A Va Khorwisekile Hi Rirhandzu Ra Yehova

MAGANDLATI lamo leha a ya himetela xikepe lexi kumiweke hi bubutsa lerikulu elwandle. Nyimpi ya masiku ya 14 ni mati lama karihaka swi endle leswaku vakhandziyi ni vatirhi va le xikepeni va sala va ri hava ntshembo, handle ka un’we. A a tshemba leswaku Yehova a a ta n’wi sirhelela, hi laha marito yo chavelela lama nge, “Pawulo, u nga tshuki u chava” ya fikeke emianakanyweni ya yena ha kona. Eka tiawara to tika leti landzeleke, xikepe xi fike eribuweni, xi endla leswaku hinkwavo va fika va hlayisekile. Nakambe muapostola Pawulo a a ri na xivangelo xo khorwiseka hi rirhandzu ra Yehova.—Mintirho 27:20-44.

Xana u khorwiseka hi laha ku fanaka hi rirhandzu ra Xikwembu? Dyondzo ya nkarhi na nkarhi ya Rito ra Xikwembu ni ku tirhisa leswi u swi dyondzaka ku tiyisa van’wana i swa nkoka. Kambe, ku va la khorwisekaka hakunene hi rirhandzu ra Yehova, u fanele u hanya hi marito ya Yehova hi ku tokota leswi a ku endlelaka swona. Un’wana la khorwisekeke kahle hi leswi i mulanguteri wa xifundza loyi a tirhaka etintshaveni leto leha ta Bolivia loyi, ku fana ni van’wana, a tokoteke nkhathalelo wa Yehova.

Wa hlamusela: “Loko ndzi tirha ehandle ka Oruro, a ndzi lava ku endzela bandlha ra le Kami, doroba ra mayini ra mpfhuka wa 100 wa tikhilomitara. Gondzo ra swintshabyana, leri rhendzelekaka ra ku fika eka 4 600 wa timitara hi ku ya ehenhla naswona ra rheta, ngopfu-ngopfu loko mpfula yi na. Hakanyingi mahiselo ya ehlela eka −10° C. kumbe ehansi.

“Makwerhu un’wana wa xinuna, Aníbal, a a ta ndzi fambisa hi xithuthuthu xa yena, naswona hi suke hi 6:00 nimixo, hi tilunghisele riendzo ra ntlhanu wa tiawara. Ku sukela eku sunguleni mpfula a yi na, ndzhope a wu pangelana exikarhi ka vhilwa ni xifunengeta vhilwa (fender), swi endle leswaku hi yima. A ku ri endzhaku ka loko hi tirhe hi matimba ntsena hi suselela ndzhope laha a hi ta kota ku ya emahlweni. Hi ku khandziya ehenhla ka xiseketelo endzhaku ka Aníbal, ndzi ringete ku sirheleta tintangu ni maburuku ya mina kambe ndzi tshikile loko swi tsakame hi laha ku heleleke.

Vumbhoni Bya Rirhandzu Ra Yehova

“Tiawara ta tsevu ti hundzile loko njhini yi onhakile exigangeni, naswona hi sungula ku vumbulukela endzhaku. Loko hi tlurile, hi ringete hi tindlela hinkwato ku khoma muchini lowo tika endzhopeni wo rheta. Hambi swi ri tano, leswi a swi pfunanga nchumu, naswona timbilu ta hina ti tsanile loko hi vona xithuthuthu xi wele eka riwa ro ringana 90 wa timitara hi ku enta! Hi langute ehansi hi ku vilela. Lexi hlamarisaka, muchini wu yimile wu nga si fika ehansi. Hambi swi ri tano, a hi nga ta swi kota ku wu humesa ku ri hava mpfuno.

“Tiawara ti hundzile, kambe a hi ri na ntshembo wuntsongo leswaku un’wana a nga ta hi gondzo rero ro onhaka. Kutani wanuna la nga ni mbhongolo ni ti-llama u humelerile. Loko a vona ku karhateka ka hina, hi Xiquechua u te: ‘Ina, ndzi na tingoti.’ U bohe tingoti ta dzovo embhongolweni ni le xithuthuthwini. Kutani, hi tlakule hi ri ehansi loko yena a ri karhi a nyika mbhongolo matimba ya ku koka. Eku heteleleni, endzhaku ka loko mbhongolo yi kokile, hi tlhelele egondzweni, mimombo ya hina a yi tsakama hi nyuku. Xana a hi ta n’wi nkhensa hi yini? Hi n’wi nyike buku ya Timhaka Ta Bibele, naswona u yi tsakerile swinene buku lerova a lava ni ku hi tlherisela hi mazambhala lama nge nhundzwini ya yena!

