‘Va Tinyiketele Eka Yehova Xikwembu Lexikulu Hi Laha Ku Nga Heriki’

HI APRIL 1935, mutirheli ni xivulavuri lexi tivekaka ngopfu xa le Amerika u endzele eHawaii. Leswi a swi ri ni ku tsakisa loku hlawulekeke eka Timbhoni ta Yehova, lava hi nkarhi wolowo a va ri 12 ntsena, hi mhaka ya leswi muendzi loyi a dumeke a ku ri Joseph F. Rutherford, muungameri wa vumbirhi wa Watch Tower Bible and Tract Society. Nkulumo leyi nge “I Mani Loyi A Nga Ta Fuma Misava Xana?” yi hlamusele vuhosi lebyi taka bya misava bya Mfumo wa Xikwembu. Yi nyikeriwe eholweni ya xikolo xa le henhla xa kwalaho naswona yi yingiseriwe hi vanhu vo tala.

Vito ra Xikwembu ni Mfumo wa xona a ku ri nhloko-mhaka ya ntirho wo chumayela wa Timbhoni ta Yehova ku sukela eku sunguleni ka tona ka manguva lawa. Kutani swa tsakisa eka hinkwavo lava tlangelaka ni ku tirhisa vito ra xiviri ra Xikwembu xa matimba hinkwawo, Yehova, leri hi Xihawaii va nge Iehova, leri a ri tolovele ku tirhisiwa hi vagandzeri vo sungula va le Hawaii. Yin’wana ya tikereke to sungula leti akiweke hi vafundhisi va Vujagana eHawaii, kereke ya maribye eKawaiahao eHonolulu, yi akeriwe phuphu ra yona hi 1839. Leswi tsariweke eka ribye leri ra ku nyikela i marito lama nge: “Eka Iehova Xikwembu xa hina hi masiku ni masiku.”

Ku sukela hi 1935, loko Muavanyisi Rutherford a endzile, ntirho wa Timbhoni ta Yehova eHawaii wu kule wu suka eka 12 wa Timbhoni leti chivirikaka ntsena ku fika eka leti tlulaka 5 400 namuntlha. Entiyisweni va ‘tinyiketele eka Yehova Xikwembu lexikulu hi laha ku nga heriki.’