Ku Twarisa Ntiyiso eTintshaveni Ta Alpe Ta Austria

AUSTRIA ri dume khwatsi hikwalaho ka nhova ya rona ya tintshava, ti-Vienna Woods na Danube leyo xonga ya wasi. Leswi ni swivono swin’wana leswi dumeke swi kokela vapfhumba lava humaka emisaveni hinkwayo exitikwanini lexi exikarhi ka Yuropa.

Enhlohlorhini ya nguva ya vapfhumba August leyi hundzeke, ntlawa wun’wana wa kwalomu ka vapfhumba va dzana lava humaka ematikweni mambe ya 17 wu tile wu ta vona nchumu lowu hambaneke hi laha ku heleleke. Va tile eVienna ku ta va kona eku nyikeriweni ka hofisi leyintshwa ya rhavi ra Austria ra Sosayiti ya Watch Tower, leyi kongomisaka ntirho wo chumayela hi Mfumo wa Timbhoni ta Yehova eAustria.

Ku Sukela eMasungulweni Lamantsongo

Hofisi yo sungula ya rhavi ra Sosayiti eAustria yi simekiwile eVienna hi 1923. Sweswo a ku ri malembe lama nga ehansi ka khume endzhaku ka pfhumba ro sungula ra vaendli va mune va swikhokhelo swa Xihondzo xo Rindza emutini wolowo. Hi nkarhi wolowo, nhlayo ya vahuweleri va Mfumo a yi kule yi va kwalomu ka dzana. Manuku ku humelele Nyimpi ya Vumbirhi ya Misava ni Mfumo wa Vunazi, ku nga nkarhi wa miringo ni ku nonon’hwa loku vavaka eka vamakwerhu lava tshembekaka. Kambe va tiyiserile, naswona eku heleni ka nyimpi swivandla swa vona a swi kulele eka lava tlulaka 700.

Leswaku ku hlayisiwa ntirho lowu andzaka, muako lowu nga eGallgasse 44 wu xaviwile hi 1957. Hi malembe yo tala, ku hundzuka ko hambana-hambana ku endliwile emuakweni leswaku ku pfumelela ku kula loku hatlisaka ka ntirho wa Mfumo etikweni. Hi 1973 nhlayo ya vahuweleri va Mfumo yi hundze mfungho wa 10 000. Xisweswo, eku sunguleni ka va-1980, tipulani to aka ti andlariwile. Swihinga leswi nga enawini eku heteleleni swi susiwile, naswona ku hlanganisiwa ka miako erhavini ku pfumeleriwile. Hi March 1983 feme ya le handle yi sungule ntirho wa masungulo. Endzhaku ka sweswo, vamakwerhu va nghenelerile ivi va hetisa ku aka.

“Ku Aka Bethele Ya Hina”

Timbhoni leti humaka eswiyengeni hinkwaswo swa Austria ti tinyiketele ku tirha. Xitsundzuxo a ku ri leswaku “hi aka Bethele ya hina.” Va te hi mimovha ni tibazi, ku fika eka 190 hi ku hela kun’we ka vhiki. Ku ringanyetiwe leswaku un’we eka vahuweleri van’wana ni van’wana va ntlhanu etikweni u hlanganyerile entirhweni. Van’wana a va ri vatshila—vativi va vumaki, vaplambara ni van’wana. Van’wana va nyikele swo aka kumbe va nyikela ku tirhisiwa ka tindlu ta vona ta mintirho. Van’wana va tshike ni mintirho ya vona ivi va ta tirha hi nkarhi hinkwawo wa ku aka.