“Njhini yi dumile, naswona hi nkhense Yehova swinene. Mpfhukanyana, hi anakanye ku yima, tanihi leswi njhini yi sunguleke ku tsana. Hi fike eka xivhengelana xa kofi. N’wini wa vhengele u vutisile a ku: ‘Xana mi kongome kwihi?’ Hi n’wi byerile kutani hi n’wi hlamusela xirhalanganya xa hina. U te: ‘Ndzi ni pulaga ni switirho swin’wana leswi ndzi nga ta mi lomba swona,’ a hi nga titshembi tindleve ta hina—leyi a yi ri ndhawu leyi vanghana, valuveri lava heleleke va tshikiwa va ri voxe, hakanyingi va nga tshembiwiki. Njhini yi dume kahle hi pulaga leyintshwa.

“Se a ku lo dzwii, naswona ndzi sungule ku vilela, loko milenge ya mina yi rhurhumela hi xirhami. Kutani, loko hi ri karhi hi khandziya xiganga, njhini yi onhakile nakambe. Ku pompa xitatara (starter) ni ku susumeta xithuthuthu ku ringana tikhilomitara tinharhu swi tikombe swi nga ri na ndzima. Loko hi karhele swinene, hi tshame etlhelo ka gondzo. Milenge ya mina a yi nga ha rhurhumeli! Kambe a hi hele matimba naswona hi nga tivi leswaku hi nga endla yini. Hi wisilenyana kutani hi tlhela hi ringeta ku dumisa njhini. Xana a yi ta tirha?

“Lexi hi hlamariseke njhini yi dumile. Hambi swi ri tano, mpfula yi sungule ku na, naswona eka mpfhuka lowu landzaka yi onhakile nakambe. Hi tlhele hi tshama etlhelo ka gondzo, enkarhini lowu a ku ri empfuleni leyi halakaka. Hi wisile nakambe. Hi ku kanakana nakambe hi ringete njhini—naswona yi dumile! Hi ku hatlisa a hi tsemakanya yinhla yo leha swinene ya riendzo ra hina. Ndzi titwe ndzi ntshunxekile, ndzi anakanya leswaku hambi loko njhini yo onhaka, hi nga ehlela eKami. Kambe hi nkarhi wolowo loko hi ehla xikhomi xa biriki xi tshovekele evokweni ra Aníbal! Hi ku hatlisa ndzi tlurile loko ndzi khomelele laha ku vekiwaka nhundzu endzhaku, ndzi cela hi milenge ehansi naswona ndzi kokiwa exiehlweni. Hi ndlela leyi ndzi endle leswaku hi kota ku yima. Leswi swi humelele eka mimpfhuka yin’wana mimbirhi.

Eku Heteleleni—Hi Fike eKami

“A ku ri 3:00 nimixo loko eku heteleleni hi fika eKami. Hi fambe 21 wa tiawara. Ku kuma vamakwerhu a ku ta va xiphiqo, tanihi leswi a ku ri riendzo ra mina ro sungula. Hi gongondze eminyangweni kambe a hi byeriwa ku: ‘Fambani! Hi etlele!’ Endzhaku ka loko hi gongondze eminyangweni yo tala, ndzi vone leswaku xo antswa i ku wisa ehansi ka lwangu leri voyameke hi lava vamakwerhu nimixo. Loko ndzi badama ehansi, ndzi biwe hi vurhongo. Loko ndzi pfukile, ndzi tikume ndzi rhendzeriwe hi vanhu. Ndzi yima, naswona wanuna la ambaleke jazi u tile eka mina a ndzi angarha a tiyisa. Ina, a va ri vamakwerhu! Aníbal a a va kumile. Ndzi tsandzeke ku vulavula tanihi laha mintlhaveko ya mina a yi ri ha kona eka mina.

