hi laha swi tolovelekeke ha kona etikerekeni to tala ta Vujagana ke? Nikantsongo! Yesu ‘u hume ematini’ loko a khuvuriwile. Leswi swi komba kahle leswaku a a nghenisiwe ematini. (Marka 1:9, 10) Entiyisweni, ku hava xin’wana lexi a ku ta va nkhuvulo, hikuva rito ra Xigriki leri hundzuluxeriweke va ku “ku khuvula” ri vula “ku nyupeta, ku nghenisa.”—Mintirho 8:36-39.

18. Ha yini ku nghenisiwa ematini ku ri xikombiso lexi fanelaka xa ku tinyiketa ka munhu eka Xikwembu?

¹⁸ Nkhuvulo wo tano i xikombiso lexi fanelaka swinene xa ku tinyiketa. Ku nghena ehansi ka mati swi kombisa kahle ku fa ka munhu emahanyelweni yakwe ya khale. Ku humesiwa kakwe ematini swi fanisela ku pfuxeriwa ka yena endleleni leyintshwa ya vutomi. Hi laha nkhuvo wa vukati wu pfunetaka ku tiyisa xiyimo xa vona xa ku va lava tekaneke eka muteki ni mutekiwa, kutani nkhuvulo wa mati emahlweni ka timbhoni hi ku fanana wu endla xitiyisekiso lexi nga heriki eka munhu la khuvuriwaka. Ku hava ku kanakana ha swona: Hi xiendlo xa ku va la khuvuriweke, ku tinyiketa ka munhu eka Yehova ku fanele ku vekiwa hi laha ku nga rivalekiki emianakanyweni ni le miehleketweni ya munhu tanihi xiendlakalo xa nkoka swinene evuton’wini bya munhu. Ku fungha yinhla ya ku hundzuka eku tirheleni ka munhu ku ya eku tirheleni ka Yehova Xikwembu.

19. Hi xihi xivangelo xin’wana xa ku khuvuriwa?

¹⁹ Hi nga honiseni mhaka ya leswaku nkhuvulo wa mati i xilaveko xo kuma ripfalo lerinene na Yehova. Leswi swi endliwe leswaku swi twisiseka eka 1 Petro 3:21, leyi hlayekisaka leswi: “Nkhuvulo wu yelana ni mhaka leyi; sweswi wa hi ponisa, ku nga ri hi ku susa thyaka emirini, kambe ku ri hi ku tinyiketa eka Xikwembu hi ripfalo leri tengeke. Nkhuvulo wa mi ponisa hi mhaka ya ku pfuka ka Yesu Kriste eku feni.”

Va Khuvuriwa Eka Malembe Wahi?

20. Hikwalaho ka yini tincece ti nga swi koti ku fanelekela nkhuvulo?

²⁰ Marito ya Yesu eka Matewu 28:19, 20 ya komba leswaku hi lava va endliweke vadyondzisiwa vakwe lava faneleke ku khuvuriwa. Hambi swi ri tano, swi le rivaleni leswaku ku hava ricece kumbe xihlangi lexintsongo lexi nga hlangavetanaka ni swilaveko swa Matsalwa swa nkhuvulo. Ricece a ri swi koti ku kombisa ripfumelo eRitweni ra Xikwembu, eka Xikwembu Muvumbi ni le ka N’wana wa xona Yesu Kriste. Xihlangi a xi swi koti ku twisisa leswaku moya lowo kwetsima i matimba ya Xikwembu lama tirhaka; naswona xi nga ka xi nga hundzuki eka swidyoho leswi hundzeke ivi xi endla ku hlambanya loku tiyeke ka ku endla ku rhandza ka Xikwembu.

21. Xana swa fanela eka vantshwa ku khuvuriwa?

²¹ Kambe swi vonaka onge van’wana exikarhi ka vanhu va Yehova va swi hundzeletile. Vatswari vo tala va Vukriste va endla leswaku vana va vona va rindza ku kondza loko va ri emalembeni ya vona yo hetelela ya vuntshwa va nga si sungula mhaka ya nkhuvulo. Nkarhi na nkarhi, hi twa hi ta vana lava endlaka nkhuvulo lowu tiyeke hi ku tisungulela ka vona vini. Hi xikombiso, n’wana wa nkulu la nga emahlweni ka malembe ya vuntshwa u lave ku khuvuriwa hakunene. Kutani tata wa yena u endle leswaku vakulu van’wana vanharhu va bula ni n’wana loyi hi swivutiso leswi endleriweke lava va lunghiselelaka nkhuvulo.a Makumu ya vona a ku ri leswaku, hambi leswi a nga ntsongo, wa faneleka ku khuvuriwa tanihi mutirheli la vekiweke wa Yehova Xikwembu. Kunene, eka lava va veke kona eXikolweni xa Ntirho wa Maphayona eBahamas sweswinyana a ku ri ni xinhwanyatana xa malembe ya khume hi vukhale lexi khuvuriweke, n’wana wa nhwanyana wa vatirheli vambirhi va nkarhi hinkwawo!

22. Loko vatswari va aka vumunhu bya Vukriste eka vana va vona, i yini lexi va nga xi langutelaka eka vana va vona?

²² Emhakeni leyi, swi vonaka onge vatswari van’wana va hluleka. I ku fikela kwihi laha va tirhisaka ‘switirho leswi nga tshwiki’ ku aka vumunhu bya Vukriste eka vana va vona? (1 Vakorinto 3:10-15) Xo sungula, ku endla tano swi lava leswaku vugandzeri lebyi tengeke bya Yehova byi va nchumu wa nkoka swinene evuton’wini bya vatswari. Tlhandla-kambirhi, vatswari va fanele ku hlayisa ndzayo leyinene leyi nyikeriweke eka Deuteronoma 6:6, 7 na Vaefesa 6:4. Vuyelo bya leswi ku nga ha va leswaku vatswari va ta fanela ku sivela vana va vona ku khuvuriwa va ha ri vantsongo ngopfu, ematshan’wini yo boheka ku va kucetela endzhakunyana.

23. Loko munhu a fikelele yinhla ya ku tinyiketa ni nkhuvulo, hi xihi xin’wana lexi lavekaka?

²³ Loko munhu a kombise ku tshemba Yehova hi ku tinyiketa ni nkhuvulo wa mati, u fanele ku hambeta a kombisa ku tshemba koloko. Xihloko lexi landzelaka lexi nge, “Ku Tirha Tanihi Vatirhi-kulorhi Lava Nga Ni Ntshembo Va Yehova,” xi ta hi pfuna ku tlangela leswi katsekaka.

[Nhlamuselo ya le hansi]

A Wu Ta Hlamurisa Ku Yini?

◻ Hi tihi timhaka leti kombisaka vuhunguki byo veka ku tshemba ka hina eka vanhu?

◻ Ha yini timfanelo ni mintirhisano ya Yehova swi hi nyika swivangelo leswinene swo n’wi tshemba?

◻ Hikwalaho ka yini ku tshemba Yehova swi lava ku tinyiketa naswona hayi ku tiboha ntsena?

◻ Vatswari va nga ku byarisa ku yini ku navela ka ku tinyiketa eka Yehova emalembeni ya vuhlangi eka vana va vona?

[Swifaniso leswi nga eka tluka 10]

Hi nga veka ku tshemba ka hina eka Yehova tanihi Mukutsuri Lonkulu