Yanani eMahlweni, N’wina Timbhoni!
“Lava tiyeke ni lava tiyimiseleke enkarhini lowu wa makumu,/Lava tilunghiseleleke i malandza ya Xikwembu leswaku va lwela mahungu lamanene./Hambi leswi Sathana loyi a lwisanaka na vona a tinyungubyiseke,/Hi matimba ya Xikwembu va ya emahlweni va nga chavi nchumu.”
Leyi i mintila yo sungula ya risimu ra nomboro ya 29 eka buku ya tinsimu ya Timbhoni ta Yehova leyi nge, Sing Praises to Jehovah. Ku tlangela ka wena risimu leri ku nga ha entisiwa hi ku tiva leswaku risimu leri ri qambiwile ekampeni ya nxaniso eJarimani ya Vunazi. Sweswinyana, vatirhi van’wana va 500 va ndyangu wa Bethele ya le Jarimani eSelters va yingisele bulo leri nga eka thepi ra muqambi wa risimu leri, Erich Frost, loyi a vikeke leswi landzelaka:
“‘Yanani emahlweni, n’wina Timbhoni!’—Loku a ku ri ku navela ka timbilu ta hina hambi ku ri enkarhini wolowo, hambi leswi a hi endla ntirho wo nonon’hwa ekampeni ya nxaniso. Mianakanyo ya muqambi minkarhi hinkwayo ya yimbelela hi mimpfumawulo yo hambana-hambana, kutani vuyimbeleri bya risimu a byi ri enhlokweni ya mina nkarhi wo leha. Ntlawa lowu tirhaka lowu a ndzi ri wa wona, lowu vumbiwaka hi Timbhoni ta 40, a wu macha hafu ya awara siku na siku wu ya evutengiselweni bya mati ehandle ka kampa. Mixo wun’wana endleleni, mianakanyo yi humelerile eka mina: ‘I nkarhi wo nghenisa marito eka risimu, leswaku ri ta yimbeleriwa,’ naswona hi ku hatlisa ndzimana yo sungula yi sungule ku va ni xivumbeko emianakanyweni ya mina.
“Ntirho wa mina a ku ri ku tleketla nhulu ya misava hi bara yi ya eka mpfhuka wa timitara ta 30. Ku vulavula enkarhini wa ntirho a ku siveriwa swinene. Hambi swi ri tano, hi ku hlawula nkarhi lowu faneleke, exihundleni ndzi vutise makwerhu loyi a tirhaka kusuhi loko a tsundzuka kahle. U vule leswaku ina, kutani ndzi n’wi nyike ndzimana yo sungula. Endzhaku ka awara, ndzi vutise makwerhu un’wana, endzhakunyana wa vunharhu naswona endzhaku wa vumune. Un’wana ni un’wana u komberiwe ku dyondza ndzimana yin’we hi mbilu.
“Loko ku tlheleriwe ekampeni madyambu wolawo, lava mune va phindhe tindzimana eka mina, hi ku landzelelana. Xisweswo, ndzi swi kotile ku nghenisa marito etinotsini. SS ingi yi swi xaxisile loko tinoti a ti lo wela emavokweni ya yona. Kambe se xiyimo a xi ri ni khombo ku tlula mpimo. Loko a va lo ndzi kuma ndzi ri na tinsimu leti, ingi va ndzi hayekile. A ndzi ta ri tumbetisa ku yini risimu leri?
“Makwerhu la dyuhaleke a a fanele ku hlayisa xitala [tshanga ra tihanci] ehandle ka kampa laha van’wana va SS a va hlayisa mimpfundla ya vona kona. Exitaleni lexi, u kume ndhawu yo fihla swin’wetsin’wetsi swa xiviri swa moya—minkandziyiso leyi heleleke ya Xihondzo xo Rindza ni yin’we kumbe timbirhi ta tibuku ta Sosayiti. Makwerhu loyi u veke vutomi byakwe ekhombyeni hi ku ngungumerisa swilo swo tano ekampeni, xisweswo a hi nyika mhaka yo yi dyondza. Laha u fihle risimu ra mina. Siku rin’wana u te: ‘Erich, risimu ra wena ri le ndleleni ya rona. Ndzi kume munhu loyi a ri rhumeleke eSwitzerland.’ Ndzi titwe ndzi ntshunxekile.
“Vamakwerhu va le Switzerland va ri rhumele eBrooklyn, laha ri weleke emavokweni ya Huvo leyi Fumaka ya Timbhoni ta Yehova. Marito ya mina lama nga hava vutshila ya hundzuriwe ya va tindzimana tinharhu leti hlamarisaka. A ndzi tsake ngopfu loko endzhakunyana ndzi kume risimu leri eka buku leyintshwa ya tinsimu ya Timbhoni ta Yehova.a Namuntlha, sweswi tanihi risimu ra nomboro ya 29, ra ha susumetela Timbhoni hinkwato ku yimela Yehova ni ntiyiso ti tiyile!”
[Nhlamuselo ya le hansi]
a Ri yimbeleriwe ro sungula eUnited States hi ntlawa wa swichudeni swa ntlawa wa vu-11 wa Xikolo xa Bibele xa Watchtower xa Gilead tanihi mhaka ya nongonoko wa ku thwasa ka vona, August 1, 1948.
[Bokisi leri nga eka tluka 21]
Erich Frost u hete pfhumba rakwe ra laha misaveni hi October 30, 1987, a ri na malembe ya 86 hi vukhale. U velekiwe hi December 22, 1900, u khuvuriwe hi March 4, 1923, naswona u nghenele vutirheli bya nkarhi hinkwawo hi 1928. Hi 1936 u vekiwe mulanguteri wa ntirho wa vusukumbele wa timbhoni leti xanisiwaka ta Yehova eJarimani, a khathalela xiavelo xexo khwatsi hi tin’hweti ta nhungu ku kondza loko a nghenisiwa ekampeni ya nxaniso. Endzhaku ka nyimpi, ku sukela hi 1945 ku ya eka 1955, u tirhe tanihi mulanguteri wa hofisi ya rhavi ya Sosayiti ya Watch Tower eJarimani. (Vona Xihondzo xo Rindza xa Xinghezi, April 15, 1961, matluka 244-9.) Endzhakunyana, u hambetile a tirhela Yehova hi ku tshembeka. Yehova a nga wu rivali ntirho wa Vakriste vo tano lava totiweke kumbe rirhandzu leri va ri kombisaka vito ra yena.—Vaheveru 6:10.