“Handle ko dya nkarhi, va rhwale mindzhwalo ya hina, ku katsa ni xithuthuthu lexi a xi tele hi ndzhope, lexi makwerhu un’wana a xi vekeke ekaya ra yena. Vaamukeri va mina a ku ri mpatswa wo titsongahata, nsati a ambale epollera, xiketi xa switlhekutana swo tala. Va te: ‘Teka mubedo wa hina.’ A ndzi swi lavanga leswaku va etlela ehansi, ngopfu-ngopfu leswi nsati wa kona a a tikile. Kambe va ndzi sindzisile.

“Xin’wana lexi a ndzi xi tiva hi leswaku, a ku ri 8:00 nimixo. Un’wana a a gongondza enyangweni. Ndzi byeriwe ku: ‘Vamakwerhu va lunghekele ntirho.’ Loko ndzi vona swikandza swa vona swo n’wayitela swi pupuma hi ku tlangela, a ndzi nga ri na ndlela yin’wana loko ku nga ri ku koka miri wa mina lowo pandza ndzi huma emubedweni ivi ndzi sungula rendzo. Naswona mawaku riendzo ro tsakisa swonghasi! Loko ndzi ri karhi ndzi famba ni vamakwerhu evutirhelini bya vona, va khapile hi ntsako na hi ku chivirika. Ndzi anakanyisise hi ndlela leyi maendzo lawa ya nga ya nkoka ha yona, ku nga khathariseki hinkwaswo leswi hi hundzeke eka swona—tanihi ‘swinambyana swa mati etikweni leri omeke.’—Esaya 32:2.

“Siku leri landzeleke hi endzele ndhawu leyi a ku ri na mufundhisi loyi a xungeteke ku hangalasa nhlangano wa hina loko ndzi fikile. Endzhaku ka nkulumo, wanuna loyi wo kariha u ndzi angarhe hi Xiboliviaa ivi a ku: ‘Makwerhu, u ni ntiyiso!’ Endzhakunyana, ndzi vutisile leswaku a a ri mani. Va te: ‘I mufundhisi.’

“Riendzo ra le Kami ri hele hi ku hatlisa, naswona a hi famba. Vamakwerhu a va xi lunghisile xithuthuthu naswona a va hlantswe swiambalo swa hina hinkwaswo leswi a swi ri ni ndzhope. Loko hi va byela hi wanuna loyi a nga hi lomba switirho, va hlamarile, tanihi leswi a tiviwaka a ri loyi a nga pfuniki munhu nikantsongo. Endzhaku ka ku angarhana ni ku qhavulana ko tala, hi sukile naswona hi ku hatlisa a hi fike eka n’wini wa vhengele ra kofi la nga ni musa ku ya n’wi vona. Endzhaku ka ku tlherisa hinkwaswo, hi n’wi vutisile leswaku: ‘Hi kolota mali muni?’ A hlamula a ku: ‘A mi koloti nchumu.’ ‘Ndzi tsakele ku pfuna!’

“Hi fike eOruro, endzhakunyana ka ntlhanu wa tiawara, hi anakanye leswaku a swi ri swa nkoka swonghasi leswi hi nga tlhelelangiki endzhaku na ndlela leyi Yehova a hi hlayiseke ha yona hi laha ku hlamarisaka. Aníbal u susumetiwe ngopfu hi ntokoto lowu lerova a ku: ‘A ndzi ta nyikela hi xin’wana ni xin’wana leswaku xi tlhelela endzhaku!’ U endle sweswo, a rhwala valanguteri van’wana lava famba-fambaka va ya eKami ni le ka tindhawu tin’wana hi xithuthuthu xa yena. Ina, hi ve ni xivangelo xo tiya xo khorwiseka swinene hi rirhandzu ra Yehova.”—Hi ku vula ka mulanguteri wa xifundza Ricardo Hernández.

[Nhlamuselo ya le hansi]

[Swifaniso leswi nga eka tluka 23]

Gondzo ra le ntshaveni leri rhendzelekaka leri yaka edorobeni ra mayini wa Kami

Gondzo leri tsemakanyaka tintshava ri ya eKami

Timbhongolo ti nga tirha swinene loko ku ri ni swa xihatla!