Makwerhu un’wana loyi a heteke xiyenge xa nkarhi wakwe wa ku wisa exivandleni xa muako u tsarile a ku: “Ndzi rhandza ku mi nkhensa nakambe hikwalaho ka vhiki leri hlamarisaka ra nkarhi wo wisa. A swi fana ni ku va exihlaleni xo rhula lexi rhendzeriweke hi lwandle leri kariheke ra vanhu. A swi hlamarisa ku tiphina hi ku phyuphya ko tano ka nyama ni ka moya mahala.” Hambi swi ri swihlangi swi hlanganyerile. Loyi a nga ni malembe ya nhungu hi vukhale u tsarile a ku: “Ndzi swi twile leswaku mi lava mali yo aka Bethele. Ndzi tsakela ku mi rhumela yin’wana ya mali leyi ndzi yi hlayiseke. Ndzi nghenisa 200 wa mali ya macheleni [kwalomu ka R32] ni papila leri.” Van’wana va bake swinkwa kumbe va rhwalela mihandzu ivi va endlela vapfuneti swo nwa (juices). Vahuweleri eka mabandlha ya 36 eVienna va nyikele hi swo timula torha hi Mugqivela wun’wana ni wun’wana enkarhini wa ku aka hinkwawo.

Ku Tihlomisela Ku Andza Kun’wana

Hikwalaho ka ku pfuxetiwa ka muako wo sungula ni ku engeteriwa ka miako leyintshwa leyi wu rhendzeleke, muako wa rhavi sweswi i wukulu ku tlula eku sunguleni kanharhu, ni xivandla lexi heleleke xa filoro xa 5 400 wa swikwere mitara. Muako wu katsa tikamara ta 38, holo yo dyela ya vanhu va 80, khixi lerintshwa ni vuhlantswelo. Holo leyintshwa ya Mfumo yi le ndzhaku ka muako lowo sungula hi ku kongoma. Tihofisi ta vulawuri ni tindzawulo tin’wana to hambana-hambana ti tirhisa miako leyi saleke.

August 22, 1987, a ku ri siku ro nyiketela ra miako leyintshwa ya rhavi. Exikarhi ka vapfhumba va 282 a ku ri ni vapfhumba va dzana lava humaka eka marhavi ya 16 ya le Yuropa ni un’we la humaka eKorea. Lava nakambe a va ri kona a ku ri kwalomu ka dzana ra vanhu va khale va Austria lava poneke miringo ya Nyimpi ya Vumbirhi ya Misava. Lonkulu swinene exikarhi ka vona a ku ri Maria Hack wa malembe ya 102 hi vukhale la humaka eGraz. Vayingiseri va 6 810 eswivandleni swin’wana swa nkombo na vona va yingisele nongonoko wo nyikela hi ku hlanganisiwa hi riqingho.

Swivulavuri-nkulu enongonokweni wo nyikela swi katse T. Jaracz na M. G. Henschel wa Huvo leyi Fumaka ya Timbhoni ta Yehova eBrooklyn, New York. Loko a vulavula hi nhloko-mhaka leyi nge “Marhavi Lama Tswalaka Mihandzu Eku Dzunisiweni Ka Yehova,” Makwerhu Jaracz u tirhise Yohane 15:2, 8 ku komba leswaku ‘marhavi’ ma tirha ku kwetsimisa Yehova loko ma tswala mihandzu yo tala. Miako leyintshwa ya rhavi yi ta nyikela swo tala ehenhleni ka ku tswala mihandzu eku dzunisiweni ka Yehova.

Eka nkulumo yo nyikela, Makwerhu Henschel u kandziyise leswaku Yehova i Xikwembu xa xikongomelo. A nga endlanga leswaku swikongomelo swakwe swi tiveka ka ha ri nkarhi ntsena kambe u tlhele a kombisa leswaku u na vuswikoti byo swi hetisisa. Ku nga khathariseki nkaneto wa Sathana, hi nga tiyiseka leswaku xikongomelo xa Xikwembu xi ta hetiseka.

Loko nongonoko wu ya eku heleni, hinkwavo lava nga kona va titwe va khutazekile leswaku va ya emahlweni ni ntirho wo chumayela hi ku hiseka loku pfuxetiweke. Kahle-kahle, miako leyinene leyintshwa yi ta hlomisa Timbhoni ta le Austria ku twarisa mahungu lamanene ya Mfumo hi mpimo lowukulu swinene etikweni leri ra tintshava, eku kwetsimisiweni ni ku dzunisiwa ka Yehova, Muvumbi Lonkulu.

[Swifaniso leswi nga eka tluka 23]

Muako lowuntshwa, wu langutiwa ku suka entangeni

Holo Ya Mfumo

Nyangwa-nkulu

Muako lowuntshwa, ni muako lowu pfuxetiweke exineneni